གདན་ས་རྣམ་གྲོལ་གླིང་དུ་རིས་མེད་མཁས་པའི་བགྲོ་གླེང་ཐེངས་ལྔ་པ་འཚོག་བཞིན་འདུག

རྒྱ་གར་ལྷོ་ཕྱོགས་ཀྱི་གདན་ས་ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་དུ་ཟླ་འདིའི་ཕྱི་ཚེས་ ༡༦ ནས་ ༡༩ བར་གྱི་ཉིན་གྲངས་བཞིའི་རིང་རིས་མེད་མཁས་པའི་བགྲོ་གླེང་ཐེངས་ལྔ་པ་འཚོག་བཞིན་འདུག

དབུས་བོད་མི་སྒྲིག་འཛུགས་ཀྱི་ཆོས་རིག་ལས་ཁུངས་ནས་གཙོ་འགན་བཞེས་པའི་ཐོག་ནས་རྒྱ་གར་ལྷོ་ཕྱོགས་ཀྱི་གདན་ས་ཐེག་མཆོག་རྣམ་གྲོལ་བཤད་སྒྲུབ་དར་རྒྱས་གླིང་དུ། ཟླ་འདིའི་ཕྱི་ཚེས་ ༡༦ ནས་ ༡༩ བར་གྱི་ཉིན་གྲངས་བཞིའི་རིང་རིས་མེད་མཁས་པའི་བགྲོ་གླེང་ཐེངས་ལྔ་པ་འཚོག་བཞིན་ཡོད་པ་དང་། དབུ་འཛུགས་ཀྱི་མཛད་སྒོའི་ཐོག་སྐུ་མགྲོན་གཙོ་བོ་ཆོས་རིག་དྲུང་ཆེ་འཆི་མེད་ཚེ་དབྱངས་ལགས་དང་། དམིགས་བསལ་སྐུ་མགྲོན་རྣམ་གྲོལ་གླིང་དབུ་འཛིན་༸སྐྱབས་རྗེ་མཆོག་སྤྲུལ་གྱང་ཁང་རིན་པོ་ཆེ་དབུས་རིས་སུ་མ་ཆད་པའི་ཆོས་བརྒྱུད་དགོན་སྡེ་ཁག་གི་སྐུ་ཚབ་མཁན་སློབ་དགེ་བཤེས་དང་། དགེ་བཤེས་མ་རྣམ་པ། ལྷོ་སྤྱི། དེ་བཞིན་་ཟུར་ཉན་པ་བཅས་བགྲོ་གླེང་ནང་མཉམ་ཞུགས་མཁན་ཁྱོན་ ༥༠༠ ཙམ་ཡོད་འདུག

དེ་རིང་ཞེ་ཆེན་བསྟན་གཉིས་དར་རྒྱས་གླིང་གི་མཁན་པོ་དཔལ་ལྡན་དབང་ཕྱུག་གིས། ཤེར་ཕྱིན་མངོན་རྟོགས་རྒྱན་གྱི་དྲང་ངེས་དང་བཀའ་བསྟན་བཅོས་གཉིས་ཀྱི་སྐོར་དང་།  དེ་བཞིན་སེར་བྱེས་དགེ་བཤེས་ལྷ་རམས་པ་འཆི་མེད་ཚེ་རིང་ལགས་ཀྱིས་ཤེར་ཕྱིན་མངོན་རྟོགས་རྒྱན་གྱི་ཐེག་ཆེན་སེམས་སྐྱེད་ཀྱི་སྐོར། རིགས་ལམ་སློབ་གཉེར་ཁང་གི་དགེ་བཤེས་རྒྱལ་མཚན་དབང་འདུས་ལགས་ཀྱིས་ཤེར་ཕྱིན་མངོན་རྟོགས་རྒྱན་གྱི་བདེན་བཞིའི་ཐོག་གསུང་བཤད་གནང་ཡོད་འདུག་ལ།   སང་ཉིན་དང་གནངས་ཉིན་བཅས་སུ་བརྩེ་ཆེན་མདོ་སྔགས་ཆོས་གླིང་གི་སློབ་དཔོན་ཀུན་བཟང་དོན་གྲུབ་ལགས་ཀྱིས་ཤེར་ཕྱིན་མངོན་རྟོགས་རྒྱན་གྱི་སྐུ་གསུམ་དང་། དཔལ་གཤེན་བསྟན་སྨན་རི་གླིང་གི་དགེ་བཤེས་སེམས་དཔའ་རྒྱལ་མཚན་ལགས་ཀྱིས་ཤེར་ཕྱིན་མངོན་རྟོགས་ལམ་གྱི་རིམ་པའི་རྒྱན་གྱི་སྲིད་པའི་ཁམས་དང་། རྒྱུན་ཁམས། སྣང་ཁམས་ཀྱི་སྐོར་སོགས་ལ་གསུང་བཤད་དང་བགྲོ་གླེང་གནང་རྒྱུ་ཡིན་འདུག

རིས་མེད་བགྲོ་གླེང་དེ་༸གོང་ས་༸སྐྱབས་མགོན་ཆེན་པོ་མཆོག་གིས་ཕྱི་ལོ་ ༢༠༡༡ ལོར་ཆོས་ཚོགས་ཐེངས་ ༡༡ ཐོག་བཀའ་སློབ་ཕེབས་དོན་བཞིན། ཕྱི་ལོ་ ༢༠༡༣ ལོར་བཤད་སྒྲུབ་བསྟན་པ་གོང་སྤེལ་ལྷན་ཚོགས་སྐབས་གྲོས་ཆོད་དུ་བཞག་སྟེ་དབུ་འཛུགས་གནང་བ་ཞིག་ཡིན་འདུག་ལ། ཕྱི་ལོ་ ༢༠༡༥ ལོར་བོད་ཀྱི་ཆོས་བརྒྱུད་སོ་སོའི་དབར་མཐུན་བསྒྲིལ་དང་སློབ་གཉེར་གོང་འཕེལ་ཡོང་བ་སོགས་ཀྱི་ཆེད་དུ་ཐེངས་དང་པོའི་བགྲོ་གླེང་དེ་རྒྱུད་སྟོད་གྲྭ་ཚང་དང་། ༢༠༡༦ ལོར་དཔལ་སྤུངས་ཤེས་རབ་གླིང་། ཕྱི་ལོ་ ༢༠༡༨ ས་སྐྱ་མཐོ་སློབ། ༢༠༡༩ ལོར་སྨན་རིའི་གླིང་དགོན་པ་བཅས་སུ་རིམ་པར་འཚོགས་ཡོད་འདུག

རྒྱ་གར་ལྷོ་ཕྱོགས་ཀྱི་གསར་འགོད་པ་དོན་འགྲུབ་བཀྲ་ཤིས།