ཁ་སང་ས་ག་ཟླ་བའི་ཚེས་ ༡༥ ཉིན་དཔལ་༧ས་སྐྱའི་བཙུན་མའི་བཤད་གྲྭ་ཡི་བཙུན་མ་གསུམ་ལ་མཁན་མོའི་མཚན་གནས་སྩལ་ཡོད་པ་དང་དེ་ནི་ས་སྐྱ་ཆོས་བརྒྱུད་ཀྱི་ལོ་རྒྱུས་ནང་མཁན་མོའི་མཚན་གནས་སྩལ་བ་ཐེངས་དང་པོ་ཆགས་ཀྱི་ཡོད་འདུག
ཁ་སང་ཕྱི་ཚེས་ ༡༤ ཉིན་རྒྱ་གར་བྱང་ཕྱོགས་དྷེ་ར་དྷུན་དུ་རྟེན་གཞི་བྱས་པའི་ས་སྐྱའི་བཙུན་མའི་བཤད་གྲྭ་ནས་གཞུང་ཆེན་ཁག་ལ་བསླབ་པ་མཐར་སོན་ཞིང་བཤད་གྲྭར་དཔེ་ཁྲིད་གནང་མཁན་བཙུན་མ་གསུམ་ལ་མཁན་མོའི་མཚན་གནས་སྩོལ་བའི་མཛད་སྒོའི་ཐོག ༸དཔལ་ས་སྐྱའི་འཁོན་གདུང་ཨ་སངྒ་བཛྲ་རིན་པོ་ཆེ་མཆོག་ཆིབས་བསྒྱུར་བསྐྱངས་ཏེ། ༸གོང་མ་ཁྲི་འཛིན་ཞེ་གསུམ་པ་འཁོན་གདུང་ཛྙ་ན་བཛྲ་རིན་པོ་ཆེ་མཆོག་ནས་སྩལ་བའི་ཐུགས་སྨོན་ཕྱག་འཁྱེར་སྩལ་གནང་ཡོད་ཅིང་། དེ་ནི་དཔལ་ས་སྐྱ་ཆོས་བརྒྱུད་ཀྱི་ལོ་རྒྱུས་ནང་བཙུན་མ་ཞིག་ལ་མཁན་མོའི་མཚན་གནས་སྩལ་བ་ཐེངས་དང་པོ་ཆགས་ཀྱི་ཡོད་འདུག
ས་སྐྱ་ཁྲི་འཛིན་ཞེ་གསུམ་པ་ཛྙན་བཛྲ་རིན་པོ་ཆེ་མཆོག་གིས་ས་སྐྱ་བཙུན་མའི་བཤད་གྲྭའི་བཙུན་མ་ཀུན་དགའ་འོད་མཚོ་ལགས་དང་། བཙུན་མ་ཀུན་དགའ་དཔལ་སྒྲོན་ལགས། ངག་དབང་གཡང་དགའ་ལགས་བཅས་ལ་གནང་བའི་ཕྱག་འཁྱེར་ནང་། བཙུན་མ་གསུམ་གྱིས་གཞུང་ཆེན་ཁག་ལ་བསླབ་བ་སློབ་གཉེར་མཐར་ཕྱིན་ཅིང་སློབ་དཔོན་མའི་ཕྱག་ཁྱེར་ཐོབ་ཡོད་པ་དང་། ལོ་མང་རིང་དེ་གར་སྐྱོར་དཔོན་དང་དགེ་རྒན་གནང་བ་མ་ཟད། ཀུན་སྤྱོད་སོགས་གང་ཅིར་ལེགས་གྲས་སོང་། ཇི་ལྟར་བཙུན་མའི་བཤད་གྲྭའི་མཁན་ལས་ནས་མཁན་མོའི་མཚན་གནས་སྩལ་གནང་དགོས་པའི་རྒྱབ་གཉེར་གནང་བ་བཞིན་འདི་ནས་ཀྱང་མཁན་མོར་བསྐོ་གཞག་བགྱིས་པ་ཡིན་ན། དེ་དོན་འབྲེལ་ཡོད་ཚང་མས་བརྩི་བཀུར་དང་ལེན་དང་། དོ་བདག་ནས་ཀྱང་ཚུལ་ཁྲིམས་རྣམ་པར་དག་པ་གཞིར་བྱས། ལྷག་བསམ་ཆེར་བསྐྱེད་ཀྱིས་བསྟན་པར་སྲི་ཞུ་སྔར་རྒྱུན་བཞིན་གནང་གལ་ཆེ་བས། འདི་ནས་ཀྱང་དེ་དེ་བཞིན་དུ་འགྲུབ་པའི་སྐྱབས་སྨོན་བྱེད། ཅེས་གསུངས་འདུག
ས་སྐྱ་བཙུན་མའི་བཤད་གྲྭའི་མཁན་པོ་ཡེ་ཤེས་ཚེ་རིང་ལགས་ཀྱིས་འདི་གའི་གསར་འགོད་པར་འགྲེལ་བརྗོད་གནང་བ་ལྟར་ན། སྤྱིར་ས་སྐྱ་བཙུན་མའི་བཤད་གྲྭ་ནས་གཞུང་ཆེན་ཁག་དཔེ་ཁྲིད་ཐུབ་མཁན་གྱི་བཙུན་མ་ ༦ བྱུང་བའི་ཁྲོད་ནས་རྩེ་ཕུད་གསུམ་ལ་མཁན་མོའི་མཚན་གནས་སྩལ་ཡོད་པ་དང་། དེ་ཡང་བཙུན་མ་རྣམས་ལ་ས་སྐྱའི་གཞུང་ཆེན་གྲགས་ཆེན་བཅོ་བརྒྱད་ཐོབ་ཟིན་པ་མ་ཟད། ཀ་བཅུ་པ་དང་སློབ་དཔོན་ཐོན་ཟིན་པའི་ཐོག ལོ་ཡན་ལ་སྐྱོར་དཔོན་དང་དཔེ་ཁྲིད་དགེ་རྒན་གནང་བ་ཡིན་ན་མཁན་མོའི་མཚན་གནས་གནང་གི་ཡོད་སྐོར་དང་། ད་ལྟའི་ཆར་བཤད་གྲྭ་དེའི་ནང་སློབ་དཔོན་ཐོན་ཟིན་པའི་བཙུན་མ་ ༡༥ དང་། ཀ་བཅུ་པ་ཐོན་པའི་བཙུན་མ་ ༢༠ ལྷག་ཡོད་སྐོར་གསུངས་བྱུང་།
གསར་འགོད་པ། པ་སངས་ཚེ་རིང་།
![Because of high altitudes in the Himalayas, difficult terrain and often poor weather, the Kailash Manasarovar pilgrimage if one of the most challenging in the world [File: Purnima Shrestha/Reuters]](https://tibettimes.net/wp-content/uploads/2026/05/Screen-Shot-2026-05-14-at-5.25.22-PM-360x180.png)
