རྒྱ་ནག་གཞུང་གིས་བོད་ཀྱི་རིག་གཞུང་རྩ་མེད་གཏོང་བའི་སྲིད་ཇུས་ལག་བསྟར་བྱེད་བཞིན་པ་དེ་ཚབས་ཆེ་ཤོས་རེད་འདུག

དེ་རིང་དྷ་སར་རྟེན་གཞི་བྱས་པའི་བོད་ཀྱི་འགྲོ་བ་མིའི་ཐོབ་ཐང་དང་མང་གཙོ་འཕེལ་རྒྱས་ལྟེ་གནས་ཁང་གིས་ཕྱི་ལོ་ ༢༠༢༡ ལོའི་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་སྐོར་གྱི་སྐད་ཡིག་གསུམ་ལྡན་གྱི་ལོ་འཁོར་སྙན་ཐོ་ཤོག་གྲངས་ ༣༢ ཅན་ཞིག་འདོན་སྤེལ་བྱས་ཏེ་རྒྱ་ནག་གཞུང་ངོས་ནས་བོད་ས་ཡོངས་སུ་རྒྱ་བསྒྱུར་སློབ་གསོ་སྤེལ་མཚམས་འཕྲལ་དུ་འཇོག་དགོས་པའི་སྐུལ་འདེབས་བྱས་འདུག

ལྟེ་གནས་ཁང་གི་འགན་འཛིན་ཚེ་རིང་མཚོ་མོ་ལགས་ཀྱིས་འདི་ལོའི་སྙན་ཐོ་དང་འབྲེལ་ནས་བརྗོད་དོན། ད་ལོ་ལྟ་བུར་མཚོན་ན་ཁོ་ཚོས་(རྒྱ་ནག་གཞུང་)གིས་སྲིད་ཇུས་སྒྲིག་སྟངས་དེ་ཚོ་ཧང་སངས་དགོས་པ་དེ་འདྲ་རེད་འདུག ད་ལན་བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་ལ་བསྡོམས་ལྟ་བུ་ཞིག་བརྒྱབ་དགོས་ན། ནམ་རྒྱུན་འགྲོ་བ་མིའི་ཐོབ་ཐང་གི་གནས་སྟངས་ལབ་དུས། མི་གཅིག་འཇུ་བཟུང་བྱས་སོང་། མི་གཅིག་ལ་མནར་གཅོད་བཏང་འདུག་ཟེར་བ་དང་། དགོན་པ་གཏོར་འདུག་ཟེར་བ་ལྟ་བུ་ཡིན་ཡང་། ད་ལྟའི་གནས་སྟངས་འདི་སྤྱི་པའི་ཐོབ་ཐང་དང་མི་རིགས་ཤིག་རྩ་མེད་བཟོ་རྒྱུའི་སྲིད་ཇུས་ལག་བསྟར་བྱེད་ཀྱི་ཡོད་པ་མཐོང་གི་འདུག ཅེས་དང་། དེ་ནི་འགྲོ་བ་མིའི་ཐོབ་ཐང་ལས་ལྷག་པའི་གནད་དོན་ཞིག་ཡིན་སྟབས། དེར་གདོང་ལེན་དང་དཀའ་ངལ་སེལ་ཐབས་ཆེད་དུས་རྒྱུན་ལས་ལྷག་པའི་ལམ་བུ་ཞིག་བཙལ་དགོས་ཀྱི་ཡོད་སྐོར་འགྲེལ་བརྗོད་གནང་སོང་། དེ་བཞིན་འདས་ལོའི་བོད་ནང་གི་འགྲོ་བ་མིའི་ཐོབ་ཐང་ཐད་ཀྱི་གནད་དོན་ཚབས་ཆེ་ཤོས་དེ་གང་ཡིན་སྐོར་གྱི་གསར་འགོད་པའི་དྲི་བར་ལན་འདེབས་བྱེད་སྐབས། བོད་ནང་གི་འགྲོ་བ་མིའི་ཐོབ་ཐང་རྡོག་རོལ་གྱི་གནས་དོན་ཕལ་ཆེ་བ་རྒྱ་ནག་གཞུང་གིས་རིག་གཞུང་རྩ་མེད་གཏོང་རྒྱུའི་སྲིད་ཇུས་ལག་བསྟར་བྱས་པའི་རྐྱེན་གྱིས་བྱུང་ཡོད་པ་དང་། ལྟེ་གནས་ཁང་ངོས་ནས་སྲིད་ཇུས་དེ་གནད་འགག་ཆེ་ཤོས་ཤིག་ལ་ངོས་འཛིན་བྱེད་ཀྱི་ཡོད་སྐོར་འགྲེལ་བརྗོད་བྱས་སོང་།

