རྒྱ་ནག་གཞུང་གིས་རྨ་ཆུའི་འགྲམ་བརྒྱུད་དུ་གཡས་འཁྱིལ་ཆུ་གློག་ས་ཚིགས་ཟེར་བ་ཞིག་རྒྱག་འཆར་ཡོད་པས་ཉེ་འགྲམ་དུ་ཡོད་པའི་ཨ་ཚོགས་དགོན་བདེ་ཆེན་ཆོས་འཁོར་གླིང་གནས་སྤོར་དགོས་པའི་བཙན་བཀའ་བཏང་ཡོད་འདུག
རྒྱ་ནག་གཞུང་གིས་བོད་མཚོ་ལྷོ་ཁུལ་བྲག་དཀར་རྫོང་ཁོངས་ཀྱི་དཀར་མོ་གཡས་འཁྱིལ་རྨ་ཆུའི་འགྲམ་བརྒྱུད་དུ་གཡས་འཁྱིལ་ཆུ་གློག་ས་ཚིགས་ཟེར་བ་ཞིག་བརྒྱག་འཆར་ཡོད་པའི་རྐྱེན་གྱིས། ཉེ་འགྲམ་དུ་ཆགས་པའི་ཨ་ཚོགས་དགོན་བདེ་ཆེན་ཆོས་འཁོར་གླིང་དཔལ་ཁ་གྲོང་རྡལ་ནས་སྤྱི་ལེ་གསུམ་བཞི་ཙམ་གྱི་མཚམས་སུ་ཡོད་པའི་ཁྱོ་དཀར་ནག་ལོ་ཞེས་པའི་རི་སྣ་ཞིག་ཡོད་པ་དེར་གནས་སྤོར་དགོས་པའི་བཀའ་བཏང་ཡོད་འདུག་ལ། མཚོ་སྔོན་ཞིང་ཆེན་གྱི་ཆུ་ནུས་ཐོན་ཁུངས་ལྷན་ཁང་གི་འདས་པའི་ལོ་ངོ་ ༤༠ རིང་གི་མི་ཡུལ་གནས་སྤོར་དང་འཛུགས་སྐྲུན་གྱི་ཕྱོགས་བསྡོམས་ཡིག་ཆའི་ནང་དུ་། ཞིང་ཆེན་དེའི་ནང་ཆུ་གློག་ས་ཚིགས་ཆེ་འབྲིང་ཁྱོན་ ༢༠ བརྒྱབ་ཟིན་པ་དང་། དེ་འབྲེལ་གྲོང་སྡེ་ཁག་ ༡༡༤ ལ་གནས་སྤོར་ལས་གཞི་ལེགས་འགྲུབ་བྱུང་ཡོད་ལུགས་བཀོད་འདུག
འབྲེལ་ཡོད་ཅིག་གིས་འདི་ག་བོད་ཀྱི་དུས་བབ་གསར་འགོད་པར། སྡེ་མི་དང་དགེ་འདུན་པ་སུ་ཡིན་རུང་གནས་སྤོར་འདོད་མེད་ནའང་། རྒྱལ་ཁབ་ཀྱི་འཛུགས་སྐྲུན་ཡིན་ཟེར་དུས་རྒྱལ་ཁབ་ཀྱི་དོ་ཡར་ཡོང་ནི་མ་རེད། གོང་རིམ་གྱི་ལས་བྱེད་པ་ཡང་ནས་ཡང་དུ་ཡོང་ནས་དགོན་པ་ཡིན་གཅིག་མིན་མིན་གཅིག་གིས་སྤོར་དགོས་ཟེར། ཁོང་ཚོ་དགོན་པར་སློབ་གསོ་གཏོང་རྒྱུ་དང་རྒྱུས་ལོན་བྱེད་དུ་ཡོང་བ་རེད། ཡིན་ནའང་ད་ལྟའི་ཆར་དགོན་པ་ནམ་སྤོར་གྱི་དུས་ཚེས་གཏན་འཁེལ་བྱས་མ་སོང་། སྤོར་དགོས་པ་གཏན་འཁེལ་རེད་ཅེས་བརྗོད་བྱུང་།
