འདས་ལོར་བསྐོ་གཞག་བྱུང་བའི་ཨ་རིའི་བོད་དོན་དམིགས་བསལ་འབྲེལ་མཐུད་པ་སྐབས་བདུན་པ་ལྕམ་ཨུ་ཛི་ར་ཛེ་ཡ་མཆོག་མགྱོགས་མྱུར་བཞུགས་སྒར་དུ་གཞུང་འབྲེལ་འཚམས་གཟིགས་སུ་ཕེབས་རྒྱུ་ཡིན་འདུག
རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཟླ་འདིའི་ཕྱི་ཚེས་ ༡༨ དང་ ༡༩ བཅས་ཉིན་གཉིས་རིང་ཨ་རིའི་གཞུང་གིས་བསྐོ་གཞག་བྱས་པའི་བོད་དོན་དམིགས་བསལ་འབྲེལ་མཐུད་པ་ལྕམ་ཨུ་ཛི་ར་ཛེ་ཡ་(Uzra Zeya) མཆོག་བཞུགས་དྷ་རམ་ས་ལར་ཕེབས་ཏེ། ༧གོང་ས་རྒྱལ་བ་རིན་པོ་ཆེ་མཆོག་དང་མཇལ་འཕྲད་དང་། བོད་མིའི་སྒྲིག་འཛུགས་ཀྱི་གཙོས་བཞུགས་སྒར་ཁུལ་དུ་འཚམས་གཟིགས་སུ་ཕེབས་འཆར་ཡོད་འདུག
དེ་འབྲེལ་རྒྱ་གར་ཧིན་རྡུ་སི་ཐན་གསར་ཁང་གི་གནས་ཚུལ་ནང་། ཐེངས་འདིའི་ལྕམ་ཨུ་ཛི་རཱ་ཛེ་ཡ་མཆོག་བཞུགས་སྒར་དྷ་སར་ཕེབས་འཆར་ཡོད་པ་དེ་ནི། སྲིད་འཛིན་བྷའེ་ཌན་གཞུང་དང་བོད་མིའི་སྒྲིག་འཛུགས་བར་གྱི་འབྲེལ་ལམ་གལ་ཆེན་ཞིག་ཆགས་ཡོད་པ་དང་། སྤྱིར་བཏང་གཞུང་འབྲེལ་གྱི་འཚམས་གཟིགས་དེའི་རིགས་ཐད་ཀར་རྒྱ་གར་ཕྱི་སྲིད་ལྷན་ཁང་དང་ལྷན་དུ་འབྲེལ་འདྲིས་ཀྱིས་གནང་སྲོལ་ཡོད་ཀྱང་། ཐེངས་འདིར་རྒྱ་གར་ཕྱི་སྲིད་ལྷན་ཁང་གི་བཀའ་འཁྲོལ་གང་ཡང་མེད་པའི་ཐོག་ནས་འཚམས་གཟིགས་ཕེབས་གཏན་འཁེལ་ཡོད་སྐོར་སོགས་བརྗོད་འདུག
ད་ལྟ་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་ཨ་རིའི་ནང་གཞུང་འབྲེལ་འཚམས་གཟིགས་སུ་ཕེབས་བཞིན་པ་དང་བསྟུན། ཉེ་ལམ་སྲིད་སྐྱོང་མཆོག་གིས་ལྕམ་ནན་སི་པོལ་སི་མཆོག་དང་བོད་དོན་དམིགས་བསལ་འབྲེལ་མཐུད་པ་ལྕམ་ཨུ་ཛི་ར་ཛེ་ཡ་མཆོག་སོགས་དང་མཇལ་འཕྲད་ཀྱིས། ཨ་རིའི་གཞུང་ནས་བོད་དོན་ལ་རྒྱབ་སྐྱོར་སྔར་ལྷག་ཡོང་བ་དང་བོད་རྒྱ་གྲོས་མོལ་ཡོང་བའི་འབོད་སྐུལ་ཞུས་ཡོད་ཅིང་། ཐེངས་འདིའི་ལྕམ་ཨུ་ཛི་ར་ཛེ་ཡ་མཆོག་གི་འཚམས་གཟིགས་དེས་ཨ་རིས་བོད་དོན་ལ་རྒྱབ་སྐྱོར་ཆེན་པོ་གནང་གི་ཡོད་པར་མཚོན་གྱི་ཡོད་པ་ལྟར། འདས་ལོར་ཨ་རིའི་བོད་དོན་དམིགས་བསལ་འབྲེལ་མཐུད་པ་སྐུ་ཞབས་ (Robert