ན་ནིང་ལོ་མཇུག་རྒྱ་ནག་ས་གནས་སྲིད་གཞུང་གིས་ཁམས་ཏྲེ་ཧོར་བྲག་མགོ་དགོན་གྱི་སློབ་གྲྭ་གཏོར་རྗེས། རྒྱ་ཡིག་རྒྱ་སྐད་མི་ཤེས་མཁན་དགེ་འདུན་པ་མང་པོ་ཞིག་རྒྱ་ནག་གཞུང་གཉེར་སློབ་གྲྭར་འཛུལ་ཞུགས་མ་ཐུབ་པར་སློབ་གཉེར་གྱི་གོ་སྐབས་རྩ་བ་ནས་མེད་པར་བཟོས་འདུག
བཙན་བྱོལ་གྱི་དགེ་འདུན་པ་ཞིག་གིས་བོད་ཀྱི་དུས་བབ་གསར་ཁང་ལ་བརྗོད་དོན། “ཉེ་ལམ་ཆོ་འཕྲུལ་སྨོན་ལམ་སྐབས་སུ། ཁམས་བྲག་མགོ་དགོན་གྲོང་གཉིས་ནང་རྒྱ་ནད་(Omicron)འགོས་ཁྱབ་སྔོན་འགོག་ལ་ཁ་གཡར་ནས་མི་མང་འདུ་འཛོམ་མི་ཆོག་པའི་མིང་ཐོག་ནས། ཆོ་འཕྲུལ་སྨོན་ལམ་ཆེན་མོ་ཡང་ཚོགས་བཅུག་མེད་པ་དང་། ཐ་ན་དགོན་གྲོང་གི་དགེ་སློབ་ཕན་ཚུན་འདུ་འཛོམ་དང་སློབ་ཁྲིད་བྱས་མི་ཆོག་པ་བཟོས་འདུག ན་ནིང་ལོ་མཇུག་བྲག་མགོ་དགོན་པའི་སློབ་གྲྭ་གཏོར་རྗེས། དགེ་འདུན་པ་མང་ཞིག་དགོན་པར་འདུག་ས་མེད་པར་ཕྱིར་ཁྱིམ་ལ་ལོག་དགོས་བྱུང་བ་དང་། དེའི་རྗེས་སུ་ཁ་ཤས་ཤིག་རྒྱ་ནག་གཞུང་གཉེར་སློབ་གྲྭར་ཞུགས་ཡོད་ནའང་། རྒྱ་ཡིག་རྒྱ་སྐད་མི་ཤེས་མཁན་མང་པོ་ཞིག་སྲིད་གཞུང་གི་སློབ་གྲྭར་མ་ཚུད་པར་སློབ་གཉེར་གྱི་གོ་སྐབས་རྩ་བ་ནས་མེད་པར་མུ་མཐུད་ཁྱིམ་དུ་འདུག་དགོས་བྱུང་བ་དང་། ཕ་མ་དང་ནང་མི་ཚོས་དགེ་འདུན་པ་དེ་ཚོར་མ་འོངས་མདུན་ལམ་ཅི་གང་མེད་པའི་གནས་སྟངས་ལ་སེམས་འཁྲུལ་བྱེད་ཀྱི་འདུག” ཅེས་དང་། “ཉེ་ལམ་བྲག་མགོ་དགོན་གྲོང་གཉིས་ནས་ཡུལ་མི་མང་པོ་ཞིག་༼མིང་དང་གྲངས་ཀ་ཏག་ཏག་ཅིག་ཤེས་མ་སོང་།༽འཛིན་བཟུང་བཙན་ཁྲིད་བྱས་པའི་གྲས་ནས། ཡུལ་མི་ཁ་ཤས་ཀྱི་གནས་སྟངས་ད་དུང་ཡང་ཤེས་རྟོགས་ཐུབ་ཀྱི་མི་འདུག