བོད་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས་ཟླ་འདིའི་ཕྱི་ཚེས་ ༦ ཉིན་རྒྱལ་ཚོགས་ཀྱི་ལྟ་ཞིབ་ཚན་པའི་གཞུང་འབྲེལ་མ་ཡིན་པའི་ཚོགས་ཆེན་ཐོག་བོད་ནང་གི་འགྲོ་བ་མིའི་ཐོབ་ཐང་སྐོར་གཏམ་བཤད་གནང་རྒྱུ་དང་དེ་ནས་ཟླ་འདིའི་ཕྱི་ཚེས ༢༩ བར་སུད་སི་དང་། སི་པན། ཅེག་སྤྱི་མཐུན་རྒྱལ་ཁབ། ཌེན་མག སེ་ཝེ་ཊན་སོགས་སུ་བོད་དོན་དྲིལ་བསྒྲགས་དང་གཏམ་བཤད་སྤེལ་རྒྱུ་ཡིན་འདུག
དེ་རིང་ནས་ཕྱི་ཚེས་ ༦ བར་མཉམ་འབྲེལ་རྒྱལ་ཚོགས་ཀྱི་ཇི་ནེའི་ཝའི་( Genewa Summit) ཚོགས་ཆེན་འཚོག་མུས་ཡིན་པ་དང་བསྟུན། བོད་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས་ཡུ་རོབ་ནང་དུ་བོད་དོན་ལས་འགུལ་སླད་ཟླ་འདིའི་ཕྱི་ཚེས ༣ ཉིན་སུད་སིའི་ཛུ་རིག་གྲོང་ཁྱེར་དུ་འབྱོར་ཡོད་པ་དང་། ཟླ་འདིའི་ཕྱི་ཚེས ༦ ཉིན་ཇི་ནེའི་ཝའི་གཞུང་འབྲེལ་མ་ཡིན་པའི་ཚོགས་ཆེན་གྱི་སྟེང་དུ་ཁོང་གིས་བོད་ནང་གི་འགྲོ་མིའི་ཐོབ་ཐང་ཐོག་ལ་གཏམ་བཤད་གནང་རྒྱུ་ཡིན་འདུག ཇེ་ནེའི་ཝའི་གཞུང་འབྲེལ་མ་ཡིན་པའི་ཚོགས་པ་ཁག་གི་འགྲོ་བ་མིའི་རིགས་ཀྱི་ཐོབ་ཐང་སྐོར་གྱི་ཚོགས་འདུ་དེའི་ཐོག་རྒྱལ་སྤྱིའི་ཤེས་ཡོན་པ་དང་། ལས་འགུལ་བ། རང་དབང་འཐབ་རྩོད་པ་སོགས་མི་གྲངས་ ༢༡ གིས་མཉམ་ཞུགས་བྱེད་ཀྱི་ཡོད་འདུག
དེའི་ཐད་འདི་གའི་གསར་འགོད་པར་རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས། སང་ཉིན་དང་གནངས་ཉིན་བཅས་ཉིན་གྲངས་ ༢ རིང་ལ་ཇི་ནེ་ཝའི་འགྲོ་བ་མིའི་ཐོབ་ཐང་སྐོར་གྱི་ཚོགས་འདུ་འཚོག་རྒྱུ་དེ། སྤྱིར་བཏང་མཉམ་འབྲེལ་རྒྱལ་ཚོགས་ཀྱིས་འགྲོ་བ་མིའི་ཐོབ་ཐང་སྐོར་གྱི་ཚོགས་ཆེན་དེ་ལོ་གཅིག་ལ་ཐེངས་གཉིས་ཙམ་འཚོགས་སྲོལ་ཡོད་པ་དང་། དེའི་མཉམ་དུ་UN watch ཞེས་པའི་སྡེ་ཚན་ཞིག་ཡོད་པ་དེའི་ནང་དུ་གཞུང་འབྲེལ་མ་ཡིན་པའི་ཚོགས་པ་ཁག་མང་པོ་ཞིག་གིས་སོ་སོའི་རྒྱལ་ཁབ་ནང་དུ་འགྲོ་བ་མིའི་ཐོབ་ཐང་གི་གནད་དོན་ཐོག་ལ་གླེང་མོལ་བྱེད་སའི་གླེང་སྟེགས་ཞིག་ཡོད་རེད། དེའི་སྟེང་གཞུང་འབྲེལ་གྱི་ཐོག་ནས་མཉམ་འབྲེལ་རྒྱལ་ཚོགས་སུ་གླེང་སློང་མ་བྱུང་བ་དང་། གཞུང་འབྲེལ་མ་ཡིན་པའི་ཚོགས་པའི་ངོས་ནས་གླེང་སློང་བྱ་རྒྱུའི་གོ་སྐབས་ཤིག་ཡོད་པ་རེད། དེའི་ནང་དུ་དུས་རྒྱུན་བོད་པའི་སྤྱི་ཚོགས་ནང་གི་ཆབ་སྲིད་བཙོན་ཟུར་དང་གཟེངས་སུ་ཐོན་པའི་སྒྱུ་རྩལ་བ་སོགས་ཀྱིས་གཏམ་བཤད་བྱས་མྱོང་འདུག