སྲིད་སྐྱོང་སྤེན་པ་ཚེ་རིང་མཆོག་ནས་ཨོ་སི་ཊོ་ལི་ཡའི་སྲིད་བློན་གསར་པར་འཚམས་འདྲི་གནང་ཡོད་པ་དང་དེ་བཞིན་བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་ཨོ་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སོགས་འཚམས་འདྲི་གནང་འདུག
དེ་ཡང་སྲིད་སྐྱོང་སྤེན་པ་ཚེ་རིང་མཆོག་གིས་ཨོ་སི་ཊོ་ལི་ཡའི་སྲིད་བློན་ཨེན་ཐོ་ནི་ཨལ་བྷེ་ནི་སི་མཆོག་ཨོ་གླིང་གི་སྲིད་བློན་དུ་བདམས་ཐོན་བྱུང་བར་འཚམས་འདྲི་གནང་བའི་ནང་། ངས་བོད་མིའི་སྒྲིག་འཛུགས་དང་བོད་མི་ཡོངས་ཀྱི་ཚབ་ཞུས་ཏེ་སྐུ་ཉིད་ཨོ་སི་ཊོ་ལི་ཡའི་སྲིད་བློན་དུ་མང་མོས་འོས་འདེམས་བྱུང་བར་འཚམས་འདྲི་བཀྲ་ཤིས་བདེ་ལེགས་ཞུ་བ་དང་། ཨོ་སི་ཊོ་ལི་ཡའི་མི་མང་གིས་འོས་ཤོག་གི་ལམ་ནས་སྐུ་ཉིད་ཀྱི་དབུ་ཁྲིད་ལམ་སྟོན་ལ་ཡིད་ཆེས་བློ་འགེལ་དང་རེ་བ་བཅོལ་ཡོད་པ་རེད། ངས་གོ་སྐབས་འདི་བརྒྱུད་ནས་ཨོ་སི་ཊོ་ལི་ཡའི་གཞུང་མང་གཉིས་ཀྱིས་བོད་ཀྱི་ཆབ་སྲིད་བཙོན་པ་དང་ཁོང་ཅག་གི་ནང་མི་གཙོ་བོར་གྱུར་པའི་བོད་མི་རྣམས་ལ་ཨོ་སི་ཊོ་ལི་ཡར་འགྲོ་བ་མིའི་བདེ་རྩ་དང་གཞིས་ཆགས་པའི་རོགས་སྐྱོར་གནང་བར་བཀའ་དྲིན་རྗེས་དྲན་ཞུ་རྒྱུ་དང་། ཨོ་སི་ཊོ་ལི་ཡའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པས་བོད་དོན་ཤུགས་ཆེན་གླེང་སློང་གནང་བཞིན་པར་ཐུགས་རྗེ་ཆེ་ཞུ་ཡི་ཡིན། ཞེས་གསུངས་འདུག
ཡང་སྲིད་སྐྱོང་མཆོག་གིས། རྒྱ་ནག་གཞུང་གི་གདུག་རྩུབ་ཆེ་བའི་དབང་བསྒྱུར་འོག་བོད་ནང་གི་བོད་མི་རྣམས་ཀྱིས་མུ་མཐུད་བཙན་གནོན་སྡུག་སྦྱོང་མྱོང་བཞིན་ཡོད་པ་དང་། དེའི་རྐྱེན་གྱིས་རིམ་པས་རིག་གཞུང་རྩ་གཏོར་འགྲོ་ཉེན་ཆེ་ནའང་། དེང་སྐབས་ཨོ་སི་ཊོ་ལི་ཡ་ཐེ་བའི་དམངས་གཙོ་དང་ཁྲིམས་ཀྱི་དབང་བསྒྱུར་ལ་དགའ་བའི་རྒྱལ་ཁབ་མང་པོས་རྒྱ་ནག་གི་སྲིད་དབང་སྒེར་འཛིན་གྱི་སྲིད་གཞུང་ལ་གདོང་ལེན་བྱེད་ཀྱི་ཡོད། ཅེས་དང་། སྲིད་བློན་མཆོག་གི་དབུ་ཁྲིད་འོག་འབྱུང་འགྱུར་གྱི་དཀའ་སྡུག་ཁག་ལ་གདོང་ལེན་བྱེད་ཐུབ་པ་དང་། ཁོང་གི་ཕྱི་འབྲེལ་གྱི་སྲིད་ཇུས་ནང་འགྲོ་བ་མིའི་ཐོབ་ཐང་དང་ཆེ་མཐོང་གཙོ་བོར་འཛིན་པའི་ཡིད་ཆེས་ཡོད། ཅེས་གསུངས་འདུག
དེ་བཞིན། བོད་མི་མང་སྤྱི་འཐུས་ཚོགས་གཙོ་མཁན་པོ་བསོད་ནམས་བསྟན་འཕེལ་མཆོག་ནས་ཨོ་སི་ཊོ་ལི་ཡའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་པའི་ཚོགས་གཙོ་སྐུ་ཞབས་ཝེ་རན་ (Warren Entsch) ལགས་དང་། བོད་དོན་རྒྱབ་སྐྱོར་བ་ལྕམ་སོ་སན་ (Susan Templeman) ལགས་རྣམ་གཉིས་བསྐྱར་དུ་ཨོ་སི་ཊོ་ལི་ཡའི་གྲོས་ཚོགས་འཐུས་མིར་བདམས་ཐོན་བྱུང་བར་དགའ་བསུའི་འཚམས་འདྲི་གནང་བའི་ནང་། ཁྱེད་རྣམ་པ་གཉིས་སླར་ཡང་ཨོ་སི་ཊོ་ལི་ཡའི་གྲོས་ཚོགས་འཐུས་མིར་བདམས་ཐོན་བྱུང་བར་བོད་མི་ཚང་མ་དགའ་ཚོར་ཆེན་པོ་བྱུང་ཡོད་པ་དང་། ཁྱེད་རྣམ་པས་མུ་མཐུད་བོད་དོན་ཐོག་རྒྱབ་སྐྱོར་གནང་རྒྱུའི་ཡིད་ཆེས་བརྟན་པོ་ཡོད། ད་རེས་ཁྱེད་རྣམ་པར་འོས་བསྡུའི་རྒྱལ་ཁ་ཐོབ་པ་དེས་ཨོ་སི་ཊོ་ལི་ཡའི་མི་མང་གིས་ཁྱེད་རྣམ་པའི་འགོ་ཁྲིད་གནང་ཕྱོགས་ལ་ཡིད་ཆེས་ཆེན་པོ་གནང་གི་ཡོད་པ་མཚོན་ཐུབ། ཁྱེད་རྣམ་པའི་གྲོས་ཚོགས་འཐུས་མིའི་ལས་ཡུན་རིང་། ཨོ་སི་ཊོ་ལི་ཡའི་མི་མང་གི་མངོན་འདོད་བསྒྲུབ་རྒྱུའི་ལས་དོན་མཐའ་དག་ལམ་ལྷོངས་ལྡན་པ་ཡོང་བའི་སྨོན་འདུན་ཞུ་རྒྱུ་ཡིན། ཞེས་བཀོད་འདུག
