མི་ཚེ་གཅིག་ལ་སྐྱེ་བ་གསུམ་ཞེས་པའི་༧ཀིརྟི་རིན་པོ་ཆེའི་མཛད་རྣམ་ཕྱག་དེབ་ཅིག་དབུ་འབྱེད་གནང་སོང་།

ཕྱི་ལོ་ ༢༠༡༢ ནས་ད་བར་འདས་པའི་ལོ་ངོ་བཅུའི་རིང་རྒྱ་རིགས་རྩོམ་པ་པོ་ལི་ཅང་ལིན་ལགས་ཀྱིས་བརྩམས་གནང་བའི་༧ཀིརྟི་རིན་པོ་ཆེའི་མཛད་རྣམ་གྱི་དཔེ་དེབ་ཅིག་འགྲེམས་སྤེལ་དབུ་འབྱེད་གནང་སོང་།

དེ་རིང་ཉིན་རྒྱབ་ཆུ་ཚོད་ ༢།༣༠ སྟེང་གངས་སྐྱིད་བོད་ཀྱི་དཔེ་མཛོད་ཁང་གི་ཚོགས་ཁང་དུ། ཀིརྟིའི་དགེ་རྩ་ཚོགས་པའི་གོ་སྒྲིག་དང་རྒྱ་རིགས་བོད་དོན་རྒྱབ་སྐྱོར་བ་ལི་ཅང་ལིན་ལགས་ཀྱིས་བརྩམས་པའི་༧སྐྱབས་རྗེ་བཀའ་ཟུར་ཀིརྟི་རིན་པོ་ཆེ་མཆོག་གི་མཛད་རྣམ་མི་ཚེ་གཅིག་ལ་སྐྱེ་བ་གསུམ་ཞེས་དབྱིན་བོད་གཉིས་ཀྱི་དཔེ་དེབ་དབུ་འབྱེད་ཀྱི་མཛད་སྒོ་ཞིག་ཚུགས་སོང་བ་དང་། མཛད་སྒོའི་སྟེང་སྐུ་མགྲོན་གཙོ་བོ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་། དམིགས་བསལ་སྐུ་མགྲོན་དུ་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་དང་བོད་ཀྱི་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་ལགས་བཅས་དང་། སྤྱི་འཐུས་ཚོགས་གཞོན་སྒྲོལ་མ་ཚེ་རིང་མཆོག་གི་དབུས་པའི་བོད་མི་མང་སྤྱི་འཐུས་ཁག་ཅིག་དང་། བཞུགས་སྒེར་ཁུལ་གྱི་མཁས་དབང་དང་ཉམས་ཞིབ་པ། རྩོམ་པ་པོ་སོགས་ཁྱོན་མི་གྲངས་བརྒྱ་ལ་ཉེ་བ་འཛོམས་འདུག