འདི་ལོའི་སྙན་ཐོ་དང་འབྲེལ་ལྟེ་གནས་ཁང་ངོས་ནས་རྒྱ་ནག་དམར་ཤོག་སྲིད་གཞུང་ལ་སྐུལ་འདེབས་དོན་ཚན་ ༡༤ བཏོན་པའི་ནང་། རྒྱ་ནག་གཞུང་གིས་བོད་མི་ཚོར་ཤེས་ཡོན་དང་རིག་གཞུང་གི་ལས་དོན་ཐད་རང་ཐག་རང་གཅོད་ཀྱི་ཐོབ་ཐང་སྤྲོད་དགོས་པ་དང་། བོད་ཡིག་སློབ་གྲྭ་སྒོ་རྒྱག་པ་དང་བསླབ་གཞིའི་སྐད་ཡིག་རྒྱ་ཡིག་ཏུ་སྒྱུར་བཞིན་པ་འཕྲལ་དུ་མཚམས་འཇོག་དགོས་པ། བོད་མི་ཚོའི་ཁང་ཁྱིམ་དང་ཁ་པར་སོགས་ལ་སྔོག་བཤེར་བྱེད་མཚམས་འཇོག་དགོས་པ། དེ་བཞིན་༧པཎ་ཆེན་རིན་པོ་ཆེ་མཆོག་གཙོས་པའི་བོད་མི་ཆབ་སྲིད་བཙོན་པ་རྣམས་ཀློད་གྲོལ་དགོས་པ་དང་། རྒྱལ་ཁབ་བདེ་འཇགས་ཀྱི་ཁྲིམས་ཡིག་གིས་མཚོན་པའི་འགྲོ་བ་མིའི་ཐོབ་ཐོང་རྡོག་རོལ་གཏོང་བྱེད་ཀྱི་ཁྲིམས་སྒྲིག་ཁག་ལ་བསྐྱར་བཅོས་བྱ་དགོས་པ་སོགས་འཁོད་འདུག

དེ་བཞིན་རྒྱལ་སྤྱིའི་སྤྱི་ཚོགས་ལ་སྐུལ་འདེབས་དོན་ཚན་ ༨ བཏོན་པའི་ནང་། བོད་ནང་དུ་རིག་གཞུང་དང་འབྲེལ་བའི་ཤེས་ཡོན་གྱི་སྤུས་ཚད་གང་འདྲ་ཡོད་མེད་རྟོག་ཞིབ་ཆེད་མཉམ་འབྲེལ་རྒྱལ་ཚོགས་ཀྱི་ཤེས་ཡོན་གྱི་ཐོབ་ཐང་དང་གྲངས་ཉུང་མི་རིགས་ཀྱི་ཐོབ་ཐང་སྐོར་གྱི་དམིགས་བསལ་སྙན་སྒྲོན་པ་རྣམ་པ་བོད་ནང་དུ་གདན་འདྲེན་ཞུ་ཐབས་དགོས་པ་དང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐང་ལྷན་ཚོགས་ཀྱི་ཚོགས་གཙོ་བོད་ནང་དུ་ཕེབས་ཐབས་དགོས་པ། རྒྱ་ནག་གཞུང་གི་སྐུ་ཚབ་མི་སྣ་ལྷན་དུ་འགྲོ་བ་མིའི་ཐོབ་ཐང་སྐོར་གླེང་སློང་བྱ་དགོས་སྐོར་དང་། གཞན་ཡང་མཉམ་འབྲེལ་རྒྱལ་ཚོགས་དང་རྒྱལ་སྤྱིའི་ཚོགས་འདུའི་སྐབས་རྒྱ་ནག་གི་སྐུ་ཚབ་ཀྱིས་བཏོན་པའི་གྲོས་གཞིར་རྒྱབ་སྐྱོར་མ་བྱས་པར་རྒྱ་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་བའི་གནས་ཚུལ་རྣམས་ཕྱི་གསལ་ནང་གསལ་བཟོ་དགོས་པ་སོགས་ཀྱི་སྐུལ་འདེབས་བྱས་འདུག

