པཱ་ཀི་སི་ཐན་གྱི་སྲིད་བློན་ཨིམ་རཱན་ཁཱན་གནས་དབྱུང་བཏང་།

ཁ་སང་པཱ་ཀི་སི་ཐན་གྱི་གྲོས་ཚོགས་འོག་མས་སྲིད་བློན་ཨིམ་རཱན་ཁཱན་ལ་ཡིད་རྟོན་མེད་པའི་འོས་བསྡུ་བྱས་ཏེ། པཱ་ཀི་སི་ཐན་གྱི་དཔལ་འབྱོར་འཛིན་སྐྱོང་དང་ཕྱི་འབྲེལ་སྲིད་ཇུས་ཐད་བྱེད་འཛོལ་ཤོར་བའི་སྐྱོན་འཛུགས་འོག་མང་མོས་ཐོག་ནས་སྲིད་བློན་ཨིམ་རཱན་ཁཱན་གནས་དབྱུང་བཏང་ཡོད་འདུག

Pakistan PM Imran Khan, army chief Gen Qamar Javed Bajwa (centre) and defence minister Pervez Khattaq at a military parade. Image: AP/File

ཁ་སང་ཕྱི་ཚེས་ ༡༠ ཉིན་པཱ་ཀི་སི་ཐན་གྱི་གྲོས་ཚོགས་འོག་མས་ཡུལ་དེའི་སྲིད་བློན་ཨིམ་རཱན་ཁཱན་གྱིས་དཔལ་འབྱོར་འཛིན་སྐྱོང་དང་ཕྱི་འབྲེལ་སྲིད་ཇུས་ཐད་བྱེད་འཛོལ་ཤོར་བའི་དོགས་གཞིའི་འོག་ཡིད་རྟོན་མེད་པའི་འོས་ཤོག་ (No-Confidence Vote) བསྡུས་ཏེ་མང་མོས་ཀྱི་ཐོག་ནས་ཁོ་པ་སྲིད་བློན་ནས་གནས་དབྱུང་བཏང་སྟེ། དེ་སྔ་ཐེངས་གསུམ་ལ་པཱ་ཀི་སི་ཐན་གྱི་སྲིད་བློན་བྱས་མྱོང་ཞིང་ལྐོག་ཟ་རུལ་སུངས་བྱས་པའི་ནག་ཉེས་འོག་བཙོན་འཇུག་ཁྲིམས་ཆད་མྱངས་པའི་ཡུལ་དེའི་སྲིད་བློན་ཟུར་པ་ན་ཝ་ཛི་ཤ་རིབ་ (Nawaz Sharif) ཀྱི་གཅུང་པོ་དང་། ཨི་རཱན་ཁཱན་གྱི་ཁ་གཏད་གཙོ་བོ་ཤེ་བྷ་ཛི་ཤ་རིབ་ (Shehbaz Sharif) སྲིད་བློན་གསར་བར་འཁོད་སྲིད་པ་ཡིན་འདུག

གྲོས་ཚོགས་ཀྱི་འོས་བསྡུའི་གོང་ཏག་ཏག་དེར་སྲིད་བློན་ཨིམ་རཱན་ཁཱན་དང་ཁོ་བོའི་གཞུང་འཛིན་ཚོགས་པའི་འཐུས་མི་རྣམས་གྲོས་ཚོགས་ར་བ་ནས་ཕྱིར་ཐོན་པ་མ་ཟད། འོས་ཤོག་གི་གྲུབ་འབྲས་བསྒྲགས་རྗེས་ཁོ་པས་རང་གི་ཊུ་ཝི་ཊར་ཐོག པཱ་ཀི་སི་ཐན་འདི་ཉིད་ཕྱི་ལོ་ ༡༩༤༧ ལོར་རང་བཙན་ཐོབ་ཡོད། འོན་ཀྱང་། དེ་རིང་ཕྱིའི་རྒྱལ་ཁབ་ཀྱི་ངན་ཇུས་འོག་ནས་གཞུང་འཛིན་བརྗེ་བསྒྱུར་ལ་འགོག་རྒོལ་བྱེད་པའི་རང་དབང་འཐབ་རྩོད་བསྐྱར་དུ་འགོ་ཚུགས་ཡོད། རྒྱལ་ཁབ་ཀྱི་བདག་དབང་དང་དམངས་གཙོ་སྲུང་སྐྱོབ་བྱེད་མཁན་ནི་དུས་ནམ་ཡང་མི་མང་ཡིན། ཞེས་བརྗོད་འདུག་ལ། ཁོ་པར་རྒྱབ་སྐྱོར་བྱེད་མཁན་གྱི་མི་མང་ངོས་ནས་ངོ་རྒོལ་བྱ་དགོས་པའི་རེ་སྐུལ་བྱས་པ་ལྟར། ཁ་སང་ཕྱི་དྲོ་ནས་པཱ་ཀི་ཐན་གྱི་གྲོང་ཁྱེར་ཆེ་གྲས་ལཱ་ཧོར་(Lahore) དང་ར་ཝལ་ལིན་ཌི་ (Rawalpindi)། ཀ་ར་ཅི་ (Karachi) བཅས་ནང་མི་མང་སྟོང་ཕྲག་བརྒལ་བ་འདུ་འཛོམས་ཀྱིས་ངོ་རྒོལ་སྐད་འབོད་ལས་འགུལ་སྤེལ་བཞིན་ཡོད་པ་རེད།

