ཡུ་རོབ་སྤྱི་འཐུས་ཐུབ་བསྟན་རྒྱ་མཚོ།
ཕྱི་ལོ་ ༢༠༢༢ ཟླ་ ༤ ཚེས་ ༢༤ ཉིན་ཧྥ་རན་སི་མི་མང་ས་ཡ་ ༤༨:༧ ཙམ་ལ་རང་གི་རྒྱལ་ཁབ་ཀྱི་སྐབས་རྗེས་མའི་སྲིད་འཛིན་གསར་བ་འོས་འཕེན་ཆེད་འབོད་སྒུག་བྱས་ཡོད། རྒྱ་མཚོའི་ཕ་རོལ་ཏུ་ཡོད་པའི་ཧྥ་རན་སིའི་ས་ཁུལ་ཡོངས་སུ་རེས་གཟའ་སྤེན་པ་ཉིན་ནས་འོས་བླུགས་ཚར། འོས་བསྡུར་མཉམ་ཞུགས་བྱ་མཁན་བརྒྱ་ཆ་ ༥༧ ནས་ ༥༤ བར་བྱུང་ཡོད་ཚོད། ད་ལོ་དངོས་གཞིའི་འོས་མི་རྣམ་གཉིས་ཕྱི་ལོ་ ༢༠༡༧ གྱི་འོས་མི་གཉིས་རང་འཇགས་འཁེལ་ཡོད།
དངོས་གཞིའི་འོས་མི་གཉིས་ལས་དང་པོ་ནི་ལས་ཐོག་སྲིད་འཛིན་ཨེ་མལ་བལ་མ་ཥི་ཝོན་མཆོག་དང་གཉིས་པ་གཡས་ཐལ་སྲིད་ཚོགས་ཀྱི་འོས་མི་ལྕམ་ལི་པཎ་གཉིས་ཆགས་ཡོད། རྗེས་མ་དེ་སྲིད་འཛིན་དངོས་གཞིའི་འོས་མིར་གྱུར་བ་ཐེངས་གཉིས་བསྟུད་མར་ཐོབ་པ་ནི་ལོ་ངོ་ ༥༠ ཐམ་པའི་རྗེས་སུ་གཡས་ཐལ་སྲིད་ཚོགས་ཀྱི་ལོ་རྒྱུས་ནང་ཐོག་མ་དེ་ཆགས།
སྲིད་འཛིན་འོས་མི་རྣམ་གཉིས་ཀྱི་ཧྥ་རན་སིའི་འབྱུང་འགྱུར་འཆར་སྣང་ལ་གཤམ་གསལ་གནད་དོན་ཐོག་ཁྱད་པར་ཆེན་པོ་མངོན།
སྤྱིར་ད་ལོ་འོས་བསྡུ་ནི་ཤར་ཡུ་རོབ་ཀྱི་ས་མཚམས་སུ་ར་ཡུག་དམག་འཁྲུག་ལངས་བཞིན་པའི་སྐབས་སུ་འཁེལ་བ་དང་།
༡ འོས་མི་གཉིས་ཀའི་གཟིགས་ཚུལ་མི་མཐུན་ས་ཡུ་རོབ་མཐུན་ཚོགས་དང་འབྲེལ་བ་འཛིན་ཕྱོགས།
༢ དཔལ་འབྱོར་གྱི་སྲིད་བྱུས་གཏན་འབེབས་གནང་ཕྱོགས།
༣ མི་མང་གི་ཉོ་ཚོང་ནུས་སྟོབས་གོང་འཕེལ་ཇི་ལྟར་གཏང་དགོས་མིན།
༤ ཧྥ་རན་སི་དང་ཨུ་རུ་སུ་བར་འབྲེལ་བ་ཇི་ལྟར་འཛིན་དགོས་མིན།
༥ མི་མང་ལོ་ཚད་ཇི་ཙམ་ལ་རྒས་ཡོལ་འགྲོ་ཆོག་མིན་གྱི་འཆར་འགོད་ཁྲིམས་ཡིག་གཏན་འབེབས་གནང་ཕྱོགས།