མཛད་རིམ་སྟེང་སྲིད་སྐྱོང་སྤེན་པ་ཚེ་རིང་མཆོག་དང་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག དེ་བཞིན་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་བཅས་ནས་༧སྐྱབས་རྗེ་བཀའ་ཟུར་ཀིརྟི་རིན་པོ་ཆེ་མཆོག་གི་མཛད་རྣམ་མི་ཚེ་གཅིག་ལ་སྐྱེ་བ་གསུམ་ཞེས་པའི་དཔེ་དེབ་དབུ་འབྱེད་གནང་མཚམས་སུ། ཀིརྟི་དགོན་པའི་ཤེས་ཡོན་འགན་འཛིན་དང་རྩོམ་པ་པོ་རེ་མདོ་སེང་གེ་ལགས་ནས་དཔེ་དེབ་ཀྱི་བྱུང་རིམ་སྐོར་ལ་ངོ་སྤྲོད་གནང་སྐབས། མི་ཚེ་གཅིག་ལ་སྐྱེ་བ་གསུམ་ཞེས་པའི་ཕྱག་དེབ་དེ་ནི། ཀིརྟི་རིན་པོ་ཆེའི་སྐུ་ཚེའི་བྱུང་བ་རྣམས་རིམ་པ་གསུམ་ལ་དབྱེ་ཡོད་པ་ལས། དང་པོ་སྐྱབས་རྗེ་ཀིརྟི་རིན་པོ་ཆེ་མཆོག་མདོ་སྨད་ཀྱི་ཐེ་བོ་སྟག་མོ་སྒང་གི་ཞིང་པའི་གྲོང་གསེབ་ཆུང་ཆུང་ཞིག་ཏུ་སྐུ་འཁྲུངས་རྗེས། ཀིརྟི་རིན་པོ་ཆེ་སྐུ་གོང་མའི་ཡང་སྲིད་དུ་ངོས་བཟུང་བ་ནས། ཡུལ་ལུང་ཞིག་གི་འདི་ཕྱི་གཉིས་ཀྱི་སྐྱབས་གནས་དང་བླ་ན་མེད་པའི་ཆོས་སྲིད་གཉིས་ཀྱི་དབུ་འཁྲིད་ཆགས་པ་དང་། རིམ་པ་གཉིས་པ་གོང་ས་མཆོག་གི་གསང་བའི་བཀའ་ཡིག་སྔ་ཕྱི་ཕེབས་པ་ལ་བརྟེན། ཕྱི་ལོ་ ༡༩༥༧ ལོར་ཀིརྟི་རིན་པོ་ཆེ་སྐུ་འཁོར་དང་བཅས་པ་བོད་ཀྱི་རྒྱལ་ས་ལྷ་སར་ཕེབས་རྗེས། གྲྭ་བ་དཀྱུས་མ་ཞིག་གི་རྣམ་པའི་སྟེང་ནས་འབྲས་སྤུངས་བློ་གསལ་གླིང་དུ་ཆོས་ཞུགས་ཀྱིས་གསན་བསམ་སློབ་གཉེར་གནང་བ་དང་བསྟུན། སྐབས་དེར་བོད་གཞུང་གིས་སྤྲུལ་སྐུ་རྣམ་གསུམ་གྱི་གདན་ཐོབ་ཕུལ་ནས་བོད་ཀྱི་བླ་མ་ཆེན་པོ་ཞིག་ངོས་འཛིན་གནང་། ཕྱི་ལོ་ ༡༩༥༩ ལོར་༧གོང་ས་མཆོག་གི་ཞབས་རྗེས་སུ་འབྲངས་ནས་བཙན་བྱོལ་དུ་ཕེབས་པ་ནས། ཀ་ལིམ་པོང་དང་ཌོ་ཧོར། ཝར་ཎ་དང་ཤེས་རིག་ལས་ཁུངས་ཀྱི་དགེ་རྒན་འོས་སྦྱོང་ཐེངས་གཉིས་པ་སོགས་སུ་ཞུགས་ཏེ། ལོ་ངོ་ ༡༩ དང་༢༠ ནང་གསན་བསམ་སློབ་སྦྱོང་མཐར་ཕྱིན་པ་གནང་ཞིང་། བོད་མིའི་སྒྲིག་འཛུགས་ཀྱི་ཆོས་རིག་བཀའ་བློན་བར་ཞབས་འདེགས་ཞུས་ཡོད་པ་བཅས་ཡིན་སྐོར་དང་། ཕྱི་ལོ་ ༢༠༡༡ ལོར་རྒྱ་རིགས་རྩོམ་པ་པོ་དང་བོད་དོན་རྒྱབ་སྐྱོར་བ་ལི་ཅང་ལིན་ལགས་ཀྱིས་༧སྐྱབས་རྗེ་ཀིརྟི་རིན་པོ་ཆེར་བོད་ནང་གི་གནས་སྟངས་སྐོར་ལ་བཅར་འདྲི་ཞུས་པ་དང་བསྟུན། ༧ཀིརྟི་རིན་པོ་ཆེའི་སྐུ་ཚེ་མཛད་རྣམ་ཞིག་འདྲི་རྒྱུ་ཡིན་པའི་སྙན་གསེང་ཞུས་རྗེས། ཕྱི་ལོ་ ༢༠༡༢ ལོར་ཀིརྟི་རིན་པོ་ཆེས་བཀའ་བཞེས་གནང་བ་ལྟར། མི་ཚེ་གཅིག་ལ་སྐྱེ་བ་གསུམ་ཞེས་པའི་ཕྱག་དེབ་འདས་པའི་ལོ་ངོ་ ༡༠ རིང་དཀའ་སྤྱད་བྱས་པའི་གྲུབ་འབྲས་ཤིག་ཡིན་སྐོར་སོགས་གསུངས་སོང་།

