ཨ་རིའི་ཡེ་ཤུ་ཆོས་ཁང་ནང་དམར་གསོད་དོན་རྐྱེན་བཟོ་མཁན་དེ་རྒྱ་མི་ཞིག་ཡིན་འདུག

དེ་རིང་རྒྱལ་སྤྱིའི་གསར་ལམ་ཁག་ཏུ་གནས་ཚུལ་ཐོན་བཞིན་པ་ལྟར་ན། ཟླ་འདིའི་ཕྱི་ཚེས་ ༡༥ ཉིན་ཨ་རིའི་ནུབ་རྒྱུད་མངའ་སྡེ་ཁེ་ལི་ཧྥོར་ནི་ཡའི་ (California) གྲོང་ཁྱེར་ལཱ་གུ་ན་ཝུཌ་སི་ (Laguna Woods) ཡི་ཡེ་ཤུའི་ཆོས་ཁང་ཞིག་གི་ནང་དུ་གང་བྱུང་མེ་མདའ་འཕངས་ཏེ་མི་ཞིག་རྐྱེན་འདས་དང་མི་མང་པོར་རྨས་སྐྱོན་གཏོང་མཁན་དེ། ཐའེ་ཝན་མི་མང་ལ་སྡང་སེམས་ཆེན་པོ་ཡོད་པའི་རྒྱ་ནག་སྐམ་ས་ཆེན་མོའི་རྒྱ་རིགས་ཤིག་ཡིན་སྐོར་བསྒྲགས་འདུག

དེ་ཡང་ས་གནས་ཉེན་རྟོག་པས་བཤད་པ་ལྟར་ན། ཐའེ་ཝན་པ་རྣམས་ཀྱིས་གཉེར་བའི་ཇེ་ནེ་ཝ་པེ་རེ་བི་ཊེ་རན་ཆོས་ཁང་ (Geneva Presbyterian Church) ནང་མི་གསོད་ཀྱི་བྱ་ངན་སྤེལ་མཁན་དེ་རང་ལོ་ ༦༨ ལ་སོན་པའི་ཨ་རིའི་མི་སེར་དུ་གྱུར་བའི་རྒྱ་ནག་སྐམ་ས་ཆེན་མོའི་རྒྱ་རིགས་ཌེ་ཝིཌ་ཁྲོ་ (David Chou) ཟེར་བ་ཞིག་ཡིན་པ་དང་། ཉེན་རྟོག་པས་ཁོ་པའི་རྒྱབ་ལྗོངས་སོགས་ལ་རྟོག་ཞིབ་བྱེད་སྐབས། ཁོ་རང་ཐའེ་ཝན་གྱི་སྤྱི་ཚོགས་ལ་མི་དགའ་བ་ཆེན་པོ་ཡོད་པ་མ་ཟད། ཉེ་ཆར་ཐའེ་ཝན་དང་རྒྱ་ནག་དབར་གྱི་ཆབ་སྲིད་རྩོད་རྙོག་ལ་མི་དགའ་བ་ཆེན་པོ་བྱེད་ཀྱི་ཡོད་པ་ཤེས་རྟོགས་བྱུང་ཡོད་སྐོར་དང་། ཉེན་རྟོག་པས་མི་དེ་འཛིན་བཟུང་བྱས་ཡོད་པ་མ་ཟད། དོན་མེད་དམར་གསོད་བཏང་བ་དང་དམར་གསོད་གཏོང་རྩིས་བྱས་པ་སོགས་ཀྱི་ནག་ཉེས་ལྔ་བཙུགས་ཡོད་འདུག

