ཁེ་ཎ་ཌའི་རྒྱལ་སྤྱིའི་བདེ་འཇགས་དང་ཐོབ་ཐང་ཉམས་ཞིབ་ཁང་གིས་རྒྱ་ནག་གཞུང་གིས་ཕྱི་ཚུལ་ནས་བོད་ནང་ཡར་རྒྱས་གཏོང་གི་ཡོད་པའི་ཁས་ལེན་ཙམ་ནས་དོན་དངོས་ཐོག་བོད་ནང་མུ་མཐུད་དམ་དྲག་བྱེད་བཞིན་ཡོད་པའི་སྙན་ཐོ་བཏོན།
ཁེ་ཎ་ཌའི་ནང་རྟེན་གཞི་བྱས་པའི་རྒྱལ་སྤྱིའི་བདེ་འཇགས་དང་ཐོབ་ཐང་ (IFFRAS) ཉམས་ཞིབ་ལྟེ་གནས་ཁང་གིས། རྒྱ་ནག་གཞུང་གིས་བོད་ནང་ཡར་རྒྱས་གཏོང་གི་ཡོད་པའི་དྲིལ་བསྒྲགས་དང་ཁས་ལེན་ཙམ་ལས། དོན་དངོས་ཐོག་མུ་མཐུད་བོད་ནང་འགྲོ་བ་མིའི་ཐོབ་ཐང་རྡོག་རོལ་གྱི་བྱ་སྤྱོད་སྤེལ་བཞིན་ཡོད་པ་མངོན་གསལ་ཡིན་སྐོར་གྱི་སྙན་ཐོ་ཞིག་བཏོན་གནང་འདུག
སྙན་ཐོ་དེའི་ནང་ཉེ་ལམ་རྒྱ་ནག་གཞུང་གིས་ཁམས་བྲག་མགོ་རུ་ཐུབ་དབང་དང་རྗེ་བཙུན་བྱམས་པ་མགོན་པོའི་སྐུ་བརྙན་གཏོར་བཤིག་གི་མཚོན་པའི་དོན་དག་མེད་པར་༧གོང་ས་མཆོག་གི་ཡང་སྲིད་ཀྱི་བདག་དབང་གླེང་བ་སོགས་ཆོས་དད་རང་དབང་བཀག་སྡོམ་གྱི་དྲག་གནོན་སྲིད་ཇུས་སྤེལ་བཞིན་ཡོད་པ་མ་ཟད། ཉེ་ལམ་ཁམས་བྲག་མགོའི་སྐུ་བརྙན་གཏོར་བཤིག་གི་བརྙན་པར་བརྒྱུད་སྐུལ་བྱས་པའི་ཉེས་མིང་འོག་གང་བྱུང་མི་མང་འཛིན་བཟུང་བྱས་པ་དང་། རྒྱ་ནག་གཞུང་གིས་བོད་ཁམས་ཡོངས་སུ་རྒྱ་སྒྱུར་སློབ་གསོའི་སྲིད་ཇུས་ལག་བསྟར་གྱིས། བོད་ཀྱི་སྐད་ཡིག་གི་རང་དབང་བཀག་སྡོམ་དང་། བོད་ཡིག་སློབ་འཁྲིད་བྱེད་མཁན་འཛིན་བཟུང་གིས་བོད་ཀྱི་སྐད་ཡིག་རྩ་མེད་གཏོང་གི་ཡོད་པ། དེ་བཞིན་ལས་ཀ་འཚོལ་སྒྲུབ་ཀྱི་ཡིག་རྒྱུགས་ཁག་རྒྱ་ཡིག་ནང་བཏང་སྟེ་མངོན་གསལ་དོད་པོའི་ཐོག་ནས་བོད་མི་རྣམས་ལ་ལས་ཀའི་དབྱེ་འབྱེད་བྱེད་ཀྱི་ཡོད་པ་དང་། བོད་ནང་འདྲ་མཉམ་མིན་པའི་སྲིད་ཇུས་འདྲ་མིན་ལག་བསྟར་གྱིས་བོད་མི་ཚོའི་གཞི་རྩའི་འགྲོ་བ་མིའི་ཐོབ་ཐང་གི་གནས་སྟངས་ཇེ་ཞན་དུ་འགྲོ་མུས་ཡིན་སྐོར་སོགས་བརྗོད་འདུག
