ལྷ་སའི་རོང་ཁུལ་ནས་བོད་སིལ་བུའི་དུས་སྐབས་ཀྱི་རྣམ་པ་མངོན་པའི་ནང་བསྟན་བྲག་བརྐོས་རི་མོ་གསར་རྙེད་བྱུང་།

ལྷ་སའི་རོང་ཁུལ་ནས་བོད་སིལ་བུའི་དུས་སྐབས་ཀྱི་རྣམ་པ་མངོན་ཞིང་བཟོ་རྩལ་ཡག་ཤོས་དང་གཞི་ཁྱོན་ཆེ་ཤོས། ལོ་རབས་སྔ་ཤོས་བཅས་ཡིན་པའི་ནང་བསྟན་བྲག་བརྐོས་རི་མོ་གསར་རྙེད་བྱུང་།

ཁ་སང་རྒྱ་ནག་མི་དམངས་དྲ་བས་གནས་ཚུལ་སྤེལ་བ་ལྟར་ན། ཉེ་ལམ་བོད་རང་སྐྱོང་ལྗོངས་ཟེར་བའི་རིག་དངོས་སྲུང་སྐྱོབ་ཞིབ་འཇུག་ལྟེ་གནས་ཁང་གིས། ལྷ་ས་སྐྱིད་ཆུའི་ལྷོ་ངོས་དང་ལྷ་ས་གྲོང་ཁྱེར་དང་བར་ཐག་ལེ་དབར་བཅུ་ཙམ་གྱི་སར་གནས་པའི་སྟག་རྩེ་རྫོང་ཁོངས་ཚལ་གུང་ཐང་ཤང་གི་རི་ཁུག་ནས། བྱམས་པ་དང་རྒྱལ་སྲིད་སྣ་བདུན། རྣམ་པར་སྣང་མཛད་དང་སྤྱན་རས་གཟིགས་སོགས་ཀྱི་སྐུ་འདྲ་དང་བོད་ཡིག་བརྐོས་མ་ཁྱོན་ ༢༢ གསར་དུ་རྙེད་སོན་བྱུང་ཡོད་འདུག

དེ་འབྲེལ་ཐད། བོད་རང་སྐྱོང་ལྗོངས་ཟེར་བའི་རིག་དངོས་སྲུང་སྐྱོབ་ཞིབ་འཇུག་ལྟེ་གནས་ཁང་གིས། བྲག་བརྐོས་དེ་དག་ནི་ད་སྔ་བར་ལྷ་སའི་རོང་ཁུལ་ནས་ཤེས་རྟོགས་བྱུང་བའི་ལོ་རབས་སྔ་ཤོས་དང་། བཟོ་རྩལ་ཡག་ཤོས། གཞི་ཁྱོན་ཆེ་ཤོས་བཅས་ཡིན་པའི་གནའ་རབས་ཀྱི་ནང་བསྟན་བྲག་བརྐོས་རེད། ཅེས་བརྗོད་ཡོད་པ་དང་། བྲག་བརྐོས་རི་མོ་དེ་དག་ཚལ་གུང་ཐང་ཤང་གི་རི་ཁུལ་གྱི་ས་ཚིགས་མི་འདྲ་བ་ ༦ ནས་གསར་དུ་རྙེད་ཡོད་ཅིང་། ཐོག་མར་ཁྱབ་བསྒྲགས་བྱས་པའི་དཔྱད་ཡིག་ཅིག་ཆགས་ཀྱི་ཡོད་འདུག

ད་ལྟ་གསར་དུ་རྙེད་ཅིང་ས་ཁོངས་གཅིག་ཏུ་འདུས་ཡོད་པའི་བྲག་བརྐོས་རི་མོ་དེ་དག་དུས་རབས་དགུ་པའི་དུས་མཇུག་ནས་དུས་རབས་ ༡༡ པ་དང་ དུས་རབས་་༡༡ པ་ནས་་༡༣ པའི་བར་དུས་སྐབས་གཉིས་སུ་ཕྱེ་ཡོད་པ་དང་། བྲག་བརྐོས་སྐུ་བརྙན་གྱི་བཟོ་རྩལ་ནི་སྲིབ་ཐིག་རྐོ་རྩལ་ཡིན་ཞིང་། རྐོ་རྩལ་བྱང་ཆུབ་པ་དང་ཐིག་རིས་ཡག་པོ་ཡོད་པ། དེ་བཞིན་མཐའ་འཁོར་ས་ངོས་སུ་རྡོའི་བཟོ་བཀོད་གནའ་ཤུལ་མཐོང་རྒྱུ་ཡོད་པས་སྔ་དུས་ཀྱི་ནང་པའི་ཉམས་ལེན་བྱ་ཡུལ་དང་འབྲེལ་བ་ཡོད་པའི་ཚོད་དཔག་བྱེད་ཐུབ། བྲག་བརྐོས་ཁྲོད་དུ་སྐུ་ཡི་བཀོད་པ་ཁ་ཤས་སུ་བོད་ཀྱི་བཙན་པོའི་དུས་མཇུག་གམ་བོད་སིལ་བུའི་དུས་ཀྱི་རྣམ་པའང་མངོན་ཡོད་སྐོར་སོགས་བརྗོད་འདུག

བོད་རང་སྐྱོང་ལྗོངས་ཟེར་བའི་རིག་དངོས་ཞིབ་འཇུག་ལྟེ་གནས་ཁང་གི་ཞིབ་འཇུག་པ་ཞྭ་སྒབ་དབང་འདུས་ཀྱིས་བྲག་བརྐོས་དེ་དག་ཤེས་རྟོགས་བྱུང་བ་ལས་བོད་ཀྱི་ལྟེ་བའི་ས་ཁུལ་གྱི་ནང་བསྟན་གྱི་བསམ་བློ་དང་། སྒྱུ་རྩལ་གྱི་ལོ་རྒྱུས། ལོ་རྒྱུས་དང་རིག་གནས་བཅས་ལ་ཞིབ་འཇུག་བྱེད་པར་དངོས་རྫས་ཀྱི་དཔྱད་གཞི་རྩ་ཆེན་མཁོ་འདོན་བྱས་ཡོད། ཅེས་བརྗོད་ཡོད་པ་དང་། བྲག་བརྐོས་རི་མོ་དེ་དག་ཕྱི་ལོ་ ༢༠༡༧ ལོ་ནས་འཚོལ་ཞིབ་ཀྱི་ལས་གཞི་མགོ་བརྩམས་ཏེ་གསར་རྙེད་བྱུང་བའི་རིག་དངོས་ཤ་སྟག་ཡིན་པ་རེད།