རྒྱལ་སྤྱིའི་གསར་ལམ་ཁག་གི་གནས་ཚུལ་ལྟར་ན། ཟླ་འདིའི་ཕྱི་ཚེས་ ༡༥ ཉིན་ས་གནས་ཀྱི་ཉིན་གུང་ཙམ་ལ། དོགས་ཡོད་ཉེས་ཅན་པ་ཌེ་ཝིཌ་ཁྲོ་ཟེར་བ་དེས་སྣུམ་ལྡན་འབར་རྫས་ (Molotov cocktail) ཀྱིས་ཁེངས་པའི་ཁུག་མ་ཞིག་དང་། མེ་མདའ་དང་མདེའུ་ཡིས་ཁེངས་པའི་ཁུག་མ་ཞིག་ཁྱེར་ཡོང་སྟེ།  ཆོས་ཁང་དེའི་ནང་ཡོད་པའི་ཆོས་ཞུ་བ་རྣམས་ཀྱི་ཐོག་ལ་གང་བྱུང་མེ་མདའ་བརྒྱབ་སྟེ་རང་ལོ་ ༥༢ ཡིན་པའི་ཇོན་ཁྲེང་(John Cheng) ཞེས་པ་ཞིག་རྐྱེན་འདས་བཏང་བ་དང་། ལོ་ན་ ༦༦ ནས་ ༩༢ བར་ཡིན་པའི་སྐྱེས་པ་ ༤ དང་རང་ལོ་ ༨༦ ཡིན་པའི་སྐྱེས་མ་ཞིག་བཅས་མི་ལྔ་ལ་རྨས་སྐྱོན་ཚབས་ཆེན་བཏང་ཡོད་པ་རེད། ཉེན་རྟོག་པའི་འགྲེལ་བརྗོད་ལྟར་ན། རྐྱེན་འདས་སུ་ཕྱིན་པའི་སྐྱེས་པ་ཇོན་ཁྲེང་ཟེར་བ་དེས་ཌེ་ཝིཌ་ཁྲོ་ཟེར་བ་དེར་ཕར་རྒོལ་བྱས་ཏེ་འགོག་རྩིས་བྱེད་སྐབས་ལམ་ལྷོངས་མ་སོང་བར་རྐྱེན་འདས་སུ་ཕྱིན་ཡོད་པ་དང་། དེའི་རྗེས་ཌེ་ཝིཌ་ཁྲོ་ཟེར་བ་དེས་མེ་མདའི་མདེའུ་བསྐྱར་བླུགས་བྱེད་བཞིན་པའི་མཚམས་དེར། ཆོས་ཁང་དེའི་རྒྱུན་གཏན་གྱི་ཆོས་ཞུ་བ་ཞིག་གིས་ཁོ་པའི་མགོ་ལ་རྐུབ་བཀྱག་གིས་གཞུས་ཏེ་འཛིན་བཟུང་བྱེད་ཐུབ་པ་བྱུང་ཡོད་འདུག ཕྱིས་སུ་ས་གནས་ཀྱི་མགོ་འཁྲིད་དང་ཉེན་རྟོག་པས་གལ་ཏེ་ཆོས་ཞུ་བ་དེས་བློ་སྟོབས་ཆེན་པོས་ཕར་རྒོལ་བྱས་མེད་ཚེ། མི་དེ་ལས་མང་བའི་ཚེ་སྲོག་འཆོར་ངེས་ཡིན་སྐོར་བརྗོད་དེ་བསྔགས་བརྗོད་བྱས་ཡོད་འདུག

