འབྱུང་འགྱུར་ལོ་ལྔ་ཚན་གཅིག་ནང་རྒྱ་གར་གཞུང་ནས་བོད་མིར་རོགས་དངུལ་ས་ཡ་ ༤༠༠ གནང་གཏན་འཁེལ་འདུག

རྒྱ་གར་གཞུང་གིས་བཙན་བྱོལ་བོད་མི་རྣམས་ཀྱི་འཚོ་བ་དང་ཤེས་ཡོན་སློབ་སྦྱོང་སོགས་ཀྱི་ཐོག་རོགས་རམ་རྒྱུན་མཐུད་གནང་བཞིན་ཡོད་པ་ལྟར་འབྱུང་འགྱུར་ལོ་ལྔའི་ནང་བོད་མིའི་སྒྲིག་འཛུགས་ནང་སྲིད་ལས་ཁུངས་ཀྱི་ཁྱབ་ཁོངས་དབུས་བོད་མིའི་ངལ་སེལ་ཚོགས་པར་ཧིན་སྒོར་ས་ཡ་ ༤༠༠ ཡི་རོགས་དངུལ་གནང་གཏན་འཁེལ་ཡོད་འདུག

རྒྱ་གར་གྱི་རྒྱལ་ས་ལྡི་ལི་རུ་རྒྱ་གར་གཞུང་གི་སྔོན་རྩིས་གྲོས་ཚོགས་འཚོག་བཞིན་ཡོད་པ་ལྟར། ཟླ་འདིའི་ཕྱི་ཚེས་ ༦ ཉིན་ཧིན་རྡུ་གསར་ཁང་ལ་རྒྱ་གར་གྲོས་ཚོགས་བོད་དོན་རྒྱབ་སྐྱོར་ཚོགས་པའི་ཚོགས་གཙོ་དང་རྒྱ་གར་གྱི་གྲོས་ཚོགས་གོང་མའི་འཐུས་མི་སྐུ་ཞབས་སུ་ཇི་ཏི་ཀུ་མཱར་ (Sujeet Kumar) ལགས་ཀྱིས། རྒྱ་གར་དབུས་གཞུང་གི་རོགས་དངུལ་དེ་ཕྱི་ལོ་ ༢༠༡༥ ནས་གནང་སྟེ་ལོ་ལྔ་ཚན་གཅིག་ཚང་ཟིན་ཡོད་པ་དང་། འབྱུང་འགྱུར་ལོ་ལྔའི་ནང་ལོ་རེར་ཧིན་སྒོར་ས་ཡ་ ༨༠ རེ་བྱས་ཏེ་ཁྱོན་བསྡོམས་ས་ཡ་ ༤༠༠ གནང་གཏན་འཁེལ་ཡོད་པའི་སྐོར་གསུངས་འདུག

དེ་ཡང་ཕྱི་ལོ་ ༢༠༡༤ ཟླ་ ༡༠ ཚེས་ ༢༠ ཉིན་རྒྱ་གར་དབུས་ནང་སྲིད་ལས་ཁུངས་ཀྱིས་བཙན་བྱོལ་བོད་མིར་མཐུན་རྐྱེན་སྦྱོར་སྤྲོད་བྱེད་ཕྱོགས་ཀྱི་སྲིད་ཇུས་ (Tibetan Rehabilitation Policy 2014) ཞེས་པ་གཏན་འབེབས་གནང་སྟེ། འབྲེལ་ཡོད་མངའ་སྡེ་ཁག་གི་ནང་ལག་བསྟར་བཀོད་ཁྱབ་གནང་ཡོད་ཀྱང་། མངའ་སྡེ་ཁག་ཅིག་ནང་དབུས་གཞུང་གི་གཏན་འབེབ་ནང་གསལ་ལྟར་ལག་བསྟར་ཡོང་གི་ཡོད་མེད་ཀྱི་གནས་སྟངས་འོག་ད་ལྟའི་ཆར་དབུས་ནང་སྲིད་ལྷན་ཁང་ངོས་ནས་དབུས་སའི་འབྲེལ་ཡོད་ལས་ཁུངས་ཁག་ལ་འབྲེལ་བ་གནང་སྟེ་སྲིད་ཇུས་དེར་བསྐྱར་ཞིབ་བྱེད་ཀྱིན་ཡོད་འདུག

རྒྱ་གར་དབུས་གཞུང་གི་ལྟ་སྐྱོང་སྲིད་ཇུས་དེའི་ནང་༧གོང་ས་མཆོག་གི་མཚན་ཐོག་ཏུ་ཡོད་པའི་བོད་མིའི་ངལ་སེལ་ཚོགས་པ་རང་ནས་བཙན་བྱོལ་བོད་མིའི་བོགས་གཡར་ས་ཆ་རྣམས་བེད་སྤྱོད་གཏོང་ཕྱོགས་གང་དགེ་ཐག་གཅོད་གནང་ཆོག་པ་དང་། རྒྱ་གར་གཞུང་གི་ལས་ཁུངས་ནང་འཕྲོད་བསྟེན་གྱིས་མཚོན་ཤེས་རིག་དང་འབྲེལ་བའི་ལས་དོན་ཐོག་བོད་མིས་ལས་ཀ་བྱེད་ཆོག་པ་དང་། དེ་བཞིན་སྤྱི་ཚོགས་བདེ་དོན་དང་འབྲེལ་བའི་ཐོག་གཞུང་གི་ལས་འཆར་གང་འདྲ་ཞིག་ཡོད་རུང་སྐྱབས་བཅོལ་ལག་དེབ་ཡོད་ཚེ་ཐོབ་ཐང་ལེན་ཆོག་གི་ཡོད་སྐོར་སོགས་གསལ་ཡོད་ཀྱང་། མངའ་སྡེ་སོ་སོའི་ནང་ལག་བསྟར་གྱི་སྲིད་ཇུས་ཅུང་མ་འདྲ་བ་ཡོང་གི་ཡོད་པ་རེད།

གསར་འགོད་པ། པ་སངས་ཚེ་རིང་།