རྒྱ་ནག་གཞུང་གིས་བོད་མི་གསུམ་ཀློད་གྲོལ་བཏང་ཡོད་ཀྱང་གཅིག་ནད་པར་གྱུར་འདུག

བོད་རེབ་གོང་རྫོང་གྲོང་ཁྱེར་ཅན་བསྒྱུར་བའི་རྒྱ་ནག་གཞུང་གི་ལས་གཞིར་འགོག་རྐྱེན་བཟོས་པ་སོགས་ཀྱི་ཉེས་མིང་འོག་ལོ་ ༣ ནས་ ༧ བར་ཁྲིམས་ཐག་བཅད་པའི་བོད་མི་ ༩ ཡི་ཁྲོད་ནས་གསུམ་ཀློད་གྲོལ་བཏང་ཡོད་ཀྱང་བསོད་ནམས་རྒྱལ་ལགས་ནད་པར་གྱུར་འདུག

ཕྱི་ལོ་ ༢༠༡༨ ལོར་རྒྱ་ནག་གཞུང་གིས་བོད་རེབ་གོང་རྫོང་གྲོང་ཁྱེར་ཅན་དུ་བསྒྱུར་བའི་ལས་གཞི་སྤེལ་སྐབས། རེབ་གོང་ཧོར་རྒྱ་སྡེ་བའི་ས་ཞིང་བསྡུ་རུབ་བྱས་པར་མོས་མཐུན་མ་བྱས་པའི་རྐྱེན་གྱིས་བོད་མི་དགུ་འཛིན་བཟུང་བྱས་ཏེ། ལོ་གསུམ་ནས་ ༧ བར་གྱི་ཁྲིམས་ཐག་བཅད་ཡོད་པ་ལྟར། འདི་ལོའི་ཕྱི་ཟླ་དང་པོའི་ནང་ཧོར་རྒྱ་སྡེ་བའི་བསོད་ནམས་རྒྱལ་ཀློད་གྲོལ་བཏང་ཡོད་ཀྱང་ནད་པ་ཆགས་ཡོད་པ་མ་ཟད། རྒྱ་ནག་གཞུང་གི་སོ་ཉུལ་བ་བཏང་སྟེ་འགྲོ་འདུག་ལ་རང་དབང་མེད་པར་གྱུར་ཡོད་འདུག

གནས་ཚུལ་མཁོ་སྤྲོད་པས་བསོད་ནམས་རྒྱལ་ལགས་ཀྱི་རོགས་པ་གཞན་གཉིས་ཀྱང་ཀློད་གྲོལ་བཏང་ཡོད་ཀྱང་། འབྲེལ་ཡོད་ཅིག་ལ་གཞན་གཉིས་དེ་སུ་ཡིན་མིན་སྐད་ཆ་འདྲི་སྐབས་གློ་བུར་དུ་ཁ་པར་སྒོ་བརྒྱབ་ནས་འབྲེལ་བ་བཅད་ཡོད་སྐོར་དང་། དང་ཐོག་ཁྲིམས་ཁང་ནས་ཁྲིམས་ཆད་ཉུང་ཤོས་ལོ་ ༣ ཡས་མས་ལབ་ཡོད་ཀྱང་དུས་ཡུན་ལོ་ ༣ ཟིན་ནའང་ཀློད་མེད་སྐོར་བརྗོད་བྱུང་།

གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་ཟླ་བ་དྲུག་པའམ་བདུན་པའི་ནང་བསོད་ནམས་རྒྱལ་ལགས་ཀྱི་སྤུན་མཆེད་ཆུང་བ་བཀྲིས་ཚེ་རིང་ལགས་ཀློད་གྲོལ་གཏང་རྒྱུའི་རེ་བ་བྱེད་ཀྱི་ཡོད་པ་དང་། དེ་བཞིན་དགེ་འདུན་བཟོད་པ་ཚུད་པའི་མི་ ༣ ལ་ལོ་བདུན་གྱི་ཁྲིམས་ཐག་བཅད་ཡོད་ལྟར་ད་ལྟ་བཙོན་ཁང་དུ་ཡོད་འདུག དགེ་འདུན་བཟོད་པ་ལགས་བཙོན་འཇུག་བྱས་ཏེ་ཟླ་བ་ཁ་ཤས་ཀྱི་རྗེས་སུ་ནད་པར་གྱུར་ཏེ་རྒྱ་སྒོར་ཁྲི་གཅིག་སྤྲད་ནས་སྨན་བཅོས་ཆེད་ཀློད་ཡོད་ཀྱང་། ནད་ཚ་ཅུང་ཙམ་དྲག་སྐྱེད་ཡོང་མཚམས་ཡང་བསྐྱར་བཙོན་འཇུག་བྱས་ཡོད་འདུག

