སྤྱི་འཐུས་མཁན་པོ་བསོད་ནམས་བསྟན་འཕེལ་མཆོག་གིས་སྐབས་བཅུ་བདུན་པའི་གྲོས་ཚོགས་ཚོགས་དུས་གསུམ་པའི་མཇུག་བསྡོམས་གསུང་བཤད་གནང་སྐབས། བཀའ་ཤག་གི་གསལ་བཤད་ལན་འདེབས་ནང་གསལ་བ་ལྟར་ང་ཚོའི་འདས་པ་དེ་འདས་པ་རེད། མ་འོངས་པར་བཟང་ཕྱོགས་ཀྱི་འགྱུར་བ་འགྲོ་རྒྱུར་འབད་བརྩོན་ཞུ་ཐུབ་རྒྱུ་གལ་ཆེན་པ་རེད་ཅེས་གསུངས་སོང་།
དེ་རིང་བོད་མི་མང་སྤྱི་འཐུས་ལྷན་ཚོགས་སྐབས་ ༡༧ པའི་གྲོས་ཚོགས་ཚོགས་དུས་ ༣ པ་དེ་ཉིད་དངོས་སུ་མཇུག་བསྒྲིལ་སོང་བ་དང་། ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་མཇུག་བསྡོམས་གསུང་བཤད་སྐབས། གྲོས་ཚོགས་ནི་བོད་ཀྱི་ཆོས་རིག་དང་སྐག་ཡིག་རིག་གཞུང་དང་བཅས་པའི་མེ་ལོང་ལྟ་བུ་ཡིན་སྟབས་སྤྱི་འཐུས་ཚང་མས་སྡིངས་ཆ་དེ་བཞིན་བོད་སྤྱི་བའི་ཆེད་དུ་དོན་ཕན་ལྡན་པ་ཞིག་ཡོང་རྒྱུར་འགན་འཁུར་ལེན་དགོས་སྐོར་གསུངས་སོང་།
ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་མཇུག་བསྡོམས་གསུང་བཤད་སྐབས། ཁ་སང་ཕྱི་ཚེས་ ༣༠ རེས་གཟའ་ལྷག་པའི་ཉིན་བོད་ཁམས་སྐྱེ་རྒྱུ་མདོ་ཡི་དམག་སྒར་གྱི་ཉེ་འགྲམ་དུ་བོད་མི་ཞིག་གིས་རང་ལུས་མེར་སྲེག་བཏང་བ་དངོས་བདེན་བྱུང་འདུག ང་ཚོས་གྲོས་ཚོགས་ཚོགས་དུས་གཉིས་པའི་སྐབས་སུ་ཕྱི་ཟླ ༢ ཚེས་༢༥ ཉིན་གཞས་པ་ཚེ་དབང་ནོར་བུས་རང་ལུས་མེ་བསྲེགས་བཏང་ནས་འདས་གྲོངས་སུ་གྱུར་བར་མྱ་ནང་གུས་འདུད་ཀྱི་གྲོས་འཆར་ཞིག་ཁུར་ཡོད་པ་རེད། ད་ལྟ་སྐྱེ་རྒུ་མདོ་རུ་རང་ལུས་མེར་སྲེག་མཁན་གྱི་མཚན་དང་ལོ་རྒྱུས་སོགས་གསལ་ཁ་གང་ཡང་རག་གི་མི་འདུག