ཉི་ཧོང་གིས་ཐའེ་ལེན་ཌིར་གོ་མཚོན་ཚོང་འགྲེམས་དང་ཉི་ཐེ་གཉིས་ཀྱི་ཚོང་འབྲེལ་གོང་མཐོར་གཏང་འཆར་ཡོད་པ་མ་ཟད་རྒྱ་ནག་གཞུང་གི་སྟོགས་ཤུགས་སྐྱེད་མུས་ཡིན་པའི་རྒྱ་གར་ཞི་བདེ་རྒྱ་མཚོའི་ཁུལ་དུ་སྲུང་སྐྱོབ་སྔར་ལྷག་བྱ་རྒྱུ་ཡིན་འདུག
ཁ་སང་རྒྱལ་སྤྱིའི་གསར་འགྱུར་བརྒྱུད་ལམ་ཁག་ནས་གནས་ཚུལ་སྤེལ་བ་ལྟར་ན། ཉི་ཧོང་གི་སྲིད་བློན་ཧྥོ་མི་ཡི་ཀི་ཤ་ཌ (Fumio Kishida)མཆོག་གིས་ཨེ་ཤ་ཡའི་ལྷོ་ཤར་ཕྱོགས་རྒྱལ་ཁབ་ཁག་ཏུ་འཚམས་གཟིགས་གནང་ཡོད་པ་ལྟར། ཟླ་འདིའི་ཕྱི་ཚེས་ ༢ ཉིན་ཉི་ཧོང་གི་སྲིད་བློན་དང་ཐའེ་ལེན་ཌིའི་སྲིད་བློན་པུ་རཱ་ཡོ་ཐི་( Prayuth Chan-ocha) རྣམ་གཉིས་ཀྱིས་བྷེང་ཀོག་ཏུ་མཇལ་འཕྲད་གནང་ཏེ། རྒྱལ་ཁབ་གཉིས་ཀྱི་རྒྱལ་སྲུང་ཐད་ལ་ཆིངས་ཡིག་ཅིག་བཞག་ཡོད་པ་མ་ཟད། རྒྱལ་ཁབ་གཉིས་ཀྱི་བར་དུ་སྔར་ལས་ལྷག་པའི་ཚོང་འབྲེལ་ཤུགས་ཆེ་རུ་གཏང་རྒྱུ་དང་། ཉེ་ལམ་རྒྱ་ནག་གཞུང་གིས་རྒྱ་གར་ཞི་བདེ་རྒྱ་མཚོའི་ཁུལ་དུ་སྟོབས་ཤུགས་སྐྱེད་ནས་བདག་བཟུང་བྱེད་མུས་ཡིན་པ་དེར། རྒྱལ་ཁབ་གཉིས་ཀྱིས་མཉམ་རུབ་ཀྱི་ཐོག་ནས་སྲུང་སྐྱོབ་བྱ་རྒྱུར་མོས་མཐུན་བྱུང་ཡོད་འདུག
ཆིངས་ཡིག་དེའི་འོག་ནས་ཨེ་ཤ་ཡའི་ཁུལ་གྱི་དམག་གི་སྟོབས་ཤུགས་ཆེ་ཤོས་གྲས་སུ་ཡོད་པའི་ཉི་ཧོང་གིས་ཐའེ་ལེན་ཌི་ལ་དམག་དོན་འཕྲུལ་ཆས་དང་གོ་མཚོན་མཁོ་སྤྲོད་བྱེད་ཐུབ་ཀྱི་ཡོད་ཀྱང་། རྒྱལ་ཁབ་གཉིས་ཀྱི་ཞིབ་ཕྲའི་གྲོས་མཐུན་དེ་ཕྱིར་བསྒྲགས་བྱས་མེད་པ་རེད་འདུག དེའི་ཐད་ཐའེ་ལེན་ཌིའི་སྲིད་བློན་པུ་རཱ་ཡོ་ཐི་( Prayuth