ར་མོ་ཆེ་གཙུག་ལག་ཁང་གི་མདུན་ཐང་ནས་བོད་མི་ཞིག་བཙན་འཁྲིད་བྱས་ཡོད་འདུག

དེ་རིང་བོད་ནང་གི་སྔ་དྲོའི་ཆུ་ཚོད་ ༡༠ ཡས་མས་ཤིག་ལ་རྒྱ་ནག་ཉེན་རྟོག་པས་བོད་ཀྱི་རྒྱལ་ས་ལྷ་སའི་ར་མོ་ཆེ་གཙུག་ལག་ཁང་གི་མདུན་ཐང་ནས་བོད་རིགས་སྐྱེས་པ་ཞིག་འཛིན་བཟུང་བྱས་ཏེ་ཉེན་རྟོག་ཁང་དུ་བཙན་འཁྲིད་བྱས་ཡོད་འདུག

ལྷ་སར་ཡོད་པའི་ཡུལ་སྐོར་བ་ཞིག་གིས་འདི་ག་དུས་བབ་ཀྱི་གསར་འགོད་པར་གནས་ཚུལ་མཁོ་སྤྲོད་གནང་བ་ལྟར་ན། དེ་རིང་ཁོང་ར་མོ་ཆེ་གཙུག་ལག་ཁང་ལ་མཇལ་སྐོར་དུ་ཕྱིན་སྐབས། མི་མང་པོ་བང་བསྒྲིགས་ཏེ་མཆོད་མཇལ་དུ་འགྲོ་བཞིན་པའི་བར་ནས་བོད་རིགས་སྐྱེས་པ་ཞིག་ཉེན་རྟོག་པས་བཙན་འཁྲིད་བྱས་ཡོད་འདུག འོན་ཀྱང་། བོད་མི་དེ་སུ་ཡིན་དང་། ནག་ཉེས་ག་རེ་གཡོགས་པ་ཡིན་སོགས་གང་ཡང་ཤེས་རྟོགས་ཐུབ་མི་འདུག

ཡང་གནས་ཚུལ་མཁོ་སྤྲོད་པ་དེས། དེང་སང་རྒྱ་ནག་ནང་ལོག་གཙོ་བོར་གྱུར་བའི་ས་ཁུལ་མང་པོར་ཏོག་དབྱིབས་གཉན་རིམས་འགོས་ཁྱབ་ཀྱི་རྐྱེན་གྱིས་བཀག་སྡོམ་བྱེད་བཞིན་ཡོད་ཀྱང་། བོད་ཀྱི་རྒྱལ་ས་ལྷ་སའི་པོ་ཏ་ལ་དང་ར་མོ་ཆེ་གཙུག་ལག དེ་བཞིན་བར་སྐོར་སོགས་སུ་རྒྱ་ནག་ནང་ལོག་ནས་ཡོང་བའི་ཡུལ་སྐོར་བ་ཧ་ཅང་མང་པོ་ཡོད་པ་དང་། ནད་ཡམས་རྐྱེན་གྱིས་ཡིན་མིན་གང་ལྟར་ཡང་དེང་སང་བདུན་ཕྲག་གཅིག་ནང་མཆོད་མཇལ་དུ་ཐེངས་གསུམ་མ་གཏོགས་གཏོང་གི་མེད་སྐོར་དང་། རྒྱ་ནག་ནང་ལོག་ནས་ཡོང་མཁན་མང་དྲགས་པའི་རྐྱེན་གྱིས་ས་གནས་བོད་མི་སོགས་དུས་རྒྱུན་ལྟར་མཆོད་མཇལ་དང་སྐོར་རར་འགྲོ་རྒྱུ་ཁག་པོ་ཆགས་ཡོད་སྐོར་བརྗོད་བྱུང་།

ས་གནས་གསར་འགོད་པ།