Opposition supporters celebrated outside the Supreme Court after the court ruled the move to block a no-confidence vote was unconstitutional2

པཱ་ཀི་སི་ཐན་གྱི་ཁ་གཏད་ཚོགས་པ་གཙོ་གྲས་པཱ་ཀི་སི་ཐན་ཁ་ཆེའི་ཚོགས་པའི་(Pakistan Muslim League) མགོ་འཁྲིད་ཤེ་བྷ་ཛི་ཤ་རིབ་ཀྱིས་རང་གི་ཊུ་ཝི་ཊར་སྟེང་། པཱ་ཀི་སི་ཐན་ནང་སྐྱ་རེངས་གསར་བ་ཤར་སོང་། མཉམ་འདུས་སྲིད་དོན་ཚོགས་པས་པཱ་ཀི་སི་ཐན་བསྐྱར་སྐྲུན་བྱ་རྒྱུ་རེད། ཅེས་བརྗོད་ཡོད་ཀྱང་། ཁོ་པ་ཨིམ་རཱན་ཁཱན་གྱི་ཁ་གཏད་གཙོ་བོ་དེ་ཡིན་སྟབས། ཨིམ་རཱན་ཁཱན་གྱི་སྲིད་དོན་ཚོགས་པ་པཱ་ཀི་སི་ཐན་རྒྱལ་ཡོངས་དྲང་བདེན་ལས་འགུལ་ཚོགས་པས་ (Pakistan Tehreek-e-Insaf) གལ་ཏེ་ཤེ་བྷ་ཛི་ཤ་རིབ་ཀྱིས་རང་ཉིད་སྲིད་བློན་གྱི་འོས་མི་ནས་ཕྱིར་འཐེན་མ་བྱས་ཚེ། ཚོགས་པ་དེའི་གྲོས་ཚོགས་འཐུས་མི་ཚང་མས་རྩ་དགོངས་ཞུ་རྒྱུ་ཡིན་པ་མ་ཟད། ཁོ་པའི་གཞུང་ལ་མཐའ་གཅིག་ཏུ་འགོག་རྒོལ་གྱི་ལས་འགུལ་གཞི་རྒྱ་ཆེན་པོ་སྤེལ་རྒྱུ་ཡིན་པའི་ཉེན་བརྡ་བཏང་ཡོད་པ་རེད། འོན་ཀྱང་ད་ལྟའི་ཆར་པཱ་ཀི་སི་ཐན་གྱི་སྲིད་དོན་དབྱེ་ཞིབ་པ་ཕལ་ཆེ་བས་དེ་སྔ་ཡུལ་དེའི་གནད་འགག་ཆེ་བའི་པཱན་ཇབ་མངའ་སྡེའི་སྤྱི་ཁྱབ་བློན་ཆེན་བྱས་མྱོང་མཁན་ཤེ་བྷ་ཛི་ཤ་རིབ་སྲིད་བློན་གསར་བར་འདེམས་ཐོན་འབྱུང་སྲིད་པའི་ཚོད་དཔག་བྱེད་ཀྱིན་འདུག