Chan-ocha) ལགས་ཀྱིས། ཉི་ཧོང་གིས་ཐའེ་ལེན་ཌིའི་རྒྱལ་སྲུང་གི་ཆེད་དུ་མ་འཛུགས་བྱེད་རོགས་བྱས་པ་དེས། རྒྱལ་སྲུང་གི་ནུས་པ་གོང་མཐོར་གཏོང་ཐུབ་ཅིང་། དེ་ནི་ཐའེ་ལེན་ཌིའི་དམིགས་ཡུལ་གལ་ཆེན་ཡིན་པའི་སྐོར་དང་། ཐའེ་ལེན་ཌིར་མ་འཛུགས་བྱེད་མཁན་གཙོ་བོར་གྱུར་བའི་ཉི་ཧོང་དང་ལྷན་དུ་ཐོན་སྐྱེད་སྐྱེལ་འདྲེན་དང་ལོ་ལྔ་རིང་གི་ཉི་ཐའེ་གཉིས་ཀྱི་ཚོང་གི་འབྲེལ་ལམ་གོང་མཐོར་གཏང་རྒྱུའི་སྐོར་ལ་གླེང་སློང་བྱས་ཡོད་སྐོར་བརྗོད་འདུག
ཉི་ཧོང་གིས་ལོ་ངོ་བཅུ་ཡི་རིང་ལ་ཨེ་ཤ་ཡའི་ལྷོ་ཤར་ཕྱོགས་ཀྱི་རྒྱལ་ཁབ་ཁག་ཏུ་བཟོ་གྲྭ་མང་པོ་ཞིག་གཉེར་ཡོད་པ་དང་། འགྲུལ་འཁོར་དང་འཕྲུལ་རིགས་མང་པོ་ཞིག་བཟོ་སྐྲུན་དང་ཚོང་འགྲེམས་བྱས་ཡོད་སྟབས། ཨེ་ཤ་ཡའི་ལྷོ་ཤར་ཕྱོགས་ཀྱི་རྒྱལ་ཁབ་ཁག་ནི་ཉི་ཧོང་གི་ཚོང་འབྲེལ་གྱི་ས་ཚིགས་གལ་ཆེན་ཞིག་ཏུ་གྱུར་ཡོད་འདུག་ལ། རྒྱལ་ཁབ་དེ་དག་ནི་ཨ་རི་དང་ཉི་ཧོང་། རྒྱ་ནག་སོགས་ཀྱི་རྩོད་གླེང་བྱེད་སའི་ཨེ་ཤ་ཡའི་ལྷོ་ཤར་ཕྱོགས་ཀྱི་ཚོང་འབྲེལ་གྱི་ས་ཚིགས་ལྟེ་བ་ཞིག་ཆགས་ཡོད་འདུག
ཉི་ཧོང་སྲིད་བློན་གྱིས་ཕྱི་ཟླ ༤ ཚེས་ ༢༩ ཉིན་ཨིན་ཌོ་ནེ་ཤི་ཡའི་སྲིད་བློན་དང་ཐུག་འཕྲད་ཀྱིས། ཉེ་ལམ་ཨུ་རུ་སུས་ཡུ་ཁེ་རན་ལ་བཙན་འཛུལ་བྱེད་མུས་ཡིན་པར་རྒོལ་ལན་སློག་དགོས་པ་དང་། ཁུལ་དེར་རྒྱ་ནག་གཞུང་གི་སྟོབས་ཤུགས་རྒྱས་མུས་ཡིན་པ་དེར་དོགས་གཟོན་བྱ་དགོས་སྐོར་གླེང་སློང་བྱས་ཡོད་འདུག་ལ། ད་བར་ལྷོ་ཤར་ཨེ་ཤ་ཡའི་ཁུལ་གྱི་སིང་གྷ་པུར་གཅིག་པུ་ལས། རྒྱལ་ཁབ་གཞན་རྣམས་ཀྱིས་ཨུ་རུ་སུར་རྒོལ་ལན་གང་ཡང་བརྒྱག་ཐུབ་མེད་པ་རེད་འདུག
ད་ལན་ཉི་ཧོང་སྲིད་བློན་མཆོག་ཨིན་ཌོ་ནེ་ཤི་ཡ་དང་། ཝེ་ཊི་ནམ། ཐའེ་ལེན་ཌི་བཅས་སུ་འཚམས་གཟིགས་ལ་ཕེབས་ཡོད་ཅིང་། ཉི་ཧོང་གིས་ཐའེ་ལེན་ཌི་ལ་དངུལ་བུན་ཨ་སྒོར་ས་ཡ་ ༣༨༥ གཡར་ཏེ། ཏོག་དབྱིབས་རིམས་ནད་ཞི་འཇམ་ཡོང་ཐབས་ལ་རོགས་རམ་གནང་ཡོད་འདུག
གསར་འགོད་པ། དཔལ་ལྡན།
