རྒྱ་ནག་གཞུང་གིས་ཉེས་མིང་འདྲ་མིན་འོག་བོད་ཀྱི་ཆབ་སྲིད་བཙོན་པ་གསུམ་གར་ཡོད་ཆ་མེད་དུ་བཏང་བའི་གནད་དོན་ཐད་རྒྱལ་སྤྱིའི་ཚོགས་སྡེ་དྲུག་ནས་འདྲི་རྩད་ནན་པོ་བྱས་ཡོད་ཀྱང་རྒྱ་ནག་གཞུང་གིས་ལན་འདེབས་གསལ་བཤད་གང་ཡང་བྱས་མེད་འདུག
ཉེ་ཆར་འཛམ་གླིང་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་དྲ་རྒྱའི་ཐོག་ཕྱིར་བསྒྲགས་བྱས་པ་ལྟར་ན། འདི་ལོའི་ཕྱི་ཟླ་ ༢ ཚེས་ ༡༧ ཉིན་རྒྱལ་ཚོགས་ཀྱི་ཁྱབ་ཁོངས་ཆེད་མཁས་རྟོག་ཞིབ་དང་ལས་དོན་ཚན་པ་དྲུག་གིས་མཉམ་འབྲེལ་སྒོས་རྒྱ་ནག་གཞུང་ལ་ཡིག་ཐོག་ནས་བོད་ཀྱི་རྩོམ་པ་པོ་དྷཱི་ལྷ་ལྡན་དང་། བོད་ཀྱི་གླུ་བ་ལྷུན་གྲུབ་གྲགས་པ། སློབ་དགེ་རིན་ཆེན་སྐྱིད་བཅས་ཀྱི་བཙོན་འཇུག་བཀག་ཉར་དང་གར་སོང་ཆ་མེད་དུ་གྱུར་བའི་གནས་སྟངས་སོགས་ཀྱི་ཐད་ལ་འདྲི་རྩད་ནན་པོ་བྱས་ཡོད་ཀྱང་། ད་ལྟའི་ཆར་རྒྱ་ནག་གཞུང་ནས་ལན་འདེབས་གསལ་བཤད་བྱས་མེད་འདུག
རྒྱལ་ཚོགས་ཀྱི་འདྲི་རྩད་དེའི་ནང་། རྩོམ་པ་པོ་བློ་བཟང་ལྷུན་གྲུབ་བམ་དྷཱི་ལྷ་ལྡན་དང་གླུ་བ་ལྷུན་གྲུབ་གྲགས་པ། དགེ་རྒན་རིན་ཆེན་སྐྱིད་གསུམ་གྱི་གནས་སྟངས་དེ་ནི། རྒྱ་ཆེ་ས་ནས་རང་གི་སྐད་ཡིག་དང་རིག་གཞུང་གོམས་སྲོལ་བཅས་པར་སྲུང་སྐྱོབ་དང་། བོད་ནང་ལག་བསྟར་བྱེད་བཞིན་པའི་རྒྱ་ནག་གཞུང་གི་སྲིད་ཇུས་ལ་སྐྱོན་བརྗོད་བྱེད་མཁན་གྱི་བོད་མི་མང་པོའི་ལས་དབང་ཡིན་སྐོར་དང་། རྒྱ་ནག་གཞུང་གིས་བོད་ཀྱི་རིག་གཞུང་གོང་འཕེལ་གཏོང་མཁན་དང་རྒྱ་ནག་གི་དབང་འཛིན་ལ་སྐྱོན་བརྗོད་བྱེད་མཁན་བོད་མི་རྣམས་བཙོན་འཇུག་བཀག་ཉར་དང་། མཚམས་རེར་གར་སོང་ཆ་མེད་དུ་གཏོང་བཞིན་པར་བློ་འཚབ་ཧ་ཅང་ཆེན་པོ་ཡོད་སྐོར་འཁོད་འདུག དེ་བཞིན་རྒྱ་ནག་གཞུང་ངོས་ནས་འགྲོ་མིའི་ཐོབ་ཐང་གི་ཡོངས་ཁྱབ་གསལ་བསྒྲགས་ཀྱི་དོན་ཚན་ ༩ དང་། ༡༠། ༡༡ བཅས་ཀྱི་དགོངས་དོན་གཞིར་བཟུང་། བོད་མི་ཁོང་གསུམ་ལ་རང་དབང་ཅན་གྱི་ཁྲིམས་ཁང་མདུན་ནས་ཁྲིམས་བཤེར་དྲང་པོ་ཡོང་རྒྱུར་ཁག་ཐེག་བྱ་དགོས་པའི་རེ་སྐུལ་ཡང་ཞུས་ཡོད་འདུག