༦ ཕྱི་མི་ཧྥ་རན་སིར་གནས་སྤོས་ཡོང་མཁན་སྟངས་འཛིན་ཇི་ལྟར་བྱ་དགོས་པ་དང་ཆབ་སྲིད་སྐྱབས་བཅོལ་ཞུ་རྒྱུའི་ཐོབ་ཐང་མུ་མཐུད་དེ་སྤྲོད་དགོས་མིན།
སྲིད་འཛིན་འོས་མི་གཉིས་ཀའི་ལས་འཆར་དང་ཆབ་སྲིད་ལངས་ཕྱོགས་བཅས་སྤྱི་ཡོངས་ནས་ཁྱད་པར་དང་ཧེ་བག་ཆེན་པོ་ཡོད་སྟབས་དོ་དགོང་གི་ཧྥ་རན་སིའི་མི་མང་གི་འོས་འཕེན་གྲུབ་འབྲས་ཀྱང་འགལ་བའི་ཆ་དེ་གསལ་བོ་མཚོན་རྒྱུ་ལས་མ་འདས།
༨ དེ་རིང་དགོང་མོ་ས་གནས་ཆུ་ཚོད་ ༢༠:༠༠ ནས་བརྙན་འཕྲིན་བརྒྱུད་ནས་ཧྥ་རན་སིའི་སྲིད་འཛིན་གསར་བ་སུ་ཡིན་མིན་ནམ་རྒྱུན་ལྟར་གསལ་བསྒྲགས་བྱ་རྒྱུ་ཡིན་འདུག
འདས་པའི་ལོ་ངོ་ལྔ་རིང་ལ་སྲིད་འཛིན་ལས་ཐོག་པ་སྐུ་ཞབས་མ་ཥི་ཝོན་མཆོག་གི་སྲིད་སྐྱོང་གི་དུས་ཡུན་རིང་ལ་མི་མང་ཁྲོད་སྟོད་ཐུང་སེར་བོ་གོན་མཁན་ཚོས་ཟླ་ཤས་རིང་ལ་ངོ་རྒོལ་ལས་འགུལ་སྤེལ་བ་ནས་བཟུང་ཏོག་དབྱིབས་ནད་ཡམས་ཀྱི་དཀའ་ངལ་བཅས་དཀའ་ངལ་ཟམ་མི་ཆད་པ་བྱུང་ཡོད།
དེ་རིང་དགོང་མོ་སྲིད་འཛིན་གསར་བ་སུ་འདེམས་ཐོན་བྱུང་རུང་འདི་ལོ་ཕྱི་ཟླ་ ༦ ཚེས་ ༡༢ ཉིན་གྲོས་ཚོགས་འོག་མའི་སྔོན་འགྲོའི་འོས་བསྡུ་བྱ་རྒྱུ་དང་ཚེས་ ༡༩ ཉིན་དངོས་གཞིའི་འོས་བསྡུ་བྱས་རྗེས་སྲིད་འཛིན་གསར་བའི་སྲིད་ལྟ་དང་ལས་འཆར་བཅས་ལ་རྒྱབ་སྐྱོར་ཡོད་མཁན་གྲོས་ཚོགས་འཐུས་མི་མང་བར་འོས་འཐོབ་ན་མ་གཏོགས་སྲིད་འཛིན་གསར་བའི་སྲིད་བྱུས་དང་ལས་འཆར་ལག་བསྟར་བྱ་རྒྱུའི་རྩ་ཁྲིམས་དང་ཆབ་སྲིད་ཀྱི་ཆ་རྐྱེན་ལྡན་མི་ཐུབ། ཕྱི་ཟླ་ ༦ ཚེས་ ༢༠ ནས་བཟུང་སྟེ་གཞུང་འཛིན་སྲིད་ཚོགས་སུ་བསླེབ་རྒྱུ་ཡིན་མིན་ཧ་གོ་ཡོང་རྒྱུ་དང་།