འདི་གའི་གསར་འགོད་པས་རྒྱུས་ལོན་བྱས་པ་ལྟར་ན། མཚོ་ལྷོ་ཁུལ་བྲག་དཀར་རྫོང་གི་འབྲེལ་ཡོད་འགོ་ཁྲིད་ཚོས་ཨ་ཚོགས་དགོན་གྱི་དགེ་འདུན་པ་ཚོས་གཡས་འཁྱིལ་ཆུ་གློག་འཛུགས་སྐྲུན་གྱི་འཆར་འགོད་ལྟར་དུ་བདེ་འཇགས་ངང་འཛུགས་སྐྲུན་ལེགས་འགྲུབ་ཡོང་ཆེད། དགེ་འདུན་པ་དང་ཡུལ་མི་ཚོར་གོ་དཀོན་བློ་འགུག་གི་དྲིལ་བསྒྲགས་སྣ་ཚོགས་སྤེལ་གྱི་ཡོད་འདུག འོན་ཀྱང་། ཨ་ཚོགས་དགོན་པ་དང་ཡུལ་མིའི་ངོས་ནས་དགོན་པ་གནས་སྤོར་འདོད་མེད་པའི་བསམ་ཚུལ་དང་དཀའ་ཁག་ཡོད་པ་འབྲེལ་ཡོད་ལ་འགྲེལ་བརྗོད་བྱས་ཡོད་ཀྱང་ཕན་ཐོགས་བྱུང་མེད་འདུག
གཡས་འཁྱིལ་ཆུ་གློག་ས་ཚིགས་ཟེར་བ་དེ་ན་ནིང་ཕྱི་ཟླ་༡༢ བའི་ཚེས་༢༦ ཉིན་ནས་སྔ་རྗེས་སུ་རྟོག་ཞིབ་རུ་ཁག་བསླེབས་ནས་ཞིབ་འཇུག་དང་རྒྱུས་ལོན་བྱེད་འགོ་བཙུགས་ཡོད་པ་དང་། ཆུ་གློག་འཛུགས་སྐྲུན་གྱི་འགན་གཙོ་བོ་ རྨ་ཆུ་ཀུང་སི་ཟེར་བ་ཞིག་གིས་འཁུར་ཡོད་འདུག རྒྱ་ནག་གཞུང་ཕྱོགས་ནས་ལས་གཞི་དེ་ནི་རྒྱལ་ཁབ་འཕེལ་འགྱུར་ཨུ་ཡོན་ལྷན་ཁང་ཟེར་བ་དེས་ཆུ་གློག་ས་ཚུགས་ཀྱི་ལས་གཞི་དེར་ཆོག་མཆན་སྤྲད་ཡོད་ལུགས་དང་། ཕྱི་ལོ་༢༠༢༢ ནས་ ༢༠༢༣ བར་འཆར་གཞི་ལྟར་དུ་འཛུགས་སྐྲུན་ལེགས་འགྲུབ་བྱུང་དགོས་ལུགས་དྲིལ་བསྒྲགས་བྱས་འདུག
ཆུ་གློག་ས་ཚིགས་དེ་མཚོ་ལྷོ་ཁུལ་བྲག་དཀར་རྫོང་དང་མང་ར་རྫོང་གཉིས་མཚམས་ཀྱི་དཀར་མོ་གཡས་འཁྱིལ་ཞེས་པའི་ལུང་གཞོང་དུ་རྒྱུ་བའི་རྨ་ཆུའི་འགྲམ་རྒྱུད་དུ་འཛུགས་སྐུན་བྱ་འཆར་ཡོད་པ་དང་། རྒྱ་ནག་གཞུང་ཕྱོགས་ཀྱི་དྲིལ་བསྒྲགས་ནང་དུ། ཆུ་མཛོད་དེའི་ཤོངས་ཚད་སྟོང་ཝ་དུང་ཕྱུར་༡༦.༣༩ དང་། ཆུ་གློག་ས་ཚིགས་ཁང་བའི་སྤྱིའི་ཤོངས་ཚད་རྒྱ་དཔང་གྲུ་བཞི་མ་ཁྲི་ ༢༠.༤ ། ཆུ་རག་གི་སྤྱིའི་རྒྱ་ཁྱོན་རྒྱ་དཔང་གྲུ་བཞི་མ་ཁྲི་༣༩༠ ཡིན་ལུགས་བརྗོད་འདུག
