ཨ་རི་དང་ཡུ་རོབ་ཀྱི་གྲོས་ཚོགས་འཐུས་མི་མང་པོས་ཐའེ་ཝན་ནང་གཟིགས་སྐོར་གནང་།

ཨ་རིའི་གྲོས་ཚོགས་གོང་མའི་འཐུས་མི་དྲུག་ཐའེ་ཝན་ནང་འབྱོར་ཏེ་ཉིན་གྲངས་གཉིས་རིང་གཟིགས་སྐོར་གནང་བཞིན་ཡོད་པ་དང་བསྟུན་རྒྱ་ནག་གཞུང་གིས་ཐའེ་ཝན་གྱི་མཐའ་འཁོར་དུ་འཐབ་འཁྲུག་གནམ་གྲུ་དང་དམག་གྲུ་སོགས་བཏང་ནས་འཇིགས་སྐུལ་བྱས་ཡོད་འདུག

ཁ་སང་ཕྱི་ཚེས་ ༡༤ ནས་ཉིན་གཉིས་རིང་ཨ་རིའི་གྲོས་ཚོགས་གོང་མའི་འཐུས་མི་ལིན་སི་གྷར་ཧམ་(Lindsey Graham)ལགས་དང་ཨ་རིའི་ཕྱི་སྲིད་ལྷན་ཁང་གི་འགན་འཛིན་དང་གྲོས་ཚོགས་གོང་མའི་འཐུས་མི་རོ་བྷིར་ཊི་(Robert Menendez)། གྲོས་ཚོགས་གོང་མའི་འཐུས་མི་ (Richard Burr) དང་ (Ben Sasse)། (Rob Portman)། ཨ་རིའི་གྲོས་ཚོགས་འོག་མའི་འཐུས་མི་ (Ronny Jackson) བཅས་འཐུས་མི་དྲུག་གིས། ཐའེ་ཝན་ནང་གཟིགས་སྐོར་གནང་སྟེ་སྲིད་འཛིན་ཚའེ་ཡེན་ཝུན་མཆོག་དང་། ཕྱི་སྲིད་བློན་ཆེན་ཇོ་སེབ་ཝུ་སོགས་ལ་མཇལ་མོལ་གནང་ཡོད་པ་དང་། ཟླ་འདིའི་ཕྱི་ཚེས་ ༧ ཉིན་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནན་སེ་པེ་ལོ་སི་(Nancy Pelosi) མཆོག་ཐའེ་ཝན་ནང་ཕེབས་འཆར་ཡོད་པའི་གནས་ཚུལ་ཐོན་ཡོད་ཀྱང་། ལྕམ་སྐུ་མཆོག་ལ་ཏོག་དབྱིབས་ནད་རྟགས་ཐོན་ཡོད་པ་དང་། རྒྱ་ནག་གཞུང་ཕྱོགས་ནས་ཕེབས་མི་ཆོག་པའི་སྐྱོན་བརྗོད་ཤུགས་ཆེན་བྱས་ཡོད་པ་རེད།

ཐའེ་ཝན་གཞུང་གི་མགྲིན་ཚབ་པ་ཞ་ཝེ་ཁྲང་ (Xavier Chang) གིས། ཨ་རིའི་གྲོས་ཚོགས་འཐུས་མི་ཐའེ་ཝན་ནང་གཟིགས་སྐོར་དུ་ཕེབས་པ་དེས་ཨ་རིའི་གཞུང་གིས་ཐའེ་ཝན་ལ་རྒྱབ་སྐྱོར་བྱེད་ཀྱི་ཡོད་པ་གསལ་སྟོན་བྱས་པ་ཙམ་མིན་པར། ཐའེ་ཝན་དང་ཨ་རི་དབར་གྱི་འབྲེལ་ལམ་གཏིང་ཟབ་པོ་ཡོད་པ་གསལ་སྟོན་བྱེད་ཀྱི་ཡོད་པ་རེད། ཅེས་དང་། ཐའེ་ཝན་དང་ཨ་རིའི་དབར་གྱི་འབྲེལ་ལམ་མུ་མཐུད་དུ་སྲ་བརྟན་ཡོང་ཐུབ་རྒྱུ་དང་། འཛམ་གླིང་ཞི་བདེ་དང་ཡར་རྒྱས་གོང་འཕེལ་ཡོང་བར་ཕན་ཐོགས་ཡོང་ཐུབ་པའི་རེ་བ་ཡོད་སྐོར་བརྗོད་འདུག

