ཧྥ་རན་སིའི་ལས་ཐོག་སྲིད་འཛིན་ལ་བསྐྱར་དུ་རྒྱལ་ཁ་འཐོབ་སྲིད་པའི་ཚོད་དཔག་བྱེད་ཀྱི་འདུག  

ཧྥ་རན་སིའི་སྲིད་འཛིན་འོས་བསྡུའི་གྲུབ་དོན་གྱིས་ཡུ་རོབ་མཐུན་ཚོགས་ཀྱི་འབྱུང་འགྱུར་རྒྱལ་སྲུང་བདེ་འཇགས་དང་རྒྱལ་ཁབ་ཉེར་བདུན་གྱི་ནུས་པ་མཉམ་སྤུངས་ཐད་ཤུགས་རྐྱེན་ཆེན་པོ་ཐེབས་སྲིད་པའི་ཚོད་དཔག་བྱེད་ཀྱི་ཡོད་འདུག

ཟླ་འདིའི་ཕྱི་ཚེས་ ༡༠ ཉིན་ཧྥ་རན་སིའི་འདི་ལོའི་སྲིད་འཛིན་གྱི་སྔོན་འགྲོའི་འོས་བསྡུ་བྱས་ཡོད་པ་དང་། སྲིད་འཛིན་འོས་མི་གྲངས ༡༢ ཡོད་པའི་ཁྲོད་ནས་སྲིད་འཛིན་ལས་ཐོག་སྐུ་ཞབས་མེཀ་རོན་ (Emmanuel Macron) ལ་འོས་ཤོག་བརྒྱ་ཆ་ ༢༧། ༨ དང་། ཧྥ་རན་སིའི་གཡས་ཕྱོགས་རིང་ལུགས་སམ་རྒྱལ་ཞེན་རིང་ལུགས་སྲིད་དོན་ཚོགས་པ་ (FN) ཡི་སྲིད་འཛིན་འོས་མི་མ་ལི་ཕིན་ (Marine Le Pen) ལ་འོས་ཤོག་བརྒྱ་ཆ་ ༢༣།༢ ཐོབ་སྟེ། ཁོང་གཉིས་དངོས་གཞིའི་འོས་མིར་འདེམས་ཐོན་བྱུང་ཡོད་འདུག་ལ། ཁོང་གཉིས་ཀྱིས་སྲིད་འཛིན་གྱི་དངོས་གཞིའི་རྒྱལ་ཕམ་རྩོད་ཐེངས་གཉིས་པ་དེ་ཆགས་ཡོད་འདུག

སྤྱིར་བཏང་ཧྥ་རན་སིའི་འོས་བསྡུའི་སྒྲིག་གཞིའི་ནང་འོས་མི་གང་རུང་ཞིག་ལ་འོས་ཤོག་བརྒྱ་ཆ་ ༥༠ ལོན་ཚེ་ཐད་ཀར་སྲིད་འཛིན་དུ་འོས་འདེམས་བྱུང་གི་ཡོད་ཀྱང་། ད་ལན་གྱི་འོས་གྲངས་མཐོ་ཤོས་གཉིས་ཀྱིས་བརྒྱ་ཆ ༥༠ ལོན་པར་ཧེ་བག་ཆེན་པོ་ཡོད་སྟབས། ཟླ་འདིའི་ཕྱི་ཚེས་ ༢༤ ཉིན་སྲིད་འཛིན་གྱི་དངོས་གཞིའི་འོས་བསྡུ་གནང་རྒྱུ་ཡིན་འདུག ད་བར་འོས་ཤོག་བླུགས་ཐེངས་དང་པོ་ནས་ཐད་ཀར་འོས་འདེམས་བྱུང་བའི་སྲིད་འཛིན་གཅིག་ཀྱང་བྱུང་མྱོང་མེད་འདུག ད་ལན་གྱི་འོས་བསྡུའི་ཁྲོད་དུ་འོས་གྲངས་མང་ཤོས་གཉིས་པ་ཐོབ་མཁན་གྱི་ལྕམ་མ་ལི་ཕིན་ལགས་ནི་ ༢༠༡༧ ལོའི་སྲིད་འཛིན་གྱི་འོས་ཤོག་མང་ཤོས་ཐོབ་མཁན་གཉིས་པ་དེ་ཆགས་ཡོད་ཀྱང་། དངོས་གཞིའི་འོས་བསྡུའི་སྐབས་སུ་ཕམ་ཡོད་འདུག