ཨ་ཚོགས་དགོན་བདེ་ཆེན་ཆོས་འཁོར་གླིང་ནི་མཚོ་ལྷོ་བྲག་དཀར་རྫོང་དཔལ་ཁ་གྲོང་རྡལ་དཀར་མོ་གཡས་འཁྱིལ་རྨ་ཆུའི་འགྲམ་དུ་ཆགས་ཡོད་པ་དང་། དགོན་པ་དེ་ནི་ཕྱི་ལོ་༡༨༨༩ ལོར་ཨ་ཚོགས་མཆོག་སྤྲུལ་དཀོན་མཆོག་ཆོས་དར་མཆོག་གིས་ཕྱག་བཏབ་པ་ཞིག་ཡིན་འདུག ད་ལྟ་དགོན་པ་དེར་སློབ་གཉེར་གནང་མཁན་དགེ་འདུན་པ་ཞལ་གྲངས་ ༡༥༧ ལྷག་ཡོད་ཅིང་། ཕྱི་ལོ་༢༠༢༡ ལོའི་སྟོན་མཇུག་ནས་བཟུང་རྒྱ་གཞུང་གིས་རང་ལོ་༡༨ མ་ཟིན་པའི་དགེ་འདུན་པ་རྣམས་དགོན་པར་འཛུལ་ཞུགས་མི་ཆོག་པ་བཟོས་ཡོད་འདུག
ཕྱི་ལོ་༢༠༡༤ ནས་༢༠༡༧ བར་རྒྱ་གཞུང་གིས་དཀར་མོ་གཡས་འཁྱིལ་གྱི་ཟམ་ཆེན་བསྐྱར་དུ་འཛུགས་སྐྲུན་བྱས་ཏེ། མང་ཚོགས་ཀྱི་འགྲིམ་འགྲུལ་སྐྱེལ་འདྲེན་དང་དཔལ་འབྱོར་འདུ་འགོད་ལ་ཕན་ཐོགས་ཆེ་ལུགས་བཤད་དེ། ཟམ་པ་རྒྱ་ཆེ་རུ་བཏང་ཡོད་ནས་ཆུ་གློག་ས་ཚིགས་འཛུགས་སྐྲུན་ལ་སྟབས་བདེ་བསྐྲུན་ཡོད་འདུག
རྒྱ་ནག་གཞུང་གིས་བོད་ཁུལ་གྱི་རྒྱུག་ཆུ་དང་གཙང་པོའི་ཐོག་ཏུ་གློག་ཁང་ཆེ་ཆུང་སྣ་ཚོགས་འཛུགས་སྐྲུན་བྱས་དང་བྱེད་བཞིན་ཡོད་པ་མ་ཟད། ཆུ་རག་སོགས་ཀྱི་འཛུགས་སྐྲུན་དང་འབྲེལ་ནས་ཉེ་འཁོར་གྱི་ཞིང་འབྲོག་མང་ཚོགས་དུད་ཁྱིམ་སྟོང་ཕྲག་མང་པོ་བཙན་ཐབས་ཀྱིས་ས་གནས་གཞན་དུ་གནས་སྤོར་གཏོང་གི་ཡོད་པ་རེད། དཔེར་ན། བོད་མཚོ་སྔོན་ཞིང་ཆེན་ནང་གཅིག་པུར་ཆ་བཞག་ན། ཞིང་ཆེན་གྱི་ཆུ་ནུས་ཐོན་ཁུངས་ལྷན་ཁང་གིས་ཕྱི་ལོ་ ༢༠༡༩ ཟླ་ ༥ ཚེས་ ༢༧ ཉིན་སྤེལ་བའི་མི་མང་གནས་སྤོར་དང་དང་འཛུགས་སྐྲུན་ལས་གཞིའི་སྐོར་གྱི་ཕྱོགས་བསྡོམས་ནང་། ཞིང་ཆེན་དེའི་ནང་ཕྱི་ལོ་ ༡༩༧༠ ནང་ནས་བཟུང་ཆུ་གློག་ས་ཚིགས་འཛུགས་སྐྲུན་བྱས་ཏེ་ཆུ་གློག་ས་ཚིགས་ཆེ་འབྲིང་ཁྱོན་ ༢༠ བརྒྱབ་ཡོད་པ་དང་། ཆུ་མཛོད་ཁང་ཆེ་འབྲིང་ཁྱོན་ ༡༢ བརྒྱབ་ཡོད་ལུགས་དང་། ས་གནས་དེ་ཁུལ་གྱི་ཞིང་འབྲོག་མི་མང་ཁྲི་ ༦༠༠༠༠ ལྷག་གནས་སྤོར་བྱས་ཟིན་པ་བཅས། ད་ལྟ་བར་དུ་གྲོང་སྡེ་ ༡༡༤ ལ་གནས་སྤོར་ལས་གཞི་ལེགས་འགྲུབ་བྱུང་ཡོད་ལུགས་བཀོད་འདུག
ས་གནས་གསར་འགོད་པ།
