བོད་ཁུལ་དུ་རྒྱལ་ཁབ་བདེ་འཇགས་སློབ་གསོའི་ཉིན་མོ་ཟེར་བ་ཞིག་སྲུང་གཙི་བྱས་འདུག

ཟླ་འདིའི་ཕྱི་ཚེས་ ༡༥ ཉིན་ནི་རྒྱལ་ཁབ་བདེ་འཇགས་སློབ་གསོ་ཉིན་མོའི་ཟེར་བ་ཞིག་ཡིན་ལུགས་བཤད་དེ་རྒྱ་ནག་དམར་ཤོག་གི་ཁྱད་ཆོས་ལྡན་པའི་རྒྱལ་ཁབ་ཀྱི་བདེ་འཇགས་འགྲོ་ལམ་མཐའ་འཁྱོངས་བྱེད་དགོས་ཟེར་བ་སོགས་ཀྱི་ཆབ་སྲིད་དྲིལ་བསྒྲགས་བྱས་འདུག

ཁ་སང་རྒྱ་ནག་གཞུང་གིས་བོད་མགོ་ལོག་ཁུལ་གྱི་ས་གནས་ཁག་ཅིག་ཏུ་དམངས་ཡོངས་ཀྱི་རྒྱལ་ཁབ་བདེ་འཇགས་སློབ་གསོའི་ཉིན་མོ་ཟེར་བའི་བྱ་འགུལ་ཞིག་སྤེལ་ཏེ། གནད་ཆེན་ལྔ་དང་། འབྲེལ་བ་ལྔ། མཐའ་འཁྱོངས་བྱེད་དགོས་པ་བཅུ་ཟེར་བ་སོགས་ཀྱི་དྲིལ་བསྒྲགས་ཚོགས་འདུ་བསྡུས་པ་དང་། ས་གནས་ཀྱི་དགོན་པ་དང་སློབ་གྲྭ། དེ་བཞིན་ལས་ཡུལ་གང་སར་རྒྱལ་ཁབ་བདེ་འཇགས་ཀྱི་སྤྱིའི་ལྟ་བ་བརྟན་པོ་བཙུགས་ནས་དུས་རབས་གསར་པའི་རྒྱལ་ཁབ་བདེ་འཇགས་ཀྱི་གྲུབ་འབྲས་གསར་པ་ཚོར་པར་བྱེད་ཅེས་པའི་ཡིག་ཆ་ཞིག་འགྲེམས་སྤེལ་བྱེད་བཞིན་འདུག

ནགས་ཚལ་དང་ཁོར་ཡུག་སྲུང་སྐྱོབ་ལ་ཁ་གཡར་ཏེ་ས་གནས་བོད་མི་ཚོ་དྲིལ་བསྒྲགས་ཀྱི་ལག་ཆར་བེད་སྤྱོད་གཏོང་གི་ཡོད་པའི་ཐད་ནས་འདི་གའི་གསར་འགོད་པར་བོད་མི་གཉིས་ཀྱིས། ཉེ་ལམ་རྒྱ་ནག་གཞུང་གིས་མགོ་ལོག་ཕྱོགས་ཀྱི་ས་གནས་མང་པོ་ཞིག་ཏུ་ནགས་ཚལ་དང་ཁོར་ཡུག་སྲུང་སྐྱོབ་བྱ་དགོས་ཟེར་ནས་ཡིག་ཆ་ཨང་དང་པོ་ཟེར་བ་ཞིག་ལག་བསྟར་བྱ་དགོས་སྐོར་བརྗོད་དེ། ས་གནས་ཀྱི་མགོ་འཁྲིད་ཚོས་མི་མང་རྣམས་ལ་རི་ཁ་སོགས་སུ་དྲིལ་བསྒྲགས་ཀྱི་རུ་དར་དང་འཕྲེད་དར་སོགས་འཕྱར་བཅུག་ཏེ་པར་བཏབ་ནས་སློབ་གསོ་ཤུགས་ཆེན་སྤེལ་ཡོད་ལུགས་དྲིལ་བསྒྲགས་བྱེད་ཀྱི་ཡོད་ཀྱི་འདུག་ཀྱང་། སྐད་ཆ་བཤད་པ་དང་ཡིག་ཆ་བཀྲམ་པའི་ནང་དུ་ཞི་ཅིན་ཕིན་གྱིས་སྣེ་ཁྲིད་པའི་རྒྱལ་ཁབ་ལ་དགའ་ཞེན་དང་རྒྱལ་ཁབ་ཀྱི་བདེ་འཇགས་སྲུང་སྐྱོབ་བྱ་དགོས་སྐོར་གྱི་སློབ་གསོ་རྐྱང་རྐྱང་སྤེལ་བཞིན་ཡོད་སྐོར་བརྗོད་བྱུང་།

