ཁྲིམས་ཞིབ་པའི་འོས་ཆོས་སྐོར་གྱི་བསྐྱར་བཅོས་ཁྲིམས་འཆར་དེ་ཟགས་སོང་།

སྤྱི་འཐུས་ཁག་ཅིག་གིས་གྲོས་ཆོད་ཡིག་ཆ་ཨང་ ༣༩ བ་དང་འབྲེལ་ཁྲིམས་ཞིབ་པ་ཆེ་བའི་འོས་ཆོས་དང་འབྲེལ་བའི་བསྐྱར་བཅོས་ཁྲིམས་འཆར་དེར་དགག་པ་བརྒྱབ་པ་དང་གཏན་འབེབས་བྱེད་ཐུབ་མེད་པ་རེད།

དེ་རིང་སྐབས་བཅུ་དྲུག་པའི་བཀའ་ཤག་གིས་གྲོས་ཚོགས་ར་བའི་ནང་། ཉེ་ལམ་གྲོས་ཚོགས་ཚོགས་དུས་གོང་མའི་སྟེང་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བའི་འོས་མི་འདེམས་སྒྲུག་ཚོགས་ཆུང་ལ་ཁྲིམས་ཞིབ་པ་ཆེ་བའི་འོས་མི་ཐོབ་མེད་པའི་གནས་སྟངས་དང་། ད་ཡོད་བཅའ་ཁྲིམས་དོན་ཚན་གཞིར་བཟུང་ཁྲིམས་ཞིབ་པ་ཆེ་བ་སྐོ་ཐུབ་ཀྱི་མེད་པར་བརྟེན། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པའི་འོས་ཆོས་དང་འབྲེལ་བའི་བསྐྱར་བཅོས་ཁྲིམས་འཆར་ཞིག་བཏོན་པར་སྤྱི་འཐུས་རྩ་འབོར་གྱི་གསུམ་ཆ་གཉིས་ཀྱི་རྒྱབ་སྐྱོར་མ་ཐོབ་པར་བརྟེན། ཁྲིམས་འཆར་དེ་གཏན་འབེབས་བྱེད་ཐུབ་མ་སོང་།

དེ་ཡང་བཙན་བྱོལ་བོད་མིའི་བཅའ་ཁྲིམས་དོན་ཚན་ ༦༣ པ་ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཞེས་པའི་ནང་གསེས་དོན་ཚན་ ༢ པའི་ག་པར། ཆེས་མཐོའི་ཁྲིམས་ཞིབ་ཁང་གི་ཁྲིམས་ཞིབ་པ་ཆེ་བ་དང་ཁྲིམས་ཞིབ་པ་གཞན་གཉིས་བཅས་ནི། “ཁྲིམས་ཁང་ཞིག་ནང་ལོ་ལྔའི་རིང་མུ་མཐུད་ཁྲིམས་དཔོན་གྱི་ལས་འཁུར་བྱས་མྱོང་བའམ། ཡང་ན་ཉུང་མཐར་ལོ་བཅུའི་རིང་ཁྲིམས་རྩོད་མཁས་པའི་གྲས་སུ་ཚུད་པ་བཅས་ལ་མ་གཏོགས་འོས་བབ་ཡོད་པ་མ་ཡིན། འོན་ཀྱང་བཅའ་ཁྲིམས་འདི་ཉིད་ལག་ལེན་འགོ་འཛུགས་བྱས་པ་ནས་བཟུང་ལོ་སུམ་ཅུའི་རིང་ཁྲིམས་ཞིབ་པ་ཆེ་བ་དང༌། ཁྲིམས་ཞིབ་པ་གཞན་གཉིས་བཅས་བསྐོ་གཞག་དགོས་རིགས་ནང་གསེས་འདིའི་ཆ་རྐྱེན་ཁག་ལ་བསྟུན་གནང་མི་དགོས།” ཞེས་པར་བསྐྱར་བཅོས་ཁྲིམས་འཆར། ཁྲིམས་ཁང་ཞིག་ནང་ལོ་ལྔའི་རིང་མུ་མཐུད་ཁྲིམས་དཔོན་གྱི་ལས་འཁུར་བྱས་མྱོང་བའམ། ཡང་ན་ཉུང་མཐར་ལོ་བཅུའི་རིང་ཁྲིམས་རྩོད་མཁས་པའི་གྲས་སུ་ཚུད་པ་བཅས་ལ་མ་གཏོགས་འོས་བབ་ཡོད་པ་མ་ཡིན། འོན་ཀྱང་བཅའ་ཁྲིམས་འདི་ཉིད་ལག་ལེན་འགོ་འཛུགས་བྱས་པ་ནས་བཟུང་ལོ་གསུམ་རིང་ཁྲིམས་ཞིབ་པ་ཆེ་བ་དང༌། ཁྲིམས་ཞིབ་པ་གཞན་གཉིས་བཅས་བསྐོ་གཞག་དགོས་རིགས་ནང་གསེས་འདིའི་ཆ་རྐྱེན་ཁག་ལ་བསྟུན་གནང་མི་དགོས། ཞེས་འཁོད་ཡོད་ཅིང་། བགྲོ་གླེང་སྐབས་སྤྱི་འཐུས་རེ་འགས་ལོ་ལྔ་མིན་པར་ལོ་གསུམ་ཕར་འགྱངས་བྱེད་དགོས་དོན་གང་ཡིན་སྐོར་དོགས་འདྲི་བྱས་སོང་།

