སྲིད་སྐྱོང་མཆོག་གིས་ཀོ་ལི་གྷལ་དོན་ལྡན་གླིང་དུ་འཚམས་གཟིགས་གནང་བཞིན་པ།

ཕྱི་ཟླ་ ༥ ཚེས་ ༢༨ ནས་ཟླ་འདིའི་ཕྱི་ཚེས་ ༡༢ བར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་ལྷོ་ཕྱོགས་ཁུལ་གྱི་བཙན་བྱོལ་བོད་མིའི་གཞིས་ཆགས་ཁག་ཏུ་གཞུང་འབྲེལ་འཚམས་གཟིགས་གནང་བཞིན་ཡོད་པ་ལྟར་དེ་རིང་ཕྱི་ཚེས་ ༦ ཉིན་ཀོ་ལི་གྷལ་དོན་ལྡན་གླིང་དུ་ཕེབས་འདུག

Sikyong’s arrival at Kollegal Dhondeling Tibetan settlement after concluding Hunsur visit, 6 June 2022.

དེ་རིང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་རྒྱ་གར་ལྷོ་ཕྱོགས་ཀྱི་ཀོ་ལི་གྷལ་དོན་ལྡན་གླིང་གཞིས་ཆགས་སུ་ཕེབས་འབྱོར་གྱིས་རྫོགས་ཆེན་དགོན་དང་ས་སྐྱ་དགོན་པ། སེར་སྨད་ཟེ་ཕུག་དགོན་པ། སྔ་འགྱུར་སྟག་གཤམ་ཨོ་རྒྱན་བསམ་གཏན་ཆོས་གླིང་། བཀྲ་ཤིས་དར་རྒྱས་དགོན་པ། རྟ་རྣ་དགོན་སོགས་སུ་འཚམས་གཟིགས་གནང་ཡོད་འདུག

ཁ་སང་ཕྱི་ཚེས་ ༥ ཉིན་སྲིད་སྐྱོང་སྤེན་པ་ཚེ་རིང་མཆོག་གིས་ཧོན་སུར་ས་གནས་ཀྱི་ལས་སྣེ་རྣམ་པ་དང་། སེར་སྐྱ་མང་ཚོགས་རྣམས་ལ་སྐབས་ ༡༦ པའི་བཀའ་ཤག་གི་སྲིད་ཇུས་ལངས་ཕྱོགས་འགྲེལ་བརྗོད་གནང་བ་དང་། བོད་ནང་གི་ཛ་དྲག་གི་གནས་སྟངས། བཙན་བྱོལ་བོད་མི་རྣམས་གཅིག་སྒྲིལ་གྱིས་བོད་ཀྱི་ཆོས་རིག་འཛིན་སྐྱོང་སྤེལ་གསུམ་ཐོག་ཧུར་བརྩོན་དགོས་པ། དེ་བཞིན་དབུ་མའི་ལམ་གྱི་སྲིད་ཇུས་འོག་ཤར་སྐྱོད་ཀྱིས་གྲོལ་མོལ་གྱི་ལམ་ནས་བོད་མིའི་མངོན་འདོད་སྒྲུབ་ཐབས་བྱེད་བཞིན་ཡོད་སྐོར་སོགས་གསུངས་ཡོད་འདུག དེ་ནས་ཉིན་རྒྱབ་ཏུ་རྒྱུད་སྨད་གྲྭ་ཚང་དང་ཆོས་འཁོར་མཆོད་རྟེན་སོགས་ལ་ཕེབས་ཡོད་འདུག་ལ། ཕྱི་ལོ་ ༢༠༢༢ ལོའི་ལྷོ་ཕྱོགས་རྐང་སྤོལ་འགྲན་སྡུར་གྱི་ཉིན་མཐའ་མའི་སྐབས་སྐུ་མགྲོན་གཙོ་བོར་གདན་ཞུ་ལྟར་ཕེབས་ཡོད་འདུག

Sikyong addresses the community members of Rabgyaling settlement at a reception and felicitation hosted this morning honouring the Sikyong’s maiden visit.

ཟླ་འདིའི་ཕྱི་ཚེས་ ༤ ཉིན་ཧོན་སུར་གཞིས་ཆགས་ཀྱི་རྒྱུད་སྨད་གྲྭ་ཚང་དང་རྒྱུད་སྨད་གངས་ཅན་རིག་གནས་སློབ་གྲྭར་འཚམས་གཟིགས་གནང་སྟེ། ནང་ཆོས་དང་རིགས་ལམ། བོད་ཀྱི་སྐད་ཡིག་ཐོག་དབྱར་ཁའི་ཟབ་སྦྱོང་ནང་མཉམ་ཞུགས་གནང་མཁན་ཧོན་སུར་རབ་རྒྱས་གླིང་དང་ཀོ་ལི་གྷལ་དོན་ལྡན་གླིང་སམ་བྷོ་ཊའི་དགེ་ལས་སློབ་ཕྲུག་རྣམས་ལ་གསུང་བཤད་གནང་། དེ་བཞིན་སྲིད་སྐྱོང་མཆོག་གིས་ཧོན་སུར་གཞིས་ལས་ཁང་སོགས་ལས་ཁུངས་ཁག་དང་དགོན་སྡེ། སྨན་ཁང་། སློབ་གྲྭ། རྒས་གསོ་གླིང་སོགས་སུ་འཚམས་གཟིགས་གནང་ཡོད་འདུག

Sikyong Penpa Tsering addressing the faculty and students of TCV Bylakuppe school.

ཟླ་འདིའི་ཕྱི་ཚེས་ ༡ དང་ ༢ ཉིན་སྦེལ་ཀོབ་བདེ་སླར་སཾ་བྷོ་ཊ་སི་ཝི་པི་ (CVP) ཉིན་སློབ་ཏུ་འཚམས་གཟིགས་དང་འབྲེལ་རྐང་རྩེད་སྤོ་ལོའི་རྩེད་ཐང་དང་། ཚན་རིག་སྐྱེད་ཚལ་ཞིག་དབུ་འབྱེད་གནང་ཡོད་པ་མ་ཟད། བདེ་སླར་གཞིས་གྲོང་ཁག་བཅུ་གསུམ་དང་། ས་གནས་འགོ་འཛིན་ལས་ཁུངས། ས་གནས་རང་བདེན་ཚོགས་ཆུང། མཉམ་འབྲེལ་དང་སྡེ་ཚན་ཁག་གི་ལས་ཁུངས། དེ་བཞིན་ལུགས་བསམ་གཞིས་གྲོང་ ༥ དང་ ༦ སོགས་ལ་འཚམས་གཟིགས་གནང་། ཕྱི་ཚེས་ ༢ ཉིན་སྐྱེ་ལྡན་སོ་ནམ་ཉམས་ཞིབ་དང་སྦྱོང་བརྡར་ཁང་དང་། སྦེལ་ཀོབ་རྒས་གསོ་ཁང་། སྦེལ་ཀོབ་མ་དགོན་ཐེག་ཆེན་གླིང་དགོན་པར་ཕེབས་ཡོད་འདུག

Sikyong Penpa Tsering addressing the Tibetans in Bylakuppe.

ཕྱི་ཟླ་ ༥ ཚེས་ ༢༨ ནས་བཟུང་བོད་མིའི་སྒྲིག་འཛུགས་ཀྱི་སྲིད་སྐྱོང་མཆོག་གི་ལྷོ་ཕྱོགས་ཀར་ན་ཊ་ཀ་ཁུལ་གྱི་འཚམས་གཟིགས་དབུ་འཛུགས་གནང་ཡོད་པ་ལྟར། ཐོག་མར་བྷང་ལོར་ཁུལ་གྱི་སློབ་གྲྭ་དང་མི་མང་སོགས་སུ་ཐུག་འཕྲད་གསུང་བཤད་གནང་ཡོད་པ་དང་། ཚེས་ ༣༠ ཉིན་ཀར་ན་ཊ་ཀ་མངའ་སྡེའི་སྤྱི་ཁྱབ་བློན་ཆེན་སྐུ་ཞབས་ (Shri Basavaraj Bommai) དང་། ཀར་ན་ཊ་ཀའི་མངའ་གཞུང་གི་ཁྱུར་ལ་ཉེ་བའི་སྤྱི་ཁྱབ་དྲུང་ཆེ་སྐུ་ཞབས་ (Shri P Ravi Kumar) ལགས་རྣམ་གཉིས་དང་མཇལ་འཕྲད་གནང་ཡོད་པ་རེད། ཕྱི་ཚེས་ ༣༡ ཉིན་ནས་སྲིད་སྐྱོང་གིས་རྒྱ་གར་ལྷོ་ཕྱོགས་སྦེལ་ཀོབ་ལུགས་ཟུང་བསམ་གྲུབ་གླིང་དུ་ཕེབས་འབྱོར་བྱུང་སྟེ། ས་གནས་ཀྱི་དགོན་པ་གྲྭ་ཚང་ཁག་དང་སློབ་གྲྭ། གྲོང་སྡེ་བཅས་ཀྱི་ནང་དུ་གཟིགས་སྐོར་གནང་ཡོད་པ་རེད།

གསར་འགོད་པ། བསྟན་འཛིན་ཕུར་བུ།