སང་ཉིན་ཕྱི་ཚེས་ ༢༢ ནས་ ༢༣ བར་ཨ་རིའི་རྒྱལ་ས་ཝ་ཤིང་ཊོན་དུ་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་ ༨ པ་འཚོག་རྒྱུ་ཡིན་པ་དང་ཚོགས་ཆེན་ཐོག་དྲ་ལམ་བརྒྱུད་༧གོང་ས་རྒྱལ་བ་རིན་པོ་ཆེ་མཆོག་ནས་བཀའ་སློབ་ལམ་སྟོན་གནང་རྒྱུ་ཡིན་འདུག
རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་གྱི་གསར་འགོད་གསལ་བསྒྲགས། སྤྱི་འཐུས་ལྷན་ཚོགས་ཀྱི་པར།
སང་ཉིན་ཕྱི་ཚེས་ ༢༢ ནས་ ༢༣ བར་ཨ་རིའི་རྒྱལ་ས་ཝ་ཤིང་ཊོན་དུ་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་ ༨ པ་འཚོག་རྒྱུ་ཡིན་པ་ལྟར། ཁ་སང་ཕྱི་ཚེས་ ༢༠ ཉིན་བོད་མི་སྤྱི་འཐུས་ཚོགས་གཙོ་སྦྲེལ་པོ་མཆོག་དང་ཨ་རིའི་སྐུ་ཚབ་དོན་གཅོད་ཁང་མཉམ་འབྲེལ་ཐོག་ཚོགས་ཆེན་དང་འབྲེལ་བའི་གསར་འགོད་གསལ་བསྒྲགས་ཤིག་སྤེལ་བའི་ནང་ད་ལན་གྱི་ཚོགས་ཆེན་ཐོག་རྒྱལ་ཁབ་ ༢༦ ནས་གྲོས་ཚོགས་འཐུས་མི་དང་ཆེད་མཁས་པ་སོགས་མི་གྲངས་ ༡༠༠ ལྷག་མཉམ་ཞུགས་གནང་རྒྱུ་ཡིན་སྐོར་གསུངས་འདུག
བོད་མི་མང་སྤྱི་འཐུས་ལྷན་ཚོགས་ཀྱི་གཞུང་འབྲེལ་དྲ་རྒྱའི་ཐོག་སྤེལ་བའི་བསྒྲགས་གཏམ་ནང་། མང་གཙོའི་གཞི་རིམ་གྱི་ལྟ་གྲུབ་ལ་གུས་བརྩི་དང་། ཐོབ་ཐང་འདྲ་མཉམ་ལྡན་པའི་རྒྱལ་ཁབ་ཨ་རིའི་ནང་ད་རེས་ཀྱི་རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐེངས་བརྒྱད་པ་བསྐོང་ཚོགས་གནང་སྟེ། ཨ་རིའི་གྲོས་ཚོགས་ནས་ད་བར་བོད་དོན་དང་འབྲེལ་བའི་ཁྲིམས་འཆར་དང་། སྲིད་བྱུས་གཏན་འབེབས་གནང་བ་སོགས་བོད་དོན་ཐོག་ལྷག་བསམ་རྣམ་དག་གིས་རྒྱབ་སྐྱོར་གནང་བར་ང་ཚོས་ཐུགས་རྗེ་ཆེ་ཞུ་རྒྱུ་དང་ཆབས་ཅིག བོད་མིའི་སྒྲིག་འཛུགས་ངོས་ནས་ཀྱང་མང་གཙོའི་ལྟ་གྲུབ་དང་། དེའི་རིན་ཐང་གལ་ཆེར་བརྩིས་ནས་དེའི་ཐོག་ཤར་བསྐྱོད་གནང་བཞིན་ཡོད་པར་དོ་སྣང་གནང་རྒྱུའི་འབོད་སྐུལ་ཞུ་ཡི་ཡོད། བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གི་ཕུགས་རྒྱང་རིང་པོར་དགོངས་པར་བཞེས་ནས་རིམ་པས་བཀའ་སློབ་ལམ་སྟོན་གནང་འབྲས་སུ། ད་ཆ་བཙན་བྱོལ་བོད་མིའི་སྒྲིག་འཛུགས་ཀྱི་ཆབ་སྲིད་ཀྱི་འགོ་ཁྲིད་རྣམས་མང་གཙོའི་ལམ་ལུགས་ཐོག་ནས་འོས་འདེམས་གནང་སྟེ་ཆབ་སྲིད་དང་། འཛིན་སྐྱོང་གི་ཐུགས་འགན་ཡོངས་རྫོགས་བཞེས་ཀྱི་ཡོད་པ་མ་ཟད། བོད་མི་མང་སྤྱི་འཐུས་ལྷན་ཚོགས་བརྒྱུད་མང་ཚོགས་ལ་འགན་ཁུར་ལན་འདེབས་ཀྱང་གནང་བཞིན་ཡོད། ཅེས་འཁོད་ཡོད་འདུག
