བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ཨུ་ཛི་ར་ཛི་ཡ་ལགས་སོགས་སུ་མཇལ་འཕྲད་གནང་སྟེ་བོད་དོན་ཞུ་གཏུག་གནང་བཞིན་ཡོད་པ་ལྟར་ཨ་རིའི་སྲིད་དོན་ཚོགས་པ་ཐུན་མོང་དང་། རྒྱལ་སྤྱིའི་དབུ་ཁྲིད་རྣམ་པས་བོད་ཀྱི་འཐབ་རྩོད་ཐོག་རྒྱབ་སྐྱོར་གནང་བ་དེ་ནི་གཞིས་བྱེས་བོད་མི་ཡོངས་ཀྱི་རེ་བ་བཅོལ་ས་ཞིག་ཆགས་ཀྱི་ཡོད་པས། ང་ཚོས་རྟག་ཏུ་དྲན་ངེས་ཡིན་སྐོར་གསུངས་འདུག
ཁ་སང་ཕྱི་ཚེས་ ༢༦ ཉིན་སྲིད་སྐྱོང་སྤེན་པ་ཚེ་རིང་མཆོག་གིས། ཨ་རིའི་རྒྱལ་ས་ཝ་ཤིང་ཊོན་གྱི་(Melrose George Town) མགྲོན་ཁང་གི་ཚོགས་ཁང་ཞིག་ཏུ། ཅེག་སྤྱི་མཐུན་རྒྱལ་ཁབ་ཀྱི་ཕྱི་འབྲེལ་བློན་ཆེན་ཇན་ལི་པཱ་སི་ཀེ་(Jan Lipavsky) མཆོག་དང་ཐུག་འཕྲད་གནང་སྟེ། རྒྱ་ནག་གཞུང་གིས་བོད་མི་རིགས་རྩ་མེད་གཏོང་ཐབས་ཀྱི་སྲིད་ཇུས་དང་། བོད་ནང་གི་བོད་མིའི་གནས་སྟངས་སྐོར་ལ་གླེང་སློང་གནང་ཡོད་འདུག
ཟླ་འདིའི་ཕྱི་ཚེས ༢༥ ཉིན་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་ཨུ་ཛི་ར་ཛི་ཡ་མཆོག་དང་མཇལ་འཕྲད་གནང་སྟེ་རྒྱ་ནག་གཞུང་དང་གྲོས་མོལ་གྱི་ལམ་ནས་བོད་རྒྱའི་བཀའ་རྙོག་སེལ་ཐབས་དང་། དབུ་མའི་ལམ་གྱི་ཁེ་ཕན་སོགས་ཀྱི་སྐོར་ལ་གླེང་སློང་གནང་ཡོད་འདུག་ལ། དེའི་ཐད་སྲིད་སྐྱོང་མཆོག་གི་སྒེར་གྱི་ངོ་དེབ་ཏུ། ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སྐུ་ཨུ་ཛི་ར་ཛི་ཡ་མཆོག་དང་མཇལ་འཕྲད་གནང་རྒྱུ་བྱུང་བར་དགའ་སྤོབས་ཆེན་པོ་བྱུང་། མཇལ་འཕྲད་སྐབས་ང་ཚོ་མཉམ་རུབ་ཐོག་ནས་རྒྱ་ནག་གཞུང་དང་ལྷན་གྲོས་མོལ་ཡོང་ཐབས་གནང་སྟེ་བོད་རྒྱའི་དཀའ་རྙོག་སེལ་རྒྱུའི་ཐོག་གྲོས་བསྡུར་གནང་བ་དང་། དེ་བཞིན་ང་ཚོའི་ངོས་ནས་གཉིས་སྨན་དབུ་མའི་ལམ་གྱི་ལངས་ཕྱོགས་བརྟན་པོ་འཛིན་བཞིན་ཡོད། ཨ་རིའི་སྲིད་དོན་ཚོགས་པ་ཐུན་མོང་དང་། རྒྱལ་སྤྱིའི་དབུ་ཁྲིད་རྣམ་པས་བོད་ཀྱི་འཐབ་རྩོད་ཐོག་རྒྱབ་སྐྱོར་གནང་བ་དེ་ནི་གཞིས་བྱེས་བོད་མི་ཡོངས་ཀྱི་རེ་བ་བཅོལ་ས་ཞིག་ཆགས་ཀྱི་ཡོད་པས། ང་ཚོས་རྟག་ཏུ་དྲན་ངེས་ཡིན། ཞེས་གསུངས་འདུག
དམིགས་བསལ་འབྲེལ་མཐུད་པ་ལགས་དང་མཇལ་འཕྲད་གནང་སྐབས། བྱེས་ཀྱི་གདན་ས་བཀྲ་ཤིས་ལྷུན་པོའི་མཁན་རིན་པོ་ཆེ་གཟིག་རྒྱབ་རིན་པོ་ཆེ་མཆོག་ཀྱང་མཉམ་ཕེབས་གནང་ཡོད་པ་ལྟར། ༧གོང་ས་རྒྱལ་བ་རིན་པོ་མཆོག་གིས་ཡང་སྲིད་དུ་ངོས་འཛིན་མཛད་པའི་༧ཀུན་གཟིགས་པཎ་ཆེན་དགེ་འདུན་ཆོས་ཀྱི་ཉི་མ་མཆོག་གར་ཡོད་ཆ་མེད་དུ་གྱུར་ནས་ལོ་ངོ་ ༢༧ ཕྱིན་པའི་གནས་སྟངས་སྐོར་གླེང་སློང་གནང་ཡོད་པ་མ་ཟད། རྒྱ་ནག་ཏུ་ཡོད་པའི་ཨ་རིའི་གཞུང་ཚབ་པས་༸པཎ་ཆེན་རིན་པོ་ཆེ་ལ་དངོས་སུ་མཇལ་འཕྲད་གནང་ཐབས་དང་། རིན་པོ་ཆེ་མཆོག་གི་སྐུ་འཁོར་ནང་མི་སོགས་ལ་རང་དབང་དབུལ་དགོས་པའི་འབོད་སྐུལ་ཞུས་ཡོད་པ་དང་། དེ་བཞིན་ཨ་རིའི་རྒྱལ་སྤྱིའི་ཆོས་དད་རང་དབང་ལྷན་ཚོགས་ཀྱི་སྐུ་ཚབ་སྐུ་ཞབས་ (Rashad Hussain ) ལགས་དང་མཇལ་ཏེ་༸ཀུན་གཟིགས་༸པཎ་ཆེན་རིན་པོ་ཆེའི་གནས་སྟངས་དང་། བོད་དོན་སྤྱིའི་ཐོག་གླེང་སློང་གནང་ཡོད་འདུག
དེ་བཞིན། སྲིད་སྐྱོང་སྤེན་པ་ཚེ་རིང་མཆོག་གིས་ཨ་རིའི་རྒྱལ་ཡོངས་བདེ་འཇགས་ལྷན་ཚོགས་ཀྱི་རྒྱ་གར་དང་ཞི་བདེ་རྒྱ་མཚོའི་གནད་དོན་ཐོག་གི་འབྲེལ་མཐུད་པ་སྐུ་ཞབས་ཀུར་ཊ་ཁེམ་བྷེལ་ (Kurt Campbell) ལགས་དང་ཐུག་འཕྲད་གནང་སྟེ་བོད་དོན་གླེང་སློང་གནང་ཡོད་འདུག
གསར་འགོད་པ། དཔལ་ལྡན།
