གནས་ཆེན་ལུམ་བིའི་ཚལ་དུ་རྒྱ་གར་དང་བལ་ཡུལ་གྱི་རྒྱལ་འབྲེལ་དྲན་རྟེན་ཞིག་བཞེངས་རྒྱུ་ཡིན་འདུག

བལ་ཡུལ་ནང་མང་གཙོ་གཙིགས་འཛིན་གྱི་གཞུང་གསར་ཞིག་བསླེབས་པ་དང་བསྟུན། ཨ་རི་དང་རྒྱ་གར་སོགས་ཀྱིས་བལ་ཡུལ་ལ་ཕྱི་འབྲེལ་བློ་ཐག་ཇེ་ཉེ་རུ་གཏོང་གི་ཡོད་པ་ལྟར། མི་འགྱངས་བར་རྒྱ་གར་གྱི་སྲིད་བློན་མུ་དྷི་མཆོག་བལ་ཡུལ་ནང་འཚམས་གཟིགས་སུ་ཕེབས་འཆར་འདུག

འདས་ལོར་བལ་ཡུལ་གྱི་རྒྱལ་ཡོངས་མང་གཙོ་ཚོགས་པར་གཞུང་སྲིད་འཛིན་རྒྱུའི་རྒྱལ་ཁ་ཐོབ་ཡོད་པ་དང་། ད་ལྟའི་སྲིད་བློན་སྐུ་ཞབས་ཤར་བྷ་ཧ་ཌོར་ལགས་ཀྱིས་སྣེ་འཁྲིད་པའི་བལ་ཡུལ་གཞུང་ནི་ཨ་རི་དང་རྒྱ་གར་ལ་མཚོན་ན་ཆབ་སྲིད་ཀྱི་འབྲེལ་ལམ་གོང་འཕེལ་འགྲོ་ངེས་ཡིན་པའི་གཞུང་ཞིག་ཆགས་ཀྱི་ཡོད་པ་ལྟར། ཟླ་འདིའི་ཕྱི་ཚེས་ ༡༦ ཉིན་རྒྱ་གར་གྱི་སྲིད་བློན་མུ་དྷི་མཆོག་བལ་ཡུལ་དུ་རྒྱལ་འབྲེལ་འཚམས་གཟིགས་སུ་ཕེབས་འཆར་ཡོད་ཅིང་། གོང་ཚེས་ཉིན་སྲིད་བློན་མུ་དྷི་མཆོག་དང་བལ་ཡུལ་གྱི་སྲིད་བློན་ཤར་བྷ་ཧ་ཌོར་ལགས་གཉིས། རྒྱ་གར་དང་བལ་ཡུལ་གྱི་ས་མཚམས་སུ་འཁེལ་ཞིང་བདག་ཅག་གི་སྟོན་པ་སངས་རྒྱས་བཅོམ་ལྡན་འདས་ཀྱི་འཁྲུངས་ཡུལ་གནས་ཆེན་ལུམ་བིའི་ཚལ་དུ་ཐུག་འཕྲད་ཀྱིས། རྒྱལ་ཁབ་གཉིས་ཀྱི་རྒྱལ་འབྲེལ་མཛའ་བརྩེ་མཚོན་ཞིང་ནང་པ་དང་ཧིན་རྡུ་ཆོས་ལུགས་ཀྱི་མཚོན་རྟགས་ལྡན་པའི་དྲན་རྟེན་རྡོ་རིང་ཞིག་བཞེངས་གཏན་ཁེལ་ཡོད་འདུག

དེ་འབྲེལ་རྒྱ་གར་ཧིན་རྡུ་སི་ཐན་གསར་ཁང་གི་གནས་ཚུལ་ནང་། ཐེངས་འདིའི་རྒྱལ་ཁབ་གཉིས་ཀྱི་མགོ་ཁྲིད་ཀྱི་ཐུག་འཕྲད་དེ་ནི། ཕྱི་ལོ་ ༢༠༡༩ ལོར་མུ་དྷི་ལ་སྐབས་གཉིས་པའི་རྒྱ་གར་སྲིད་བློན་གྱི་འོས་བསྡུའི་རྒྱལ་ཁ་ཐོབ་རྗེས་བལ་ཡུལ་དུ་རྒྱལ་འབྲེལ་འཚམས་གཟིགས་སུ་ཕེབས་པ་ཐོག་མ་ཆགས་ཀྱི་ཡོད་པ་དང་། ད་སྔ་བར་བལ་ཡུལ་གྱི་མའོ་རིང་ལུགས་རྩོད་མཁན་དང་དམར་ཤོག་ཚོགས་པ། གཡོན་ལྷུང་བརྒྱུད་ལམ་ཁག་གིས་རྒྱ་གར་ལ་ལྟ་སྟངས་ངན་པ་བཟུང་ནས་རྒྱ་ནག་དང་ལག་འབྲེལ་བྱས་ཡོད་པ་མ་ཟད། དེ་སྔ་སྲིད་བློན་ཟུར་པ་ཨོ་ལིའི་གཞུང་གིས་རྒྱ་གར་གྱི་མངའ་སྡེ་ཨོ་ཊར་ཁན་གྱི་ས་མཚམས་ས་ཁུལ་(Kalapani) དང་(Limpiyadhura)། དེ་བཞིན་(Lipulekh) བཅས་ས་ཁུལ་གསུམ་བལ་ཡུལ་གྱི་ས་ཁོངས་ཡིན་པའི་རྩོད་རྙོག་བསླངས་ཡོད་སྟབས། མུ་དྷི་གཞུང་ལ་མཚོན་ན། ཐེངས་འདིར་དམིགས་བསལ་ལུམ་བིའི་ཚལ་དུ་རྒྱལ་ཁབ་གཉིས་ཀྱི་དབུ་འཁྲིད་ཐུག་འཕྲད་བྱས་པ་བརྒྱུད་ཕྱོགས་གཉིས་བར་བཟང་ཕྱོགས་ཀྱི་རེ་བ་ཤུགས་ཆེན་འཛིན་བཞིན་ཡོད་སྐོར་སོགས་བརྗོད་འདུག