གཞན་ཡང་བསྒྲགས་དེ་ལྟར་ན། བོད་མི་མང་སྤྱི་འཐུས་ཚོགས་ལྷན་ཚོགས་ཀྱི་གོ་སྒྲིག་འོག་ཟླ་འདིའི་ཕྱི་ཚེས་ ༢༢ དང་ ༢༣ བཅས་ཉིན་གྲངས་གཉིས་རིང་འཚོག་གཏན་འཁེལ་བའི་ཚོགས་ཆེན་གྱི་དབུ་འབྱེད་མཛད་སྒོའི་ཐོག་༧གོང་ས་རྒྱལ་བ་རིན་པོ་ཆེ་མཆོག་ནས་བརྙན་ལམ་བརྒྱུད་བཀའ་སློབ་གནང་རྒྱུ་ཡིན་པ་མ་ཟད། བོད་དོན་ཐོག་རྒྱབ་སྐྱོར་ཤུགས་ཆེན་གནང་མཁན་ཨ་རིའི་གྲོས་ཚོགས་འོག་མའི་ཚོགས་གཙོ་ནེན་སི་པེ་ལོ་སི་མཆོག་ཆེད་ཕེབས་ཀྱིས་གསུང་བཤད་གནང་རྒྱུ་ཡིན་པ་རེད་འདུག
གཞན་ཡང་རྒྱལ་སྤྱིའི་གྲོས་ཚོགས་འཐུས་མིའི་ཚོགས་ཆེན་དེར་བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་མཆོག་དང་ཚོགས་གཙོ་སྦྲེལ་པོ་རྣམ་གཉིས་ཀྱི་དབུས། བོད་མི་མང་སྤྱི་འཐུས་སྤྱི་འཐུས་མི་འགྱུར་རྡོ་རྗེ་ལགས་དང་། སྤྱི་འཐུས་ཨ་ཀྲུག་ཚེ་བརྟན་ལགས། སྤྱི་འཐུས་བློ་བཟང་ཐུབ་བསྟན་ལགས། སྤྱི་འཐུས་ཀ་བྲག་དངོས་གྲུབ་བསོད་ནམས་ལགས། སྤྱི་འཐུས་གོ་བོ་བློ་བཟང་ཕན་བདེ་ལགས། སྤྱི་འཐུས་ཨ་ཀྲོང་རིན་ཆེན་རྒྱལ་མཚན་ལགས། སྤྱི་འཐུས་ཚེ་རིང་སྒྲོལ་མ་ལགས། སྤྱི་འཐུས་བསྟན་འཛིན་འཇིགས་བྲལ། སྤྱི་ཐུས་ཆོས་གྲགས་རྒྱ་མཚོ་ལགས་བཅས་ཕེབས་ཡོད་འདུག
རྒྱལ་སྤྱིའི་གྲོས་ཚོགས་འཐུས་མིའི་བོད་དོན་རྒྱབ་སྐྱོར་ཚོགས་ཆེན་ཐོག་མ་དེ་ཕྱི་ལོ་ ༡༩༩༤ ལོར་རྒྱ་གར་གྱི་རྒྱལ་ས་ལྡི་ལིར་འཚོགས་ཡོད་ཅིང་། དེའི་རྗེས་རིམ་པས་ཕྱི་ལོ་ ༡༩༩༤ ལོར་ཡུ་རོབ་ཀྱི་ལི་ཐུ་ནིཡའི་རྒྱལ་ས་ཝིལ་ནུས་དང་། ཕྱི་ལོ་ ༡༩༩༧ ལོར་ཨ་རིའི་རྒྱལ་ས་ཝ་ཤིང་ཊོན། ཕྱི་ལོ་ ༢༠༠༥ ལོར་སི་ཀོ་ཊི་ལེན་ཌིའི་རྒྱལ་ས་ཨེ་ཌན་སྦ་རག་དང་། ཕྱི་ལོ་ ༢༠༠༩ ལོར་ཨི་ཊ་ལིའི་རྒྱལ་ས་རོམ། ཕྱི་ལོ་ ༢༠༡༢ ལོར་ཁེ་ན་ཌའི་རྒྱལ་ས་ཨོ་ཊ་ཝ་དང་། ཕྱི་ལོ་ ༢༠༡༩ ལོར་ལ་ཊི་ཝི་ཡའི་རྒྱལ་ས་རི་གྷ་བཅས་ལ་འཚོགས་ཡོད་པ་རེད་འདུག
གསར་འགོད་པ། པ་སངས་ཚེ་རིང་།
