བོད་ཀྱི་སྲིད་ཇུས་ཉམས་ཞིབ་ཁང་གི་དབུ་འཛིན་ཟླ་བ་ཚེ་རིང་ལགས་ཀྱིས་སྔོན་ཆད་རྒྱ་ནག་གཞུང་གིས་ཆོས་ལུགས་བེད་སྤྱད་ནས་བོད་མི་ཚོ་གུང་ཁྲན་ཏང་གི་ཁ་ལ་ཉན་ཐབས་བྱས་ཡོད་ཀྱང་ད་ལྟ་བོད་ཀྱི་སྐད་ཡིག་དང་ཆོས་ལུགས་བཅས་རྩ་མེད་གཏོང་བའི་སྲིད་ཇུས་ཐད་ཀར་འཛིན་གྱི་ཡོད་སྐོར་འགྲེལ་བརྗོད་གནང་བྱུང་།
ཉེ་བའི་ལོ་ཤས་ནང་བོད་ཁུལ་གྱི་བོད་རིགས་སོགས་ཀྱི་དཔོན་པོ་མང་པོ་ཞིག་དབུས་གཞུང་གི་གཏན་འབེབས་དོན་ཚན་བརྒྱད་ཟེར་བ་དང་འགལ་བའི་ཉེས་མིང་འོག ལས་གནས་ནས་གནས་དབྱུང་དང་དམར་ཤོག་ཚོགས་པའི་ནང་ནས་ཕྱིར་འབུད་གཏོང་གི་ཡོད་པ་ལྟར། བོད་དཀར་མཛེས་ཁུལ་གྱི་ཁུལ་དཔོན་གཞོན་པ་ཟུར་པ་ཁང་ཀོང་ཡིའུ་ཞེས་པ་ཞིག་ལ་རྒྱ་ནག་གི་གཏན་འབེབས་དོན་ཚན་བརྒྱད་ཟེར་བ་དང་འགལ་ཏེ་དམར་ཤོག་ཏང་ལ་བློ་མི་དཀར་བ་དང་། སྒྲིག་ཁྲིམས་དང་བཅའ་ཁྲིམས་ཀྱི་འདུ་ཤེས་ཞན་པ། ཞིབ་བཤེར་ལ་ཁ་གཏད་བཅགས་པ། རྨོངས་དད་ཀྱི་བྱེད་སྒོར་ཞུགས་པ་སོགས་ཀྱི་ཉེས་མིང་འོག་ལས་གནས་ནས་གནས་དབྱུང་དང་། དམར་ཤོག་ཚོགས་པ་ནས་ཕྱིར་འབུད་བཏང་ཡོད་འདུག
འདི་གའི་གསར་འགོད་པས་བོད་ཀྱི་སྲིད་ཇུས་ཉམས་ཞིབ་ཁང་གི་འགན་འཛིན་ཟླ་བ་ཚེ་རིང་ལགས་སུ་ཉེས་མིང་སྣ་ཚོགས་འོག་བོད་ཁུལ་གྱི་མགོ་འཁྲིད་མང་པོར་ཉེས་ཆད་ཕོག་གི་ཡོད་པ་དེའི་ཐད་དགོངས་ཚུལ་ཅི་ཡོད་སྐོར་དྲིས་པར་ཁོང་གིས། སྤྱིར་བོད་དང་། ཡུ་གུར་གཉིས་གཙོ་བོ་འགྱུར་བའི་ལྷོ་སོག་ཏུ་ད་ལྟའི་གནས་ཚུལ་དེ་ཡོང་གི་ཡོད་པ་རེད། སྔོན་མ་རིག་གནས་གསར་བརྗེ་ཆེན་མོའི་རྗེས་སུ་ཆོས་ལུགས་བྱེད་སྒོ་ཁག་སླར་ཡང་མགོ་བཙུགས་ཡོང་བའི་སྐབས་སུ། རྒྱ་ནག་གཞུང་གིས་བོད་ནང་དུ་དབང་ཆ་སྲ་བརྟན་ཡོང་སླད་དུ་ཆོས་ལུགས་བེད་སྤྱོད་གཏོང་གི་ཡོད་པ་རེད། སྐབས་དེ་དུས་གུང་ཁྲན་ཏང་གི་མི་ཡིན་ཡང་ཆོས་ལུགས་གྱི་མི་སྣར་འབྲེལ་བ་བྱེད་ཆོག་པ་དང་། ཆོས་ལུགས་བེད་སྤྱོད་ནས་མི་མང་ཁར་ཉན་བཅུག་གི་ཡོད། དེ་ནི་འཐབ་ཕྱོགས་གཅིག་འགྱུར་གྱི་ལས་ཀ་ཞིག་ཡིན་པ་དང་། བོད་མི་ཚོས་རྒྱ་ནག་གཞུང་གི་དཔོན་རིགས་ཚོའི་ཁར་མ་ཉན་པར་བོད་ཀྱི་བླ་མ་རྣམས་བེད་སྤྱད་ནས་མི་མང་ཚོ་རྒྱ་ནག་གཞུང་གི་ཁར་ཉན་བཅུག་སྟེ། རྒྱ་ནག་གཞུང་གི་གྲུབ་འབྲས་ཤིག་ཏུ་བརྩི་ཡི་ཡོད་པ་མ་ཟད། རྒྱ་ནག་གཞུང་གིས་བོད་ཀྱི་དགོན་པ་དང་བླ་མ་རྣམས་ཆབ་སྲིད་ཀྱི་ལག་ཆར་བེད་སྤྱོད་གཏོང་གི་ཡོད་པ་རེད། རྗེས་སུ་རྒྱ་ནག་གཞུང་གིས་སྟོབས་ཤུགས་ཇེ་ཆེར་འགྲོ་དུས། བོད་ཀྱི་བླ་མ་དང་གྲྭ་བ་རྣམས་དགྲ་རུ་ངོས་འཛིན་བྱས་ཏེ་བཀག་འགོག་བྱེད་མགོ་བཙུགས་ནས་བོད་ཀྱི་བླ་མ་སོགས་ཀྱི་འགྲོ་འདུག་ལ་ཚོད་འཛིན་ནན་མོ་བྱས། རྒྱ་ནག་གཞུང་གི་མགོ་ཁྲིད་དང་ལས་བྱེད་ཚོས་ཆོས་བྱ་མི་ཆོག་པ་དེ་ནི་གུན་ཁྲན་ཏང་གི་དམིགས་ཡུལ་གཙོ་བོ་དེ་མིན་པར། དེ་ནི་བོད་པ་དང་ཡུ་གུར་ལ་དམིགས་བསྡད་ཀྱི་ཡོད་པ་རེད། རྒྱ་ནག་གཞུང་གིས་བོད་ནང་དུ་ལས་འགུལ་ག་རེ་སྤེལ་བ་ཡིན་ཡང་། དེ་དག་ནི་རྒྱལ་ཁབ་གཅིག་འགྱུར་དང་། བོད་ཀྱི་སྐད་ཡིག་དང་ཆོས་ལུགས་རྩ་མེད་གཏོང་བའི་སྲིད་ཇུས་ཐད་ཀར་འཛིན་གྱི་ཡོད་པ་རེད། ཅེས་འགྲེལ་བརྗོད་གནང་བྱུང་།
ཡང་ཁོང་གིས། ཉེ་བའི་ཆར་རྒྱ་ནག་གཞུང་གིས་བོད་རིགས་དཔོན་པོ་ཚོས་བོད་ཀྱི་སྐད་ཡིག་སྦྱང་བརྩོན་བྱ་མི་ཆོག་པའི་ཁར། ཐ་ན་ནང་མི་རྣམས་ཀྱི་བོད་སྐད་བོད་ཡིག་སྦྱང་བརྩོན་བྱ་མི་བཅུག་པ་དེ། རྒྱ་ནག་གཞུང་གིས་བོད་མི་རིགས་འདི་རྒྱ་ནག་ཅན་དུ་བསྒྱུར་རྒྱུ་དང་། བོད་ཀྱི་ཆོས་ལུགས་དེ་རྒྱ་ནག་ཅན་དུ་བསྒྱུར་ཐབས་སོགས་ཆབ་སྲིད་ཀྱི་ཐ་སྙད་མང་པོ་ཞིག་བཏགས་ནས་སྲིད་ཇུས་མང་པོ་ཞིག་བཏིང་གི་ཡོད་པ་རེད། སྲིད་ཇུས་དེའི་རྩ་བ་ནི་བོད་མི་རིགས་འདི་རྩ་མེད་དུ་གཏང་སྟེ། བོད་སྐད་བོད་ཡིག་མེད་པར་བཟོས་ནས། བོད་ཡུལ་རྒྱ་ཡུལ་དུ་བསྒྱུར་ཐབས་དང་། བོད་མི་རྒྱ་མིར་བསྒྱུར་རྒྱུ། བོད་མི་ཚོས་རྒྱ་སྐད་མ་གཏོགས་བོད་སྐད་མི་ཤེས་པ་བཟོ་བའི་སྲིད་ཇུས་