སྲིད་སྐྱོང་སྤེན་པ་ཚེ་རིང་མཆོག་རིང་མིན་ཨ་རིའི་ནང་ཕེབས་ཏེ་གནད་ཡོད་མི་སྣར་མཇལ་འཕྲད་གནང་འཆར་ཡོད་འདུག

བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་མཆོག་སྒྲུབ་ལགས་ཀྱིས་ཨ་རིའི་གྲོས་ཚོགས་འཐུས་མི་བོད་དོན་རྒྱབ་སྐྱོར་བ་སྐུ་ཞབས་ཇིམ་མེག་གྷོ་ཝན་ལགས་དང་མཇལ་འཕྲད་གནང་སྟེ་འདི་ལོར་ཨ་རིའི་ནང་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་འཚོག་གཏན་འཁེལ་བའི་སྐོར་སོགས་གླེང་སློང་གནང་ཡོད་འདུག

དེ་རིང་བོད་མིའི་སྒྲིག་འཛུགས་ཀྱི་གཞུང་འབྲེལ་དྲ་བར་གནས་ཚུལ་འཁོད་པ་ལྟར་ན། ཟླ་འདིའི་ཕྱི་ཚེས་ ༡ ཉིན་བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་མཆོག་སྒྲུབ་ལགས་ཀྱིས་སྐུ་ཞབས་ཇིམ་མེག་གྷོ་ཝན(Jim McGovern) ལགས་སུ། རྒྱ་ནག་གཞུང་གིས་བོད་མིའི་ངོ་བོ་དང་། བོད་ཀྱི་སྐད་ཡིག་གཙོ་བོར་གྱུར་བའི་བོད་ཀྱི་ཐུན་མོང་མ་ཡིན་པའི་རིག་གནས་མང་པོ་རྩ་མེད་དུ་གཏོང་ཐབས་བྱེད་མུས་ཡིན་པའི་ཁར། བོད་རྒྱ་ནག་ཅན་དུ་བསྒྱུར་ཐབས་བྱེད་མུས་ཡིན་པའི་སྲིད་ཇུས་ཀྱི་འོག་ནས། བོད་ནང་དུ་ཆོས་དད་རང་དབང་སོགས་མེད་སྟབས། ཉེ་ཆར་གཞས་པ་གྲགས་ཅན་ཚེ་རིང་ནོར་བུ་ལགས་དང་བཀྲ་ཕུན་ལགས་གཉིས་ཀྱིས་རྒྱ་ནག་གཞུང་གིས་བོད་ཐོག་བཟུང་བའི་སྲིད་ཇུས་ལ་ངོ་རྒོལ་གྱིས་རང་ལུས་མེར་བསྲེགས་ནས་སྐུ་གྲོངས་ཡོད་སྐོར་དང་། སྲིད་སྐྱོང་སྤེན་པ་ཚེ་རིང་མཆོག་གིས་དབུ་ཁྲིད་པའི་བཀའ་ཤག་སྐབས་ ༡༦ པས་བོད་རྒྱའི་འབྲེལ་ལམ་བསྐྱར་གསོའི་ཆེད་དུ་བརྩམས་པའི་ལས་གཞིའི་སྐོར་དང་། ཟླ་འདིའི་ནང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨ་རིའི་ནང་ཕེབས་རྒྱུ་ཡིན་པ་དང་། དེ་བཞིན་འདི་ལོར་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་ ༨ པ་འཚོག་གཏན་ཁེལ་བ་སོགས་ཀྱི་སྐོར་ལ་གླེང་སློང་གནང་ཡོད་འདུག

 གཞན་ཡང་། ཕྱི་ཟླ་ ༣ ཚེས་ ༣༠ ཉིན་བྱང་ཨ་རིའི་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་མཆོག་སྒྲུབ་ལགས་དང་དྲུང་ཆེ་བཀྲ་ཤིས་དོན་གྲུབ་རྣམ་གཉིས་ཀྱིས་ཨ་རིའི་རྒྱལ་སྤྱིའི་ཆོས་དད་རང་དབང་སྲུང་སྐྱོབ་ལྷན་ཁང་གི་སྐུ་ཚབ་ཟུར་པ་སྐུ་ཞབས་(Samuel Brownback) ལགས་དང་།  ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨུ་ཛི་ར་ཛེ་ཡ་ལགས་ཀྱི་དམིགས་བསལ་ལས་རོགས་རི་ཡན་ (Ryan Fioresi) ལགས་གཉིས་དང་མཇལ་འཕྲད་ཀྱིས་བོད་དོན་ཐད་མུ་མཐུད་དུ་རྒྱབ་སྐྱོར་གནང་དགོས་པའི་རེ་སྐུལ་ཞུས་ཡོད་པ་དང་། ཟླ་བཞི་པའི་ནང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨ་རིར་ཕེབས་གཏན་འཁེལ་ཡོད་སྐོར་སོགས་གསུངས་ཡོད་འདུག

གསར་འགོད་པ། དཔལ་ལྡན།