ད་ལན་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་ཆེད་མཁས་རྟོག་ཞིབ་སྡེ་ཚན་དྲུག་གིས་རྒྱ་ནག་གཞུང་ལ་འདྲི་རྩད་ཁག་གཅིག་བྱས་པའི་ཁྲོད་དུ། རྩོམ་པ་པོ་དྷི་ལྷ་ལྡན་ལགས་གར་ཡོད་དང་འཕྲོད་བསྟེན་གྱི་གནས་སྟངས་ཇི་ཆགས། མགོ་འཁྲིད་ཚོས་ད་བར་ཁོང་གི་ནང་མིའམ་ཁྲིམས་མཐུན་སྐུ་ཚབ་ལ་ཁོང་གི་གནས་སྟངས་ཁ་གསལ་བཤད་མེད་པའི་རྒྱུ་མཚན་ཇི་ཡིན་དྲིས་འདུག་ལ། གླུ་བ་ལྷུན་གྲུབ་གྲགས་པ་དང་དགེ་རྒན་རིན་ཆེན་སྐྱིད་ཁྲིམས་སྒྲིག་གི་གཞི་རྩ་གང་གི་ཐོག་ནས་འཛིན་བཟུང་ཁྲིམས་ཆད་བཅད་ཡོད་མེད་དང་། རྒྱ་ནག་གཞུང་གི་ཐག་གཅོད་དེ་དག་རྒྱལ་སྤྱིའི་འགྲོ་བ་མིའི་ཐོབ་ཐང་གི་སྒྲིག་སྲོལ་དང་མཐུན་གྱི་ཡོད་མེད། ཁོང་རྣམ་གཉིས་ད་ལྟ་གང་དུ་བཙོན་འཇུག་བྱས་ཡོད་མེད་ཀྱི་གནས་ཚུལ་རྣམས་དོ་བདག་གི་ནང་མི་ལ་གསལ་བཤད་མ་བྱས་པའི་རྒྱུ་མཚན་གང་ཡིན་སོགས་ཀྱི་འདྲི་རྩད་ནན་མོ་བྱས་ཡོད་འདུག
ད་ལྟ་རང་ལོ་ ༥༠ ཡིན་པའི་རྩོམ་པ་པོ་བློ་བཟང་ལྷུན་གྲུབ་ལགས་ཀྱིས་ཕྱི་ལོ་ ༢༠༡༡ དང་ ༢༠༡༥ སོ་སོར་ཚེ་སྲོག་གིས་བསྐྲུན་པའི་སྐད་ཆ་དང་། བསྟུན་རྒོལ་ཁྲིམས་གཏུག་ཅེས་པའི་དཔེ་དེབ་བརྩམས་པའི་རྐྱེན་གྱིས། ཕྱི་ལོ་ ༢༠༡༩ ཟླ་ ༦ པའི་ནང་རྒྱ་ནག་གཞུང་གི་ཉེན་རྟོག་པས་སྤྱི་ཚོགས་ནང་ཟིང་འཁྲུག་སློང་བའི་ཉེས་མིང་འོག་ཁྲིན་ཏུའུ་ནས་འཛིན་བཟུང་བྱས་ཏེ་ཐོག་མའི་ཟླ་བ་ ༡༨ རིང་ཁྲིམས་བཤེར་གྱི་བརྒྱུད་རིམ་གང་ཡང་མེད་ཅིང་ནང་མིར་ཐུག་འཕྲད་བྱེད་དུ་མ་བཅུག་པར་བཀར་ཉར་བྱས་ཡོད་ཅིང་། མཐར་ཕྱི་ལོ་ ༢༠༢༡ ཟླ་ ༦ པའི་ནང་ཁོང་ལ་སྤྱི་ཚོགས་ནང་ཟིང་འཁྲུག་བསླངས་པའི་ནག་ཉེས་བཙན་འགེལ་གྱིས་ལོ་བཞིའི་བཙོན་འཇུག་ཁྲིམས་ཐག་བཅད་ཡོད། འོན་ཀྱང་ད་ལྟའང་ཁོང་བཙོན་ཁང་གང་དུ་ཡོད་མེད་དང་འཕྲོད་བསྟེན་གྱི་གནས་སྟངས་ཇི་ཡིན་ཁ་གསལ་མེད་པ་རེད། ཁམས་འབྲི་རུ་ནས་ཡིན་ཞིང་ད་ལྟ་རང་ལོ་ ༣༨ ཡིན་པའི་བོད་ཀྱི་གླུ་བ་ལྷན་གྲུབ་གྲགས་པ་ལགས་ཀྱིས་རྒྱ་ནག་གཞུང་ལ་སྐྱོན་བརྗོད་ཀྱི་ཞྭ་མོ་ནག་པོ་ཞེས་པའི་གླུ་བླངས་པ་ལ་བརྟེན་ནས་ཕྱི་ལོ་ ༢༠༡༩ ལོར་རྒྱ་ནག་གི་ཉེན་རྟོག་པས་འཛིན་བཟུང་བྱས་ཏེ། ཕྱི་ལོ་ ༢༠༢༠ ལོར་ཁོང་ལ་ལོ་དྲུག་གི་བཙོན་འཇུག་ཁྲིམས་ཐག་བཅད་ཡོད་པ་རེད།