འདི་ལོའི་ཨ་རིའི་རང་དབང་ཁང་པས་བོད་ནི་འཛམ་གླིང་གི་ཆེས་རང་དབང་མེད་པའི་རྒྱལ་ཁབ་དེ་ཡིན་སྐོར་བསྒྲགས་པ་ལྟར། སྙན་ཐོའི་ནང་འཛམ་གླིང་གི་རྒྱལ་ཁབ་དང་གཞུང་འབྲེལ་མིན་པའི་ཚོགས་སྡེ་ཁག་ཅིག་གིས། བོད་མི་རྣམས་ལ་སེམས་ཚོར་དང་རོགས་དངུལ་སྤྲོད་པ། དེ་བཞིན་རྒྱ་ནག་གཞུང་ལ་དཔལ་འབྱོར་གྱི་ཉེས་ཆད་གཅོད་པ་སོགས་ཀྱི་ལམ་ནས་རྒྱབ་སྐྱོར་བྱེད་བཞིན་ཡོད་ཀྱང་། གལ་སྲིད་དངོས་གནས་བོད་མི་རྣམས་ལ་གདུང་སེམས་མཉམ་བསྐྱེད་དང་རྒྱ་ནག་གཞུང་ལ་ནག་ཉེས་ཀྱི་འགན་འཁུར་དུ་འཇུག་འདོད་ཚེ། འཛམ་གླིང་རྒྱལ་ཁབ་དེ་དག་གིས་རང་གི་མཐུན་གྲོགས་རྒྱལ་ཁབ་ཁག་དང་མཉམ་འབྲེལ་གྱིས། རྒྱ་ནག་གཞུང་ལ་རྒྱ་ཆེ་ས་ནས་ཉེས་ཆད་བཅད་དེ་ཤུགས་རྐྱེན་སྤྲོད་དགོས་པ་དང་། དེ་ལྟར་བྱས་ཚེ་བོད་མི་ཙམ་མ་ཡིན་པར་འཛམ་གླིང་ཁྱོན་ཡོངས་སུ་བོད་མི་ནང་བཞིན་ད་ལྟ་རྒྱ་ནག་གི་དབང་སྒྱུར་འོག་མྱངས་བཞིན་པ་དང་མ་འོངས་པར་མྱང་སྲིད་པ་རྣམས་ལ་ཕན་ཐོགས་ཀྱི་ཡོད་སྐོར་སོགས་བརྗོད་འདུག
དམིགས་བསལ་སྙན་ཐོའི་ནང་རྒྱ་ནག་གཞུང་གིས། བོད་ཕྱི་ནང་གཉིས་ཀྱི་འབྲེལ་ལམ་ཐད་དམ་དྲག་ནན་མོ་བྱས་ཏེ། བོད་ནས་རྒྱ་གར་དུ་ཡོད་པའི་སྐྱབས་བཅོལ་བོད་མི་རྣམས་ལ་འབྲེལ་འདྲིས་བྱེད་མཁན་ཚོར་ཉེས་ཆད་དྲག་པོ་གཏོང་གི་ཡོད་ཅིང་། འདི་ལོའི་ཕྱི་ཟླ་ ༣ ནང་རྒྱ་ནག་གཞུང་གིས་བོད་ཀྱི་ལྷོ་ཕྱོགས་ཀྱི་མཐའ་མཚམས་ཁུལ་དུ། མི་གྲངས་ ༢༠༠༠ ཙམ་ཆེད་མངགས་ཀྱིས། གྲོང་གསེབ་ཀྱི་ཡུལ་མི་དང་ཕྱིའི་འབྲེལ་འདྲིས། འགྲིམས་འགྲུལ་སོགས་ལ་ཞིབ་བཤེར་དང་སྔར་ལྷག་དམ་དྲག་བྱེད་ཀྱི་ཡོད་པ་དང་། ཕྱི་ལོ་ ༢༠༡༩ ལོར་ཏོག་དབྱིབས་གཉན་རིམས་ཁྱབ་པ་དང་དེ་ལ་ཁ་གཡར་ནས་བོད་མི་རྣམས་དགོན་པར་མཆོད་མཇལ་དུ་བསྐྱོད་མི་ཆོག་པ་དང་ཆོ་ག་ཆོས་ལུགས་ལ་དམ་དྲག་བྱས་པ་མ་ཟད། དགོན་པ་ཁག་ཏུ་ནང་བསྟན་ཆོས་ལུགས་རྒྱ་ནག་ཅན་དུ་བསྒྱུར་དགོས་པའི་དམར་པོའི་ལྟ་གྲུབ་ཀྱི་ཟབ་སྦྱོང་སོགས་བཙན་གྱིས་སྤྲད་ཡོད་པ་གསལ་འདུག
ཉེ་ལམ་རྒྱ་ནག་གཞུང་གིས་སྐད་ཡིག་སློབ་གཉེར་གྱི་མཉེན་ཆས་ (Talkmate) དང་བརྙན་ལམ་ཐད་གཏོང་གི་མཉེན་ཆས་ (Bilibili) གཉིས་ཀྱི་ནང་བོད་ཡིག་བཀོལ་སྤྱོད་མེད་པར་བཟོས་ཡོད་ཅིང་། འདི་ལོའི་ཕྱི་ཟླ་ ༣ ཟླ་མཇུག་ཙམ་ལ་ཁམས་རིན་ཆེན་ཟེར་བའི་བོད་པའི་ཕོ་གསར་ཞིག་གིས་བརྙན་ལམ་ནས། དེང་སྐབས་རྒྱ་ནག་སྤྱི་དང་བོད་ནང་དར་ཁྱབ་ཆེ་ཞིང་རྒྱ་ནག་གཞུང་འབྲེལ་གྱི་ཐད་གཏོང་མཉེན་ཆས་མགྱོགས་འཕྲིན་(快手) ནང་བོད་སྐད་བོད་ཡིག་བཀོལ་སྤྱོད་བྱ་མི་ཆོག་པ་དང་གལ་སྲིད་བོད་སྐད་བོད་ཡིག་བཀོལ་སྤྱོད་བྱས་ཚེ། དྲ་ཐག་ཁ་བྱང་སྒོ་རྒྱག་པའམ་ལྟ་ཉན་བྱེད་མཁན་མེད་པར་བཟོ་བ་སོགས་དབྱེ་འབྱེད་ཀྱི་སྲིད་ཇུས་ལག་བསྟར་བྱེད་བཞིན་པར་ངོ་རྒོལ་དང་འབྲེལ། མགྱོགས་འཕྲིན་ (快手) ཚོང་གཉེར་ཁང་གིས་མི་རིགས་འདྲ་མཉམ་དང་། གྲངས་ཉུང་མི་རིགས་ཀྱི་ཁྲིམས་མཐུན་ཁེ་དབང་དང་ཁེ་ཕན་འགན་སྲུང་བཅས་སྲུང་སྐྱོབ་བྱ་དགོས་པའི་འབོད་སྐུལ་ཞུས་རྗེས། ཁམས་རིན་ཆེན་ལགས་སུ་རྒྱ་ནག་གཞུང་གིས་འདྲི་གཅོད་བྱས་ཡོད་སྐོར་བོད་མི་ཞིག་གིས་འགྲེལ་བརྗོད་གནང་སོང་།
གསར་འགོད་པ། སྐལ་བཟང་སྦྱིན་པ།
