རྒྱ་ནག་ནང་ཆུ་ལོག་གི་དཀའ་ངལ་ཤུགས་ཆེན་འཕྲད་ཀྱི་འདུག

རྒྱ་ནག་གི་དབུས་དང་ལྷོ་ཕྱོགས་ཀྱི་ས་ཁུལ་ཁག་ཅིག་གི་ནང་དུ་ཆུ་ལོག་དང་ས་རུད་སོགས་འབྱུང་བའི་གོད་ཆག་བྱུང་སྟེ་མི་རྒྱུ་གཉིས་ལ་དཀའ་ངལ་ཤུགས་ཆེན་འཕྲད་ཀྱི་ཡོད་འདུག

CORRECTS TOWN – Flood waters sweep through the ancient town of Feng Huang in central China’s Hunan province, Saturday, June 4, 2022. State media reported some deaths and missing in flooding in the province. (AP Photo) (Uncredited/AP)

རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་ཐོན་པ་ལྟར་ན། ཁ་སང་རྒྱ་ནག་གི་དབུས་ཧའོ་ནན་ཞིང་ཆེན་ནང་ཆུ་ལོག་བརྒྱུགས་ཏེ། ཁྱིམ་ཚང་ ༢༧༠༠ ལྷག་གི་ཁང་པར་གཏོར་བཤིག་ཐེབས་པ་དང་། ད་སྔ་བར་མི་གྲངས་ ༡༠ འདས་གྲོངས་དང་མི་ ༣ བོར་བརླག་ཏུ་ཕྱིན་ཡོད་པ་མ་ཟད། ད་དུང་ཡང་མྱུར་སྐྱོབ་རུ་ཁག་གིས་འཚོལ་ཞིབ་ཀྱི་བྱ་བ་མུ་མཐུད་སྤེལ་བཞིན་ཡོད་པ་དང་། ད་བར་ཆུ་ལོག་དེའི་ཁྲོད་གྲོང་གསེབ་ཀྱི་མི་མང་ས་ཡ་ ༡།༨ ཙམ་གྱི་འཚོ་གནས་ལ་གནོད་ཤུགས་ཐེབས་པ་དང་མི་གྲངས་ ༢༨༦༠༠༠ ལྷག་གནས་སྤོར་བྱ་དགོས་བྱུང་ཡོད་འདུག

དེ་བཞིན། དེ་རིང་སྔ་དྲོར་རྒྱ་ནག་གི་ལྷོ་ཕྱོགས་ཀན་ཤི་ས་ཁུལ་དུ་རི་ཉིལ་ས་རུད་བྱུང་སྟེ་ཤེས་རྟོགས་བྱུང་བ་ལྟར་ན། ད་སྔ་བར་བུད་མེད་ཅིག་འདས་གྲོངས་སུ་ཕྱིན་པ་གཏན་འཁེལ་བྱུང་ཡོད་པ་དང་། ད་ལྟ་མྱུར་སྐྱོབ་རུ་ཁག་གིས་གསོན་གནས་ཐུབ་པའི་མི་ག་ཚོད་ཅིག་ཡོད་མེད་མུ་མཐུད་འཚོལ་ཞིབ་བྱེད་ཀྱི་ཡོད་འདུག་ལ། ཟླ་འདིའི་མགོ་ནས་བཟུང་ཧའོ་ནན་ཞིང་ཆེན་ནང་རླུང་འཚུབ་དྲག་པོ་གཡུགས་པ་དང་ལོ་རྒྱུས་ནང་འབབ་མ་མྱོང་བའི་ཆར་བ་སོགས་བབས་པར་བརྟེན། མི་རྒྱུ་གཉིས་ལ་དཀའ་ངལ་ཤུགས་ཆེན་བཟོས་ཡོད་པ་རེད།