དཔེར་ན། ལི་ཁོག་མ་ནས་ཡུལ་མི་མང་པོ་ཞིག་འཛིན་བཟུང་གིས་ཐང་ནག་མའི་སློབ་གསོ་ཁང་དུ་ཁྲིད་ཡོད་ནའང་། ཡུལ་མི་དེ་དག་སུ་སུ་ཡིན་མིན་དང་སློབ་གསོ་ཁང་དུ་ཅི་བྱས་མིན། གློད་གྲོལ་བཏང་མིན་ཡང་གོ་ཐོས་མི་འདུག གཞན་ཁ་ཤས་ཤིག་རིམ་པས་སློབ་གསོ་ཁང་ནས་གློད་གྲོལ་བཏང་ཡོད་ནའང་། ཧ་ལམ་བདུན་ཕྲག་རེ་རེར་ཉེན་རྟོག་པས་བསྐྱར་དུ་འགོག་འགུག་གིས་འདྲི་གཅོད་བྱེད་ཀྱིན་པའི་གནས་ཚུལ་འདུག་ཀྱང་། ཁོང་ཚོར་འདྲི་གཅོད་ག་རེ་བྱེད་ཀྱི་ཡོད་མེད་དང་གཅར་རྡུང་གཏོང་གི་ཡོད་མེད་གསལ་བོ་ཞིག་ཤེས་ཀྱི་མི་འདུག ཅེས་བརྗོད་སོང་།
འདས་ལོའི་ཕྱི་ཟླ་ ༡༡ པའི་ཟླ་མཇུག་ཙམ་ལ་ཁམས་བྲག་མགོ་རྫོང་དམར་ཤོག་དྲུང་ཆེ་ཝང་ཏུང་ཧྲིན་(王东升) ཟེར་བ་དེའི་བཀོད་ཁྱབ་འོག་ཏུ་ཁམས་ཏྲེ་ཧོར་བྲག་དགོན་གྱི་དགེ་ལྡན་ནང་བསྟན་སློབ་གྲྭ་གཏོར་རྗེས། དགེ་འདུན་པ་༡༠༠ ལྷག་ཕྱིར་རང་ཁྱིམ་དུ་ལོག་དགོས་བྱུང་བའི་གནས་ཚུལ་ཐོན་ཡོད།
དགེ་ལྡན་ནང་བསྟན་སློབ་གྲྭ་ནི་ཕྱི་ལོ་༡༩༩༠ ནང་བཙུགས་པ་ཞིག་ཡིན་པ་དང་། སློབ་གྲྭ་དེའི་སློབ་གཉེར་བ་ཚང་མ་གྲྭ་པ་ཡིན་ནའང་། དབྱར་དགུན་གནང་གི་སྐབས་སུ། ཁམས་བྲག་མགོ་རྫོང་དང་རྟའུ་རྫོང་ཁོངས་ཀྱི་སློབ་འགྲིམ་སློབ་ཕྲུག་ཚོར་བོད་སྐད་ཡིག་དང་ནང་ཆོས་ངོ་སྤྲོད། དབྱིན་ཡིག་སོགས་སློབ་ཁྲིད་བྱེད་ཀྱི་ཡོད་པ་རེད།
ཕྱི་ལོ་༢༠༠༨ དང་ལྷག་པར་དུ་༢༠༡༢ ལོར་ཁམས་བྲག་མགོ་རྫོང་སེར་སྐྱ་མང་ཚོགས་ཀྱིས་རྒྱ་ནག་དམར་ཤོག་སྲིད་གཞུང་གི་དྲག་གནོན་ལ་མ་བཟོད་པར་ཞི་རྒོལ་གནང་བ་བཟུང་ནས། རྒྱ་གཞུང་གིས་སྔ་རྗེས་སུ་བྲག་མགོ་དགོན་གྱི་དགེ་འདུན་པ་དང་། སློབ་གྲྭའི་སློབ་སྤྱི་དགེ་འདུན་པ་རྒན་ཚེ་དབང་འཛིན་བཟུང་བཙོན་འཇུག་བྱས་པར་མ་ཟད། རང་ལོ་༡༨ མ་ཟིན་པར་ཁ་གཡར་ནས་དགོན་པ་དེའི་གྲྭ་ཕྲུག་མང་པོ་ཞིག་བཙན་གྱིས་ཕྱིར་བཏང་བའི་གནས་ཚུལ་ཐོན་ཡོད།
ས་གནས་གསར་འགོད་པ།
