བོད་ཀྱི་ཆབ་བཙོན་པ་བཀྲ་ཤིས་ལགས་ཀྱི་བཙོན་འཇུག་དུས་ཡུན་ལོ་ ༡༢ དེ་འདི་ལོའི་ཕྱི་ཟླ་ ༣ པའི་ནང་རྫོགས་ཀྱི་ཡོད་ཀྱང་ལོ་གསུམ་འཕར་འགྱང་བཏང་བར་བརྟེན་ཁོང་གི་བཟའ་ཟླ་སོགས་ཀྱིས་སེམས་སྡུག་ཆེན་པོ་བྱེད་བཞིན་འདུག
ཕྱི་ལོ ༢༠༡༠ ཟླ་ ༣ ནང་རྒྱ་ནག་གཞུང་གིས་མགོ་ལོག་རྨ་སྟོད་རྫོང་མཚོ་སྐྱ་རེངས་ཡུལ་ཚོའི་བོད་མི་བཀྲ་ཤིས་ལགས་ཀྱིས་རྒྱལ་ཁབ་ཀྱི་གསང་བ་ཕྱིར་བསྒྲགས་དང་། ཁ་བྲལ་རིང་ལུགས་ལ་ངན་བསྐུལ་བྱས་པའི་ཉེས་མིང་འོག མགོ་ལོག་རྨ་ཆེན་རྫོང་མི་མང་ཁྲིམས་ཁང་གིས་གསང་བའི་ཐོག་ནས་ལོ་ ༡༢ ཁྲིམས་ཐག་བཅད་ཡོད་པ་དང་། འདི་ལོའི་ཕྱི་ཟླ་ ༣ པའི་ནང་ཁོང་གི་བཙོན་འཇུག་དུས་ཡུན་རྫོགས་ཀྱི་ཡོད་ཀྱང་། ཁོང་གི་ཁྱིམ་མི་ཚོར་སྔོན་བརྡ་སོགས་གང་ཡང་མ་བཏང་བར་ཁོང་གི་བཙོན་འཇུག་དུས་ཡུན་ལོ་གསུམ་ཕར་འགྱངས་བཏང་ཟིན་ཡོད་འདུག་ལ། བོད་མི་བཀྲ་ཤིས་ལགས་སུ་བཙོན་འཇུག་ཁྲིམས་ཐག་བཅད་དེ་ལོ་ ༡༢ ཕྱིན་རྗེས་གཞི་ནས་གནས་ཚུལ་དེ་ཕྱི་ཕྱོགས་སུ་བསླེབས་ཡོད་པ་རེད།
འདི་གའི་གསར་འགོད་པར་ཁུངས་ལྡན་གནས་ཚུལ་འབྱོར་བ་ལྟར་ན། འདི་ལོར་བཀྲ་ཤིས་ལགས་ཀྱི་ཁྱིམ་མི་ཚོས་ཁོང་ཀློད་གྲོལ་བྱུང་ནས་ནང་མི་ལྷན་འཛོམས་ཡོང་རྒྱུར་སྒུག་ནས་བསྡད་ཡོད་ཀྱང་། བཀྲ་ཤིས་ལགས་ཀྱིས་བཙོན་རོགས་ལ་རྩོད་པ་བརྒྱབ་པའི་ཉེས་མིང་འོག་གསང་བའི་ཐོག་ནས་ལོ་གསུམ་འཕར་འགྱང་བྱས་ཡོད་པ་དང་། ད་ལྟའི་ཆར་རྒྱུ་མཚན་ངོ་མ་གང་ཡིན་ཁ་གསལ་ཤེས་རྟོགས་ཐུབ་ཀྱི་མེད་པ་རེད། ཁྱིམ་མི་ཚོས་ཁོང་གི་འཕྲོད་བསྟེན་ཐོག་སེམས་ཁྲལ་ཆེན་པོ་བྱེད་ཀྱིན་ཡོད་འདུག ལྷག་པར་དུ་ཁོང་གི་བཟའ་ཟླ་དབྱངས་སྐྱིད་ལགས་ཀྱིས་སེམས་སྡུག་ཆེན་པོ་བྱེད་བཞིན་ཡོད་སྐོར་འགྲེལ་བརྗོད་བྱས་བྱུང་།
གནས་ཚུལ་མཁོ་སྤྲོད་པས་བརྗོད་པ་ལྟར་ན། བཀྲ་ཤིས་ལགས་བཙོན་འཇུག་བྱས་རྗེས། ཁོང་གི་བཟའ་ཟླ་དང་བུ་མོར་སྐར་མ་ཁ་ཤས་རིང་ཐུག་ཕྲད་བྱས་བཅུག་ཡོད་ཀྱང་། སྐབས་དེར་ཁོང་གི་རྐང་ལག་གཉིས་ཀར་ལྕགས་སྒྲོག་བརྒྱབ་ཡོད་ཅིང་། ཕྱིས་སུ་ཁོང་ཟི་ལིང་གི་བཙོན་ཁང་ཞིག་ཏུ་འཁྲིད་ཡོད་འདུག ཟི་ལིང་དུ་འཁྲིད་རྗེས་ནང་མི་ཚོར་ཐུག་འཕྲད་ཐེངས་འགའ་བྱས་བཅུག་ཡོད་ཀྱང་། ལྟ་སྲུང་བ་འགྲམ་དུ་ལངས་ཏེ་ཤེལ་སྒོའི་ཕྱི་ནང་ནས་ཁ་པར་བརྒྱུད་སྐར་མ་ ༡༥ ནས་༣༠ བར་སྐད་ཆ་བཤད་བཅུག་ཡོད་འདུག
ད་ལྟ་རང་ལོ་སུམ་ཅུ་སོ་སྟོད་ཡིན་པའི་བོད་མི་བཀྲ་ཤིས་ལགས་ནི་དཀར་མཛེས་ཁུལ་དགེ་སྡེ་ནས་ཡིན་ཞིང་། ཁོང་གི་ནང་མི་དང་བཟའ་ཟླ་རྣམས་མགོ་ལོག་རྨ་སྟོད་རྫོང་གི་མཚོ་སྐྱ་རེངས་ཡུལ་ཚོའི་ཆུ་མགོ་སྡེ་གསར་དུ་ཡོད་འདུག