ཁ་སང་རྒྱུན་ལྡན་གྱི་གསར་འགོད་ལྷན་ཚོགས་ཤིག་གི་ཐོག་རྒྱ་ནག་ཕྱི་སྲིད་ལས་ཁུངས་ཀྱི་མགྲིན་ཚབ་པ་ཀྲའོ་ལི་ཅན་ (Zhao Lijian) གྱིས། ཨ་རི་དང་ཐའེ་ཝན་གཉིས་ཀྱི་འབྲེལ་ལམ་ལ་མཐའ་གཅིག་ཏུ་ངོ་རྒོལ་་ཡོད་ལ། མུ་མཐུད་རྒྱ་ནག་གཞུང་གིས་མངའ་ཁོངས་སྲུང་སྐྱོབ་ཐད་བློ་རྩ་བརྟན་པོ་ཡོད་སྐོར་བརྗོད་འདུག་པ་མ་ཟད། དེ་རིང་རྒྱ་ནག་གཞུང་གིས་འཐབ་འཁྲུག་གནམ་གྲུ་དང་འབར་རྫས། དམག་གྲུ་སོགས་བཏང་སྟེ་ཐའེ་ཝན་མཐའ་འཁོར་དུ་འཇིགས་སྐུལ་དྲག་པོ་བྱས་ཡོད་འདུག

ཟླ་འདིའི་ཕྱི་ཚེས་ ༧ ཉིན་ལྕམ་སྐུ་ནན་སེ་པེ་ལོ་སི་མཆོག་ཐའེ་ཝན་ནང་ཕེབས་འཆར་ཡོད་པའི་གནས་ཚུལ་ཐོན་པ་དང་སྦྲགས། རྒྱ་ནག་གཞུང་གིས་ཨ་རྒྱ་གཉིས་ཀྱི་འབྲེལ་བར་དོ་ཕོག་ཆེན་པོ་ཐེབས་རྒྱུ་ཡིན་སྟབས་འཕྲལ་དུ་ཕྱིར་འཐེན་དགོས་སྐོར་དང་། ཨ་རིས་མུ་མཐུད་ཐའེ་ཝན་ལ་འབྲེལ་ལམ་བཟུང་བ་ཡིན་ན་རྒྱ་ནག་གིས་ཡ་ལན་སློག་རྒྱུ་ཡིན་ལ། དེའི་མཇུག་འབྲས་གང་བྱུང་གི་འགན་ཆ་ཚང་ཨ་རིས་འཁུར་དགོས་པའི་ཉེན་བརྡ་བཏང་ཡོད་པ་རེད།

སི་ཝེ་ཌིན་གྲོས་ཚོགས་ཀྱི་སི་ཐའེ་གྲོས་ཚོགས་ཀྱི་རྒྱབ་སྐྱོར་ཚོགས་པས་སྣེ་འཁྲིད་པའི་འཐུས་མི་ ༡༡ དང་། དེ་བཞིན་ཡུ་རོབ་མཐུན་ཚོགས་ཀྱི་གྲོས་ཚོགས་འཐུས་མི་གཅིག་བཅས་ཀྱིས་ཐའེ་ཝན་ནང་ཉིན་གྲངས་ལྔ་རིང་གཟིགས་སྐོར་གནང་ཡོད་པ་ལྟར། ཟླ་འདིའི་ཕྱི་ཚེས་ ༡༢ ཉིན་ཐའེ་ཝན་གྱི་སྲིད་འཛིན་ཚའེ་ཡེན་ཝུན་མཆོག་དང་ལྷན་དུ་དྲ་ལམ་བརྒྱུད་གླེང་མོལ་གནང་ཡོད་པ་དང་། སྐབས་དེར་སྲིད་འཛིན་ཚའེ་ཡེན་ཝུན་མཆོག་གིས། ཐའེ་ཝན་དང་སི་ཝེ་ཌིན་གཉིས་ཀྱིས་སྤྱི་ཡོངས་ནས་རང་དབང་དང་དམངས་གཙོ་ལ་རིན་ཐང་སྤྲོད་དགོས་པའི་ལངས་ཕྱོགས་གཅིག་པ་ཡིན་སྟབས། འཛམ་གླིང་གི་དམངས་གཙོ་དོན་དུ་གཉེར་བའི་རྒྱལ་ཁབ་རྣམས་མཉམ་འབྲེལ་དགོས་པ་དེ་གལ་ཆེན་པོ་ཡིན་སྐོར་དང་། དེ་བཞིན་འཐུས་མི་རྣམས་ནས་ཀྱང་ཐའེ་ཝན་གྱི་རང་དབང་དང་དམངས་གཙོ་སྲུང་སྐྱོབ་བྱ་རྒྱུ་དེ་སོ་སོའི་འོས་འགན་ཞིག་ཡིན་ལ། ཐའེ་ཝན་དང་ཡུ་རོབ་མཐུན་ཚོགས་བར་གྱི་མཐུན་གྲོས་མུ་མཐུད་ཡོང་ཐབས་གནང་རྒྱུ་ཡིན་པའི་ཁས་ལེན་གནང་ཡོད་འདུག

རྒྱ་ནག་གཞུང་གིས་སྐྱོན་བརྗོད་བྱས་མིན་ལ་མ་ལྟོས་པར་ཨ་རིའི་གནད་ཡོད་མི་སྣ་ཁག་ཅིག་སྔ་རྗེས་སུ་ཐའེ་ཝན་ནང་ཕྱིན་ཡོད་པ་དང་། འདི་ལོའི་ཕྱི་ཟླ་ ༣ ཚེས་ ༢ ནས་ཉིན་གྲངས་ ༤ རིང་ཨ་རིའི་རྒྱལ་སྲིད་བློན་ཆེན་ཟུར་པ་མེག་པམ་པུ་མཆོག་གཞུང་འབྲེལ་མིན་པའི་ཐོག་ནས་ཐའེ་ཝན་ནང་ཕེབས་ཡོད་པ་མ་ཟད། ཨ་རིའི་གཞུང་ནས་ཐའེ་ཝན་ཐོག་བཟུང་བའི་ལངས་ཕྱོགས་ལ་དྲང་ཕྱོགས་ཀྱི་གོམ་པ་གསར་པ་ཞིག་སྤོ་དགོས་སྐོར་དང་། ཐའེ་ཝན་ནི་རང་བཙན་གཙང་མའི་རྒྱལ་ཁབ་ཅིག་ཡིན་པས་རང་བཙན་གསལ་བསྒྲགས་དགོས་དོན་མེད་སྐོར་སོགས་གསུངས་ཡོད་འདུག་ལ། ཐའེ་ཝན་གཞུང་ནས་ཀྱང་ཁོང་ལ་ཆེ་བསྟོད་ཕུལ་ཡོད་འདུག སྐུ་ཚབ་མེག་པམ་པུ་མཆོག་སྐབས་རྗེས་མའི་ཨ་རིའི་སྲིད་འཛིན་གྱི་འོས་མི་ཞིག་ཏུའང་ངོས་འཛིན་བྱེད་ཀྱི་ཡོད་པ་རེད།

གསར་འགོད་པ། བསྟན་འཛིན་ཕུར་བུ།