དེ་རིང་སྔ་དྲོར་༧གོང་ས་རྒྱལ་བ་རིན་པོ་ཆེ་མཆོག་ནས་བཞུགས་སྒར་ཐེག་ཆེན་གཙུག་ལག་ཁང་གི་ཆོས་རའི་ནང་དུ་ཞོ་སྟོན་ཐེངས་ཉེར་ལྔ་པར་བཅར་བའི་ལྷ་མོ་ཚོགས་པ་ཁག་གི་ཚོགས་མི་རྣམས་ལ་དམིགས་བསལ་མཇལ་ཁ་གནང་སྐབས་ཁྱེད་རང་ཚོས་རྣམ་ཐར་བཏང་བ་དང་ངོས་རང་ཆུང་དུས་སྐབས་ཀྱི་ཞོ་སྟོན་གྱི་ཚོར་བ་དེ་བསླེབས་སོང་ཞེས་སོགས་བཀའ་སྩལ།
དེ་ཡང་ལྷ་སའི་ཞོ་སྟོན་དང་འབྲེལ་ཏེ་༧གོང་ས་མཆོག་གིས། ལྷ་སར་ཞོ་སྟོན་ཉིན་བཞི་ཙམ་ཡོད་རེད། གཟིགས་ཕུད་ཉིན་གཅིག་བྱས་ནས་ཉིན་ལྔ་ཡོད་པ་རེད། དེའི་རིང་དེར་ང་རང་སྐྱིད་པོ་ཞེ་དྲགས་ཡོད་རེད། ཡོངས་འཛིན་རིན་པོ་ཆེ་ཕེབས་ནས་གསུང་ཆོས་དང་དཔེ་ཆ་སྐྱོར་རྒྱུ་གང་ཡང་ཡོད་པ་མ་རེད། དེ་ནས་ཨ་མ་ལགས་ཞོ་སྟོན་གྱི་ལྟད་མོ་གཟིགས་ཀར་ཕེབས་ཏེ། ནོར་བུ་གླིང་ཁར་ཡབ་གཞིས་ཤིག་ཡོད་པ་དེར་བཞུགས་ཀྱི་རེད། དེར་བརྟེན་ཨ་མ་ལགས་དུས་དུས་སུ་ཐུག་རྒྱུ་ཡོད་རེད། གང་ལྟར་ཞོ་སྟོན་ཕལ་ཆེར་དབྱར་ཁའི་གུང་གསེང་ཆེ་ཤོས་ཤིག་རེད། དེ་རིང་འདིར་ང་རང་ཚོའི་བོད་ཀྱི་གོམས་གཤིས་ཟེར་དགོས་ཀྱི་མ་རེད་དམ། སྲོལ་རྒྱུན་ལྟ་བུའི་ཐོག་ནས་ཞོ་སྟོན་ཚུགས་ཀྱི་ཡོད་རེད། ཞོ་སྟོན་ཟེར་དུས་ཞོ་འཐུང་རྒྱུ་དང་ཞོ་འབྲས་བཟའ་རྒྱུ་འདྲ་བོ་མིན་འགྲོ། གང་ལྟར་ང་རང་ཞོ་སྟོན་གྱི་ཉིན་མོ་དེ་དག་རིང་ལ་སྐྱིད་པོ་ཞེ་དྲགས་ཡོང་གི་ཡོད། དེ་རིང་གི་འདི་ང་ཚོའི་རིག་གཞུང་གི་ཆ་ཤས་ལྟ་བུ་ཞིག་རེད། ཞོ་སྟོན་ལ་རྒྱལ་མཁར་དང་གཅུང་པ། ཤངས་པ། སྐྱོར་མོ་ལུང་པ་ཞེས་ཁག་བཞི་ཡོད་པ་རེད། དེ་དག་གིས་གཞུང་མི་འདྲ་བ་འཁྲབ་ཀྱི་འདུག རྒྱལ་མཁར་བས་རྒྱལ་བཟའ་བལ་བཟའ་དང་ནོར་བཟང་འཁྲབ་རྒྱུ་ཡོད་རེད། གཅུང་པས་གཅུང་དོན་ཡོད་དོན་གྲུབ་ཟེར་བ་དེ་འཁྲབ་ཀྱི་རེད། གཅུང་པོ་དོན་ཡོད་དོན་གྲུབ་དེ་སེམས་སྐྱོ་བོ་འདྲ་ཞིག་ཡོད། དེ་ནས་ཤངས་པ་ཟེར་བ་དེས་བྲམ་ཟེ་ལྟ་བུ་བྱས་ཏེ་འཁྲབ་རྒྱུ་ཞིག་འདུག དེ་ནས་སྐྱོར་མོ་ལུང་པས་གཞུང་འདྲ་མིན་འཁྲབ་ནས་གང་ལྟར་ཞོ་སྟོན་ཉིན་བདུན་དེ་ངའི་དུས་ཚོད་སྐྱིད་ཤོས་ཤིག་ལ་རྩི་ཡི་ཡོད། ཅེས་གསུངས་སོང་།