དགེ་རྒན་རིན་ཆེན་སྐྱིད་ལགས་ལྟ་བུར་མཚོན་ན། ཕྱི་ལོ་ ༢༠༢༡ ཟླ་ ༧ ཚེས་ ༨ ཉིན་རྒྱ་ནག་གཞུང་གིས་བོད་མགོ་ལོག་ཁུལ་དར་ལག་རྫོང་དུ་རྟེན་གཞི་བྱས་པའི་སེང་འབྲུག་སྟག་རྩེས་མཚོན་པའི་བོད་མིའི་སྒེར་གཉེར་སློབ་གྲྭ་སྐོར་ཞིག་སྒོ་བརྒྱབ་པའི་རྐྱེན་གྱིས། སློབ་གྲྭ་དེ་གའི་དགེ་རྒན་རིན་ཆེན་སྐྱིད་ལགས་ཀྱིས་སྔ་དགོང་གི་ཟས་མ་ཟོས་པར་ཉིན་བཅུ་གྲངས་ཤིག་ཕྱིན་ཏེ་གཟུགས་པོའི་གནས་སྟངས་ཧ་ཅང་ཞན་པོ་ཆགས་རྐྱེན། ཁོང་མོའི་ཕ་མ་དང་སྤུན་མཆེད་སོགས་ཀྱིས་སེམས་ཁུར་བྱས་ནས་སྨན་ཁང་དུ་འཁྲིད་ཐབས་བྱས་ཡོད་ཀྱང་འགྲོ་རོགས་བྱས་མེད་པ་དང་། ཕྱིས་སུ་ས་གནས་ཉེན་རྟོག་པ་ཡོང་ནས་རྒྱལ་ཁབ་ལ་ངོ་ལོག་བྱས་པའི་ཉེས་མིང་གཡོགས་ཏེ། ས་གནས་སྨན་ཁང་ཞིག་ཏུ་བཙན་འཁྲིད་བྱས་ནས་ཉིན་གྲངས་ ༢ རིང་བཀག་ཉར་བྱས་རྗེས། ཟི་ལིང་གི་ཞིང་ཆེན་སྨན་ཁང་དུ་འཇོག་རྒྱུ་ཡིན་ཚུལ་ཟེར་ནས་ད་བར་གར་ཡོད་ཆ་མེད་དུ་གྱུར་ཡོད་པ་རེད།
ད་ལན་རྒྱ་ནག་གཞུང་ལ་མཉམ་འབྲེལ་གྱི་ཐོག་ནས་བོད་མི་ཆབ་སྲིད་བཙོན་པ་གསུམ་གྱི་གནས་སྟངས་ཐད་འདྲི་རྩད་བྱེད་མཁན་གྱི་ཁྲོད་དུ། རྒྱལ་ཚོགས་ཀྱི་རིག་གཞུང་ཐོབ་ཐང་ཚན་པའི་དམིགས་བསལ་ཆེད་མཁས་རྟོག་ཞིབ་ཚན་པ་དང་ (Special Rapporteur in the field of cultural rights)། གང་བྱུང་བཀག་ཉར་བྱས་པའི་གནས་ཚུལ་སྐོར་གྱི་ལས་དོན་ཚན་པ་ (Working Group on Arbitrary Detention)། བཙན་གྱིས་སམ་རང་འགུལ་མིན་པའི་ཐོག་ནས་གར་སོད་ཆ་མེད་དུ་གྱུར་བའི་གནས་ཚུལ་ཐད་ཀྱི་ལས་དོན་ཚན་པ་ (Working Group on Enforced or Involuntary Disappearances)། ཤེས་ཡོན་ཐབ་ཐང་གི་དམིགས་བསལ་ཆེད་མཁས་རྟོག་ཞིབ་ཚན་པ་ (Special Rapporteur on the right to education)། བསམ་བརྗོད་རང་དབང་སྲུང་སྐྱོབ་དང་གོང་འཕེལ་གྱི་དམིགས་བསལ་ཆེད་མཁས་རྟོག་ཞིབ་ཚན་པ་ (Special Rapporteur on the promotion and protection of the rights to freedom of opinion and expression)། གྲངས་ཉུང་མི་རིགས་ཀྱི་གནད་དོན་ཐོག་གི་དམིགས་བསལ་ཆེད་མཁས་རྟོག་ཞིབ་ཚན་པ་ (special Rapporteur on minority issues) བཅས་ཡོད་འདུག
གསར་འགོད་པ། པ་སངས་ཚེ་རིང་།