འདས་པའི་ཟླ་བ་འགའ་ཤས་ནང་ཕྱིའི་རྒྱལ་ཁབ་ཀྱི་བུ་ལོན་སྤྲོད་འཇལ་མ་ཐུབ་པ་དང་། དངུལ་གྱི་ཡུལ་ཐང་ཆག་སྟེ་སྣུམ་དང་བཟའ་ཅའི་རིན་གོང་འཕར་བའི་རྐྱེན་གྱིས། མང་ཚོགས་ཁྲོད་ཨིམ་རཱན་ཁཱན་གྱིས་སྣེ་ཁྲིད་པའི་པཱ་ཀི་སི་ཐན་གྱི་གཞུང་ལ་འདོད་པ་མེད་པའི་རྣམ་པ་ཤུགས་ཆེར་མངོན་བཞིན་པའི་ཐོག པཱ་ཀི་སི་ཐན་རང་བཙན་ཐོབ་པ་ནས་བཟུང་ཡུལ་དེའི་ཆབ་སྲིད་ལ་ཕྱོགས་ཡོངས་ནས་ཁ་ལོ་བསྒྱུར་ཞིང་དུས་རྒྱུན་ཕན་ཚུན་དགྲ་ཟླར་གྱུར་བའི་ཕྱོགས་བརྒལ་པཱ་ཀི་སི་ཐན་ཁ་ཆེ་ཚོགས་པ་དང་། པཱ་ཀི་སི་ཐན་མི་མང་སྲིད་དོན་ཚོགས་པ་ (Pakistan Peoples Party) གཉིས་གཅིག་ཏུ་བསྒྲིལ་ཏེ། ཨིམ་རཱན་ཁཱན་ཁྲིམས་མཐུན་གྱི་ཐོག་ནས་ཡིད་རྟོན་མེད་པའི་འོས་ཤོག་བརྒྱུད་གནས་དབྱུང་གཏོང་ཐབས་བྱས་ཡོད་པ་རེད།

སྤྱིར་ཁ་གཏད་ཚོགས་པས་གྲོས་ཚོགས་འོག་མའི་ནང་ཡིད་རྟོན་མེད་པའི་འོས་ཤོག་དེ་ཉིད་ཟླ་འདིའི་ཕྱི་ཚེས་ ༣ ཉིན་ཁུར་ཡོད་ཀྱང་། དེ་སྔ་པཱ་ཀི་སི་ཐན་གྱི་རྒྱལ་ཡོངས་དབྱུག་རྩེད་སྤོ་ལོའི་ (Cricket) རྩེད་འགྲན་པ་གྲགས་ཅན་དང་། ཕྱི་ལོ་ ༢༠༡༨ ལོར་ལྐོག་ཟ་རུལ་སུངས་གཙང་བཟོ་བྱས་ཏེ་པཱ་ཀི་སི་ཐན་དེང་རབས་ཀྱི་ཕྱོགས་སུ་འཁྲིད་རྒྱུའི་ཁས་ལེན་འོག་ནས་སྲིད་བློན་དུ་བདམས་ཐོན་བྱུང་བའི་ཨིམ་རཱན་ཁཱན་གྱིས་བདེན་དཔང་མེད་པའི་ཐོག་ནས་ཁ་གཏད་ཚོགས་པ་དང་ཨ་རི་གཉིས་ནས་ངན་པ་ལག་སྦྲེལ་བྱས་ཏེ་ཁོ་པ་གནས་དབྱུང་གཏོང་རྩིས་བྱེད་ཀྱི་ཡོད་པའི་སྐྱོན་བརྗོད་བྱས་ཡོད་ལ། གྲོས་ཚོགས་འོག་མའི་ཚོགས་གཞོན་ཁ་སིམ་སུ་རི་ (Qasim Suri) ཨིམ་རཱན་ཁཱན་གྱི་གཞུང་འཛིན་ཚོགས་པའི་ཚོགས་མི་ཞིག་ཡིན་སྟབས། ཁ་གཏད་ཚོགས་པས་བཏོན་པའི་ཡིད་རྟོན་མེད་པའི་འོས་ཤོག་དེ་ཉིད་ཕྱིའི་རྒྱལ་ཁབ་ཀྱི་ངན་ཇུས་འོག་བྱུང་བ་ཞིག་ཡིན་པར་བརྟེན་རྩ་ཁྲིམས་དང་འགལ་ཡོད་སྐོར་བརྗོད་དེ་འོས་བསྡུའི་ལས་རིམ་རྩིས་མེད་བཏང་ཡོད་ཅིང་། དེའི་ཐོག་སྲིད་བློན་ཨིམ་རཱན་ཁཱན་གྱིས་ཡུལ་དེའི་སྲིད་འཛིན་ལ་བཀའ་མངག་བཏང་སྟེ་གྲོས་ཚོགས་ནུས་མེད་བཟོས་པ་བརྒྱུད་བར་བརྒལ་འོས་བསྡུ་འཚོག་དགོས་སྐོར་བརྗོད་པར་བརྟེན། ཁ་གཏད་ཚོགས་པ་རྣམས་ཀྱིས་ཡུལ་དེའི་ཆེས་མཐོའི་ཁྲིམས་ཁང་ལ་ཞུ་གཏུག་བྱས་ཏེ། ཟླ་འདིའི་ཕྱི་ཚེས་ ༧ ཉིན་ཆེས་མཐོའི་ཁྲིམས་ཁང་གིས་སྲིད་བློན་གྱི་ཐག་གཅོད་དེ་རྩ་ཁྲིམས་དང་འགལ་བ་ཞིག་ཡིན་པ་དང་། གྲོས་ཚོགས་ངོས་ནས་ཡིད་རྟོན་མེད་པའི་འོས་ཤོག་བསྡུ་དགོས་པའི་བཀའ་བཏང་བ་ཞིག་ཡིན་པ་རེད།