ད་ལྟ་རང་ལོ་ ༧༡ ཡིན་པའི་ཚོགས་གཙོ་སྐུ་ཞབས་ཝེ་རན་ལགས་ནི་ཕྱི་ལོ་ ༡༩༩༦ ནས་ ༢༠༠༧ བར་དང་ཕྱི་ལོ་ ༢༠༡༠ ནས་ད་བར་ཨོ་སི་ཊོ་ལི་ཡའི་གྲོས་ཚོགས་འཐུས་མིར་བདམས་ཐོན་བྱུང་ཞིང་། ཕྱི་ལོ་ ༢༠༡༣ ནས་བོད་དོན་རྒྱབ་སྐྱོར་ཚོགས་པའི་ཚོགས་མི་ཡིན་པ་དང་། ད་ལྟའི་ཆར་བོད་དོན་རྒྱབ་སྐྱོར་ཚོགས་པའི་ཚོགས་གཙོའང་ཡིན་འདུག ད་ལྟའི་ཆར་ཡུལ་དེའི་བོད་དོན་རྒྱབ་སྐྱོར་ཚོགས་པའི་ཚོགས་གཙོའི་ཕྱག་ལས་གནང་གི་ཡོད་འདུག ཁོང་ནས་གནམ་གཤིས་འགྱུར་ལྡོག་གིས་འཛམ་གླིང་ནང་ཆེས་རྒྱ་ཆེ་ཤོས་སུ་ངོས་འཛིན་བྱེད་བཞིན་པའི་ཨོ་གླིང་གི་བྱུ་རུའི་གླིང་ཚོམ་ (Great Barrier Reef) ལ་ཤུགས་རྐྱེན་ཆེན་པོ་ཐེབས་ཀྱི་ཡོད་པར་བརྗོད་དེ་ཁོར་ཡུག་སྲུང་སྐྱོབ་ཐོག་ཤུགས་རྒྱག་གི་ཡོད་འདུག དེ་བཞིན་ཁོང་གིས་མཚན་མཐུན་གཉེན་སྒྲིག་ལ་རྒྱབ་སྐྱོར་ཤུགས་ཆེན་བྱེད་ཀྱི་ཡོད་པ་དང་། ཡུན་རིང་རྩོད་ལེན་བྱས་པ་བརྒྱུད་ཕྱི་ལོ་ ༢༠༡༧ ལོར་ཨོ་གླིང་ནང་མཚན་མཐུན་གྱི་གཉེན་སྒྲིག་ཁྲིམས་མཐུན་ཆགས་ཡོད་པ་རེད།
ད་ལྟ་རང་ལོ་ ༥༨ ཡིན་པའི་གྲོས་ཚོགས་འཐུས་མི་ལྕམ་སྐུ་སོ་སན་(Susan Templeman)ལགས་ཕྱི་ལོ་ ༢༠༡༠ ནས་ངལ་རྩོལ་ཚོགས་པའི་ (Labor Party)ཁོངས་ནས་འཐུས་མིར་བདམས་ཐོན་བྱུང་ཞིང་། ཁོང་མོས་ཀྱང་མཚན་མཐུན་གཉེན་སྡེབ་ (LGBT) དང་གཉེན་སྒྲིག་གི་རང་དབང་། བུད་མེད་ལ་ཐོབ་ཐང་འདྲ་མཉམ་དང་ཕོ་མོ་གཉིས་ཀྱི་གླ་ཕོགས་གཅིག་མཚུངས་སོགས་ལ་རྒྱབ་སྐྱོར་གནང་གི་ཡོད་པ་མ་ཟད། ཨོ་གླིང་ནང་གི་གཞུང་འབྲེལ་མ་ཡིན་པའི་ཚོགས་པ་ (Australian Republican Movement) ཡིས་ཨོ་གླིང་གི་རྒྱལ་ཁབ་དེ་མི་སེར་གྱི་རྒྱལ་ཁབ་ཅིག་བསྒྱུར་བར་འཐབ་རྩོད་བྱེད་བཞིན་ཡོད་པ་ལྟར་དེ་ལ་རྒྱབ་སྐྱོར་གནང་གི་ཡོད་འདུག
གསར་འགོད་པ་བསྟན་འཛིན་ཕུར་བུས་བོད་མིའི་སྒྲིག་འཛུགས་ཀྱི་དྲ་བ་ལས་བཏུས།
