རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་འདི་ལོའི་གསར་འགོད་རང་དབང་གི་སྙན་ཐོའི་ནང་བྱང་ཀོ་རི་དང་རྒྱ་ནག་སོགས་འདས་པའི་ལོ་བཅུ་བསྟུད་མར་འཛམ་གླིང་གི་གསར་འགོད་རང་དབང་སྡུག་ཤོས་ཀྱི་གྲས་ཡིན་སྐོར་བསྒྲགས་འདུག
ཁ་སང་འཛམ་གླིང་ཡུལ་གྲུ་གང་སར་རྒྱལ་སྤྱིའི་གསར་འགོད་རང་དབང་གི་ཉིན་མོ་སྲུང་གཙི་ཞུས་པ་དང་བསྟུན། དེ་རིང་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས། ཕྱི་ལོ་ ༢༠༢༢ ལོའི་འཛམ་གླིང་རྒྱལ་ཁབ་ཁག་གི་གསར་འགོད་རང་དབང་གི་གནས་སྟངས་སྐོར་གྱི་ཞིབ་འཇུག་སྙན་ཐོ་ཐེངས་ ༢༠ པ་འདོན་སྤེལ་གནང་བའི་ནང་། ཡུ་རོབ་ཀྱི་རྒྱལ་ཁབ་ནོ་ཝེ་དང་ཌན་མག སི་ཝེ་ཌན། ཨེ་སི་ཊོ་ནེ་ཡ་དང་ཧྥི་ལན་ཌི་བཅས་ནི་འཛམ་གླིང་གི་གསར་འགོད་རང་དབང་ཆེ་ཤོས་ཀྱི་རྩེ་ཕུད་རྒྱལ་ཁབ་ལྔ་ཡིན་པ་དང་། བྱང་ཀོ་རི་ཡ་དང་རྒྱ་ནག་གཙོ་བྱས་པའི་ཨི་རན་དང་ཤར་ཨ་ཧྥི་རི་ཁའི་རྒྱལ་ཁབ་ཨི་རེ་ཊི་ཡ། དེ་བཞིན་འབར་མ་སོགས་འཛམ་གླིང་རྒྱལ་ཁབ་བཅུ་འདས་པའི་ལོ་བཅུ་བསྟུད་མར་གསར་འགོད་རང་དབང་གི་གནས་བབ་སྡུག་ཤོས་ཀྱི་ལུང་པར་ངོས་འཛིན་བྱས་འདུག
ཕྱི་ལོ་ ༢༠༢༢ ལོའི་གསར་འགོད་རང་དབང་གི་བརྗོད་གཞི་ནི། སྤྱི་ཚོགས་བརྒྱུད་ལམ་གྱི་ཤུགས་རྐྱེན་འོག་ (Journalism Under Digital Siege) གི་གསར་འགོད་ལས་རིགས་ཞེས་པ་ཡིན་པ་ལྟར། འདི་ལོའི་གསར་འགོད་རང་དབང་གི་སྙན་ཐོ་དེ་ནི་རྒྱལ་མཚམས་མེད་པའི་གསར་འགོད་མཐུན་ཚོགས་ཀྱིས། འཛམ་གླིང་རྒྱལ་ཁབ་དང་ས་ཁུལ་ ༡༨༠ ནང་གི་གསར་འགོད་རང་དབང་གི་གནས་བབ་ལ་གཞིགས་ནས་འདོན་སྤེལ་གནང་བའི་སྙན་ཐོ་ཞིག་ཆགས་ཀྱི་ཡོད་པ་དང་། སྙན་ཐོའི་ནང་དམིགས་བསལ་དྲ་ཐོག་གི་གནས་ཚུལ་རྫུན་མ་དང་དྲིལ་བསྒྲགས་རིགས་ཀྱིས་གསར་འགོད་ལས་རིགས་ལ་ཤུགས་རྐྱེན་ཆེན་པོ་ཐེབས་ཀྱི་ཡོད་པ་མ་ཟད། གསར་འགོད་རང་དབང་ལ་བཙན་དབང་དྲག་གནོན་ཆེ་བའི་རྒྱལ་ཁབ་དང་ཚོགས་པ་དག་གིས། རང་རང་གི་མངོན་འདོད་དྲིལ་བསྒྲགས་དང་གནས་ཚུལ་རྫུན་བསྒྲགས་བྱེད་བཞིན་པ་སོགས་ལ་བརྟེན་ནས། མང་གཙོ་དང་གུ་ཡངས་སྤྱི་ཚོགས་ཀྱི་བར་འགལ་ཟླ་ཤུགས་ཆེན་བསླངས་ཏེ། མང་གཙོའི་རྒྱལ་ཁབ་དག་གི་ནུས་པ་ཉམས་དམེས་སུ་གཏོང་གི་ཡོད་པ་མ་ཟད། རྒྱལ་ཁག་དེ་དག་གིས་མང་གཙོའི་རྒྱལ་ཁབ་ཁག་ལ་གནས་ཚུལ་རྫུན་བསྒྲགས་ཀྱིས་འཐབ་འཁྲུག་ཅིག་རྒྱག་གི་ཡོད་སྐོར་སོགས་བརྗོད་འདུག