དམིགས་བསལ་སྐུ་མགྲོན་དགེ་བཤེས་ལྷག་རྡོར་ལགས་ཀྱིས། ཀིརྟི་རིན་པོ་ཆེ་དང་ཁོང་གི་འོག་གི་དགེ་འདུན་པ་རྣམས་རྒྱག་ཅིག་མཆོངས་གཅིག་བྱས་ནས་༧གོང་ས་མཆོག་གི་སྐུ་འོག་དཔུང་འདེགས་ཞུ་བཞིན་པ་ནི་ཧ་ཅང་གི་གལ་ཆེན་ཡིན་པ་དང་ཀིརྟི་རིན་པོ་ཆེའི་ལམ་སྟོན་འོག་གཞུང་ཆེན་བཀའ་པོད་ལྔའམ་རིག་གནས་བཅུའི་སྟེང་དཔར་བསྐྲུན་བྱས་ཏེ། དེང་རབས་དང་མཐུན་ཞིང་དགེ་འདུན་པ་རྣམས་ལ་སློབ་གཉེར་གྱི་སྒོ་མོ་ཕྱེས་ཡོད་པ་དང་འཆད་རྩོད་རྩོམ་གྱི་ཐོག་ནས་མ་འོངས་པར་ཕན་ཐོགས་ཆེན་པོ་ལྡན་པའི་བྱས་རྗེས་བཞག་ཡོད་སྐོར་གསུངས་སོང་བ་དང་། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གིས་ཀིརྟི་རིན་པོ་ཆེའི་མཛད་རྣམ་རྩོམ་སྒྲིག་དང་དཔར་སྐྲུན་གནང་མཁན་གྱི་འབྲེལ་ཡོད་ཡོངས་ལ་ལེགས་གསོལ་བསྔགས་བརྗོད་གནང་བ་དང་སྦྲགས། ཕྱག་དེབ་དེ་བརྒྱུད་བོད་ཀྱི་གནས་བབ་རྟོགས་ཐུབ་པ་དང་། ཀིརྟི་རིན་པོ་ཆེའི་གསན་བསམ་དང་ཆོས་ཕྱོགས་ཀྱི་མཛད་འཕྲིན་གནང་ཕྱོགས་སོགས་ཚང་མ་རྟོགས་ཐུབ་ཀྱི་ཡོད་སྐོར་དང་། རིན་པོ་ཆེའི་མཛད་རྗེས་ལ་ཞབས་འདེགས་ཐུབ་པ་གང་ཡང་ཞུ་མི་ཐུབ་ནའང་རིན་པོ་ཆེའི་དགོངས་པ་བཞེས་ཕྱོགས་དང་བོད་བསྟན་སྲིད་མི་རིགས་ཀྱི་དོན་དུ་འགན་ཁུར་བཞེས་ཕྱོགས་ཐོག་ཚང་མས་དྲན་གསོ་ཞུ་དགོས་སྐོར་སོགས་གསུངས་སོང་།

