སེང་གྷ་པུར་དུ་ཤང་རི་ལ་འབྲེལ་མོལ་(Shangri-La Dialogue) ཞེས་པའི་ཨེ་ཤ་ཡའི་བདེ་འཇགས་ལྷན་ཚོགས་ཐོག་བོད་དང་ཤིན་ཅང་སོགས་ཀྱི་གནད་དོན་གླེང་སློང་གནང་འཆར་ཡོད་སྐོར་འབྲེལ་ཡོད་ཅིག་གིས་བརྗོད་འདུག
ཟླ་འདིའི་ཕྱི་ཚེས་ ༡༠ ནས་ ༡༢ བར་སེང་གྷ་པུར་དུ་ཤང་རི་ལ་འབྲེལ་མོལ་(Shangri-La Dialogue) ཞེས་པའི་(IISS Asia Security Summit)ཨེ་ཤ་ཡའི་བདེ་འཇགས་ལྷན་ཚོགས་བསྡུ་རྒྱུ་ཡིན་པ་དང་། ལྷན་ཚོགས་དེའི་ཐོག་ཨ་རི་དང་རྒྱ་ནག རྒྱ་གར། ཁེ་ན་ཌ། ལྷོ་ཀོ་རི་ཡ། དེ་བཞིན་ཡུ་རོབ་ཀྱི་རྒྱལ་ཁབ་ཁག་བཅས་ཁྱོན་འཛམ་གླིང་ཤར་ནུབ་ཀྱི་རྒྱལ་ཁབ་ ༢༨ ཙམ་མཉམ་ཞུགས་བྱེད་ཀྱི་ཡོད་འདུག་ལ། ལྷན་ཚོགས་ཐོག་བྱང་ཀོ་རི་ཡ་དང་ཨེ་རན་(Iran) ནང་རྡུལ་མཚོན་གྱི་འཇིགས་སྐུལ་བྱུང་བཞིན་ཡོད་པ་དང་། ཨ་རི་དང་དེའི་མཐུན་ཕྱོགས་རྒྱལ་ཁབ་སོགས་ཀྱི་སྐོར་ལ་གླེང་སློང་བྱ་རྒྱུ་ཡིན་འདུག ལྷན་ཚོགས་ཀྱི་འབྲེལ་ཡོད་ཅིག་གིས་བརྗོད་པ་ལྟར་ན། ཐེངས་འདིའི་ལྷན་ཚོགས་ཐོག་རྒྱ་ནག་གི་རྒྱལ་སྲུང་བདེ་འཇགས་བློན་ཆེན་ཝེ་ཧྥུང་ཧེ་ (Wei Fenghe) དང་ཨ་རིའི་རྒྱལ་སྲུང་བདེ་འཇགས་བློན་ཆེན་ (Lloyd Austin) གཉིས་དངོས་སུ་ཐུག་འཆར་ཡོད་སྐོར་དང་། ད་ལན་གྱི་ལྷན་ཚོགས་ཐོག་ཐའེ་ཝན་དང་ཧོང་ཀོང་། བོད། ཤིན་ཅང་། གོ་ལའི་གནད་དོན་ཐད་གླེང་སློང་བྱ་འཆར་ཡོད་སྐོར་བརྗོད་འདུག
སེང་གྷ་པུར་རྟེན་གཞི་བྱས་ཡོད་པའི་ (Nanyang Technological University) མཐོ་རིམ་སློབ་གཉེར་ཁང་གི་སློབ་དཔོན་ལི་ཆི་ཧོན (Lee Chih-Horng)གྱིས། ཕྱི་ཟླ་ ༥ པའི་ནང་ཨ་རིའི་སྲིད་འཛིན་བྷའེ་ཌིན་མཆོག་གིས། རྒྱ་ནག་གིས་ཐའེ་ཝན་ལ་བཙན་འཛུལ་བྱས་ཚེ་ཨ་རིའི་གཞུང་ནས་ཐའེ་ཝན་ལ་རྒྱབ་སྐྱོར་བྱེད་ཀྱི་ཡིན་སྐོར་བརྗོད་པར་བརྟེན། རྒྱ་ནག་གཞུང་གིས་གནད་དོན་དེའི་ཐད་ཁ་གསལ་བཟོ་རྒྱུ་ཡིན་འདུག དེ་ཡང་ཨ་རིའི་གཞུང་ནས་ཐའེ་ཝན་ལ་རྒྱབ་སྐྱོར་དང་ཐའེ་ཝན་གྱི་ཡོང་ལ་ཉེ་བའི་འོས་བསྡུའི་ནང་དམངས་གཙོ་ཚོགས་པར་རྒྱལ་ཁ་ཐོབ་རྒྱུའི་དམིགས་ཡུལ་ཡོད་པ་རེད། འོན་ཀྱང་རྒྱ་ནག་གཞུང་ལ་ཆ་མཚོན་ན། དེའི་རྐྱེན་གྱིས་འགྱུར་ལྡོག་གསར་པ་བྱུང་སྟེ་ཆབ་སྲིད་ཀྱི་དཀའ་ངལ་འཕྲད་པའི་སེམས་འཚབ་བྱེད་བཞིན་ཡོད་སྐོར་བརྗོད་འདུག
ཆབ་སྲིད་ཚན་རིག་གི་སློབ་དཔོན་ནི་ལི་ཞོང་(Ni Lexiong)གིས། ཨུ་རུ་སུ་དང་ཡུ་ཀེ་རེན་གྱི་དབར་ལ་དམག་འཁྲུག་བྱུང་བཞིན་པ་དེས་དེང་དུས་ཀྱི་དམག་འཁྲུག་བྱུང་ན་མཇུག་འབྲས་ངན་པ་ཡོང་གི་ཡོད་སྐོར་དང་། འཛམ་གླིང་གི་སྟོབས་ཤུགས་ཆེ་བའི་རྒྱལ་ཁབ་ཨ་རི་དང་རྒྱ་ནག་གཉིས་ཀྱིས་ཐའེ་ཝན་གྱི་དོན་དུ་དམག་བརྒྱབ་ན་རྐྱེན་ཆག་འབྱུང་ངེས་ཡིན་སྐོར་བརྗོད་འདུག རྒྱ་ནག་གི་ཕྱི་སྲིད་བློན་ཆེན་ཝང་ཡས་(Wang Yi)ཀྱིས། ཨ་རྒྱ་གཉིས་ཀྱི་འབྲེལ་ལམ་ཇེ་སྡུག་ཏུ་འགྲོ་རྒྱུ་མིན་པ་དང་། འོས་འཚམ་ཅན་གྱི་ཐག་གཅོད་བྱ་དགོས་ཀྱི་ཡོད་པ་རེད། ཅེས་བརྗོད་ཡོད་འདུག
རྒྱལ་ཁབ་ཁག་གི་བདེ་འཇགས་དང་འབྲེལ་ལམ་ཡར་རྒྱས་ཆེད་ཕྱི་ལོ་ ༢༠༠༢ ནས་བཟུང་ལོ་ལྟར་ལྷན་ཚོགས་དེ་བསྡུ་ཡི་ཡོད་ཅིང་། ཚོགས་ཐོག་ཏུ་ཚོགས་ཞུགས་རྒྱལ་ཁབ་ཁག་གི་བདེ་འཇགས་བློན་ཆེན་རྣམས་མཉམ་ཞུགས་གནང་དགོས་ཀྱི་ཡོད་འདུག ཡིན་ནའང་། ཕྱི་ལོ་ ༢༠༢༠ དང་ ༢༠༢༡ ལོར་ཏོག་དབྱིབས་རྐྱེན་གྱིས་བསྡུ་ཐུབ་མེད་འདུག
གསར་འགོད་པ། བསྟན་འཛིན་ཕུར་བུ།