རྒྱལ་མཚམས་མེད་པའི་གསར་འགོད་མཐུན་ཚོགས་ཀྱི་སྙན་ཐོ་ལྟར་ན། ཨུ་རུ་སུས་ཡོ་ཁུ་རེན་ལ་བཙན་འཛུལ་གྱི་དམག་འཁྲུག་རྒྱག་གི་ཡོད་པའི་གནས་སྟངས་འོག འཛམ་གླིང་གི་རྒྱལ་ཁབ་ཨང་ ༡༠༦ ནས་ ༡༥༥ བར་མར་ཟག་སྟེ་ཨུ་རུ་སུ་འཛམ་གླིང་གི་གསར་འགོད་རང་དབང་ཧ་ཅང་སྡུག་པོ་ཡོད་པའི་གྲས་སུ་གྱུར་ཡོད་པ་དང་། དེ་བཞིན་རྒྱ་གར་དང་པ་ཀི་སི་ཐན། ཨི་ཟི་རལ་དང་པ་ལི་སི་ཐན། ཨ་རཱབ་བཅས་ཀྱི་གསར་འགོད་རང་དབང་གི་གནས་སྟངས་སྔར་ལོ་བསྡུར་ན་ཇེ་སྡུག་ཏུ་ཕྱིན་ཡོད་པ་དང་། ཡང་ཡུ་རོབ་རྒྱལ་ཁབ་མཱོལ་ཌོ་བཱ་(Moldova)དང་བྷོལ་གྷ་རེ་ཡ་(Bulgaria) གཉིས་ཀྱི་གསར་འགོད་རང་དབང་གི་གནས་བབ་སྔར་ལོ་བསྡུར་ན་ཧ་ཅང་ཇེ་ལེགས་སུ་ཕྱིན་ཡོད་པར་ངོས་འཛིན་བྱས་འདུག
ཡང་སྙན་ཐོའི་ནང་ཨེ་ཤ་ཡའི་གསར་འགོད་རང་དབང་གི་གནས་བབ་ཐད། འབར་མའི་དྲག་དམག་སྲིད་གཞུང་གིས་མང་གཙོའི་གཞུང་མགོ་རྟིང་སློག་སྟེ། འབར་མའི་གསར་འགོད་རང་དབང་གི་གནས་བབ་འཛམ་གླིང་རྒྱལ་ཁབ་ཨང་༡༤༠ ནས་ ༡༧༦ བར་མར་ཟག་སྟེ། ད་ལྟ་འབར་མ་འཛམ་གླིང་གི་གསར་འགོད་རང་དབང་གི་གནས་སྟངས་སྡུག་ཤོས་ཨང་བཞི་བ་དང་། ཨ་ཧྥི་གྷན་ནེ་སི་ཐན་སླར་ཡང་ཐ་ལི་བྷན་འཇིགས་སྐུལ་དྲག་སྤྱོད་པས་དབང་བསྒྱུར་ཏེ། གསར་འགོད་པ་དང་གསར་ཁང་ཁག་ལ་འཇིགས་སྐུལ་དང་དྲག་གནོན་བྱེད་བཞིན་ཡོད་པའི་རྐྱེན་གྱིས། ཨ་ཧྥི་གྷན་ནེ་སི་ཐན་ནང་གི་གསར་འགོད་རང་དབང་གི་གནས་སྟངས་ཧ་ཅང་སྡུག་པོ་ཆགས་ཡོད་པ་དང་། དེ་བཞིན་རྒྱ་ནག་དང་བྱང་ཀོ་རི་ཡ་གཉིས་ནས་རང་གི་མངའ་ཁུངས་ཀྱི་གསར་འགོད་རང་དབང་ལ་བཀག་སྡོམ་བྱེད་པ་ཙམ་མ་ཡིན་པར། རྒྱལ་མཚམས་ལས་བརྒལ་ཏེ་གསར་འགོད་རང་དབང་ལ་བཀག་སྡོམ་བྱེད་ཀྱི་ཡོད་པ་སོགས་འདས་ལོ་དང་བསྡུར་ན་ཨེ་ཤ་ཡའི་གསར་འགོད་རང་དབང་གི་གནས་སྟངས་ཧ་ཅང་ཇེ་སྡུག་ཏུ་ཕྱིན་ཡོད་འདུག
གསར་འགོད་པ། སྐལ་བཟང་སྦྱིན་པ།