སྲིད་བློན་མུ་དྷི་མཆོག་བལ་ཡུལ་དུ་རྒྱལ་འབྲེལ་འཚམས་གཟིགས་སུ་མ་ཕེབས་པའི་སྔོན་ཏེ། ཟླ་འདིའི་ཕྱི་ཚེས་ ༥ ཉིན་ད་ལྟའི་རྒྱ་གར་གྱི་བལ་ཡུལ་གཞུང་ཚབ་པ་སྐུ་ཞབས་ཝི་ནེ་མོ་ཧན་ (Shri Vinay Mohan Kwatra) ལགས་ཀྱི་ཚབ་ཏུ། འདས་པའི་ལོ་མང་རིང་རྒྱ་གར་ཕྱི་སྲིད་ལྷན་ཁང་དུ་ཕྱི་འབྲེལ་དང་དམིགས་བསལ་རྒྱ་དཀར་ནག་བར་གྱི་ས་མཚམས་རྩོད་རྙོག་ཐོག་ཕྱག་ལས་གནང་མཁན་གཙོ་གྲས་སྐུ་ཞབས་ནེ་ཝིན་སི་རེ་ཝ་སི་ཊ་ཝ་ (Naveen Srivastava) ལགས་རྒྱ་གར་གྱི་བལ་ཡུལ་གཞུང་ཚབ་པ་གསར་པར་བསྐོ་གཞག་གིས། རྒྱ་གར་དང་བལ་ཡུལ་བར་རྒྱལ་འབྲེལ་གྱི་ལེའུ་གསར་པ་ཞིག་མགོ་རྩོམ་གྱི་ཡོད་པའི་བརྡ་ལན་བསྟན་ཡོད་ཅིང་། དམིགས་བསལ་སྐུ་ཞབས་ནེ་ཝིན་སི་རེ་ཝ་སི་ཊ་ཝ་ལགས་ཀྱིས་དེ་སྔ་རྒྱ་ནག་གི་གྲོང་ཁྱེར་ཧྲང་ཧེ་རུ་རྒྱ་གར་གྱི་དོན་གཅོད་མི་སྣའི་ཕྱག་ལས་གནང་མྱོང་བར་བརྟེན། ཁོང་བལ་ཡུལ་དུ་རྒྱ་གར་གྱི་གཞུང་ཚབ་པར་བསྐོས་པ་དེས། བལ་ཡུལ་ནང་རྒྱ་དཀར་ནག་གི་ཆབ་སྲིད་ཀྱི་ཤུགས་རྐྱེན་འགྲན་བཞིན་པར་ཁ་གཏད་གཅོག་ཐབས་ཤིག་ཀྱང་ཡིན་སྐོར་ཧིན་རྡུ་སི་ཐན་དུས་བབ་ཀྱིས་བརྗོད་འདུག

ད་ལན་སྲིད་བློན་མུ་དྷི་མཆོག་གི་རྒྱལ་འབྲེལ་འཚམས་གཟིགས་དེ་ནི། སེངྒ་ལ་གཙོས་བལ་ཡུལ་དང་པ་ཀི་སི་ཐན་སོགས་ཀྱི་དཔལ་འབྱོར་ཉམས་རྒུད་དུ་འགྲོ་བཞིན་པའི་སྐབས་ཤིག་ཡིན་ཞིང་། དམིགས་བསལ་བལ་ཡུལ་ཡང་རྒྱ་ནག་གི་རྒྱུ་གཅིག་ལམ་གཅིག་གི་འཛུགས་སྐྲུན་གྱི་ཁོངས་ཚུད་རྒྱལ་ཁབ་ཅིག་ཡིན་སྟབས། རྒྱ་གར་གཞུང་ནས་བལ་ཡུལ་གྱི་དཔལ་འབྱོར་གནས་བབ་ཐད་སེམས་འཚབ་སྐྱེ་ཡི་ཡོད་པའི་བརྡ་ལན་ཞིག་ཆགས་ཀྱི་ཡོད་ཀྱང་། བལ་ཡུལ་ནང་གཞུང་འཛིན་གསར་པ་བསླེབས་པ་ནས་བཟུང་། སྲིད་བློན་ཤར་བྷ་ཧ་ཌོར་ལགས་ཀྱིས་སྣེ་འཁྲིད་པའི་བལ་གཞུང་གིས། རྒྱ་ནག་གི་རོགས་དངུལ་ལེན་རྒྱུ་ཡིན་པ་ལས་འཛུགས་སྐྲུན་དང་འབྲེལ་བའི་བུ་ལོན་གང་ཡང་ལེན་རྒྱུ་མིན་པ་རྒྱ་ནག་གཞུང་ལ་བརྡ་ལན་གསལ་བོ་སྤྲད་ཡོད་པ་རེད།