གཞན་ཡང་། ཟླ་འདིའི་ཕྱི་ཚེས་ ༡༥ ཉིན་ཨ་རིའི་གྲོང་ཁྱེར་ནེའུ་ཡོག་གི་མི་རིགས་ནག་པོ་འདུ་སྡོད་ཆེ་སའི་ས་ཁུལ་བྷ་ཧྥེ་ལོ་ (Buffalo) ཞེས་པའི་ཚོང་ཁང་གི་ཐོག་རྩེག་ཞིག་གི་ནང་།  རང་ལོ་ ༡༨ ཡིན་པའི་མི་རིགས་དཀར་པོ་པེ་ཊོན་གྷེན་ཌོ་རོན་ (Payton Gendron) ཟེར་བ་ཞིག་གིས་གང་བྱུང་མེ་མདའ་འཕངས་ཏེ་མི་གྲངས་ ༡༠ རྐྱེན་འདས་དང་། མི་ ༣ ལ་རྨས་སྐྱོན་ཚབས་ཆེན་བཟོས་ཡོད་པ་མ་ཟད། མི་གསོད་ཀྱི་དོན་རྐྱེན་དེ་དག་ཐད་གཏོང་བྱས་ཡོད་པ་རེད། རྐྱེན་འདས་དང་རྨས་སྐྱོན་ཐེབས་མི་ ༡༣ ཁྲོད་ནས་ ༡༡ མི་རིགས་ནག་པོ་ཡིན་ཞིང་། ཕྱིས་སུ་ཉེན་རྟོག་པས་རྟོག་ཞིབ་བརྒྱུད་ཨ་རིའི་མི་གསོད་ཕལ་ཆེར་ལྟར་ད་ལན་འདི་ཡང་ཆེས་མཐར་ལྷུང་བའི་མི་རིགས་དཀར་པོའི་རིང་ལུགས་ཀྱི་མཇུག་འབྲས་ཤིག་ཡིན་པ་དང་། པེ་ཊོན་གྷེན་ཌོ་རོན་ཟེར་བའི་དོགས་ཡོད་ཉེས་ཅན་པ་དེས་མེ་མདའི་ཐོག་མི་རིགས་ནག་པོར་དབྱེ་འབྱེད་ཀྱི་འབོད་ཚིག་བྲིས་ཡོད་པ་མ་ཟད། ཁོ་པས་དྲ་ལམ་ཐོག་ལའང་བསྒྲགས་གཏམ་ཞིག་སྤེལ་བའི་ནང་མི་རིགས་དབྱེ་འབྱེད་ཀྱི་ནང་དོན་ཡོད་པ་རེད་འདུག

འདས་པའི་ལོ་ཤས་ནང་ཨ་རིའི་ནང་མེ་མདའི་དོན་རྐྱེན་བསྟུད་མར་བྱུང་བའི་རྐྱེན་གྱིས་མི་སེར་དཀྱུས་མས་མེ་མདའ་ཐོགས་རྒྱུའི་ཐད་ཚོད་འཛིན་བྱ་དགོས་པའི་གླེང་སློང་ཤུགས་ཆེན་པོ་བྱུང་ཡོད། འོན་ཀྱང་ཨ་རིར་མཚོན་ན་མེ་མདའ་ནི་སྲོལ་རྒྱུན་གོམས་སྲོལ་དང་ལོ་རྒྱུས་གནས་བབ་སོགས་ཀྱི་ཐོག་ནས་བྲལ་ཐབས་མེད་པའི་ཆ་ཤས་ཤིག་ཡིན་པས། ཨ་རིའི་རྩ་ཁྲིམས་དོན་ཚན་ ༢ པའི་ནང་ཨ་རིའི་མི་སེར་རྣམས་ལ་མཚོན་ཆ་ཐོགས་ཆོག་པའི་ཐོབ་ཐང་སྤྲད་ཡོད་ལ། ཨ་རིའི་པེའུ་ཞིབ་འཇུག་ཁང་ (Pew Research Centre) ལྟར་ན། རང་ལོ་ ༡༨ ཡན་གྱི་ཨ་རིའི་མི་འབོར་ཁྲོད་ཀྱི་གསུམ་ཆ་གཅིག་གི་ལག་ལ་མཚོན་ཆ་ཡོད་ཅིང་། ཆབ་སྲིད་ཀྱི་ལྟ་བའི་ཐད་ནས་བཤད་ན། སྤྱི་མཐུན་ཚོགས་པའི་ཁོངས་མི་རྣམས་ཀྱི་ཁྲོད་ནས་བརྒྱ་ཆ་ ༤༤ ཡིས་རང་ལ་མཚོན་ཆ་ཡོད་པ་དང་། དམངས་གཙོ་ཚོགས་པའི་ཁོངས་མིའི་བརྒྱ་ཆ་ ༢༠ ཡིས་རང་ལ་མཚོན་ཆ་ཡོད་སྐོར་བཤད་ཡོད་འདུག ཕྱོགས་གཞན་ནས་ཨ་རི་ནི་འཛམ་གླིང་སྟེང་མི་སེར་དཀྱུས་མས་མཚོན་ཆ་མང་ཤོས་ཉར་མཁན་གྱི་རྒྱལ་ཁབ་ཨང་དང་པོ་དེ་ཡིན་པ་རེད།

