དྷ་ས་ས་གནས་མགོ་འཛིན་ལས་ཁུངས་ཀྱི་རོགས་ཚོགས་དྲུང་ཡིག་ཟུར་པ་དཀོན་མཆོག་མིག་དམར་ལགས་སུ་འོས་གྲངས་ ༡༡༤༩ ཐོབ་སྟེ་དྷ་ས་ས་གནས་མགོ་འཛིན་དུ་བདམས་ཐོན་བྱུང་འདུག
དྷ་ས་ས་གནས་མགོ་འཛིན་དཀོན་མཆོག་མིག་དམར། དུས་བབ་ཀྱི་པར།
དེ་རིང་དྷ་ས་ས་གནས་འོས་བསྡུ་ལས་ཁུངས་ཀྱིས། ཁ་སང་ཕྱི་ཚེས་ ༠༣ ཉིན་བསྡུས་པའི་དྷ་ས་ས་གནས་མགོ་འཛིན་གྱི་དངོས་གཞིའི་འོས་བསྡུའི་ཁྲོད་ནས། དྷ་ས་ས་གནས་མགོ་འཛིན་ལས་ཁུངས་ཀྱི་རོགས་ཚོགས་དྲུང་ཡིག་ཟུར་པ་དཀོན་མཆོག་མིག་དམར་ལགས་སུ་འོས་གྲངས་ ༡༡༤༩ དང་། ས་གནས་མགོ་འཛིན་ལས་ཐོག་ཀུན་དགའ་ཚེ་རིང་ལགས་སུ་འོས་གྲངས་ ༦༩༠ ཐོབ་སྟེ། དཀོན་མཆོག་མིག་དམར་ལགས་དྷ་ས་ས་གནས་མགོ་འཛིན་གསར་པར་བདམས་ཐོན་བྱུང་ཡོད་འདུག
བདམས་ཐོན་ས་གནས་མགོ་འཛིན་དཀོན་མཆོག་མིག་དམར་ལགས་ཀྱིས་འདི་གའི་གསར་འགོད་པར། དྷ་ས་ས་གནས་མགོ་འཛིན་གྱི་འོས་བསྡུའི་ནང་མི་མང་གིས་ང་ལ་འོས་ཚད་མཐོན་པོ་འཕངས་པ་དེ་ལ་དགའ་པོ་ཞེ་དྲག་བྱུང་། དེར་བརྟེན་ངས་བརྒྱུད་ལམ་འདིིའི་ཐོག་ནས་ང་ལ་རྒྱབ་སྐྱོར་གནང་མཁན་དང་། འོས་བསྡུའི་ནང་མཉམ་ཞུགས་གནང་མཁན་གྱི་དྷ་རམ་ས་ལ་ས་གནས་མི་མང་ཚང་མ་ལ་སྙིང་ཐག་པ་ནས་ཐུགས་རྗེ་གནང་ཞུ་རྒྱུ་དང་། ང་རང་ངོས་ནས་ས་གནས་མི་མང་གི་དཀའ་ངལ་གྱི་ཆེད་དུ་ལས་ཀ་གང་འདྲ་ཞིག་བྱེད་དགོས་ཀྱི་ཡོད་ནའང་རེད། མི་གང་འདྲ་ཞིག་ཐུག་དགོས་བྱུང་ནའང་། དེ་ངས་བརྒྱ་ཆ་བརྒྱ་ནས་བརྒྱ་ཏན་ཏན་བྱེད་ཀྱི་ཡིན་ཞེས་དེ་རིང་ངས་ཁས་ལེན་ཞུ་ཐུབ་ཀྱི་འདུག ཅེས་བརྗོད་བྱུང་།
དཀོན་མཆོག་མིག་དམར་ནི་བོད་མངའ་རིས་ཁུལ་ནས་ཡིན་ཞིང་། ཕྱི་ལོ་ ༡༩༩༧ ལོར་རྒྱ་གར་དུ་འབྱོར་སྟེ་དྷ་སའི་ཉེ་འཁྲིས་སུ་ཡོད་པའི་གོ་པར་པུར་བོད་ཕྲུག་ཁྱིམ་སྡེ་སློབ་གྲྭ་འགྲིམས་ཏེ་ཕྱི་ལོ་ ༢༠༠༩ ལོར་སློབ་མཐར་སོན། ཕྱི་ལོ་ ༢༠༡༢ ལོར་ལྡི་ལི་གཙུག་ལག་སློབ་གྲྭ་ནས་སྲིད་དོན་རིག་པའི་ཐོག་ལ་རབ་འབྱམས་པའི་བསླབ་པ་མཐར་སོན་གྱིས། ཕྱི་ལོ་ ༢༠༡༧ ལོར་དྷ་སར་རྟེན་གཞི་བྱས་པའི་བོད་ཀྱི་ཐེབས་རྩའི་ནང་ལོ་གཅིག་ཙམ་རིང་ལས་ཀ་བྱས་ཤིང་། ཕྱི་ལོ་ ༢༠༡༨ ནས་ཉེ་ཆར་བར་དྷ་ས་ས་གནས་མགོ་འཛིན་ལས་ཁུངས་སུ་རོགས་ཚོགས་ཀྱི་དྲུང་ཡིག་གི་ལས་འཁུར་ཞུས་ཡོད་འདུག
གསར་འགོད་པ། པ་སངས་ཚེ་རིང་།