ཕྱི་ལོ་ ༢༠༡༧ ལོར་ལྕམ་ལི་ཕིན་ (Le Pen) ལགས་ལ་འོས་ཤོག་བརྒྱ་ཆ་ ༣༤།༥ དང་། སྐུ་ཞབས་མཱག་རོན་ (Macron) ལགས་ལ་དངོས་གཞིའི་ཁྲོད་འོས་ཤོག་བརྒྱ་ཆ་ ༦༥།༥ བཅས་ཐོབ་སྟེ། ཧྥ་རན་སིའི་ལོ་རྒྱུས་ནང་གི་སྲིད་འཛིན་ལོ་ན་གཞོན་ཤོས་དེ་ཆགས་ཡོད་ཅིང་།  སྐབས་དེར་ཧྥ་རན་སིའི་དཀའ་རྙོག་གཙོ་བོ་ནི་ལས་མེད་ཀྱི་གྲངས་འབོར་ཤུགས་ཆེན་པོ་ཡིན་སྟབས། སྐུ་ཞབས་མཱག་རོན་ལགས་ཀྱིས་འཆར་གཞི་ལྡན་པའི་ཐོག་ནས་ངལ་རྩོལ་དང་ཁྲལ་བསྡུ་ཡི་ཁྲིམས་སྒྲིག་བསྐྱར་བཟོས་བྱས་ནས་རྡོ་སྣུམ་དང་ས་སྣུམ་གོང་འཕར་པ་དང་། ཚད་སྙོམས་མིན་པའི་གཞུང་ཁྲལ་དེ་དག་གིས་མི་མང་གི་འཚོ་གནས་ལ་དོ་ཕོག་ཤུགས་ཆེན་བཟོས་ཡོད་སྟབས། སྟོད་གོས་སེར་པོའི་ངོ་རྒོལ་( yellow jackets protests) ལངས་ཡོད་ཀྱང་།  ཁོང་གིས་ཡུ་རོབ་རང་སྐྱོང་གནས་བབ་མཐོར་འདེགས་གཏོང་ཐབས་ལ་འབད་བརྩོན་ཆེན་པོ་བྱས་པ་སོགས་ལ་གྲུབ་འབྲས་གང་ལེགས་བྱུང་བར་བརྟེན་ཁོང་ལ་བསྔགས་བརྗོད་དང་ཡིད་ཆེས་བྱེད་མཁན་གང་ཙམ་བྱུང་ཡོད་འདུག ཁོང་གིས་སྔོན་འགྲོ་འོས་བསྡུར་སླེབས་པར་ཉིན་བརྒྱད་ཀྱི་སྔོན་དུ་འོས་བསྡུའི་དྲིལ་བསྒྲགས་བྱེད་མགོ་བརྩམས་ཡོད་ཅིང་། མུ་མཐུད་དུ་སྔར་ལས་ལྷག་པའི་འབད་འབུངས་བྱ་རྒྱུའི་དྲིལ་བསྒྲགས་བྱེད་སྐབས། གཞུང་ཁྲལ་སོགས་ཆག་ཡང་གཏང་འཆར་ཡོད་པ་མ་ཟད། སྤྱི་ཚོགས་བདེ་དོན་གྱི་སྒྲོམ་གཞི་བསྐྱར་སྒྲིག་བྱ་རྒྱུའི་ཁས་ལེན་བྱས་ཡོད་འདུག དེ་བཞིན་ཉེ་ལམ་ཡུ་རོབ་མཐུན་ཚོགས་ཀྱི་ཤར་ཕྱོགས་སུ་ཆགས་པའི་ཡུ་ཀེ་རན་དུ་དམག་འཁྲུག་ལང་མུས་ཡིན་སྟབས། གལ་ཏེ་མེག་རོན་ལ་འོས་ཤོག་ཐོབ་པ་ཡིན་ན་ཨུ་རུ་སུས་ཡུ་ཀེ་རན་ལ་བཙན་འཛུལ་བྱེད་མུས་ཡིན་པ་དེར་ཡུ་རོབ་མཐུན་ཚོགས་ཀྱིས་ནུས་པ་མཉམ་སྤུངས་བྱེད་ཐབས་བྱས་པ་དང་།  ཡུ་རོབ་མཐུན་ཚོགས་ཀྱི་རྒྱལ་སྲུང་གི་སླད་དུ་མཉམ་ལས་བྱེད་ཐུབ་པའི་ཚོད་དཔག་བྱེད་ཀྱི་ཡོད་པ་རེད་འདུག