ཨ་རིའི་གཞུང་གི་གྲངས་ཐོ་ལྟར་ན། ཕྱི་ལོ་ ༡༩༦༨ ནས་ ༢༠༡༧ བར་ཨ་རིའི་ནང་མི་གྲངས་ས་ཡ་ ༡།༥ མེ་མདའི་འོག་ནས་རྐྱེན་འདས་སུ་ཕྱིན་ཡོད་ཅིང་། གྲངས་འབོར་དེ་ནི་ཕྱི་ལོ་ ༡༧༧༥ ལོའི་ཨ་རིའི་རང་བཙན་གྱི་དམག་འཁྲུག་རྗེས་ནས་ད་བར་རྐྱེན་འདས་སུ་ཕྱིན་པའི་ཨ་རིའི་དམག་མིའི་གྲངས་འབོར་ལས་མཐོ་བ་ཡིན་ཞིང་། ཕྱི་ལོ་༢༠༢༠ གཅིག་པུར་མཚོན་ན། ཨ་རིའི་ནང་མེ་མདའི་རྐྱེན་པས་མི་གྲངས་ ༤༥༠༠༠ ལས་མང་བ་རྐྱེན་ལམ་དུ་སོང་ཡོད་ཅིང་། དེ་ནི་ལོ་དེའི་ཡར་སྔོན་གྱི་ལོ་ལྔའི་རིང་གི་གྲངས་འབོར་ལས་བརྒྱ་ཆ་ ༢༥ ཡིས་མཐོ་བ་ཡིན་པ་མ་ཟད། ཕྱི་ལོ་ ༢༠༡༠ དང་བསྡུར་ན་བརྒྱ་ཆ་ ༤༣ གྱིས་འཕར་ཆ་ཕྱིན་ཡོད་པ་རེད། ཆ་སྙོམས་བྱས་ན་ཨ་རིའི་ནང་ཉིན་རེར་མི་ ༥༣ མེ་མདའི་འོག་ནས་རྐྱེན་འདས་སུ་འགྲོ་ཡི་ཡོད་ཅིང་། ཨ་རིའི་ཆབ་སྲིད་ཀྱི་བགྲོ་གླེང་ནང་མེ་མདའ་བདག་བཟུང་ཐད་ཚོད་འཛིན་དགོས་པའི་གླེང་སློང་ཤུགས་ཆེར་འབྱུང་བཞིན་ཡོད་ནའང་། ཨ་རིའི་གྷ་ལབ་ཞིབ་འཇུག་ཁང་ (Gullup) གིས་ཕྱི་ལོ་ ༢༠༢༠ ལོར་བསམ་ཤོག་ཅིག་བསྡུས་པའི་ནང་། བརྒྱ་ཆ་ ༥༢ གྱིས་མེ་མདའ་ཁྲིམས་སྒྲིག་དམ་དུ་གཏོང་དགོས་པ་དང་། བརྒྱ་ཆ་ ༣༥ ཡིས་རང་སོར་འཇོག་དགོས་པ། བརྒྱ་ཆ་ ༡༡ ཡིས་མེ་མདའི་ཁྲིམས་སྒྲིག་ལྷོད་དུ་གཏོང་དགོས་སྐོར་བརྗོད་ཡོད་ཅིང་། ལོ་དེར་ཨ་རིའི་མང་ཚོགས་ཁྲོད་མེ་མདའི་ཁྲིམས་སྒྲིག་དམ་དུ་གཏོང་དགོས་པའི་བསམ་ཚུལ་འདོན་མཁན་ཕྱི་ལོ་ ༢༠༡༤ ནས་བཟུང་དམའ་ཤོས་དེ་ཡིན་པ་རེད་འདུག

གསར་འགོད་པ། པ་སངས་ཚེ་རིང་།