དེ་རིང་ས་ག་ཟླ་བའི་བོད་ཚེས་ ༡༥ ཉིན་གྱི་སྔ་དྲོར་༧གོང་ས་རྒྱལ་བ་རིན་པོ་ཆེ་མཆོག་གིས་རྨི་ལམ་བཟང་པོ་རྨིས་ན་རྨི་ལམ་བཟང་པོའི་འབྲས་བུ་སྨིན་ཐུབ་པ་ཞིག་དང་། རྨི་ལམ་ངན་པ་ཞིག་བྱུང་བ་ཡིན་ན་བཀྲ་མི་ཤིས་པ་འདྲ་བོ་ཡོད་པ་ཡིན་ནའང་དེར་སེལ་ཐབས་ཡོད་པས་སེམས་མ་སྐྱིད་པ་བྱེད་དགོས་རྒྱུ་ཁྱོན་ནས་མེད་སྐོར་གསུངས་སོང་།
ཏཱའི་སི་ཏུ་རིན་པོ་ཆེ་མཆོག་གིས་ཇི་ལྟར་གསོལ་འདེབས་ཞུས་དོན་ལྟར། བཞུགས་སྒར་ཐེག་ཆེན་ཆོས་གླིང་གཙུག་ལག་ཁང་དུ་ཉིན་གྲངས་གཉིས་རིང་སྤྱན་རས་གཟིགས་རྒྱལ་བ་རྒྱ་མཚོའི་བཀའ་དབང་སྩལ་བ་ལེགས་པར་གྲུབ་སོང་། དེ་རིང་བཀའ་དབང་དངོས་གཞིའི་སྐབས་༧གོང་ས་མཆོག་གིས། ཉིད་ཀྱི་འོད་ཟེར་ཆོས་སྐུ་རུ་སད། རྨི་ལམ་ལོང་སྐུ་དེ་སད། སད་པ་སྤྲུལ་སྐུ་དེ་སད་ཟེར་ནས་སད་བ་སྐོར་དགུ་དངོས་གནས་ཀྱི་ཐུན་མོང་མ་ཡིན་པའི་བསམ་བློ་གཏོང་རྒྱུ་ཞེ་དྲགས་འདུག དེ་དག་ལམ་མཐོན་པོའི་སྐད་ཆ་གང་ཡང་མ་རེད། ང་རང་ཚོ་ལས་དང་པོ་བའི་ས་དེ་ག་རང་ནས་གཉིད་མར་ཁུག་པའི་ཁ་ཐུག་ཏུ་བློ་ག་ལེར་ག་ལེར་ཕྲ་རུ་ཕྲ་རུ་ཕྱིན་པའི་ཁ་ཐུག་ལ། འཐིམ་རིམ་དེ་དག་བསླེབས་ཡོང་གི་ཡོད་རེད། བྱས་ནས་གཉུག་མ་ལྷན་ཅིག་སྐྱེས་པའི་འོད་ཟེར་གྱི་སེམས་དེ་ངོ་འཕྲོད་པ་བྱས་ནས། དེའི་སྒང་དུ་སྟོང་ཉིད་སྒོམ་རྒྱུ་གསུང་གི་འདུག དེ་དག་ལ་བསམ་བློ་བཏང་བའི་ཁ་ཐུག་ལ་ཡ་མཚར་པོ་འདུག་གཱ། མེད་བསྡད་པ་ཞིག་ལ་བཤད་བསྡད་པ་མ་ཡིན་པར། ད་ལྟ་ང་རང་ཚོའི་རྒྱུད་ལ་སེམས་ཕྲ་རགས་མང་པོ་ཞིག་ཡོད་པ་དེ་དག་དབྱེ་འབྱེད་བཏང་ནས། སེམས་ཤིན་ཏུ་ཕྲ་བ་དེའི་སྒང་ལ་བློ་ལྷོད་ནས་འཇོག་རྒྱུ་ཞིག