རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་ལྕམ་སྐུ་མི་ཤེལེ་བྷཤེ་ལེཌི་ལགས་ཀྱིས་ཉིན་གྲངས་དྲུག་རིང་རྒྱ་ནག་ནང་སྐོར་སྐྱོད་བྱས་ཡོད་ཀྱང་འགྲོ་བ་མིའི་ཐོབ་ཐང་གི་གནད་དོན་གླེང་སློང་བྱས་མེད་རྐྱེན་ཁོང་མོས་ལས་གནས་ནས་དགོངས་པ་ཞུ་དགོས་པའི་བསྒྲགས་གཏམ་སྤེལ།
རྒྱལ་སྤྱིའི་འགྲོ་བ་མིའི་ཐོབ་ཐང་ཚན་པ་མང་པོ་ཞིག་གིས་ལྕམ་སྐུ་མི་ཤེལེ་བྷཤེ་ལེཌི་(Michelle Bachelet)ཡིས། རྒྱ་ནག་གཞུང་གིས་འགྲོ་བ་མིའི་ཐོབ་ཐང་རྡོག་རོལ་གཏོང་མུས་ཡིན་པའི་ཐད་ལ་གླེང་སློང་བྱས་མེད་སྟབས། ཁོང་མོས་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་ནས་དགོངས་པ་ཞུ་དགོས་པའི་རེ་འདུན་བཏོན་འདུག
བསྒྲགས་གཏམ་དེའི་ནང་། རྒྱལ་ཚོགས་ཀྱི་འགྲོ་བ་མིའི་ཐོབ་ཐོང་གི་འགན་འཛིན་ལྕམ་སྐུ་མི་ཤེལེ་བྷཤེ་ལེཌི་(Michelle Bachelet) ལགས་ཀྱིས་འདི་ལོའི་ཕྱི་ཟླ་ ༥ ཚེས་ ༢༣ ནས་ ༢༨ བར་ཉིན་གྲངས་དྲུག་རིང་། རྒྱ་ནག་གཞུང་གི་མགོ་ཁྲིད་ཚོ་དང་ཐུག་ཕྲད་སོགས་བྱས་ཡོད་པ་ལྟར། ཟླ་འདིའི་ཕྱི་ཚེས་ ༨ ཉིན་ལྕམ་སྐུ་མི་ཤེལེ་བྷཤེ་ལེཌི་(Michelle Bachelet) ལགས་ཀྱིས་རྒྱ་ནག་གཞུང་གི་འགྲོ་བ་མིའི་ཐོབ་ཐང་རྡོག་རོལ་དུ་གཏོང་མུས་ཡིན་པ་སྣང་མེད་དུ་བཞག་ཡོད་སྟབས། ཡུ་གུར་བ་དང་བོད་པ། ལྷོ་སོག རྒྱ་རིགས་དམངས་གཙོ་དོན་གཉེར་བ་སོགས་ཚོགས་སྡེ་ཁག་ ༢༣༠ ཡིས་ཁོང་མོས་མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་ནས་དགོངས་པ་ཞུ་དགོས་པའི་བསྒྲགས་གཏམ་སྤེལ་ཡོད་པ་དང་སྦྲགས། རྒྱལ་ཚོགས་ཀྱིས་ཡུ་གུར་སོགས་ཀྱི་ནང་དུ་འགྲོ་མིའི་ཐོབ་ཐང་རྡོག་རོལ་གཏོང་མུས་ཡིན་པའི་སྙན་ཐོ་འདོན་དགོས་པ་མ་ཟད། རྒྱལ་ཚོགས་ཀྱི་སྤྱི་ཁྱབ་དྲུང་ཆེ་མཆོག་གིས། མི་ཤེལེ་བྷཤེ་ལེཌི་ལགས་ཀྱིས་གཞུང་འབྲེལ་འཚམས་གཟིགས་སུ་བསྐྱོད་པའི་སྙན་ཐོ་འདོན་སྤེལ་བྱེད་པར་དུས་འགྱངས་གཏན་ནས་བྱ་མི་ཉན་པའི་འབོད་སྐུལ་ཞུས་འདུག