བལ་གཞུང་གསར་བའི་ངོས་ནས་དེ་སྔའི་གཞུང་དང་མི་འདྲ་བར། ཟླ་སྔོན་མའི་ཕྱི་ཚེས་ ༢༢ ཉིན་ཨ་རིའི་གྲོས་ཚོགས་གོང་འོག་གཉིས་ཀྱི་མི་སྣས་འདུས་པའི་སྐུ་ཚབ་ཚོགས་ཆུང་ཞིག་བལ་ཡུལ་དུ་གཞུང་འབྲེལ་འཚམས་གཟིགས་སུ་བསུས་ཡོད་པ་མ་ཟད། ཟླ་དེའི་ཕྱི་ཚེས་ ༢༤ ཉིན་བལ་ཡུལ་གཞུང་གིས་ཨ་རིའི་རོགས་ཚོགས་བརྒྱུད་ཨ་སྒོར་ས་ཡ་ ༦༥༩ ཡི་རོགས་དངུལ་ལེན་རྒྱུ་གཏན་འཁེལ་བྱས་ཡོད་པ་རེད་ལ། སྐབས་དེར་ཨ་རིའི་སྐུ་ཆབ་ཚོགས་ཆུང་གིས་བལ་ཡུལ་དུ་གནས་སྡོད་སྐྱབས་བཅོལ་བོད་མི་རྣམས་ལ་ཡིག་ཆའི་དཀའ་ངལ་ཡོད་པ་སེལ་དགོས་སྐོར་བལ་ཡུལ་གཞུང་ལ་ཞུ་སྐུལ་ཡང་བྱས་ཡོད་འདུག

ཡང་འདས་ལོའི་ཕྱི་ཟླ་ ༧ ཚེས་ ༡༣ ཉིན་བལ་ཡུལ་གྱི་རྒྱལ་ཡོངས་འོས་བསྡུ་ཆེན་མོའི་སྐབས་རྒྱལ་ཡོངས་མང་གཙོ་ཚོགས་པའི་ཚོགས་གཙོ་དང་ད་ལྟའི་སྲིད་བློན་ཤར་བྷ་ཧ་ཌོར་ལགས་སུ་གཞུང་འཛིན་གྱི་འོས་བསྡུའི་རྒྱལ་ཁ་ཐོབ་པ་དང་གཞུང་འཛིན་གསར་བའི་ངོས་ནས། ཕྱི་འབྲེལ་སྲིད་ཇུས་ལ་གུ་ཡངས་འགྱུར་བཅོས་བཏང་སྟེ། དམིགས་བསལ་ཨ་རི་དང་རྒྱ་གར་སོགས་མང་གཙོ་རྒྱལ་ཁབ་ཁག་དང་འབྲེལ་འདྲིས་ཀྱིས། ཨུ་རུ་སུས་ཡོ་ཁུ་རེན་ལ་བཙན་འཛུལ་བྱེད་བཞིན་པར་ངོ་རྒོལ་བྱས་པ་དང་། ཟླ་སྔོན་མའི་ཕྱི་ཚེས་ ༢ ཉིན་སྲིད་བློན་ཤར་བྷ་ཧ་ཌོར་ལགས་ཀྱིས་སྣེ་འཁྲིད་པའི་བལ་ཡུལ་གྱི་གནད་ཡོད་མི་སྣ་ཁག་ཅིག་ཉིན་གསུམ་རིང་རྒྱ་གར་ནང་འཚམས་གཟིགས་སུ་ཕེབས་པ་དང་བསྟུན། རྒྱ་གར་གྱི་དཔལ་འབྱོར་རོགས་དངུལ་འོག་བལ་སྒོར་ཐེར་འབུམ་ ༨།༧༧ གྱི་འགྲོ་གྲོན་བཏང་སྟེ། བལ་ཡུལ་དང་རྒྱ་གར་བར་མེ་འཁོར་ལྕགས་ལམ་ཞིག་གསར་འབྱེད་བྱས་ཡོད་པ་རེད།

གསར་འགོད་པ། སྐལ་བཟང་སྦྱིན་པ།