ཡང་༧གོང་ས་མཆོག་གིས། ང་ཚོ་བཙན་བྱོལ་བ་རེད་དེ་བོད་མི་རིགས་ཀྱི་ཆོས་དང་རིག་གཞུང་དེ་དག་དམ་འཛིན་བྱེད་ཀྱི་ཡོད་རེད། དེར་བརྟེན་ང་ཚོའི་ཟློས་གར་ནི་བོད་པའི་རིག་གཞུང་གི་ཆ་ཤས་ཆགས་ཀྱི་ཡོད་རེད། ང་ཚོས་རྒྱ་མི་ལ་འཁྲུག་པ་བརྒྱབ་ནས་ཡོང་ཐུབ་རྒྱུ་ཡོད་མ་རེད། ང་ཚོ་ལ་དགོས་པ་དེ་རང་སྐྱོང་མིང་དོན་མཚུངས་པ་ཞིག་དང་བོད་ཀྱི་སྐད་ཡིག་གཙོ་བོར་གྱུར་བའི་བོད་པའི་རིག་གཞུང་དེ་དག་བོད་པས་བདག་པོ་ཆ་ཚང་བརྒྱག་ཐུབ་དགོས་ཀྱི་ཡོད་རེད། དེང་སང་རྒྱ་མིར་འགྱུར་བ་འགྲོ་ཡི་ཡོད་པ་རེད། དངོས་ཡོད་གནས་ཚུལ་ལ་རྒྱ་ནག་ནང་དུ་ནང་ཆོས་ལ་དོ་སྣང་བྱེད་མཁན་མང་དུ་འགྲོ་ཡི་འདུག དཔལ་ནལནྜའི་ཆོས་བརྒྱུད་དེ་བཤད་སྒྲུབ་ཟུང་འབྲེལ་གྱི་ཐོག་ནས་དཔལ་ན་ལེནྜའི་ཆོས་བརྒྱུད་ཀྱི་ནང་པའི་ཆོས་ང་ཚོ་བོད་པས་བདག་པོ་བརྒྱབ་པ་ནང་བཞིན་གཞན་སུས་ཀྱང་བརྒྱབ་ཐུབ་ཀྱི་ཡོད་མ་རེད། དེར་བརྟེན་རྒྱ་ནག་གི་ནང་གི་ནང་པ་ཚོས་བོད་ཀྱི་སངས་རྒྱས་པའི་ཆོས་དེ་ན་ལེནྜའི་ཆོས་བརྒྱུད་དྲི་མ་མེད་པ་ཞིག་དང་དེ་ལ་དམིགས་བསལ་གྱིས་དོ་སྣང་བྱེད་ཀྱི་ཡོད་པ་རེད། ན་ལེནྜའི་ཆོས་བརྒྱུད་འདི་ཚན་རིག་དང་མཐུན་པའི་ཆོས་ཤིག་རེད་འདུག དད་པ་གཅིག་པུ་མིན་པར་རྒྱུ་མཚན་ལ་བསམ་བློ་བཏང་ནས་དཔྱད་པ་བྱས་ཏེ་ཡིན་པ་དང་མིན་པ་ཤེས་པར་བྱས། ང་ཚོ་ཚང་མ་ཆགས་སྡང་གཉིས་ཀྱིས་ཕོངས་ཡོང་གི་ཡོད་རེད། ཆགས་སྡང་གི་རྩ་བ་བདེན་འཛིན་ལ་ཐུག་ཡོང་གི་ཡོད་རེད། བདེན་འཛིན་ཟེར་བ་དེ་ཇི་ལྟར་སྨྲ་བ་ནང་བཞིན་དོན་གྱི་ངོས་ནས་ཡོད་པ་ཞིག་ལ་ཡིད་ཆེས་བྱས་ཏེ་ཆགས་སྡང་གི་བློ་སྐྱེས་ཀྱི་ཡོད་རེད། དཔེར་ན་ (Quantum Physics) ཟེར་བ་དེ་དོན་གྱི་ངོས་ནས་ཡོད་མ་རེད་ལབ་ཀྱི་འདུག དེ་སྔ་ང་ཚོ་བོད་ཀྱི་སངས་རྒྱས་པའི་ཆོས་དེ་ཆོལ་ཁ་གསུམ་གྱི་ས་ཁུལ་གཅིག་པུ་རེད། འཛམ་བུ་གླིང་སྤྱི་ལ་བོད་ཀྱི་ནང་ཆོས་ལ་དོ་སྣང་གསར་པ་ཞིག་བསླེབས་རྒྱུ་དང་། སེམས་ཁམས་རིག་པ་བ་གཙོ་བོར་གྱུར་བའི་ཚན་རིག་པ་མང་པོ་ཞིག་གིས་དོ་སྣང་བྱེད་ཀྱི་འདུག ང་ཚོ་བཙན་བྱོལ་བ་ཆགས་ནས་མི་མང་པོ་ལ་འབྲེལ་བ་བྱེད་ཀྱི་ཡོད་པར་བརྟེན། ང་ཚོའི་ཆོས་དང་རིག་གཞུང་དེ་དག་འཛམ་གླིང་སྤྱི་ལ་ཁྱབ་ཐུབ་པ་ཆགས་ཡོད་པ་རེད། བཙན་བྱོལ་དུ་ཡོད་པའི་བོད་པ་ཉུང་ཤས་ཀྱིས་བོད་ཀྱི་རིག་གཞུང་མུ་མཐུད་དུ་གཅེས་སྐྱོང་དང་། འཛམ་གླིང་ནང་དོ་སྣང་བྱེད་མཁན་ཇེ་མང་དུ་འགྲོ་ཡི་ཡོད་རེད། ཆོས་རྒྱལ་སྲོང་བཙན་སྒམ་པོས་ང་ཚོའི་ཡི་གེ་ཟུར་དུ་དགོས་ཀྱི་འདུག་གསུངས་པ་དེ་རླབས་ཆེན་པོ་རེད་འདུག དུས་རབས་བརྒྱད་པའི་ནང་ཁྲི་སྲོང་ལྡེའུ་བཙན་སྐབས་རྒྱ་གར་ནས་མཁན་ཆེན་ཞི་བ་འཚོ་གདན་ཞུ་གནང་། ཁོང་གིས་ང་ཚོ་བོད་ཡིག་འདུག དེར་བརྟེན་ལེགས་སྦྱར་སྐད་དང་པཱ་ལིའི་སྐད་བསླབ་དགོས་ཀྱི་མི་འདུག ལེགས་སྦྱར་དང་པཱ་ལིའི་ནང་ཡོད་པ་དེ་དག་བོད་ཡིག་ནང་བསྒྱུར་དགོས་སྐོར་གསུངས་ཡོད་པ་རེད། དེ་ལྟར་བཀའ་འགྱུར་དང་བསྟན་འགྱུར་བོད་ཡིག་ནང་བསྒྱུར་བ་རེད། ང་ཚོ་རྒྱ་གར་དུ་འབྱོར་སྐབས་ངོས་རང་གིས་ནེ་རུ་ལ་ང་ཚོ་བོད་པ་ལ་བོད་ཡིག་དང་བོད་སྐད་ཟུར་དུ་ཡོད་པས། བོད་པའི་སློབ་གྲྭ་དགོས་ཀྱི་འདུག་ཞུས་ཡིན། ཁོང་གིས་འགྲིག་གི་རེད་ཟེར་ནས་བོད་པའི་སློབ་གྲྭ་བཙུགས་པ་རེད། ནེ་རུ་དྲིན་ཆེན་པོ་ཞེ་དྲགས་ཡིན། བོད་ཀྱི་ནང་ཆོས་ནི་ཚན་རིག་དང་མཐུན་པའི་ཆོས་ལུགས་ཤིག་རེད། དེང་སང་ནང་པའི་ལྟ་གྲུབ་དང་སེམས་ཁམས་རིག་པའི་སྐོར་ལ་ཚན་རིག་པའི་ནང་ནས་ཤེས་འདོད་ཤུགས་ཆེན་པོ་བྱེད་ཀྱི་འདུག