ད་ལན་བོད་ཀྱི་བུད་མེད་ལྷན་ཚོགས་ནས་རྐང་འགན་ཁྱེར་ནས་ས་མིག་ཅིག་ཐབས་ཤེས་བྱས་ནས་ང་ཤོག་ལབ་པ་རེད། ངས་ཕྱི་ཚེས་ ༦ ཉིན་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་ལ་སྐད་ཆ་བཤད་རྒྱུ་ཡིན་པ་དང་། ད་ལན་གྱི་ཚོགས་འདུའི་ཐོག་རྒྱལ་ཁབ་མང་པོ་ཞིག་ནས་འགྲོ་བ་མིའི་ཐོབ་ཐབ་གླེང་སློང་བྱེད་མཁན་མང་པོ་ཞིག་ཡོང་གི་ཡོད་དུས། གོ་སྐབས་བཟང་པོ་ཞིག་ཀྱང་ཡིན་པ་རེད། ཅེས་བརྗོད་བྱུང་།
དེ་བཞིན་ཁ་སང་སུད་སི་དང་ལིག་ཏིན་སི་བོད་རིགས་ཚོགས་པའི་གོ་སྒྲིག་འོག བོད་དོན་རྒྱབ་སྐྱོར་བ་དང་ཨ་རིའི་རྒྱལ་ཡོངས་སིལ་སྤོལ་རྩེད་འགྲན་པ་གྲགས་ཅན་ཨེ་ནེ་སི་ཀན་ཊར་(Enes Kanter)ལགས་དང་། རང་བཙན་འཐབ་རྩོད་པ་བསྟན་འཛིན་བརྩོན་འགྲུས་ལགས་གཉིས་ལ་ཡི་རངས་བསྔགས་བརྗོད་ཀྱི་གསོལ་སྟོན་མཛད་སྒོ་ཞིག་འཚོགས་ཡོད་པ་དང་། སྐབས་དེར་འཐབ་རྩོད་པ་བསྟན་འཛིན་བརྩོན་འགྲུས་ལགས་ཀྱིས། བོད་ནང་གི་བོད་མིའི་གནས་བབ་དང་འབྲེལ་ནས་བོད་མི་རིགས་ཀྱི་རང་དབང་འཐབ་རྩོད་ཀྱི་སླད་དུ་ནམ་ཡང་སེམས་ཤུགས་ཆགས་མི་ཉན་པ་དང་། བོད་དོན་ལ་ལྷག་བསམ་རྣམ་དག་གིས་ཞབས་འདེགས་བསྒྲུབ་སླད། བོད་མི་ཚོས་ཆོལ་ཁ་སོགས་ཀྱི་འཐེན་འཁྱེར་སྤངས་ཏེ། ཚང་མས་རྡོག་རྩ་གཅིག་སྒྲིལ་བྱ་དགོས་སྐོར་འབོད་སྐུལ་གནང་ཡོད་འདུག
ཡང་བསྟན་འཛིན་བརྩོན་འགྲུས་ལགས་ཀྱིས། སུད་སིར་བོད་མི་དང་ས་གནས་མི་མང་ལ་བོད་དོན་དྲིལ་བསྒྲགས་དང་གོ་རྟོགས་སྤེལ་འཆར་ཡོད་པ་དང་། དེ་ནས་སུ་ཝེ་ཌན་གྱི་མཐོ་སློབ་གཉིས་སུ་བོད་དོན་སྐོར་ལ་གཏམ་བཤད་གནང་རྒྱུ་དང་། དེ་ནས་སི་པན་དང་ཅེག་སྤྱི་མཐུན་རྒྱལ་ཁབ་གཉིས་སུ་སི་པན་དང་ཅེག་ཀྱི་སྐད་ཡིག་ཏུ་ཕབ་སྒྱུར་བྱས་པའི་ཁོང་གི་བརྩམས་ཆོས་སྐོར་ར་དབུ་འབྱེད་དང་དེའི་ཐད་གླེང་མོལ་སོགས་བྱ་རྒྱུ་ཡིན་སྐོར་སོགས་བརྗོད་བྱུང་ལ། ལས་འཆར་ལྟར་ན། ཟླ་འདིའི་ཕྱི་ཚེས་ ༧ ནས་ཕྱི་ཚེས ༢༩ བར་སུད་སི་དང་། སི་པན། ཅེག་སྤྱི་མཐུན་རྒྱལ་ཁབ། ཌེན་མག སེ་ཝེ་ཊན་སོགས་སུ་བོད་དོན་དྲིལ་བསྒྲགས་དང་གཏམ་བཤད་སྤེལ་རྒྱུ་ཡིན་འདུག
གསར་འགོད་པ། དཔལ་ལྡན།