དེ་འདྲ་བའི་གཉུག་མ་ལྷན་ཅིག་སྐྱེས་པའི་འོད་ཟེར་ཟེར་བ་དེ་ཐོག་མ་དང་མཐའ་མ་མེད་བསྡད་པ། སེམས་གྲུབ་ཙམ་ཉིད་ནས་གཉུག་མ་ལྷན་ཅིག་སྐྱེས་པའི་འོད་ཟེར་གྱི་རང་བཞིན་ཆགས་བསྡད་པ། ད་དེ་འདྲ་བྱས་ནས་འགྲོ་ཡི་ཡོད་པ་རེད། གཉུག་མ་ལྷན་ཅིག་སྐྱེས་པའི་འོད་ཟེར་གྱི་སེམས་འདི་ཁོ་ངོ་བོའི་ཆ་ནས་རྣམ་མཁྱེན་དང་ཕྲ་རགས་ཀྱི་ཁྱད་པར་མེད་བསྡད་པ་རེད་འདུག ཅེས་གསུངས་སོང་།
ཡང༧་མགོན་པོ་གང་ཉིད་ཀྱིས། དེ་རིང་སྤྱན་རས་གཟིགས་རྒྱལ་བ་རྒྱ་མཚོ་ཟེར་བ་འདི་སྔགས་བླ་མའི་གཞུང་ནས་གསུང་པ་ནང་བཞིན་གཉུག་མ་ལྷན་ཅིག་སྐྱེས་པའི་འོད་ཟེར་ལམ་དུ་བྱ་རྒྱུ་གཙོ་བོ་དེ་རེད་འདུག སྤྱན་རས་གཟིགས་སྙིང་རྗེའི་ལྷ། ཁོ་དངོས་གནས་དྲང་གནས་གཞན་དང་མི་འདྲ་བ་ཞིག་ཆགས་བསྡད་ཡོད་རེད། དེ་གྲུབ་སྟངས་དེ་འོད་ཟེར་རྩལ་དུ་བཏོན་ནས་གྲུབ་རྒྱུ་ཞིག་བྱུང་དུས། ཁོ་གཞན་དང་མི་འདྲ་བའི་ཁྱད་ཆོས་ཡོད་བསྡད་པ་ཞིག་ཆགས་ཀྱི་འདུག ཅེས་གསུངས་སོང་།
ཡང་རྨི་ལམ་གྱི་སྐོར་ལ་༧མགོན་པོ་གང་ཉིད་ཀྱིས། རྨི་ལམ་དུ་བླ་མ་དང་ལྷ་སོགས་མཇལ་བ་ཡིན་ན། རྨི་ལམ་བཟང་བ་ཡོད་པ་ཐག་ཆོད་པ་རེད། དེ་མིན་རྨི་ལམ་དུ་གྱེན་དུ་འགྲོ་བར་རྨིས་པ་ཡིན་ན་བཟང་བ་རེད། ཁ་ཐུར་ལ་གཏད་ནས་འགྲོ་བ་རྨིས་པ་ཡིན་ན་ཏོག་ཙམ་ངན་པར་རྩི་བ་རེད། གང་ལྟར། རྨི་ལམ་བཟང་ངན་འདྲ་མི་འདྲ་ག་རེ་བྱུང་ནའང་། གཉིད་སད་པའི་ཁ་ཐུག་ལ་སེམས་དགའ་ལྷང་ལྷང་ཡོད་པ་ཞིག་བྱུང་བ་ཡིན་ན་བཟང་བ་རེད། ཡང་རྨི་ལམ་འཁྲུག་པོ་ཞེ་དྲགས་བཏང་ནས་གཉིད་སད་པའི་ཁ་ཐུག་ལ་ཏོག་ཙམ་སེམས་ཡིད་ཐང་ཆད་བསྡད་པའི་ཟོལ་འདྲ་བོ་ཞིག་ཡིན་ན། ཏོག་ཙམ་ཞན་པ་རེད། གང་ལྟར། རྨི་ལམ་བཟང་པོ་རྨིས་ན་རྨི་ལམ་བཟང་པོའི་འབྲས་བུ་སྨིན་ཐུབ་པ་ཞིག་དང་། རྨི་ལམ་ངན་པ་ཞིག་བྱུང་བ་ཡིན་ན་བཀྲ་མི་ཤིས་པ་འདྲ་བོ་ཡོད་པ་ཡིན་ན། སྔགས་ཁ་ཐུག་ཡིན་དུས་བླ་མས་གསང་ཆུ་གཏོར་ཏེ་བར་ཆད་གསལ་རྒྱུ་དང་། མཇུག་ཏུ་ཆོས་ཐམས་ཅད་རང་བཞིན་མེད་པར་ཡག་པོ་བསམ་བློ་འཁོར་བའི་ཐོག་ནས། སྲུང་སྒོ་སྒོམ་རྒྱུ་ཡོད་ཙང་། རྨི་ལམ་འཁྲུག་བསྡད་པ་ཡོད་ནའང་། སེམས་མ་སྐྱིད་པ་བྱེད་དགོས་རྒྱུ་ཁྱོན་ནས་ཡོད་མ་རེད། ད་ཁ་སང་སྤྱན་རས་གཟིགས་རྒྱལ་བ་རྒྱ་མཚོའི་སྟ་གོན་ཟིན་པ་བྱས། དེ་རིང་དངོས་གཞི་ཕུལ་རྒྱུ་རེད། ངོས་རང་ལ་ཆ་བཞག་ནའང་བསྐལ་བ་བཟང་པོ་ཞེ་དྲགས་བྱུང་། ཕྱོགས་ཅིག་ནས་ངོས་རང་ཞོགས་པ་ལངས་པ་ནས་བྱང་ཆུབ་ཀྱི་སེམས་སྒོམ་གྱི་ཡོད་རེད། དེ་ནས་མ་ཎི་བགྲངས་ཀྱི་ཡོད། ང་རང་ཚོ་བོད་རིགས་ཤིག་ཡིན་པའི་ངོས་ནས། བོད་གངས་ཅན་ལྗོངས་ཀྱི་ལྷ་སྐལ་དེ་འཕགས་པ་སྤྱན་རས་གཟིགས་རེད། ཁོ་རང་དམིགས་བསལ་གྱི་རྒྱུ་མཚན་ཞིག་བཤད་རྒྱུ་འདུག ང་ཚོ་བོད་པ་ཚོ་གྱོང་པོ་ཞེ་དྲགས་རེད་འདུག ཆོས་རྒྱལ་སྲོང་བཙན་སྒམ་པོས་རྒྱ་བཟའ་དང་འཁྲུངས་ས་སྐྱོན་ནས་ལྷ་སའི་ཇོ་བོ་རྒྱ་ནག་ནས་ཡར་ཕེབས་པ་རེད། འབྲེལ་བ་ཤུགས་ཆེན་པོ་ཞེ་དྲགས་ཡོད་རེད་དེ། ཡིན་ནའི་ཆོས་རྒྱལ་སྲོང་བཙན་སྒམ་པོས་ང་བོད་པ་རེད། ང་ཚོར་བོད་ཡིག་དགོས་ཟེར་ནས་སྲོང་བཙན་སྒམ་པོས་བོད་ཡིག་སྲོལ་གཏོད་འདུག་གཱ། རྒྱ་ཡིག་ལ་དཔེ་མ་བལྟས་པ་བྱས། རྒྱ་གར་བྷེ་བ་ནག་རི་ཟེར་བ་དེ་ནས་དཔེ་བལྟས་ཏེ་དབྱངས་དང་གསལ་བྱེད་ཀྱི་ཡི་གེ་འདི་བཟོས་པ་རེད།ཅེས་སོགས་གསུངས་ཏེ་བཀའ་དབང་ལེགས་པར་གྲུབ་སོང་།
༧གོང་ས་རྒྱལ་བ་རིན་པོ་མཆོག་གི་མཛད་འཆར་ལྟར་ན། ཟླ་འདིའི་ཕྱི་ཚེས་ ༢༤་༸གོང་ས་རྒྱལ་བ་རིན་པོ་ཆེ་མཆོག་ལ་ཚོགས་པ་ཁག་ཅིག་གིས་ཇི་ལྟར་གསོལ་བ་བཏབ་པ་ལྟར་ཐེག་ཆེན་ཆོས་གླིང་གཙུག་ལག་ཁང་དུ་བརྟན་བཞུགས་བསྟར་འབུལ་ཞུ་རྒྱུ་དང་། ཕྱི་ཟླ་༧ ཚེས་ ༨་ནས་ ༡༠་བར་ཉིན་གྲངས་གཉིས་ལ་བཞུགས་སྒར་དྷ་སའི་ཐེག་ཆེན་ཆོས་གླིང་གཙུག་ལག་ཁང་དུ་བདེ་མཆོག་ལཱུ་ཨི་པའི་བཀའ་དབང་བཀའ་དྲིན་སྩལ་རྒྱུ་ཡིན་འདུག
གསར་འགོད་པ། དཔལ་ལྡན།