ད་རེས་རྒྱ་ནག་དབུས་དང་ལྷོ་ཕྱོགས་ཀྱི་ས་ཁུལ་ཁག་ཏུ་འབྱུང་བའི་གོད་ཆག་བྱུང་བཞིན་པའི་གནད་དོན་དང་འབྲེལ་ནས། རྒྱ་ནག་གཞུང་གིས་ཀན་ཤི་གྲོང་ཁྱེར་གྱི་གཙོས་ཅཱང་ཤི་(Jiangxi)དང་ ཧྥོ་ཇེན་(Fujian)། གཱང་ཌཱོན་ (Guangdong)། ཧེ་ནན་ (Hainan)། སི་ཁྲིན། ཡུ་ནན། ཞི་ཧྥ་ (Xinhua) སོགས་སུའང་ཆར་བ་ཤུགས་ཆེན་འབབ་རྒྱུ་ཡིན་པའི་ཉེན་བརྡ་བཏང་ཡོད་པ་རེད་ལ།

རྒྱ་ནག་གཞུང་གིས་ཆུ་ལོག་གི་ཉེན་ཁ་སྲུང་སྐྱོབ་དང་ཆུ་གློག་གི་ལས་གཞིའི་སྟེང་འགྲོ་གྲོན་ཤུགས་ཆེན་བཏང་སྟེ། ཡར་ཀླུང་གཙང་པོའི་ཆུ་རྒྱུན་དུ་ཆུ་མཛོད་ཆེན་པོ་གསུམ་བརྒྱབ་ཡོད་ཀྱང་། འདས་པའི་ལོ་མང་རིང་དབྱར་ཁའི་སྐབས་སུ་རྒྱ་ནག་གི་ལྷོ་དང་དབུས་ཁུལ་དུ་ཆུ་ལོག་གི་གོད་ཆག་མང་པོ་བྱུང་ཡོད་པ་དང་། ཕྱི་ལོ་ ༡༩༩༨ ལོར་ཡར་ཀླུང་གཙང་པོའི་ཆུ་རྒྱུན་དུ་ཆགས་པའི་མི་གྲངས་ ༢༠༠༠ ལྷག་འདས་གྲོངས་དང་མི་མང་ས་ཡ་ ༣ ལྷག་གི་སྡོད་གནས་མེད་པར་བཟོས་ཏེ། སྐབས་དེའི་ཆུ་ལོག་དེ་ནི་རྒྱ་ནག་གི་ལོ་རྒྱུས་ནང་ཆེས་འཇིགས་སུ་རུང་བའི་ཆུ་ལོག་ཅིག་ལ་ངོས་འཛིན་བྱས་ཡོད་པ་རེད།

ཡང་འདས་ལོར་ཏོག་དབྱིབས་གཉན་རིམས་ཀྱི་དཀའ་ངལ་ཐོག རྒྱ་ནག་དབུས་ས་ཁུལ་ (Zhengzhou)ནང་ཆུ་ལོག་བརྒྱུགས་ཏེ་མི་གྲངས་ ༢༥ འདས་གྲོངས་དང་མི་མང་ཁྲི་ ༢༠ ལྷག་གནས་སྦོར་དགོས་བྱུང་བའི་གནས་ཚུལ་བྱུང་ཡོད་ཀྱང་། ཕྱིས་སུ་སྤྱི་ཚོགས་བརྒྱུད་ལམ་ཁག་ཏུ་པར་རིས་སོགས་བཀྲམ་པའི་ནང་། སྲང་ལམ་དུའང་ཆུ་ལུག་ཆེན་པོ་བརྒྱུགས་ཏེ་མང་ཚོགས་དཀྱུས་མ་རྣམས་ཆུ་ཆེན་བརྒལ་ནས་ལས་ཀར་འགྲོ་བ་དང་ཉིན་རེའི་འཚོ་བའི་ཕྱིར་དུ་བསྐྱོད་ཀྱི་ཡོད་པ་སོགས་མཐོང་རྒྱུ་བྱུང་བ་མ་ཟད། ཉམས་ཞིབ་པ་ཚོས་རྒྱ་ནག་གཞུང་གིས་བསྒྲགས་པའི་གྲངས་འབོར་དག་ལ་ནམ་ཡང་ཡིད་ཆེས་བྱ་རྒྱུ་མེད་སྐོར་བརྗོད་འདུག

གསར་འགོད་པ། སྐལ་བཟང་སྦྱིན་པ།