རྒྱ་གར་ལྷོ་ཕྱོགས་ཀྱི་གཞིས་ཆགས་ཀོ་ལི་གྷལ་གྱི་གཞོན་ལྷན་ཕུད་གཞན་ཕྱི་ལོ་ ༢༠༡༣ ལོར་དབུས་གཞོན་ལྷན་གྱི་ཁྱབ་ཁོངས་ནས་ལོགས་སུ་ཐོན་སོང་བའི་ས་གནས་ཁག་ ༧ གྱི་གཞོན་ལྷན་འགྲིག་འཇགས་བྱུང་སྟེ་ཕྱིར་དབུས་ཁོངས་སུ་འཛུལ་ཡོད་འདུག
དེ་རིང་སྔ་དྲོར་བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་ནས་དེ་སྔོན་ཚོགས་ཁོངས་ནས་ཐོན་པའི་ས་གནས་ཁག་གི་དཀའ་ངལ་འགྲིག་འཇགས་བྱུང་ཡོད་སྐོར་གྱི་གསར་འགོད་ལྷན་ཚོགས་ཤིག་བསྡུས་ཏེ། དབུས་ཚོགས་གཙོ་མགོན་པོ་དོན་གྲུབ་ལགས་ཀྱིས་ཕྱི་ལོ་ ༢༠༡༣ ལོའི་བོད་ཀྱི་གཞོན་ནུ་ལྷན་ཚོགས་ཀྱི་ཚོགས་ཆེན་སྐབས་གཞོན་ལྷན་ས་གནས་ཁག་བརྒྱད་ཚོགས་ཁོངས་ནས་ཕྱིར་ཐོན་གྱིས་ཡིད་སྐྱོའི་གནས་ཚུལ་བྱུང་ཡོད་པར་བརྟེན། ཚོགས་ཐོག་ཏུ་གཞོན་ལྷན་དབུས་རྒྱུན་ཟུར་པ་དང་། དགའ་ལྡན་ཕོ་བྲང་གི་སྐུ་ཚབ་མཁས་དབང་ཟམ་གདོང་རིན་པོ་ཆེ་མཆོག་ནས་གཞོན་ལྷན་གྱི་ལས་དོན་བྱེད་ཕྱོགས་ཁག་ལ་བླང་དོར་བཀའ་སློབ་ལམ་སྟོན་ཕེབས་དོན་བཞིན། དེ་སྔ་ཕན་ཆད་གཞོན་ལྷན་གྱིས་ཐལ་ཆ་ཕྱིན་པའི་གནད་དོན་ཡོངས་རྫོགས་ཕྱིར་འཐེན་དང་ནུས་མེད་ཀྱི་གྲོས་ཆོད་བཞག་པ་མ་ཟད། སྐབས་ ༡༥ པའི་གཞོན་ལྷན་དབུས་རྒྱུན་གྱིས་གཞོན་ལྷན་སྒྲིག་འཛུགས་ནས་༧མགོན་པོ་མཆོག་ལ་ཐུགས་ཕམ་ཡོང་གཞིའི་མ་ཤེས་རྨོངས་པའི་དབང་གིས་ལས་ངན་བསགས་ཡོད་པར་འགྱོད་གདུང་དྲག་པོའི་ངང་འགྱོད་བཤགས་བཟོད་གསོལ་དང་། སླད་མར་ཡང་འདི་རིགས་མི་འབྱུང་བའི་ཁས་ལེན་དམ་བཅའ་གཙང་མ་ཞུས་ནས་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་ལ་ལྷ་དགོངས་གསལ་དྭངས་ཡོང་བའི་མཚན་འཁོད་ཞུ་སྙན་ཕུལ་ཡོད་པ་དང་། གཞོན་ལྷན་གྱི་དབང་ཚད་མཐོ་ཤོས་ཡིན་པའི་སྐབས་ ༡༥ པའི་གཞོན་ལྷན་ཚོགས་ཆེན་སྐབས། དེ་འབྲེལ་གྱི་གསར་འགོད་གསལ་བསྒྲགས་གཙོས་པའི་གྲོས་ཆོད་ཁག་ཕྱིར་འཐེན་གནང་ཡོད་ནའང་། བོད་ཀྱི་གཞོན་ནུ་ལྷན་ཚོགས་ཀྱི་ས་གནས་ཁག་ ༨ དེ་སྦེལ་ཀོབ་དང་ཧོན་སུར། ཀོ་ལི་གྷལ། སྦེང་ལོར། མོན་གྷོ། སྤོན་ཊ། ཌལ་ཧོར། ལ་དྭགས་བཅས་ནས་གཞོན་ལྷན་གྱི་སྒྲིག་གཞིའི་དམིགས་ཡུལ་ལ་རང་དགར་བཟོ་བཅོས་བྱས་པ་མ་ཟད། ས་གནས་གཞོན་ལྷན་གྱི་ལས་ཐམ་དང་ལས་ཤོག་ཡིག་སྣོད་སོགས་ཀྱི་མཚོན་པའི་ས་གནས་ཀྱི་མིང་བྱང་བརྗེ་བསྒྱུར་དང་། ས་གནས་ཀྱི་ཚོགས་མིའི་ངོས་འཛིན་ལག་འཁྱེར་སོགས་ཀྱང་བརྗེ་བསྒྱུར་བྱས་ཏེ་ཧ་ཅང་ཐལ་ཆེའི་ཐག་གཅོད་གང་མང་ཞིག་བྱས་ཡོད་ཀྱང་། གཞོན་ལྷན་དབུས་སྤྱི་ཁྱབ་རྒྱུན་ལས་ཁང་ནས་ཡིག་འབྲེལ་ཐེངས་མང་ཞུས་ཡོད་པ་མ་ཟད། ས་གནས་ས་ཐོག་ཏུ་དབུས་རྒྱུན་རིམ་པ་ཆེད་བཅར་གྱིས་དཀའ་ངལ་སེལ་ཐབས་དང་འགྲིག་འཇགས་ཡོང་ཐབས་བྱས་ཏེ། མཐར་ཕྱི་ལོ་ ༢༠༡༦ ལོར་སྦེང་ལོར་དང་མོན་གྷོ་ས་གནས་གཞོན་ལྷན་གཉིས་གཞོན་ལྷན་དབུས་སྤྱི་ཁྱབ་རྒྱུན་ལས་ཁང་གི་ཁྱབ་ཁོངས་སུ་ཆིག་སྒྲིལ་གྱིས་ཕྱིར་ཕེབས་ཐུབ་པ་བྱུང་ཡོད། ཅེས་བརྗོད་སོང་།
ད་དུང་ཁོང་གིས། ཕྱི་ལོ་ ༢༠༡༩ ཟླ་ ༩ པའི་ནང་གཞུང་ཞབས་ཟུར་པ་རྣམས་ནས་
དེའི་རྗེས་ཧོན་སུར་ས་གནས་སུ་ཆེད་བཅར་གྱིས་ས་གནས་མང་ཚོགས་དང་མཇལ་འཕྲད་ཀྱིས་སྤྱི་མོས་ཀྱི་ཐོག་ནས་རྒྱུན་ལས་མི་གྲངས་ ༦ གསར་འདེམས་ཀྱིས་ཧོན་སུར་ས་གནས་གཞོན་ལྷན་སླར་གསོ་ཞུ་ཐུབ་པ་བྱུང་། དེ་ནས་ཀོ་ལི་གྷལ་ས་གནས་སུ་ཆེད་བཅར་སྐབས་ས་གནས་གཞན་གཉིས་དང་མི་འདྲ་བར་ས་གནས་ཀྱི་ལས་འཛིན་པ་བརྒྱུད་རྒྱུན་ལས་ཚོས་ཚོགས་མི་བསྡུ་སྐོང་གིས་གྲོས་བསྡུར་སྦྱང་བཤད་གང་ལེགས་བྱུང་ཡང་ཚོགས་མི་མང་དག་ཅིག་གིས་ད་ལྟའི་གནས་སྐབས་སུ་ཁོང་རྣམ་པ་ཚོའི་མངོན་འདོད་ལ་འགྱུར་བ་གང་ཡང་མེད། ཅེས་གསུངས་པར་བརྟེན། དབུས་སྤྱི་ཁྱབ་གཞོན་ལྷན་ནས་ཚོགས་མི་མང་ཚོགས་ཀྱི་མངོན་འདོད་དྭང་ལེན་ཞུས་པའི་ཐོག་ནས་ས་གནས་གསར་འཛུགས་ཞུས་མེད། འོན་ཀྱང་གཞོན་ལྷན་དབུས་ཀྱི་ཁྱབ་ཁོངས་སུ་མེད་པར་ཟུར་དུ་མུ་མཐུད་དུ་བཞུགས་ཚེ་འབྲེལ་ཡོད་ཚོས་དགོངས་པ་ཆེ་བཞེས་ཀྱིས་ད་ནས་བཟུང་གཞོན་ལྷན་སྒྲིག་འཛུགས་ཀྱི་མཚན་བྱང་བེད་སྤྱོད་མི་གནང་རྒྱུར་སྐུལ་མ་ཞུས་ཡོད། དེ་བཞིན་ཟླ་འདིའི་ཕྱི་ཚེས་ ༡༠ ཉིན་བོད་ཀྱི་གཞོན་ནུ་ལྷན་ཚོགས་དབུས་སྤྱི་ཁྱབ་རྒྱུན་ལས་ཁང་གི་ཚོགས་གཙོ་དང་ཚོགས་གཞོན། དྲུང་ཆེ། སྒྲིག་འཛུགས་འགན་འཛིན་བཅས་རྒྱ་གར་བྱང་ཕྱོགས་སྤོན་ཊ་ས་གནས་གཞོན་ལྷན་གྱི་དེ་སྔའི་དཀའ་ངལ་འགྲིག་འཇགས་ཡོང་ཐབས་ལ་དམིགས་ཏེ་ས་གནས་སུ་ཆེད་བཅར་ཞུས་ཏེ། སྤོན་ཊ་ས་གནས་གཞོན་ལྷན་དེ་བཞིན་ལོ་ངོ་ཧྲིལ་པོ་ ༩ ཡི་རྗེས་སུ་སླར་ཡང་གཞོན་ནུའི་ཁྱབ་ཁོངས་སུ་འཛུལ་ཞུགས་གནང་ཐུབ་པ་བྱུང་ཡོད། ད་དུང་ཟླ་འདིའི་ཕྱི་ཚེས་ ༡༣ ཉིན་ཌལ་ཧོར་ས་གནས་ཀྱི་གཞུང་དང་གཞུང་འབྲེལ་མིན་པའི་ཚོགས་སྡེ་ཁག་གི་སྐུ་ཚབ་ཆེད་དུ་གདན་ཞུས་དང་། མི་དམངས་འདུ་འཛོམས་ཐོག་ས་གནས་ཀྱི་ད་ལྟའི་གནས་བབ་དང་། དེ་སྔའི་དཀའ་ངལ་སོགས་ཀྱི་ཐད་གོ་བསྡུར་སྦྱང་བཤད་གང་ལེགས་ཐོག་ཚོགས་བཅར་གནང་བའི་ཚོགས་མི་ཁག་ནས་ཚད་མཐོའི་རྒྱབ་སྐྱོར་ལ་ལས་ཐོག་རྒྱུན་ལས་སྤྱི་མོས་ཀྱི་རྒྱབ་སྐྱོར་ཐོབ་སྟེ། ཌལ་ཧོར་ས་གནས་གཞོན་ལྷན་དེ་བཞིན་གཞོན་ནུའི་ཁྱབ་ཁོངས་སུ་སླར་ཡང་འཛུལ་ཞུགས་གནང་ཐུབ་པ་བྱུང་ཡོད་སྐོར་བརྗོད་སོང་།
གསར་འགོད་གསལ་བསྒྲགས་སྟེང་ས་གནས་གསར་འགོད་པས་ལོ་ངོ་མང་པོའི་རིང་ས་གནས་ཁག་གི་དཀའ་ངལ་འགྲིག་འཇགས་མ་ཐུབ་པའི་རྒྱུ་རྐྱེན་གཙོ་བོ་ག་རེ་ཡིན་སྐོར་དྲིས་པར། ཁོང་གིས། ༢༠༡༣ ལོར་སྐབས་ ༡༥ པའི་དབུས་སྤྱི་ཁྱབ་རྒྱུན་ལས་ཁང་དང་ ༢༠༡༦ ལོར་སྐབས་ ༡༦ པའི་དབུས་སྤྱི་ཁྱབ་རྒྱུན་ལས་ཁང་སོགས་རིམ་པས་ས་གནས་ས་ཐོག་ལ་ཆེད་བཅར་ཞུས་ཡོད་ཀྱང་། དེའི་སྐབས་སུ་དཀའ་ངལ་སེལ་མི་ཐུབ་པའི་རྒྱུ་རྐྱེན་གཙོ་བོ་ནི་ལས་ཐོག་རྒྱུན་ལས་རྣམ་པ་ཚོས་མང་ཚོགས་སྐོང་ཚོགས་གནང་ཐུབ་ཀྱི་མ་རེད། མང་ཚོགས་ཀྱི་མངོན་འདོད་ཀྱི་མགྲིན་ཚབ་པ་ཡིན། མང་ཚོགས་ཀྱི་རུ་དཔོན་བརྒྱུད་ནས་མང་ཚོགས་ཀྱི་མངོན་འདོད་ནི་དབུས་སྤྱི་ཁྱབ་རྒྱུན་ལས་ཁང་ལ་གཏན་ནས་འབྲེལ་བ་བྱེད་ཀྱི་མེད་ཟེར་ནས་གསུངས་ཀྱི་འདུག་ཟེར་ནས་མང་ཚོགས་དང་ཐུག་མ་ཐུབ་པའི་གནས་སྟངས་འདིའི་ཐོག་ནས་སྐབས་གཉིས་དབུས་རྒྱུན་གྱི་ཐོག་ནས་འབད་བརྩོན་ཞུས་པ་རེད། ང་ཚོ་ ༢༠༡༧ ལོར་དབུས་སྤྱི་ཁྱབ་རྒྱུན་ལས་ཁང་དུ་བཀོད་པ་ནས་བཟུང་ལས་འཆར་བསྒྲིགས་པ་ཡིན། འོན་ཀྱང་ཕྱི་ལོ་ ༢༠༢༠ ལོ་ནས་ཏོག་དབྱིབས་གཉན་རིམས་ཀྱི་རྐྱེན་གྱིས་ཁྱིམ་སྡོད་བཀའ་རྒྱ་སོགས་ཀྱིས་ས་གནས་སུ་དངོས་སུ་བཅར་ཐུབ་མ་སོང་། དེར་བརྟེན་ཕྱི་ལོ་ ༢༠༢༢ ལོར་ས་གནས་ཁག་ལ་དངོས་སུ་བཅར་ཏེ་དཀའ་ངལ་སེལ་བ་ཡིན་སྐོར་བརྗོད་སོང་།
གསར་འགོད་པ། བསྟན་འཛིན་ཕུར་བུ།
འདི་ནི་རང་རེའི་བདེན་པའི་འཐབ་རྩོད་ལ་དགོས་ངེས་ཆེ་བའི་རྡོག་རྩ་ཅིག་སྒྲིལ་གྱི་ལམ་ཕྱོགས་སུ་ཉམ་པ་སླར་གསོ་བྱུང་བའི་ཚང་མར་དགའ་བསུའི་བཀྲིས་བདེ་ལེགས་དང་བཀྲིན་ཆེ་ཞུ་རྒྱུ་ཡིན། བོད་མི་ཚང་མ་བོད་རང་བཙན་ལ་མི་དགའ་མཁན་ནི་སུ་གང་མེད་ཀྱང་རང་བཙན་གཙང་མ་ཐོབ་དགོས་ན་མི་རབས་ནས་མི་རབས་བར་འགོར་སྲིད། དེ་འདྲའི་དུས་འགོར་ནང་རྒྱ་དམར་པོའི་བོད་མིའི་ཆོས་དང་རིགས་གཞུང་རྩ་མེད་གཏོང་ངེས་པའི་གནད་ལས་བསལ་ཐབས་སུ་ལམ་དབུ་མ་དེ་དགོང་བཞེས་གནང་བ་རེད། གང་ལྟར་ཡང་ཐབས་ལམ་གཉིས་དེར་ལག་དོན་དུ་འཁེལ་དགོས་ཀྱང་དེ་ནི་ཆེར་དཀོན་པའི་བོད་མིའི་ཐོན་ཁུངས་ཤིག་རེད་འདུག་སྙམ། ང་ཚོར་ཡོད་པའི་རྒྱ་དམར་པོར་གདོང་ལེན་བྱ་རྒྱུའི་ལག་ཆ་ནི་སྐད་འབོད་དང་བཟས་བཅད་ངོ་རྒོལ་གཉིས་དེ་རེད། དེ་རང་བཙན་དགོས་མཁན་དང་ལམ་དབུ་མ་དགོས་མཁན་གཉིས་ནས་མཉམ་རུབ་བྱས་ན་མ་འཐུས་པ་ཅི་ཡོད། དགོས་རྒྱུ་སྤག་དེ་གཅིག་མཚུངས་རེད་ཀྱང་སྤག་ཁུ་ག་རེ་བྱུང་ནའང་འགྲིག་གོ། གཏོང་རྒྱུ་ཡོད་ན་བོད་ལ་ལོག་རྒྱུའི་དོན་བསྒྲུབ་པའི་བྱ་བར་བརྩོན་དང་ལམ་རང་བཞིན་གྱི་གསལ་ཡོང་མདའ། འབད་ཤོག་འབད་ཤོག་བྱ་ལས་ལ་འབད་ཤོག