ཡང་བསྒྲགས་གཏམ་ནང་། མཉམ་འབྲེལ་རྒྱལ་ཚོགས་ཀྱི་འགྲོ་བ་མིའི་ཐོབ་ཐང་གི་འགན་འཛིན་ལྕམ་མིཤེལེ་བྷཤེ་ལེཌི་ལགས་བོད་ནང་དུ་འགྲོ་སྐྱོད་བྱེད་ཐུབ་མེད་ཅིང་། འཚམས་གཟིགས་སྐབས་གྱི་ཉིན་མཐའ་མའི་གསལ་འགོད་གསལ་བསྒྲགས་སྟེང་། བོད་དོན་སྐོར་ལ་གནད་བསྡུས་དང་ཡོངས་གྲགས་ཙམ་ཞིག་གླེང་སློང་གནང་ཡོད་ཀྱང་། ཉེ་ལམ་རྒྱ་ནག་གཞུང་གིས་གོ་རིམ་ལྡན་པའི་ཐོག་ནས་བོད་ཀྱི་སྐད་ཡིག་དང་བོད་མིའི་ངོ་བོ་རྩ་གཏོར་གཏོང་ཐབས་སྔར་ལས་ལྷག་པར་བྱེད་མུས་ཡིན་པའི་སྐོར་སོགས་གླེང་སློང་གནང་མེད་པ་མ་ཟད། ཁོང་མོས་རྒྱ་ནག་གཞུང་གིས་བཅད་བགོས་བྱས་པའི་བོད་རང་སྐྱོང་ལྗོངས་ཟེར་བ་གཅིག་པུ་མིང་འདོན་བྱས་པ་ལས། བོད་ཁུལ་གཞན་རྣམས་སྣང་མེད་དུ་བཞག་ཡོད་སྐོར་སོགས་འཁོད་འདུག
གཞན་ཡང་ཉིན་གྲངས་དྲུག་རིང་གི་གཟིགས་སྐོར་ཁྲོད། ཁོང་མོས་རྒྱ་ནག་གཞུང་གིས་ཤར་ཏུར་ཀི་སི་ཐན་ནང་དུ་མི་རིགས་རྩ་མེད་གཏོང་བའི་གནད་དོན་ཚུད་པའི་འགྲོ་བ་མིའི་ཐོབ་ཐང་རྡོག་རོལ་གཏོང་མུས་ཡིན་པའི་གནད་དོན་བཅས་ཀྱི་ཐད་ལ་གླེང་སློང་བྱས་ཐུབ་མེད་པ་དང་། དེ་བཞིན་ཧོང་ཀོང་གི་ནང་དུ་འགྲོ་སྐྱོད་བྱས་མེད་པ་མ་ཟད། རྒྱ་ནག་གཞུང་གིས་ཕྱི་ལོ ༢༠༡༩ ཙམ་ནས་ཧོང་ཀོང་ནང་གི་འགྲོ་བ་མིའི་ཐོབ་ཐང་དང་དམངས་གཙོའི་ལམ་ལུགས་བཅས་ལ་རྡོག་རོལ་དུ་གཏོང་མུས་ཡིན་པའི་སྐོར་དང་། རྒྱ་ནག་གཞུང་གིས་ལྷོ་སོག་གི་ངོ་བོ་རྩ་མེད་གཏོང་ཐབས་བྱེད་མུས་ཡིན་པའི་ཐད་སོགས་ལ་གླེང་སློང་བྱས་མེད་པའི་སྐོར་སོགས་འཁོད་ཡོད་འདུག
གསར་འགོད་པ། དཔལ་ལྡན།
![Uyghur Scholar Rahile Dawut [Photo: Uyghur Human Rights Project]](https://tibettimes.net/wp-content/uploads/2023/09/Uyghur-Scholar-Rahile-Dawut-Photo-Uyghur-Human-Rights-Project-360x180.jpg)