ལ་ཐུག་བསྡད་ཡོད་པ་རེད་ལ། ཞི་ཅིང་ཕིན་གྱི་དབང་ཆ་སྲ་བརྟན་ཡོང་ཐབས་དེའང་སྲིད་ཇུས་དེའི་ཆ་ཤས་སུ་གྱུར་ཡོད་པ་རེད། འོན་ཀྱང་། རྒྱ་ནག་གཞུང་གིས་དགོས་པའི་དབང་གིས་བོད་ཀྱི་ཤེས་ཡོན་པ་དང་མི་ཆེན་ཁག་བེད་སྤྱད་ནས་རིམ་པས་ཆབ་སྲིད་ཀྱི་ནག་ཉེས་སྣ་ཚོགས་གཡོགས་ནས་རྩ་མེད་གཏོང་གི་ཡོད་པ་རེད། ཅེས་འགྲེལ་བརྗོད་གནང་བྱུང་།
ཕྱི་ལོ་ ༢༠༡༤ ཟླ ༡ ཚེས་ ༢༤ ཉིན་རྒྱ་ནག་དམར་ཤོག་ཚོགས་པའི་སྲིད་འཛིན་ཞི་ཅིན་ཕིང་གི་སྣེ་འཁྲིད་འོག དབུས་ཆབ་སྲིད་ལྷན་ཁང་གིས་རྒྱལ་ཁབ་བདེ་འཇཊ་ཨུ་ཡོན་ལྷན་ཁང་ཟེར་བ་ཞིག་གསར་འཛུགས་ཀྱིས། མུ་མཐུད་རྒྱ་ནག་ནང་ལོགས་དང་བོད་སོགས་གྲངས་ཉུང་མི་རིགས་ས་ཁུལ་དུ་ལྐོག་ས་རུལ་སུངས་དང་གཞུང་དངུལ་ལོག་སྤྱོད་སོགས་ཀྱི་ཉེས་མིང་འོག་དཔོན་རིགས་དང་ལས་བྱེད་མང་པོར་ཞིབ་བཤེར་ཁྲིམས་ཆད་གཅོད་བཞིན་ཡོད་པ་རེད། སྤྱི་ཡོངས་ནས་མང་ཚོགས་ཁྲོད་འཐབ་རྩོད་དེ་ལ་དགའ་མོས་བྱེད་མཁན་མང་པོ་ཡོང་གི་ཡོད་ཀྱང་། གནད་དོན་དབྱེ་ཞིབ་པ་ཚོས་དེ་ནི་ཞི་ཅིན་ཕིང་གི་ཕུལ་དུ་བྱུང་བའི་དབང་ཆ་བརྟན་སྲུང་གི་ཐབས་ཇུས་རྩེ་གཉིས་མ་ཞིག་ཡིན་པའི་ངོས་འཛིན་བྱེད་བཞིན་ཡོད་པ་མ་ཟད། བོད་དང་ཡུ་གུར་སོགས་གྲངས་ཉུང་མི་རིགས་ས་ཁུལ་དུ་འཐབ་རྩོད་དེ་ནི་རྒྱལ་ཁབ་ལ་བློ་མི་དཀར་བ་དང་ཏང་ལ་དྲིན་ལན་ལོག་འཇལ་ཟེར་བ་དང་། སྤྱི་ཚོགས་ལྷིང་འཇགས་ལ་གནོད་སྐྱོན་བཟོས་པ་དང་རྨོངས་དད་ཀྱི་ལས་ལ་ཞུགས་པ་སོགས་ཀྱི་ཉེས་མིང་འོག་ཆབ་སྲིད་ཀྱི་ཚོར་བ་སྐྱེན་པའི་གནད་དོན་ཁག་ཐག་གཅོད་བྱེད་པའི་ཐབས་ལམ་ལྟ་བུ་ཞིག་ཏུ་གྱུར་ཡོད་པའི་ངོས་འཛིན་ཡོང་གི་ཡོད་པ་རེད།
གསར་འགོད་པ། དཔལ་ལྡན།
![AfD party members celebrate victory in Saxony-Anhalt on Sunday [Matthias Schrader/AP]](https://tibettimes.net/wp-content/uploads/2026/09/WhatsApp-Image-2026-09-11-at-4.20.04-PM-360x180.jpeg)
