ཁ་སང་ཕྱི་ཚེས་ ༩ ཉིན་ནས་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་ལྷོ་ཕྱོགས་མོན་གྷོ་ཁུལ་དུ་གཞུང་འབྲེལ་འཚམས་གཟིགས་གནང་མུས་ཡིན་འདུག
བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་གིས་རྒྱ་གར་ལྷོ་ཕྱོགས་བྷེལ་ཀོབ་དང་། ཧུན་སུར། ཀོ་ལི་གྷལ་སོགས་ཀྱི་གཞུང་འབྲེལ་འཚམས་གཟིགས་ལེགས་པར་གྲུབ་སྟེ། མོན་གྷོ་ཁུལ་དུ་གཟིགས་སྐོར་གནང་གི་ཡོད་པ་ལྟར། དེ་རིང་སྲིད་སྐྱོང་སྤེན་པ་ཚེ་རིང་མཆོག་མོན་གྷོ་འདོད་རྒུ་གླིང་གཞིས་ཆགས་སུ་རྟེན་གཞི་བྱས་ཡོད་པའི་རྙིང་དགོན་གསང་སྔགས་ཆོས་འཁོར་གླིང་དང་སྤུ་ཧྲེང་བཤད་འཕེལ་གླིང་གྲྭ་ཚང་། ས་དགོན་བརྩེ་ཆེན་དམ་ཆོས་གླིང་། སམ་བྷོ་ཊ་གཞི་རིམ་སློབ་གྲྭ། བཙུན་དགོན་བྱང་ཆུབ་ཆོས་གླིང་། འཕྲོད་བསྟེན་སྨན་ཁང་སོགས་སུ་གཟིགས་སྐོར་གནང་ཡོད།
དེ་བཞིན་སྲིད་སྐྱོང་མཆོག་གིས་གསར་འབྱོར་བ་རྣམས་ལ་དམིགས་ནས་ཁང་པ་གསར་རྒྱག་གི་འཛུགས་སྐྲུན་བྱེད་མུས་ཡིན་པའི་ལས་གཞིར་གཟིགས་ཞིབ་གནང་ཡོད་པ་མ་ཟད། ས་གནས་རྒས་གསོ་ཁང་དང་། སྔ་འགྱུར་རྙིང་དགོན་ནམ་མཁའ་ཁྱུང་རྫོང་། མཐོ་ལྡིང་པདྨོ་ཚལ་དགོན། འབྲི་གུང་བཀའ་བརྒྱུད་དགོན་པར་འཚམས་གཟིགས་ལེགས་པར་བསྒྲུགས་ཡོད་འདུག
ཁ་སང་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག མོན་གྷོ་འདོད་རྒུ་གླིང་གཞིས་ཆགས་སུ་ཕེབས་འབྱོར་བྱུང་སྟེ། མོན་གྷོ་གཞིས་ཆགས་སུ་རྟེན་གཞི་བྱས་ཡོད་པའི་འབྲས་སྤུངས་བློ་གསལ་བྱེ་བའི་གླིང་གྲྭ་ཚང་དང་དེའི་ཡ་གྱལ་ཚན་རིག་བསྟི་གནས་ཁང་དུ་འཚམས་གཟིགས་ཕེབས་ཡོད་འདུག ད་དུང་ཁོང་གིས་འབྲས་སྤུངས་སྒོ་མང་གྲྭ་ཚང་དང་འབྲས་སྤུངས་སྒོ་མང་སློབ་གྲྭ། འབྲས་སྤུངས་བདེ་ཡངས་གྲྭ་ཚང་། ས་སྐྱ་བརྩེ་ཆེན་མདོ་སྔགས་ཆོས་གླིང་། སྨན་རྩིས་ཁང་། རྭ་སྟོད་གྲྭ་ཚང་། སམ་བྷོ་ཊ་འབྲིང་རིམ་སློབ་གྲྭ། བཀའ་བརྒྱུད་འབོ་དཀར་ཐོས་བསམ་ནོར་གླིང་དགའ་ཚལ་སོགས་ལ་འཚམས་གཟིགས་གནང་ཡོད་འདུག གཞན་ཡང་སྲིད་སྐྱོང་མཆོག་གིས་འབྲས་སྤུངས་བླ་སྤྱི་ཚོགས་ཁང་དུ་སྒོ་བློ་གཉིས་དང་ས་སྐྱ། རྭ་སྟོད། བཀའ་དགོན། བདེ་ཡངས་གྲྭ་ཚང་བཅས་ཀྱི་དགེ་འདུན་པ་རྣམས་ལ་གསུང་བཤད་གནང་ཡོད་འདུག
གསར་འགོད་པ། བསྟན་འཛིན་ཕུར་བུ།
ལས་རིང་ཡག་པོ་གནང་འདུག བཀའ་དྲིན་ཆེ།