A. Destro) མཆོག་ཏོག་དབྱིབས་གཉན་རིམས་ཀྱི་རྐྱེན་གྱིས་དངོས་སུ་བཞུགས་སྒར་དྷ་སར་འཚམས་གཟིགས་སུ་ཕེབས་ཐུབ་མེད་ཀྱང་། ཁོང་བོད་དོན་དམིགས་བསལ་འབྲེལ་མཐུད་པར་བསྐོ་གཞག་བྱུང་བ་དང་། དྲ་ལམ་བརྒྱུད་༧གོང་ས་རྒྱལ་བ་རིན་པོ་ཆེ་མཆོག་ལ་མཇལ་འཕྲད་ཞུས་པ་མ་ཟད། སྐབས་དེའི་བོད་མིའི་སྒྲིག་འཛུགས་ཀྱི་སྲིད་སྐྱོང་བློ་བཟང་སེང་གེ་མཆོག་དང་དངོས་སུ་ཨ་རིའི་རྒྱལ་ས་ཝ་ཤིན་ཊོན་ནས་མཇལ་འཕྲད། དེ་བཞིན། དྲ་ལམ་བརྒྱུད་བཞུགས་སྒར་དྷ་སར་རྟེན་གཞི་བྱས་པའི་གཞུང་འབྲེལ་དང་གཞུང་འབྲེལ་མིན་པའི་ཚོགས་སྡེ་ཁག་དང་ལྷན་དུ་གྲོས་མོལ་གནང་བ་སོགས་ཀྱི་ཐད་རྒྱ་ནག་གཞུང་གིས་སྐྱོན་བརྗོད་བྱས་ཡོད་ལ། དམིགས་བསལ་ད་ལྟ་སྲིད་སྐྱོང་སྤེན་པ་ཚེ་རིང་མཆོག་ཨ་རིའི་ནང་གཞུང་འབྲེལ་འཚམས་གཟིགས་སུ་ཕེབས་བཞིན་པ་དང་བསྟུན། ཉེ་ལམ་ཨ་རིའི་རྒྱལ་སའི་ཁུལ་དུ་ཅེག་སྤྱི་མཐུན་རྒྱལ་ཁབ་ཀྱི་ཕྱི་སྲིད་བློན་ཆེན་ཇན་ལི་པབ་སི་ཀེ་ (Jan Lipavsky) ལགས་ཀྱིས་སྲིད་སྐྱོང་སྤེན་པ་ཚེ་རིང་མཆོག་དང་མཇལ་འཕྲད་གནང་བར་བརྟེན། ཅེག་སྤྱི་མཐུན་རྒྱལ་ཁབ་ནང་གི་རྒྱ་ནག་གཞུང་ཚབ་ཁང་གིས། ཅེག་སྤྱི་མཐུན་གཞུང་ལ་སྐྱོན་བརྗོད་བྱས་ཡོད་པ་རེད།
ཕྱི་ལོ་ ༢༠༡༦ ལོར་ཨ་རིའི་བོད་དོན་དམིགས་བསལ་འབྲེལ་མཐུད་པ་ལྕམ་སི་ཝལ་(Sarah Sewall) མཆོག་དང་ཨ་རིའི་གཞུང་འབྲེལ་གནད་ཡོད་མི་སྣ་ཁག་ཅིག་བཅས་བཞུགས་སྒར་དུ་འཚམས་གཟིགས་སུ་ཕེབས་པ་དང་བསྟུན། ༧གོང་ས་མཆོག་དབུས་པའི་བོད་མིའི་སྒྲིག་འཛུགས་ཀྱི་གནད་ཡོད་མི་སྣ་ཁག་དང་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ་བཅས་ལ་ཐུག་འཕྲད་དང་བཙན་བྱོལ་བོད་མིའི་གནས་སྟངས་ལ་རྒྱུན་ལོན་གནང་ཡོད། འོན་ཀྱང་། སྐབས་དེར་རྒྱ་ནག་གཞུང་གིས་ཨ་རིའི་གཞུང་ནས་བོད་ཀྱི་གནད་དོན་ལ་ལག་པ་འཆང་མི་ཉན་པའི་འཇིགས་སྐུལ་བྱས་ཡོད་པ་རེད།
འདས་ལོའི་ཕྱི་ཟླ་ ༡༢ ཚེས་ ༢༠ ཉིན་བསྐོ་བཞག་བྱུང་བའི་ལྕམ་ཨུ་ཛི་ར་ཛེ་ཡ་(Uzra Zeya)མཆོག་ནི་ཨ་རིའི་བོད་དོན་དམིགས་བསལ་འབྲེལ་མཐུད་པ་སྐབས་བདུན་པ་ཡིན་པ་དང་། ཁོང་གི་སྐྱེ་ཁུངས་རྒྱ་གར་གྱི་མངའ་སྡེ་བྷི་ཧར་ནས་ཡིན་ཞིང་། འདས་ལོའི་ལོ་འགོར་ཨ་རིའི་ཕྱི་སྲིད་ལྷན་ཁང་གི་སྤྱི་དམངས་བདེ་འཇགས་དང་དམངས་གཙོ། འགྲོ་བ་མིའི་ཐོབ་ཐང་ཚན་པའི་དྲུང་ལས་གསར་པར་བསྐོ་གཞག་བྱུང་བ་ནས་བོད་དོན་དམིགས་བསལ་འབྲེལ་མཐུད་པར་བསྐོ་གཞག་བྱུང་བ་ཞིག་ཡིན་འདུག
གསར་འགོད་པ། སྐལ་བཟང་སྦྱིན་པ།