འདི་ལོའི་ལྟེ་གནས་ཁང་གི་ལོ་འཁོར་སྙན་ཐོའི་ནང་། རྒྱ་ནག་གཞུང་གིས་རྒྱའི་སྤྱི་སྐད་ཟེར་བའི་སྲིད་ཇུས་ལག་བསྟར་བྱས་པ་སོགས་བོད་ནང་གི་སྐད་ཡིག་དང་ཤེས་ཡོན་གྱི་ཐོབ་ཐང་གི་གནས་བབ་དང་། རོང་བོ་དགེ་འདུན་ལྷུན་གྲུབ་དང་སྒོ་ཡོན། གངས་སྐྱེས་སྒྲུབ་པ་སྐྱབས། དྷི་ལྷ་ལྡན། སྒོ་ཤེས་རབ་རྒྱ་མཚོ་བཅས་ཀྱིས་མཚོན་པའི་བོད་ཀྱི་ཤེས་ཡོན་མི་སྣར་འབུར་འཇོམས་བྱེད་ཚུལ། ༧གོང་ས་མཆོག་གི་སྐུ་པར་ལ་དམ་དྲག་དང་། འཛིན་བཟུང་བཀག་ཉར་དང་མནར་གཅོད་གཏོང་བའི་གནས་ཚུལ་རྣམས་འཁོད་འདུག་ལ། སྙན་ཐོའི་མཇུག་བསྡོམས་ནང་། བོད་ནང་གི་འགྲོ་བ་མིའི་ཐོབ་ཐང་གི་གནས་སྟངས་མུ་མཐུད་ཛ་དྲག་ཇེ་ཆེར་ཡིན་པ་དང་། རྒྱ་ནག་གི་རྩ་ཁྲིམས་ཀྱི་སྔོན་གླེང་དུ་རྒྱ་རིགས་ཆེན་པོའི་རིང་ལུགས་ནི་རྒྱ་ནག་གི་མི་རིགས་མཐུན་སྒྲིལ་གཏོར་བྱེད་ཀྱི་དགྲ་བོ་ཡིན་ཚུལ་བཤད་ཡོད་ཀྱང་། ད་ལྟའི་ཆར་རྒྱ་ཁྱབ་ཏུ་ལག་བསྟར་བྱེད་བཞིན་པའི་ཀྲུང་གོ་ཅན་དུ་བསྒྱུར་བའི་སྲིད་ཇུས་ཟེར་བ་དེ་ནི་རྒྱ་རིགས་ཆེན་པའི་རིང་ལུགས་ཀྱི་རྣམ་པ་གཞན་ཞིག་ཡིན་སྐོར་དང་། ཀྲུང་གོ་ཅན་དུ་བསྒྱུར་བ་ཞེས་པའི་མིང་ཐོག་ནས་རྒྱ་ནག་གུང་ཁྲན་སྲིད་གཞུང་གིས་མིང་བཏགས་པའི་ཀྲུང་ཧྭའི་རིག་གནས་དང་ཀྲུང་ཧྭའི་མི་རིགས་ཞེས་པ་དར་སྤེལ་གཏོང་དགོས་ཚུལ་བཤད་དེ་བོད་ཀྱི་ཆོས་དང་རིག་གཞུང་དང་སྐད་ཡིག་སོགས་ནི་རིན་ཐང་གི་ཆ་ནས་རིམ་པ་དམའ་བར་བརྩིས་ནས་རིམ་བཞིན་རྩ་མེད་གཏོང་ཐབས་ཀྱི་སྲིད་ཇུས་ལག་བསྟར་བྱེད་བཞིན་ཡོད་སྐོར་འཁོད་འདུག