ཡིན་ན་ཡང་། ཁོང་རྣམ་པ་ཡིས་བོད་བསྟན་སྲིད་ཀྱི་དོན་དུ་བློས་བཏང་ཆེན་པོ་ཞིག་གནང་བ་ཡིན་དུས། ང་ཚོས་ཁོང་རྣམ་པས་བློས་བཏང་དེ་དག་དོན་དང་ལྡན་པར་ཡོང་བར་ཤོག་དང་། ལྷག་པར་སོ་སོས་བོད་བསྟན་སྲིད་ཀྱི་ཆེད་དུ་ལྷག་བསམ་འཇུག་པ་ཆེར་སྐྱེད་ཀྱི་ཐོག་ནས་ཞབས་འདེགས་ཞུ་ཐུབ་དགོས་རྒྱུའི་ཆོས་སེམས་དམ་བཅའ་ཞིག་བླང་ཐུབ་པ་ཡིན་ན། ངས་མྱ་ངན་གུས་འདུད་ཀྱི་གྲོས་ཆོད་ཡིན་ན་འདྲ། གདུང་སེམས་མཉམ་སྐྱེད་དོན་དང་ལྡན་པ་ཞིག་ཆགས་ཀྱི་ཡོད་རེད་ཅེས་སྙན་གསེང་ཞུ་རྒྱུ་ཡིན། གྲོས་ཚོགས་ཀྱི་ལས་རིམ་དང་འབྲེལ་བའི་ཐོག་ནས་ང་ཚོས་ཐོག་མ་དེར་བོད་ནང་གི་ཁོར་ཡུག་གི་ཛ་དྲག་གནས་སྟངས་ཐོག་ལ་གཞུང་འབྲེལ་གྲོས་གཞི་གྲོས་འཆར་ཞིག་ཁུར་ཡོད། ང་འདིར་དྷ་རམ་ས་ལའི་གྲོས་ཚོགས་ར་བའི་ནང་སླེབས་ནས་ཆེད་དུ་དམིགས་ནས་གྲོས་ཆོད་ཁུར་བ་ཕལ་ཆེར་ཐེངས་མ་དང་པོར་ཆགས་བསྡད་ཡོད། ཅེས་གསུངས་སོང་།
དེ་ཡང་ཁོང་གིས་མུ་མཐུད་གསུངས་དོན། བཀའ་ཤག་གིས་ལས་བྱེད་འདེམས་ལྷན་གྱི་སྒྲིག་གཞི་དོན་ཚན་ཁག་ཅིག་ལ་བསྐྱར་བཅོས་ཁྱེར་ཏེ། ང་ཚོས་དེའི་ནང་གི་དོན་ཚན་ ༡༦ དང་ ༡༩ ཡི་ནང་གསེས་ཁག་ཅིག་ཐོན་ཐུབ་ཡོད་པ་རེད། དེ་བཞིན་བཅའ་ཁྲིམས་དོན་ཚན་ ༦༣ པའི་ནང་གསེས་ག་པ་ལ་བསྐྱར་བཅོས་ཁུར་ཡོད་ཀྱང་ཐོན་ཐུབ་མེད་པ་རེད། དེར་བརྟེན་སྤྱི་ཡོངས་ཀྱི་གནས་སྟངས་ཐོག་ནས་གྲོས་ཚོགས་ཀྱི་རྣམ་དཔྱོད་ལ་བརྩི་བཀུར་ཞུ་དགོས་ཀྱི་ཡོད་ནའང་། བར་སྐབས་ང་ཚོའི་སྤྱི་ཚོགས་དང་བོད་མིའི་སྒྲིག་འཛུགས་ཀྱི་གནས་སྟངས་ཐོག་ནས་དཀའ་ངལ་ཞིག་ཡོང་གི་འདུག ད་ལྟ་བཀའ་ཤག་གི་གསལ་བཤད་ལན་འདེབས་ནང་གསུངས་བ་བཞིན། ང་ཚོའི་འདས་པ་དེ་འདས་པ་རེད། མ་འོངས་པར་བཟང་ཕྱོགས་ཀྱི་འགྱུར་བ་འགྲོ་རྒྱུར་འབད་བརྩོན་ཞུ་ཐུབ་རྒྱུ་གལ་ཆེན་པོ་རེད། ཅེས་གསུངས་སོང་ལ། གྲོས་ཚོགས་འདི་བཞིན་བོད་སྤྱི་བའི་བདེ་དོན་གླེང་སའི་སྡིངས་ཆ་ཞིག་ཡིན་སྟབས། ཚང་མས་སྡིངས་ཆ་དེ་བོད་སྤྱི་བའི་ཆེད་དུ་དོན་དང་ལྡན་པ་ཞིག་ཡོང་རྒྱུར་འགན་འཁུར་ཞུ་དགོས་ཤིང་། དེ་ལྟར་བྱས་པ་བརྒྱུད་ནས་གྲོས་ཚོགས་ལ་མཚན་མཐོང་དང་། བོད་བསྟན་སྲིད་ལའང་ཕན་པ་ཡོང་གི་ཡོད་པ་མ་ཟད། གྲོས་ཚོགས་འདི་བཞིན་བོད་ཀྱི་ཆོས་རིག་སྐད་ཡིག