བུ་འཁྲིད་དཀར་པོ་ཆེ་ལགས་བསྐྱར་དུ་མངའ་སྡེའི་གྲོས་ཚོགས་འཐུས་མིར་བདམས་ཐོན་བྱུང་ཡོད་འདུག

ཁེ་ན་ཌའི་ནང་གནས་སྡོད་བོད་རིགས་བུད་མེད་བུ་འཁྲིད་དཀར་པོ་ཆེ་ལགས་ཨོན་ཊེ་རི་ཡོ་མངའ་སྡེའི་གྲོས་ཚོགས་འཐུས་མིར་བསྐྱར་དུ་བདམས་ཐོན་བྱུང་ཡོད་འདུག

ཁ་སང་ཕྱི་ཚེས་ ༢ ཉིན་ཁེ་ན་ཌའི་མངའ་སྡེ་ཨོན་ཊེ་རི་ཡོའི་ (Ontario) གྲོས་ཚོགས་འཐུས་མིའི་འོས་བསྡུ་བྱས་ཡོད་པ་ལྟར། མངའ་སྡེ་དེའི་པག་ཌིལ་ཧེ་པག་ (Parkdale-High Park) ནས་ཡིན་པའི་བོད་རིགས་བུད་མེད་བུ་འཁྲིད་དཀར་པོ་ཆེ་ལགས་བསྐྱར་དུ་འཐུས་མིར་བདམས་ཐོན་བྱུང་ཡོད་འདུག

ད་ལྟའི་ཆར་གཞུང་འབྲེལ་ཐོག་ནས་འོས་བསྡུའི་གྲུབ་འབྲས་གསལ་བསྒྲགས་གནང་མེད་ཀྱང་། ཨོན་ཊེ་རི་ཡོའི་གྲོས་ཚོགས་ནང་ཁྱོན་ཞབས་བཀྱག་ ༡༢༤ ཡོད་པ་དང་། ས་གནས་ཀྱི་མདུན་སྐྱོད་ཡར་སྐུལ་ཚོགས་པ་ (PC)དང་། ལྗང་ཁུ་ཚོགས་པ་(Green)། རང་དབང་རིང་ལུགས་པའི་ཚོགས་པ་(Liberals)། དམངས་གཙོ་ཚོགས་པ་བཅས་ཀྱི་འོས་མི་མཉམ་ཞུགས་གནང་ཡོད་པ་དང་། ད་ལྟའི་ཆར་དྲ་ལམ་གྱི་འོས་བསྡུའི་གྲུབ་འབྲས་ནང་མདུན་སྐྱོད་ཡར་སྐུལ་ཚོགས་པ་དང་དམངས་གཙོ་ཚོགས་པ་གཉིས་ལ་འོས་གྲངས་མང་ཤོས་ཐོབ་འདུག

གྲོས་ཚོགས་འཐུས་མི་བུ་འཁྲིད་དཀར་པོ་ཆེ་ལགས་ཕྱི་ལོ་ ༢༠༡༧ ཟླ་ ༩ པའི་ཚེས་ ༡༤ ཉིན་གྱི་པག་ཌིལ་ (Parkdale) ས་གནས་ཀྱི་དམངས་གཙོ་ཚོགས་པའི་ཚོགས་འདུའི་ཐོག ཕྱི་ལོ་ ༢༠༡༨ ལོའི་ཨོན་ཊེ་རེ་ཡོ་མངའ་སྡེའི་གྲོས་ཚོགས་འཐུས་མི་འོས་བསྡུའི་ནང་པག་ཌིལ་ས་གནས་ཀྱི་འོས་མིར་བདམས་ཡོད་པ་དང་། ཁོང་མོ་ནི་ཁེ་ན་ཌའི་ལོ་རྒྱུས་ནང་བོད་རིགས་ཤིག་གྲོས་ཚོགས་འཐུས་མི་ཆགས་པ་ཐོག་མ་དེ་ཡིན་འདུག བུ་འཁྲིད་དཀར་པོ་ཆེ་ལགས་ཐོག་མར་ས་གནས་འཐུས་མིར་ལངས་སྐབས། བཙན་བྱོལ་དུ་ཡོད་པའི་བོད་མིའི་མི་རབས་གསུམ་པ་ཞིག་ཡིན་པའི་ཆ་ནས་ཚོར་བ་དེ་དམིགས་བསལ་ཤུགས་ཆེན་པོ་ཡོད་སྐོར་བརྗོད་ཡོད་པ་རེད།

ཁོང་མོ་ནི་བལ་ཡུལ་ནང་བཙན་བྱོལ་དུ་ཡོད་པའི་བོད་མིའི་ཁྱིམ་ཚང་ཞིག་ཏུ་སྐྱེས་ཤིང་། གཞི་རིམ་སློབ་གྲྭ་རྒྱ་གར་ནང་ཐོན་ཡོད་པ་དང་། དགུང་ལོ་ ༡༨ སྟེང་ཁེ་ན་ཌའི་ནང་སྐྱབས་བཅོལ་དུ་འབྱོར་ཏེ་སློབ་ཆེན་འགྲིམས།  ཊོ་རོན་ཊོ་གཙུག་ལག་སློབ་གཉེར་ཁང་དུ་སྤྱི་དམངས་འཕྲོད་བསྟེན་ཐོག་ཉེ་བའི་གཙུག་ལག་རབ་འབྱམས་པ་ཐོན་པ་མ་ཟད། དབྱིན་ཇིའི་ཁོ་ལོམ་བྷི་ཡ་གཙུག་ལག་སློབ་གཉེར་ཁང་ (Columbia University) ནས་དངོས་ཁམས་ཚན་རིག་ཐོག་རིག་གནས་རབ་འབྱམས་པ་ཐོན།  ད་ལྟའི་ཆར་ (Ryerson University) གཙུག་ལག་སློབ་གཉེར་ཁང་དུ་སྤྱི་དམངས་འཕྲོད་བསྟེན་སྲིད་བྱུས་སྐོར་ལ་འབུམ་རམས་པའི་སློབ་སྦྱོང་གནང་།

གསར་འགོད་པ། བསྟན་འཛིན་ཕུར་བུ།