དེར་ཁྲིམས་འཆར་འདོན་མཁན་སྲིད་སྐྱོང་སྤེན་པ་ཚེ་རིང་མཆོག་ནས། ཁྲིམས་བཟོའི་ལས་དོན་དེ་བོད་མི་མང་སྤྱི་འཐུས་ལྷན་ཚོགས་ལ་ཡོད་སྟབས། ད་ལྟ་(བསྐྱར་བཅོས་ཁྲིམས་འཆར་)འདིའི་ནང་ལོ་ ༣ བྲིས་ཡོད་ནའང་། ལོ་གཅིག་ཟིན་གྲབས་ཡོད་པ་རེད། བཅའ་ཁྲིམས་འདི་ཉིད་གཏན་འབེབས་བྱས་པའི་ལོ་ ༡༩༩༡ ནས་བརྩིས་ན། ན་ནིང་ཕྱི་ཟླ་ ༦ ཚེས་ ༢༨ ཉིན་ལོ་ ༣༠ ཚར་བ་རེད། ད་ལྟ་ལོ་ ༣ འགྱངས་པ་ཡིན་ན་ཕྱི་ལོ་ ༢༠༢༤ ཟླ་ ༦ ཚེས་ ༢༨ བར་རེད། དེར་བརྟེན་ད་ལྟ་ལོ་གཉིས་མ་གཏོགས་ལྷག་མེད་པ་རེད། ལོ་གསུམ་འཇོག་དགོས་པའི་རྒྱུ་མཚན་གང་རེད་ཟེར་ན། ང་ཚོར་གནས་ཚུལ་དང་བཀའ་མོལ་མང་པོ་ཞིག་བྱུང་བར་བརྟེན། འདས་པའི་དཀའ་ངལ་སེལ་ཐབས་ཀྱི་ཆེད་དུ། བོད་མི་མང་སྤྱི་འཐུས་ལྷན་ཚོགས་ཀྱིས་བཅའ་ཁྲིམས་བསྐྱར་བཅོས་ཆེད་སྤྱི་ཡོངས་ནས་ཚོགས་ཆུང་ཞིག་འཛུགས་དགོས་ཀྱི་ཡོད་པ་རེད། བཀའ་ཤག་གི་གཏམ་བཤད་ནང་དུའང་དེ་ཁྲིམས་བཟོ་ལྷན་ཚོགས་ཀྱི་འགན་ཡིན་པར་བརྟེན་གསལ་པོ་བྱས་ནས་བཀོད་ཡོད། བཅའ་ཁྲིམས་བསྐྱར་བཅོས་བྱེད་པའི་སྐབས་ལ་དེའི་(ཁྲིམས་ཞིབ་པ་)ཆ་རྐྱེན་ལ་ཞིབ་ཚགས་པོ་གཟིགས་རྒྱུ་དང་། ད་ལྟའི་ཆ་རྐྱེན་ཡོད་པ་དེ་ཚོ་ལ་འགྱུར་བ་ག་རེ་གཏོང་དགོས་མིན་གཟིགས་རྒྱུའི་ཆེད་དུ། དུས་ཡུན་ཐུང་ཐུང་ཞིག་བསྣམས་པ་རེད། ཅེས་གསལ་བཤད་གནང་སོང་།

བོད་མི་མང་སྤྱི་འཐུས་ཁག་ཅིག་གིས་གྲོས་ཆོད་ཡིག་ཆ་ཨང་ ༣༩ བ་དང་འབྲེལ་ཁྲིམས་ཞིབ་པ་ཆེ་བའི་འོས་ཆོས་དང་འབྲེལ་བའི་བསྐྱར་བཅོས་ཁྲིམས་འཆར་དེར་དགག་པ་བརྒྱབ་པ་མ་ཟད། གྲོས་ཚོགས་ར་བའི་ནང་ཡིག་ཆ་ཨང་ ༣༩ ཐོག་གླེང་སློང་ཤུགས་ཆེར་བྱུང་སྟེ་བགྲོ་གླེང་མི་དགོས་པར་ཐད་ཀར་འོས་བསྡུའི་ཐོག་འགྲོ་རྒྱུའི་མང་མོས་ཐག་གཅོད་བྱུང་བ་ལྟར། བསྐྱར་བཅོས་ཁྲིམས་འཆར་ལ་རྒྱབ་སྐྱོར་བྱེད་མཁན་སྤྱི་འཐུས་ ༢༡ མ་གཏོགས་བྱུང་མེད་པར་བརྟེན། བཅའ་ཁྲིམས་དགོངས་དོན་བཞིན་ཁྲིམས་འཆར་བསྐྱར་བཅོས་ཆེད་སྤྱི་འཐུས་རྩ་འབོར་གྱི་གསུམ་ཆ་གཉིས་མ་ཐོབ་པའི་རྐྱེན་གྱིས་ཁྲིམས་འཆར་དེ་ཟགས་ཡོད་པ་རེད།

གསར་འགོད་པ། པ་སངས་ཚེ་རིང་།