བོད་དར་རྩེ་མདོ་བརྒྱད་ཟུར་རྫོང་ཁོངས་ཀྱི་ནས་ཚེ་(Nyitsi)གྲོང་བརྡལ་ནས་ཡིན་པའི་བོད་མི་བློ་དགའ་ལགས་དང་ཁོང་གི་བཟའ་ཟླ་གཡུ་མཚོ་གཉིས་རྒྱུ་མཚན་ཅི་ཡིན་སོགས་གང་ཡང་མ་བཤད་པར་འཛིན་བཟུང་བྱས་ཏེ་ད་ལྟའི་ཆར་གང་དུ་བཀག་ཉར་བྱས་ཡོད་མེད་ཙམ་ཡང་ཤེས་རྟོགས་མ་ཐུབ་པར་ལྷག་ཡོད་འདུག
དེ་རིང་འདི་གར་བོད་ནས་གནས་ཚུལ་མཁོ་སྤྲོད་གནང་བ་ལྟར་ན། ཟླ་འདིའི་ཕྱི་ཚེས་ ༡༧ ཉིན་བོད་ནང་གི་དགོང་དྲོའི་ཆུ་ཚོད་ ༣ ཡས་མས་སུ་དར་རྩེ་མདོ་བརྒྱད་ཟུར་ས་གནས་ཉེན་རྟོག་པ་ཡོང་སྟེ་བོད་མི་བློ་དགའ་དང་ཁོང་གི་བཟའ་ཟླ་གཡུ་མཚོ་རང་ཁྱིམ་ནས་འཛིན་བཟུང་བྱས་ཏེ་རྫོང་ཐོག་ཏུ་འཁྲིད་རྗེས། ད་ལྟ་བར་དུ་འཛིན་བཟུང་བྱེད་དོན་ཅི་ཡིན་དང་གང་དུ་ཡོད་མེད་སོགས་ཀྱི་གནས་ཚུལ་གང་ཡང་ཤེས་རྟོགས་མ་ཐུབ་པར་ལྷག་ཡོད་པར་བརྟེན། ཁྱིམ་མི་ཚོས་ཡར་མར་རྩད་གཅོད་བཏང་སྟེ་སེམས་ཁྲལ་ཆེན་པོ་བྱེད་བཞིན་ཡོད་འདུག
གནས་ཚུལ་མཁོ་སྤྲོད་པས་བརྗོད་ན། ཁོང་བཟའ་མི་གཉིས་འཛིན་བཟུང་བྱེད་དགོས་པའི་རྒྱུ་མཚན་གཞན་གང་ཡང་མེད་ཀྱང་། ཕྱི་ལོགས་སུ་ཡོད་པའི་བློ་དགའ་ལགས་ཀྱི་སྤུན་ཉེ་ཞིག་ལ་འབྲེལ་བ་བྱས་རྐྱེན་འཛིན་བཟུང་བྱས་ཡོད་སྲིད་པ་དང་། བསམ་བློ་བསྒྱུར་བཀོད་ཀྱི་སྲིད་འཛིན་བཀག་ཉར་ཟེར་བ་བྱས་ཏེ་ཉིན་ ༡༥ འགོར་རྗེས་ཐག་གཅོད་ཅིག་ཡོང་གི་ཡོད་པ་དང་། དེའི་རིང་ལ་ཕྱི་མིར་ཐུག་འཕྲད་སོགས་གཏན་ནས་བྱེད་འཇུག་གི་མེད་སྐོར་བརྗོད་བྱུང་།
བློ་དགའ་ལགས་ནི་རང་ལོ་ ༣༦ ཡིན་པ་དང་། ཁོང་གི་བཟའ་ཟླ་གཡུ་མཚོ་རང་ལོ་ ༣༠ ཡས་མས་ཡིན་འདུག ཁོང་གཉིས་ལ་རང་ལོ་ ༡༤ ཅན་གྱི་བུ་ཞིག་ཡོད་འདུག
ཉིན་འདི་ཚོར་ཏོག་དབྱིབས་གཉན་རིམས་རྐྱེན་གྱིས་བོད་མཚོ་སྔོན་དང་སི་ཁྲོན་ཕྱོགས་སུའང་འགྲོ་འོང་ལ་བཀག་སྡོམ་ཆེན་པོ་བྱེད་བཞིན་ཡོད་པ་མ་ཟད། ཏོག་དབྱིབས་སྐོར་གྱི་གནས་ཚུལ་གང་ཡང་བརྒྱུད་སྒྲོག་བྱེད་མི་ཆོག་པའི་བཀའ་རྒྱའི་འོག ཁ་པར་བརྒྱུད་སྤྱི་ཚོགས་དྲ་ལམ་དུའང་གནས་ཚུལ་རིགས་བརྒྱུད་སྤེལ་བྱེད་པར་བཀག་སྡོམ་སྔར་ལས་ཤུགས་ཆེན་བྱེད་ཀྱི་ཡོད་འདུག
ས་གནས་གསར་འགོད་པ།
