བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཕྱི་ཟླ་ ༥ ཚེས་ ༡༢ བར་ཨ་རིའི་རྒྱལ་ས་ཝ་ཤིང་ཊོན་གཙོ་བོར་གྱུར་བའི་ཨ་རིའི་ནང་གི་བོད་མིའི་འདུས་སྡོད་ཁུལ་དང་ཁེ་ན་ཌའི་ནང་གཞུང་འབྲེལ་འཚམས་གཟིགས་ཐེངས་དང་པོ་དབུ་འཛུགས་གནང་ཡོད་པ་རེད།
ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནན་སི་ཕེ་ལོ་སི་མཆོག་ནས་མགྲོན་འབོད་གནང་བ་ལྟར། བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཟླ་འདིའི་ཕྱི་ཚེས་ ༢༤ ཉིན་ཨ་རིའི་རྒྱལ་ས་ཝ་ཤིང་ཊོན་དུ་ཕེབས་འབྱོར་བྱུང་ཡོད་པ་དང་། སྐབས་དེར་སྐུ་ཚབ་དོན་གཅོད་འབུམ་རམས་པ་རྣམ་རྒྱལ་མཆོག་གྲུབ་ལགས་དང་། རྒྱལ་སྤྱིའི་བོད་དོན་ལས་འགུལ་ཁང་གི་བར་བརྒལ་འགན་འཛིན་བུ་ཆུང་ཚེ་རིང་ལགས་སོགས་གནམ་ཐང་དུ་ཕེབས་བསུར་བཅར་ཡོད་འདུག་ལ། སྲིད་སྐྱོང་མཆོག་གི་ཨ་རིའི་ནང་གི་འཚམས་གཟིགས་ཐེངས་དང་པོའི་ཁྲོད་ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནན་སེ་ཕི་ལོ་སི་མཆོག་དང་གྲོས་ཚོགས་གོང་འོག་གི་འཐུས་མི་ཁག་ཅིག དེ་བཞིན་ཨ་རིའི་གཞུང་ནས་བསྐོ་བཞག་གནང་བའི་བོད་དོན་དམིགས་བསལ་འབྲེལ་མཐུད་པ་ལྕམ་ཨུ་ཛི་ར་ཛི་ཡ་ལགས་སོགས་དང་མཇལ་མོལ་གྱིས་མ་འོངས་པར་མཉམ་འབྲེལ་ཕྱག་ལས་གནང་ཕྱོགས་ཐོག་གོ་བསྡུར་གནང་རྒྱུ་དང་། དེ་བཞིན་ཨ་རིའི་ཉམས་ཞིབ་ལྟེ་གནས་ཁང་ཁག་ཅིག་དང་མཐོ་སློབ་ནང་བོད་དོན་གསུང་བཤད་གནང་རྒྱུ་འདུག
དེ་བཞིན་༧པཎ་ཆེན་རིན་པོ་ཆེ་མཆོག་དགུང་གྲངས་ ༣༣ ཕེབས་པའི་འཁྲུངས་སྐར་དང་བསྟུན་གནད་ཡོད་མི་སྣ་འཛོམས་པའི་མཛད་སྒོ་འཚོག་སྟེ་རིན་པོ་ཆེ་མཆོག་ཀློད་གྲོལ་འཐོབ་ཐབས་སྐོར་ལ་ཞུ་གཏུག་གནང་རྒྱུ་དང་། བོད་རིགས་སྤྱི་མཐུན་ཚོགས་པ་གང་མང་མང་ལ་ཐུག་འཕྲད་གནང་འཆར་ཡོད་པ་ལྟར། དེ་སྔོན་སྲིད་སྐྱོང་མཆོག་དོན་གཅོད་ཡིན་སྐབས་ཕེབས་མ་ཐུབ་པའི་ཧྥེ་ལོ་ཌོ་ཧྥི་ཡའི་ནང་གི་བོད་མི་ཚོར་ཐུག་འཕྲད་གནང་རྒྱུ་དང་། དེ་ནས་ནེའུ་ཡོག་ཏུ་བོད་རིགས་མི་མང་ལ་ཐུག་འཕྲད་དང་རྒྱ་རིགས་ཤེས་ཡོན་ཅན་ལ་ཐུག་འཕྲད་སོགས་ཀྱི་ཨ་རིའི་ནང་གི་ལས་རིམ་རྣམས་གྲུབ་རྗེས། ཁ་ན་ཌའི་ཨོ་ཊོ་ཝ་དང་ཊོ་རིན་ཊོ་སོགས་སུ་ཕེབས་ཏེ་ས་གནས་གྲོས་ཚོགས་འཐུས་མིར་མཇལ་མོལ་དང་མི་མང་ལ་ཐུག་འཕྲད་སོགས་གནང་འཆར་ཡོད་འདུག
ཟླ་འདིའི་ཕྱི་ཚེས་ ༢༡ ཉིན་ནས་ཚེས་ ༢༤ བར་སྲིད་སྐྱོང་མཆོག་དང་བོད་མིའི་སྒྲིག་འཛུགས་ཀྱི་མགྲིན་ཚབ་པ་བསྟན་འཛིན་ལེགས་བཤད་ལགས། སྲིད་སྐྱོང་མཆོག་གི་སྒེར་དྲུང་བསྟན་འཛིན་གསལ་སྒྲོན་ལགས་བཅས་ཇར་མ་ནིའི་གྲོང་ཁྱེར་ (Frankfurt) ནང་ཕེབས་ཏེ། བསམ་མཛོད་བསྟི་གནས་ཀྱི་མཁས་པའི་ཚོགས་འདུར་མཉམ་ཞུགས་གནང་ཡོད་པ་དང་། དེ་བཞིན་ཇར་མ་ནིའི་གསར་འགོད་པ་དང་མཇལ་འཕྲད། དེ་བཞིན་ (Frankfurt) བོད་ཁང་དུ་ས་གནས་བོད་རིགས་མང་ཚོགས་དང་མཇལ་འཕྲད་དང་གསུང་བཤད་གནང་ཡོད་འདུག
ཟླ་འདིའི་ཕྱི་ཚེས་ ༢༣ ཉིན་སྲིད་སྐྱོང་མཆོག་གིས་ཇར་མ་ནཱིའི་གྲོང་ཁྱེར་ (Frankfurt) ཁུལ་གྱི་བོད་རིགས་རྣམས་ལ་གསུང་བཤད་དང་དྲི་བར་ལན་འདེབས་གནང་སྐབས། སྲིད་སྐྱོང་སྤེན་མཆོག་གིས། ང་ཚོའི་ལས་གཞི་གསར་པ་ཞིག་ནི་བོད་དོན་དང་བླངས་ཞུ་གཏུག་ལས་འགུལ་ཡིན་པ་དང་། ང་ཚོས་གདོང་ལེན་བྱེད་དགོས་པ་མང་པོ་འདུག གཞིས་ཆགས་ཁག་གི་ནང་མི་ཉུང་དུ་འགྲོ་བཞིན་ཡོད་པ་དང་། ཕྱི་རྒྱལ་ཡུལ་གྲུ་ཁག་གི་ནང་བོད་མི་མང་དུ་འགྲོ་བཞིན་ཡོད་པ་རེད། ང་ཚོས་གདོང་ལེན་བྱེད་དགོས་པ་རྣམས་གོ་སྐབས་ལ་བསྒྱུར་ནས་ལས་ཀ་ཇི་ལྟར་བྱེད་དགོས་ཀྱི་ཡོད་པའི་སྐོར་བསམ་བློ་གཏོང་དགོས་རྒྱུ་གལ་ཆེན་པོ་རེད་འདུག དེར་བརྟེན་བོད་དོན་དང་བླངས་ཞུ་གཏུག་ལས་འགུལ་ཞེས་མགོ་བཙུགས་ཀྱི་ཡོད་པ་རེད། ཅེས་དང་། གོ་ཐོས་ལ་ (Frankfurt) ནས་བོད་རིགས་ཁ་ཤས་ཀྱིས་ཐོ་བརྒྱབ་འདུག་ལ་གང་མང་ཡོང་ཐབས་གནང་དགོས་ཀྱི་འདུག ལྷག་པར་དུ་བོད་རིགས་གཞོན་སྐྱེས་ཚོས་སྣེ་ཁྲིད་ཐུབ་པ་ཡིན་ན། བོད་མིའི་སྒྲིག་འཛུགས་ནས་བསྐོ་མི་དགོས་པར་བོད་རིགས་ནང་ཁུལ་ནས་འགོ་ཁྲིད་འཐོན་ཐུབ་པ་དང་། འགོ་ཁྲིད་དེ་དག་གིས་མ་འོངས་པར་རྒྱལ་སྤྱིའི་ངོ་བོའི་ཐོག་ནས་ཚོགས་འདུ་རྒྱ་ཆེ་བ་དེ་འདྲ་འཚོགས་དགོས་ཀྱི་འདུག ང་ཚོའི་དམིགས་ཡུལ་བསྒྲུབ་པར་གཞོན་སྐྱེས་ཚོར་ཐབས་ཤེས་མི་འདྲ་བ་ཏན་ཏན་ཡོད་པ་རེད་བསམ་གྱི་ཡོད། དེར་བརྟེན་བོད་དོན་དང་བླངས་ཞུ་གཏུག་ནང་བོད་མི་གང་མང་མཉམ་ཞུགས་གནང་སྟེ་ལུང་པ་རེ་རེ་ནས་ཤུགས་བརྒྱབ་ཐུབ་པ་དང་། ཤུགས་རྒྱག་སྟངས་དེ་རྒྱུན་ལྡན་ནང་བཞིན་ཡོད་ཚད་ཚང་མར་བསྙབ་ཐུབ་རྒྱུའི་ཐབས་ཤེས་མ་ཡིན་པར་བོད་དོན་དང་འབྲེལ་བའི་ཐོག་ནས་ཐབས་ཤེས་བཏང་ནས་ནུས་པ་ཕྲན་བུ་ཡོད་པ་དེ་སྤྲུངས་དགོས་སྐོར་སོགས་གསུངས་ཡོད་འདུག
བོད་མིའི་སྒྲིག་འཛུགས་ཀྱི་དྲ་བ་ལས་གསར་འགོད་པ་བསྟན་འཛིན་ཕུར་བུས་བཏུས།