སྲིད་འཛིན་མེཀ་རོན་ལགས་ལ་བསྐྱར་དུ་རྒྱལ་ཁ་འཐོབ་རྒྱུའི་རེ་བ་ཡོད་ཀྱང་། གནད་དོན་དབྱེ་ཞིབ་པ་ཚོས་མེཀ་རོན་དང་ལི་ཕིན་གཉིས་བར་གྱི་ཐེངས་འདིའི་རྒྱལ་ཕམ་གྱི་འགྲན་རྩོད་དེ་ནི་ཕྱི་ལོ ༢༠༡༧ ལོའི་འགྲན་རྩོད་དང་བསྡུར་ན་རྣོ་ངར་ཆེ་བ་ཡོད་པ་མ་ཟད། སྔོན་འགྲོའི་རྒྱལ་ཁ་དེ་དངོས་གཞིའི་སྐབས་སུ་གོ་ལྡོག་ཏུ་འགྱུར་ཉེན་ཡོད་པ་སོགས་རྗོད་ཀྱིན་འདུག

ལྕམ་མ་ལི་ཕིན་ (Le Pen)ལགས་ནི་ཧྥ་རན་སིའི་གཡས་ཕྱོགས་རིང་ལུགས་སམ་རྒྱལ་ཞེན་རིང་ལུགས་སྲིད་དོན་ཚོགས་པ་ (FN) ཡི་འགན་འཛིན་དང་། ཡུ་རོབ་གྲོས་ཚོགས་ཀྱི་འཐུས་མི་ཟུར་པ་ཞིག་ཡིན་འདུག་ལ།  ༢༠༡༧ ལོར་ཧྥ་རན་སིའི་སྲིད་འཛིན་གྱི་འོས་མིར་ལངས་ནས་དངོས་གཞིའི་འོས་མིར་འདེམས་ཐོན་བྱུང་ཡོད་ཀྱང་།  ལོ་དེར་ཁོང་མོ་ཨུ་རུ་སུའི་རྒྱལ་ས་མོ་སི་ཁོ་རུ་ཕྱིན་ནས་སྲིད་འཛིན་པུ་ཊིན་ལ་ཐུག་འཕྲད་བྱས་པ་མ་ཟད། ཁོང་མོའི་འོས་བསྡུའི་ཁྱབ་བསྒྲགས་སྐབས་སུ་ཨུ་རུ་སུའི་ལྐོག་ནས་དཔལ་འབྱོར་རོགས་རམ་བྱས་པའི་དོགས་གཞི་ཡོད་པ་དང་། པུ་ཊིན་གྱིས་ལི་ཕིན་ལ་རྒྱབ་སྐྱོར་ཡོད་པའི་རྣམ་འགྱུར་མངོན་གསལ་དུ་བསྟན་པ་སོགས་བྱུང་ཡོད་འདུག་ལ། ཁོང་མོས་ཧྥ་རན་སིར་གནས་སྤོར་བྱས་ཏེ་སྐྱབས་བཅོལ་དུ་ཡོང་མཁན་ཚོ་བཀག་སྡོམ་བྱ་འཆར་ཡོད་པ་མ་ཟད། ཕྱི་རོལ་དུ་ཁ་ཆེའི་བུད་མེད་རྣམས་ཀྱིས་མགོ་དཀྲིས་བཀག་སྡོམ་བྱ་རྒྱུ་ཡིན་སྟབས། དེས་ཁོང་མོའི་འོས་ཤོག་ལ་ཤུགས་རྐྱེན་ངེས་ཅན་ཐེབས་སྲིད་པའི་ཚོད་དཔག་བྱེད་མུས་ཀྱི་ཡོད་པ་རེད་འདུག

ད་ལོར་ཧྥ་རན་སིའི་སྲིད་འཛིན་འོས་འགྲན་ཁྲོད་འོས་མི་ ༡༢  ཁྲོད་བུད་མེད་གསུམ་གྱིས་ཆ་ཤས་བླངས་ཡོད་པ་དང་། འོས་བསྡུ་ཆེན་མོའི་བརྗོད་དོན་གཙོ་བོ་ཁག་ནི། འདི་ལོའི་ཟླ་གཉིས་པའི་ནང་ཨུ་རུ་སུས་ཡུ་ཀེ་རེན་ལ་བཙན་འཛུལ་བྱས་པའི་སྐོར་དང་། ཁོར་ཡུག་གི་གནད་དོན། སྐྱབས་བཅོལ་གནས་སྤོར། རྒྱལ་སྲུང་བཅས་ཀྱི་ཐོག་ལ་གླེང་སློང་ཤུགས་ཆེན་པོ་བྱེད་ཀྱི་ཡོད་འདུག

གསར་འགོད་པ། དཔལ་ལྡན།