བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་ཕྱི་དྲིལ་བཀའ་བློན་མཆོག དེ་བཞིན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་བཅས་ནས་སྐུ་ཞབས་མཱག་རོན་མཆོག་བསྐྱར་དུ་ཧྥ་རན་སིའི་སྲིད་འཛིན་དུ་འདེམས་ཐོན་བྱུང་བར་འཚམས་འདྲི་གནང་འདུག
དེ་ཡང་སྲིད་སྐྱོང་སྤེན་པ་ཚེ་རིང་མཆོག་གི་སྒེར་གྱི་ཊི་ཝེ་ཊར་དུ། སྐུ་ཞབས་མཱག་རོན་ལགས་བསྐྱར་དུ་ཧྥ་རན་སིའི་སྲིད་འཛིན་དུ་འོས་འདེམས་བྱུང་བར་འཚམས་འདྲི་ཞུ། ལོ་རྒྱུས་རང་བཞིན་ལྡན་པའི་རྒྱལ་ཁ་འདི་ནི་ཁྱེད་ཀྱི་མགོ་ཁྲིད་དང་རིན་ཐང་ལ་ཧྥ་རན་སིའི་མི་མང་གིས་ཡིད་ཆེས་ཡོད་པ་མཚོན་ཡོད། ཅེས་གསུངས་འདུག
བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་གི་སྐུ་ཞབས་མཱག་རོག་མཆོག་ལ་ཕུལ་བའི་འཚམས་འདྲིའི་ནང་། ཁྱེད་རང་བསྐྱར་དུ་སྲིད་འཛིན་དུ་འདེམས་ཐོན་བྱུང་བ་དེས། ཁྱེད་ཀྱི་མགོ་ཁྲིད་དང་ཆོད་སེམས་ལ་མི་མང་གི་ཡིད་ཆེས་ཡོད་པ་མཚོན་གྱི་ཡོད། ངས་ཁྱེད་ཀྱིས་མུ་མཐུད་དུ་འགྲོ་བ་མིའི་རིགས་ཀྱི་ཐོབ་ཐང་དང་། དམངས་གཙོའི་བྱ་གཞག་གོང་མཐོར་གཏོང་བའི་རེ་བ་ཞུ། བོད་ལྟ་བུར་མཚོན་ན། རྒྱ་ནག་གཞུང་གིས་བཙན་གནོན་གྱི་འོག་ནས་བོད་ནང་གི་བོད་མི་ཚོར་ཆོས་ལུགས་ཀྱི་རང་དབང་དང་། སྨྲ་བརྗོད་ཀྱི་རང་དབང་། སྐད་ཡིག་བདག་གཅེས་ཀྱི་རང་དབང་མཚོན་པའི་གཞི་རྩའི་འགྲོ་བ་མིའི་རིགས་ཀྱི་ཐོབ་ཐང་མང་པོ་ཞིག་མེད་པ་རེད། གོ་སྐབས་འདི་བརྒྱུད་ནས་ཁྱེད་ཀྱིས་མགོ་ཁྲིད་འོག་ཧྥ་རན་སིར་གནས་སྡོད་བོད་མི་རྣམས་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་དང་། ཁྱེད་ཀྱིས་མུ་མཐུད་བོད་ཀྱི་རྩ་དོན་འཐབ་རྩོད་ཐོག་རྒྱབ་སྐྱོར་ཡོད་པའི་རེ་བ་ཞུ། ཞེས་གསུངས་འདུག
ཕྱི་འབྲེལ་བཀའ་བློན་ནོར་འཛིན་སྒྲོལ་མ་མཆོག་གི་འཚམས་འདྲིའི་ནང་དུ། བོད་མིའི་སྒྲིག་འཛུགས་ཕྱི་འབྲེལ་ལས་ཁུངས་ཀྱི་ཚབ་ཞུས་ཏེ། ཁྱེད་སྲིད་འཛིན་དུ་འདེམས་ཐོན་བྱུང་བར་འཚམས་འདྲི་ཞུ་རྒྱུ་ཡིན། གོ་ལ་ཡོངས་སུ་ཞི་བདེ་འདོད་མཁན་རྣམས་ཀྱིས་ཁྱེད་ཧྥ་རན་སིའི་རྒྱལ་ཁབ་ཀྱི་སྲིད་འཛིན་གྱི་རྒྱལ་ཁ་ཐོབ་པར་དགའ་མོས་བྱེད་ཀྱི་ཡོད་ཅིང་། དམིགས་བསལ་ད་ལྟའི་ཆར་འཛམ་གླིང་ནང་དཀའ་རྙོག་མང་པོ་འབྱུང་བཞིན་ཡོད་པས། ཁྱེད་རང་གིས་ཡུ་རོབ་རྒྱལ་ཁབ་སྟོབས་ཤུགས་ཅན་དུ་བཟོ་རྒྱུ་དང་ཧྥ་རན་སིའི་རྒྱལ་ཁབ་ནས་ཁོར་ཡུག་སྲུང་སྐྱོབ་བྱ་རྒྱུའི་དམིགས་ཡུལ་གཙོ་བོར་བཟུང་བར་མི་མང་རྣམས་ཀྱིས་དགའ་མོས་ཧ་ཅང་བྱེད་ཀྱི་ཡོད་པ་རེད། ཅེས་གསུངས་འདུག
ཡང་བཀའ་བློན་མཆོག་གིས། ལོ་མང་རིང་ཧྥ་རན་སི་རྒྱལ་ཁབ་དང་གྲོས་ཚོགས་གོང་མའི་ངོས་ནས་༧གོང་ས་མཆོག་དང་བོད་དོན་སླད་རྒྱབ་སྐྱོར་མུ་མཐུད་གནང་བར་བཀའ་དྲིན་ཆེན་པོ་ཡིན་པ་དང་། ཧྥ་རན་སི་རྒྱལ་ཁབ་ཀྱི་ནང་དུ་བོད་དོན་རྒྱབ་སྐྱོར་ཚོགས་པ་མང་པོ་ཡོད་པ་རེད། དེར་བརྟེན། ཧྥ་རན་སིའི་གཞུང་དང་མི་སེར་ཡོངས་ཀྱིས་བོད་མི་དང་བོད་དོན་ཐོག་རྒྱབ་སྐྱོར་གནང་བར་ཐུགས་རྗེ་ཆེ་ཞུ་རྒྱུ་ཡིན། ད་དུང་ཧྥ་རན་སིའི་སྲིད་འཛིན་སྐུ་ཞབས་ཨེམ་མཱ་ནོལ་མཱག་རོན་མཆོག་གི་སྣེ་ཁྲིད་འོག་བོད་རྒྱ་འབྲེལ་མོལ་ཐད་ཀྱི་དཀའ་རྙོག་སེལ་རྒྱུ་དང་བོད་རྒྱ་འབྲེལ་མོལ་ཡོང་རྒྱུའི་ཆེད་དུ་རྒྱབ་སྐྱོར་གནང་རོགས་ཞུ། ཞེས་གསུངས་འདུག
གསར་འགོད་པ། བསྟན་འཛིན་ཕུར་བུ། དཔལ་ལྡན།