གལ་ཏེ་སྲིད་འཛིན་གྱི་སྲིད་ཚོགས་ནས་མིན་པའི་གྲོས་ཚོགས་འོག་མའི་འཐུས་མི་མང་བ་འདེམས་ཐོན་བྱུང་ན་གཞུང་གི་སྲིད་བློན་གསར་བ་ཕྱོགས་འགལ་ཚོགས་པས་བསྐོ་གཞག་བྱས་པའི་མི་སྣ་ཞིག་ཡིན་དགོས། སྲིད་འཛིན་གྱི་མང་མོས་འོས་འབྲས་དང་གྲོས་ཚོགས་ཀྱི་འོས་བསྡུའི་གྲུབ་འབྲས་མ་མཐུན་ཚེ་སྲིད་སྐྱོང་ལམ་སྲོལ་ལ་ cohabitation ཟེར། སྲིད་འཛིན་ལ་དམག་དོན་དང་ཕྱི་སྲིད་འབྲེལ་བ་བཅས་ཐད་དམིགས་བསལ་སྐུ་དབང་ཡོད་པ་མ་གཏོགས་གཞན་གཞུང་གི་དབང་ཆ་ཡོངས་རྫོགས་ཕྱོགས་འགལ་ཚོགས་པའི་ལག་པར་ཡོད། གོང་སྨོས་གནས་འབབ་དེ་ནི་ཉེ་རབས་ཧྥ་རན་སིའི་རྩ་ཁྲིམས་ལག་བསྟར་ལོ་རྒྱུས་ནང་ཐེངས་མ་གཉིས་བྱུང་མྱོངས་ཡོད། གཅིག་ནི་སྲིད་འཛིན་མེ་ཊའི་དབང་མཆོག་དང་སྲིད་བློན་ཤུས་རག་ཥི་མཆོག་གི་སྐབས། གཉིས་པ་ནི་སྲིད་འཛིན་ཤུས་རག་ཥི་མཆོག་དང་སྲིད་བློན་ལེའུ་ནལ་འཇོ་སེ་པཎ་གྱི་སྐབས་བྱུང་ཡོད།
སྲིད་འཛིན་ལས་ཐོག་པར་དོ་དགོང་འོས་ཤོག་ཐོབ་པའི་དབང་དུ་གཏང་རུང་ད་དུང་མུ་མཐུད་ནས་མང་ཚོགས་ལ་གྲོས་ཚོགས་འོག་མའི་འོས་བསྡུའི་སྐབས་སྲིད་འཛིན་གྱི་ལྟ་གྲུབ་དང་ལས་འཆར་རྒྱབ་སྐྱོར་ཡོད་མཁན་གྱི་འཐུས་མི་གང་མང་འདེམས་རོགས་ཞེས་འོས་བསྡུའི་དྲིལ་བསྒྲགས་ཤུགས་ཆེན་བྱ་དགོས་པ་ཡིན། གྲོས་ཚོགས་འཐུས་མི་མང་བ་རག་ན་རྗེས་ནས་སྲིད་འཛིན་གསར་བའི་བཀོད་འདོམས་འོག་བསྐྱོད་མཁན་སྲིད་བློན་གསར་བའི་སྣེ་འཁྲིད་པའི་གཞུང་གསར་བའི་བཀའ་བློན་རྣམས་གཏན་འབེབས་བྱ་ཐུབ།
འོན་ཀྱང་ཧྥ་གཞུང་གི་བཀའ་བློན་གསར་བ་རྣམས་ལ་རང་གཞུང་བོད་མིའི་སྒྲིག་འཛུགས་ཀྱི་བཅའ་ཁྲིམས་རིན་པོ་ཆེའི་དོན་ཚན་ ༢༢ དང་དོན་ཚན་ ༢༣ གྱི་དགོངས་དོན་ལྟར་གྲོས་ཚོགས་ནང་འོས་འཕེན་དང་རྒྱབ་སྐྱོར་ཡོད་མེད་ཀྱི་བཀའ་འཁྲོལ་ཞུ་དགོས་མེད། གཞུང་གི་བཀའ་ཤག་གསར་བ་གཏན་འབེབས་སྐབས་གྲོས་ཚོགས་ལ་དམིགས་བསལ་ཐེ་བྱུས་བྱ་རྒྱུའི་སྐུ་དབང་ཅི་ཡང་མེད།