གཞུང་འབྲེལ་དྲ་ལམ་དུ་ཡུལ་ཚོ་གཅིག་རེའི་ནང་དྲིལ་བསྒྲགས་ཡིག་ཆ་ ༡༠༠༠ ལྷག་བཀྲམ་ཡོད་སྐོར་བཀོད་འདུག་ལ། ཡིག་ཆ་དེའི་ནང་དུ་གནད་ཆེན་བཅུ་དང་འབྲེལ་བ་ལྔ། མཐའ་འཁྱོངས་སུ་བྱེད་དགོས་བཅུ་སོགས་བོད་རྒྱ་གཉིས་ཀྱི་ནང་དུ་སྤེལ་འདུག་ལ། གནད་ཆེན་ལྔ་ནི་ཆབ་སྲིད་ཀྱི་བདེ་འཇགས་རྩ་བར་འཛིན་དགོས། མི་དམངས་ཀྱི་བདེ་འཇགས་དམིགས་ཡུལ་དུ་འཛིན་དགོས། དཔལ་འབྱོར་གྱི་བདེ་འཇགས་རྨང་གཞིར་བྱེད་དགོས། རྒྱལ་སྤྱིའི་བདེ་འཇགས་ལ་སྐུལ་འདེད་གཏོང་རྒྱུ་གཞི་རྟེན་དུ་བྱེད་དགོས། དམག་དོན་དང་ཚན་རྩལ། རིག་གནས། སྤྱི་ཚོགས་བཅས་ཀྱི་བདེ་འཇགས་འགན་སྲུང་བྱེད་དགོས་བཅས་རེད་འདུག

དེ་བཞིན་མཐའ་འཁྱོངས་བྱེད་དགོས་པ་བཅུ་ཟེར་བ་ནི། རྒྱལ་ཁབ་ཀྱི་བདེ་འཇགས་ལས་དོན་ལ་ཏང་གིས་འགོ་ཁྲིད་གཙང་བཙན་བྱེད་རྒྱུ་མཐའ་འཁྱོངས་བྱེད་དགོས། ཀྲུང་གོའི་ཁྱད་ཆོས་ལྡན་པའི་རྒྱལ་ཁབ་ཀྱི་བདེ་འཇགས་འགྲོ་ལམ་མཐའ་འཁྱོངས་བྱེད་དགོས། མི་དམངས་ཀྱི་བདེ་འཇགས་དམིགས་ཡུལ་དུ་བྱེད་རྒྱུ་མཐའ་འཁྱོངས་བྱེད་དགོས། འཕེལ་རྒྱས་དང་བདེ་འཇགས་ལ་སྤྱི་འདོམས་བྱེད་པ་མཐའ་འཁྱོངས་བྱེད་དགོས། ཆབ་སྲིད་ཀྱི་བདེ་འཇགས་དེ་ཨང་དང་པོར་འཇོག་རྒྱུ་མཐའ་འཁྱོངས་བྱེད་དགོས། ཁྱབ་ཁོངས་ཁག་གི་བདེ་འཇཊ་ལ་སྤྱི་འདོམས་སྐུལ་འདེད་གཏོང་རྒྱུ་མཐའ་འཁྱོངས་བྱེད་དགོས། རྒྱལ་ཁབ་བདེ་འཇགས་ཀྱི་ཉེན་ཁ་འགོག་སེལ་བྱེད་རྒྱུ་དེ་མངོན་གསལ་དོད་པའི་གནས་བབ་ཐོག་འཇོག་རྒྱུ་མཐའ་འཁྱོངས་བྱེད་དགོས། རྒྱལ་སྤྱིའི་ཐུན་མོང་གི་བདེ་འཇགས་ལ་སྐུལ་འདེད་གཏོང་རྒྱུ་མཐའ་འཁྱོངས་བྱེད་དགོས། རྒྱལ་ཁབ་བདེ་འཇགས་མ་ལག་དང་ནུས་པ་དེང་རབས་ཅན་ལ་སྐུལ་འདེད་གཏོང་རྒྱུ་མཐའ་འཁྱོངས་བྱེད་དགོས། རྒྱལ་ཁབ་བདེ་འཇགས་ཀྱི་ལས་བྱེད་པའི་དཔུང་ཁག་འཛུགས་སྐྱོང་ལ་ཤུགས་སྣོན་རྒྱག་རྒྱུ་མཐའ་འཁྱོངས་བྱེད་དགོས་པ་བཅས་རེད་འདུག

གསར་འགོད་པ། དཔལ་ལྡན།