གོམས་སྲོལ་དང་བཅས་པའི་མེ་ལོང་ལྟ་བུ་ཆགས་ཀྱི་ཡོད་སྐོར་གསུངས་སོང་།
འདི་ལོའི་སྔོན་རྩིས་གཏན་འབེབས་ཁྲོད་བོད་མི་མང་སྤྱི་འཐུས་ལྷན་ཚོགས་ཀྱིས་བོད་མིའི་སྒྲིག་འཛུགས་ཀྱི་རྩིས་ལོ་ ༢༠༢༢ ནས་ ༢༠༢༣ ལོའི་སྔོན་རྩིས་མ་དདུལ་ནས་ཡོང་འཆར་ཧིན་སྒོར་ ༨༥,༡༦,༡༢,༣༣༤ དང་། ཟུར་བཀོལ་ནས་ཡོང་འཆར་ཧིན་སྒོར་ ༡,༧༧,༨༢,༩༧,༨༥༤ བཅས་ཁྱོན་སྔོན་རྩིས་ཕྱོགས་བསྡོམས་མ་དངུལ་ཧིན་སྒོར་ ༢,༦༢,༩༩,༡༠,༡༨༨ ཡོང་རྒྱུ་དང་། རྩིས་ལོ་འདིའི་ནང་སྔོན་རྩིས་མ་དངུལ་ནས་རྒྱུན་གྲོན་དང་དམིགས་བསལ་ཆེད་འགྲོ་འཆར་ཧིན་སྒོར་ ༨༤༨༩༥༠༨༡༢ དང་། ཟུར་བཀོལ་རྩིས་ཁོངས་སུ་འགྲོ་འཆར་ཧིན་སྒོར་ ༡༦༩༣༢༦༤༩༣༧ བཅས་རྩིས་ལོ་འདིའི་ནང་ཁྱོན་བསྡོམས་ཧིན་སྒོར་ ༢༥༤༢༢༡༥༧༤༩ ཡི་འགྲོ་གྲོན་གཏོང་འཆར་ཡོད་པ་མང་མོས་ཀྱི་ཐོག་ནས་གཏན་འབེབས་གནང་སོང་།
དེ་བཞིན་བོད་མིའི་སྒྲིག་འཛུགས་ཀྱི་ཕྱོགས་བསྡོམས་མ་དངུལ་ནང་མ་ཚུད་པའི་སྦེང་ལོར་ལྷོ་ཕྱི་ལས་ཁུངས་དང་ས་གནས་འཐུས་མིའི་ཚོགས་འདུ་མེད་པའི་ས་གནས་ཁག་ལྔའི་སྔོན་རྩིས་ལ་ཡོང་འཆར་ཧིན་སྒོར་ ༣,༨༢,༥༢,༩༤༡ དང་། འཕྲོད་བསྟེན་ཁྱབ་ཁོངས་མངོན་དགའ་སློབ་གྲྭ་དང་། སྨན་ཁང་ཁག་ ༣ བཅས་ནས་སྔོན་རྩིས་ཡོང་འཆར་ཧིན་སྒོར་ ༡,༢༥,༦༥,༩༡༢ བཅས་ཁྱོན་ཧིན་སྒོར་ ༥,༠༨,༡༨,༨༥༣ ཡོང་འཆར་ཡིན་ཞིང་། འགྲོ་འཆར་གྱི་ཐད་སྡེ་ཚན་གཉིས་ལ་ཁྱོན་ཧིན་སྒོར་ ༤,༦༧,༦༤,༡༤༥ འགྲོ་འཆར་དུ་གཏན་འབེབས་གནང་སོང་།
གསར་འགོད་པ། པ་སངས་ཚེ་རིང་དང་དཔལ་ལྡན།