Supporters of ousted Prime Minister Imran Khan’s party take part in a rally in Peshawar on Sunday. (Photo: AP)

སྲིད་དོན་དབྱེ་ཞིབ་པ་རྣམས་ཀྱིས་ཕྱི་ལོ་ ༢༠༡༨ ལོར་ཨིམ་རཱན་ཁཱན་སྲིད་བློན་དུ་བདམས་ཐོན་བྱུང་བ་དེ། ཕྱོགས་གཅིག་ནས་ཁོ་པ་རྒྱལ་ཁབ་ཀྱི་དབྱུག་རྩེད་སྤོ་ལོའི་གྲགས་ཅན་ཞིག་ཡིན་པའི་རྐྱེན་གྱིས་མང་ཚོགས་ཀྱིས་དགའ་མོས་ཆེན་པོ་བྱས་པ་དང་། ཡང་ཕྱོགས་གཞན་ནས་ཡུལ་དེའི་སྲིད་དབང་ལ་དངོས་ཤུགས་བརྒྱུད་གསུམ་ནས་སྟངས་འཛིན་བྱེད་མཁན་གཙོ་བོ་དམག་གི་སྒྲིག་འཛུགས་དང་གསང་བའི་ལས་ཁུངས་ཀྱིས་ཁོ་པར་རྒྱབ་སྐྱོར་ཤུགས་ཆེན་བྱས་པའི་རྒྱུ་མཚན་གྱིས་ཡིན་པར་རྗོད་ཀྱིན་འདུག་ལ། ད་ལྟ་ཁོའི་དབང་ཐང་ཉམས་པའི་རྐྱེན་གཙོ་བོ་དེ་ཡང་དམག་གི་སྒྲིག་འཛུགས་དང་འགལ་ཟླར་གྱུར་བའི་རྐྱེན་གྱིས་ཡིན་པར་འགྲེལ་བརྗོད་བྱེད་ཀྱིན་འདུག

ད་བར་པཱ་ཀི་སི་ཐན་ལ་ལས་ཡུན་ལོ་ ༥ ཧྲིལ་པོ་སྲིད་བློན་གྱི་འགན་འཁུར་བླངས་མྱོང་བའི་མགོ་འཁྲིད་ཅིག་བྱུང་མྱོང་མེད་ཅིང་། ཨིམ་རཱན་ཁཱན་ནི་གྲོས་ཚོགས་ཀྱིས་ཡིད་རྟོན་མེད་པའི་འོས་ཤོག་བརྒྱུད་གནས་དབྱུང་བཏང་བའི་སྲིད་བློན་ཐོག་མ་དེ་ཆགས་ཀྱི་ཡོད་པ་རེད། པཱ་ཀི་སི་ཐན་གྱི་རྒྱལ་ཡོངས་འོས་བསྡུ་རྗེས་མ་དེ་ཕྱི་ལོ་ ༢༠༢༣ ཟླ་ ༡༠ པའི་ནང་བསྡུ་འཆར་ཡོད་སྟབས། སྐབས་དེར་ཨིམ་རཱན་ཁཱན་བསྐྱར་དུ་སྲིད་བློན་གྱི་འོས་བསྡུའི་འགྲན་བསྡུར་ནང་ཞུགས་གཏན་འཁེལ་ཡོད་འདུག

གསར་འགོད་པ། པ་སངས་ཚེ་རིང་།