མཇུག་ཏུ་སྐུ་མགྲོན་གཙོ་བོ་སྲིད་སྐྱོང་སྤེན་པ་ཚེ་རིང་མཆོག་གིས། དཔེ་དེབ་རྩོམ་པ་པོ་ལི་ཅང་ལིན་ནི་ཡུན་རིང་བོད་དོན་རྒྱབ་སྐྱོར་བ་ཞིག་ཡིན་པ་ངོ་སྤྲོད་གནང་བ་དང་བསྟུན། རྒྱ་ནག་གིས་བོད་ནང་བཙན་འཛུལ་བྱས་པའི་བརྒྱུད་རིམ་དང་འབྲེལ། ༧སྐྱབས་རྗེ་ཀིརྟི་རིན་པོ་ཆེ་བཙན་བྱོལ་དུ་ཕེབས་རྗེས། ཝཱ་རཱ་ཎ་སཱིར་དགེ་རྒན་འོས་སྦྱོངས་ཐེངས་གཉིས་པའི་སྐབས་མཉམ་ཞུགས་གནང་བ་དང་བོད་ཀྱི་དཔེ་མཛོད་ཁང་། དགའ་ལྡན་ཕོ་བྲང་། ཕྱི་ལོ་ ༡༩༩༠ རྗེས་ནས་བཅའ་ཁྲིམས་ཟིན་བྲིས་ཚོགས་ཆུང་དུ་ཞུགས་པ། ཆོས་རིག་བཀའ་བློན་གྱི་མཛད་འགན་བཞེས་པ་སོགས་ཀིརྟི་རིན་པོ་ཆེའི་མཛད་རྣམ་སྐོར་གསུངས་གྲུབ་མཚམས། དགུ་བཅུ་གོ་གྲངས་ནས་ཀིརྟི་བྱེས་པ་གྲྭ་ཚང་བཙུགས་གནང་བ་དང་གྲྭ་ཚང་བརྒྱུད་ཆོས་ཕྱོགས་ཙམ་མ་ཡིན་པར་ཁ་ཡོད་ལག་ཡོད་ཀྱིས་འཇིག་རྟེན་གྱི་བྱ་བ་མང་པོའི་ཐོག་མི་མང་གི་བདེ་སྡུག་ལ་གཟིགས་རྟོགས་གནང་ཡོད།

རིན་པོ་ཆེའི་མཛད་པའི་ནང་ནས་ང་ཚོའི་སྤྱི་ཚོགས་སུ་ཕན་ཐོགས་ཆེ་ཤོས་གཞན་ཞིག་ནི་སློབ་གྲྭའི་སློབ་ཕྲུག་ཚོའི་ཆེད་དུ་ཀློག་དེབ་བརྩམས་གནང་བ་དེ་རེད། རིན་པོ་ཆེས་ལྗགས་རྩོམ་གནང་བའི་ཀློག་དེབ་དེ་དག་སློབ་གྲྭ་ཁག་ཁོ་ན་མ་ཡིན་པར་དགོན་སྡེ་ཁག་ལ་ཕུལ་བ་ལ་བརྟེན་མ་འོངས་མི་རབས་གསར་པར་བོད་ཡིག་སྦྱོང་རྒྱུར་ཐུགས་ཕན་གསོས་ཡོད་པའི་ངོས་འཛིན་ཞུ་གི་ཡོད། ལོ་རྒྱུས་བལྟ་རྒྱུ་གལ་ཆེན་པོ་ཡིན་པ་བཀའ་ཤག་སྐབས་བཅུ་དྲུག་པ་མ་སླེབས་པའི་སྔོན་ནས་ཞུ་གི་ཡོད་ལ་ད་ལྟའང་ཞུ་གི་ཡོད། ཕྱག་དེབ་འདི་ལ་མཚོན་ལ་ལོ་རྒྱུས་ཀྱི་དེབ་རེད། རིན་པོ་ཆེའི་ཞལ་ནས་གསུངས་ཏེ་རྩོམ་སྒྲིག་པས་རྩོམ་སྒྲིག་གནང་བ་ཞིག་ཆགས་ཡོད་ཅེས་གསུངས་སོང་།

གསར་འགོད་པ། སྐལ་བཟང་སྦྱིན་པ།