ང་ཚོ་ལ་ཆོས་དང་རིག་གཞུང་སྤུས་དག་ཡོད་པ་དེ་རྒྱ་མིས་བཙན་དབང་བྱས་ནས་བྱེད་ཆོག་གི་མ་རེད་ཟེར་ནས་བསླབ་ཐུབ་ཀྱི་ཡོད་མ་རེད། ང་ཚོ་བཙན་བྱོལ་དུ་བསླེབས་ནས་རྟེན་གཞི་བཙུགས་ཏེ་འཛམ་གླིང་སྤྱི་ཡོངས་ལ་དོ་སྣང་གསར་པ་བསླེབས་རྒྱུ་བྱུང་བ་རེད། དེར་བརྟེན་ང་ཚོ་བོད་པ་ཞིག་ཡིན་པའི་ངོས་ནས་བོད་པའི་ཆོས་དང་རིག་གཞུང་། དེ་བཞིན་སྔར་གྱི་ལོ་རྒྱུས་ལ་བལྟས་ཡོང་དུས། ང་ཚོ་འཛམ་གླིང་ནང་རིག་གཞུང་ཐུན་མོང་མ་ཡིན་པ་འཛིན་མཁན་ཡིན་ཟེར་ནས་སྤོབས་པ་བྱ་རྒྱུ་ཞིག་རེད་འདུག ཅེས་གསུངས་སོང་།
ཡང་བོད་མི་ཚོ་སྤོབས་པ་ལྡན་པ་དང་སེམས་བདེ་བོའི་ཐོག་ནས་སོ་སོའི་ཆོས་དང་རིག་གཞུང་གཅེས་འཛིན་སྐོར་ལ་༧གོང་ས་མཆོག་གིས། ང་ཚོ་བཙན་བྱོལ་བ་ཆགས་ནས་རྒྱ་གར་དུ་བསླེབས། རྒྱ་གར་གཞུང་གིས་སྐུ་མགྲོན་བྱས་ཏེ་རྒྱ་གར་རང་དབང་ལུང་པའི་ནང་ལ་ངོས་ཀྱི་རྣམ་དཔྱོད་ཡོད་པ་དེ་བེད་སྤྱོད་བྱས་ཏེ། དེང་སང་འཛམ་གླིང་ཡོངས་རྫོགས་ལ་ཏཱ་ལའི་བླ་མ་ལབ་དུས་དོ་སྣང་ཡོད་པ་ཞིག་དང་དགའ་མོས་བྱེད་མཁན་ཡོང་གི་ཡོད་རེད། ངོས་ཀྱིས་བོད་རྒྱ་ཆེ་མི་མང་གི་ཚབ་བྱེད་ཀྱི་ཡོད་རེད། བོད་རྒྱ་ཆེ་མི་མང་གི་ཚབ་བྱས་ནས་བོད་གངས་ཅན་ལྗོངས་ཀྱི་ཆོས་དང་རིག་གཞུང་དེ་དག་འཛམ་གླིང་འདིའི་སྒང་ལ་རྒྱ་ཆེ་རུ་ཆེ་རུ་ཁྱབ་སྤེལ་ཕྱིན་བཞིན་ཡོད་པ་རེད། དེ་རིང་ཞོ་སྟོན་ཡག་པོ་ཞེ་དྲགས་བྱུང་། ཁྱེད་རང་ཚོས་རྣམ་ཐར་བཏང་། ངོས་རང་ཆུང་དུས་སྐབས་ཀྱི་ཞོ་སྟོན་གྱི་ཚོར་བ་བསླེབས། བོད་མི་རིགས་ཟེར་བ་འདི་དངོས་གནས་དྲང་གནས་ཀྱིས་ལས་སླ་པོ་འགྱུར་བ་གཏོང་རྒྱུ་མེད་པ་དང་། ང་རང་ཚོའི་ཆོས་དང་རིག་གཞུང་གཏིང་ཟབ་ཡོད་པ་རེད། བོད་གངས་ཅན་ལྗོངས་སུ་ཡོད་པའི་བོད་རིགས་དེ་དག་སོ་སོའི་མི་རིགས་ཀྱི་ལྟ་བ་དང་། ཆོས་དང་རིག་གཞུང་དེ་དག་སྲུང་སྐྱོབ་བྱེད་ཀྱི་ཡོད་རེད། རིམ་པས་རྒྱ་མིར་འགྱུར་བ་འགྲོ་བ་མ་གཏོགས་ང་ཚོར་འགྱུར་བ་འགྲོ་རྒྱུ་ཡོད་མ་རེད། ང་རང་ཚོར་རང་ལུགས་རྒྱུ་མཚན་ལྡན་པ་དང་དངོས་ཡོད་གནས་ཚུལ་ཕན་ཐོགས་ཡོད་པའི་རིག་གཞུང་ཡོད་པས། མུ་མཐུད་དུ་འཛིན་དགོས་ཀྱི་ཡོད་པ་རེད། ཁྱེད་རང་ཚོ་ཚང་མ་བློ་བདེ་བྱོས། སེམས་བག་ཕེབས་པོ་བྱས་ནས་སྡོད། ཅེས་གསུངས་སོང་།
༧གོང་ས་མཆོག་གིས། ང་ཚོའི་དབུ་མའི་ལམ་ཟེར་བ་འདི་མཐའ་གཅིག་ཏུ་རྒྱ་མི་དང་དགྲ་ཟླར་དགྲ་ཤེས་ལྟ་བུའི་རང་བཙན་ཟེར་བའི་སྐད་ཆ་དེ་མེད་པར། ཆེ་ས་ནས་བསམ་བློ་གཏོང་ཡོང་དུས། བོད་གཅིག་པུ་མ་ཡིན་པར་རྒྱ་ནག་རང་ནང་ལོགས་ལ་འགྱུར་བ་འགྲོ་རྒྱུ་ཞིག་རེད། གང་ལྟར་རྒྱ་ནག་ནང་བསྡད་ནས་བོད་རང་སྐྱོང་ཟེར་བ་དེ་ཆོལ་ཁ་གསུམ་ཆ་ཚང་ལ་རང་སྐྱོང་མིང་དོན་མཚུངས་པ་ཞིག་དགོས་པ་དེ་རེད། རང་སྐྱོང་ཟེར་བ་དེ་ཆབ་སྲིད་ཀྱི་འཛིན་སྐྱོང་སྐད་ཆ་མ་རེད། སོ་སོའི་ཆོས་དང་རིག་གཞུང་འཛམ་གླིང་འདིའི་སྒང་ལ་ངོམ་ཆོག་པ་ཞིག་ཡོད་པ་དེ། ང་ཚོས་བདག་པོ་ཡག་པོ་བརྒྱག་ཐུབ་རྒྱུའི་ཐོབ་ཐང་དང་རང་དབང་ཆ་ཚང་ཡོད་པ་ཞིག་བྱུང་ན། ངས་དེ་སྔོན་ལབ་དེ་རེད། རིམ་པས་རྒྱ་ནག་ནང་ལ་མར་ང་ཚོའི་ཆོས་དང་རིག་གཞུང་གིས་དབང་བསྒྱུར་ཐུབ་པ་ཞིག་ཡོང་རྒྱུའི་བཟོ་ལྟ་སླེབས་ཀྱི་འདུག དེར་བརྟེན། རྒྱ་ནག་གི་གདུག་རྩུབ་ཆེན་པོའི་སྲིད་ཇུས་དེ་ཁུངས་འཁྱོལ་རྒྱུ་ཡོད་མ་རེད། སྲིད་ཇུས་དེར་འགྱུར་བ་འགྲོ་ཡི་རེད། ང་ཚོས་རྒྱུ་མཚན་ལྡན་པ་དངོས་གནས་དྲང་གནས་ཀྱིས་དོན་དམ་པའི་སེམས་ཀྱི་ཞི་བདེ་བསྒྲུབ་རྒྱུའི་རིག་གཞུང་གཏིང་ཟབ་ཡོད་པ་དེ། མུ་མཐུད་དུ་ཡར་རྒྱས་འགྲོ་རྒྱུ་མ་གཏོགས་ཉམས་ཀྱི་མ་རེད། དེར་བརྟེན་ང་ཚོ་ཚང་མ་སེམས་ལ་སྤོབས་པ་དང་སྐྱིད་པོ་བྱས་ནས་སྡོད། ཅེས་བཀའ་སློབ་སྨིན་སྩལ་མཛད་སོང་།
གསར་འགོད་པ། བསྟན་འཛིན་ཕུར་བུ།