ཡང་ཁོང་གིས། རྒྱ་ནག་གཞུང་གིས་བསོད་ནམས་རྒྱལ་སོགས་ཀློད་གྲོལ་བཏང་ཡོད་ཀྱང་། སྡེ་བའི་ནང་དུ་རྒྱ་ནག་གཞུང་གིས་གསང་ཉུལ་བ་དང་བྱ་ར་བ་མངགས་གཏོང་བྱས་ཏེ། ཁོང་ཚོར་ལྟ་ཞིབ་དང་རྗེས་འདེད་གཏོང་གི་ཡོད་པ་མ་ཟད། སྡེ་མི་རྣམས་ཀྱིས་ཁོང་ཅག་གི་སྐོར་ལ་གླེང་སློང་དང་ཞུ་གཏུག་སོགས་བྱས་ན་བཙོན་འཇུག་བཀག་ཉར་བྱ་རྒྱུ་ཡིན་པའི་ཉེན་བརྡ་བཏང་ཡོད་པ་མ་ཟད། ཁ་པར་སོགས་སུ་ཁོང་ཚོའི་མིང་འབོད་པ་ལའང་བཀག་སྡོམ་བྱེད་ཀྱི་ཡོད་སྐོར་དང་། ཁོང་ཚོའི་ནང་མི་དང་འབྲེལ་ཡོད་རྣམས་ཀྱི་འགྲོ་འདུག་སྤྱོད་གསུམ་ལའང་ལྟ་རྟོག་བྱེད་ཀྱི་ཡོད་སྐོར་བརྗོད་བྱུང་།

ཕྱི་ལོ་ ༢༠༡༨ ཟླ་ ༨ པའི་ནང་རྒྱ་ནག་གཞུང་གིས་ནག་ཚོགས་ངན་སེལ་ཟེར་བའི་མིང་ཐོག་ནས་རེབ་གོང་ཧོར་རྒྱ་སྡེ་པའི་དགེ་འདུན་པ་བཟོད་པ་དང་། ཆོས་བཟང་། བན་དེ་རྡོ་རྗེ། བཀྲ་ཤིས་ཚེ་རིང་། བསོད་ནམས་རྒྱལ། དར་རྒྱས། ཤ་བོ་ཚེ་རིང་། མཁའ་བྱམས་རྒྱལ། འབྲུག་འབུམ་ཚེ་རིང་བཅས་འཛིན་བཟུང་བྱས་ཡོད་པ་མ་ཟད། ཁོང་ཚོས་་བཙན་སྐུལ་གྱིས་ཚོང་བརྗེ་ལེན་དང་། ཧམ་འཕྲོག་གཡོ་ལེན། མི་མང་དཔུང་བསྡེབས་ཀྱིས་སྤྱི་ཚོགས་སྒྲིག་ལམ་ལ་གཏོར་བརླག་བཅས་བཏང་ཚུལ་དང་། གོང་རིམ་གྱི་འཛུགས་སྐྲུན་ལས་དོན་ལ་འགོག་རྐྱེན་བཟོས་པ་སོགས་ཀྱི་ཉེས་མིང་འོག ལོ་ ༣ ནས་ ༧ བར་གྱི་བཙོན་འཇུག་ཁྲིམས་ཐག་བཅད་ཡོད་པ་རེད།

འབྲེལ་ཡོད་གནས་ཚུལ།

རེབ་གོང་ནས་ནག་ཚོཊ་ཤིག་རྩད་ཆོད་ཡོད་ཟེར།

བོད་མི་དགུ་ལ་བཙོན་འཇུག་ཁྲིམས་ཐག་བཅད།

གསར་འགོད་པ། དཔལ་ལྡན།