ཨོ་གླིང་སིཌ་ནིར་རྟེན་གཞི་བྱས་པའི་འཕྲུལ་རིག་སློབ་གྲྭ་ཆེན་མོའི་ནང་རྒྱ་ནག་གཞུང་ཚབ་པས་རྒྱ་ནག་དང་ཨོ་གླིང་གི་འབྲེལ་ལམ་སྐོར་གཏམ་བཤད་སྤེལ་སྐབས་སྤྱི་ཟུར་གདོང་འདུས་སྐྱིད་འཛོམས་ལགས་དང་བོད་དོན་ལས་འགུལ་བ་རྣམས་ཀྱིས་ཚོགས་རའི་ནང་ངོ་རྒོལ་སྐད་འབོད་བྱས་ཡོད་འདུག
Former Tibetan Parliament member Kyizom Dongdue interrupts Chinese ambassador’s speech at UTC on 23 June, 2022. Photo: SBS news
དེ་རིང་ཕྱི་ཚེས་ ༢༤ ཉིན་ཨོ་གླིང་དུ་ཡོད་པའི་རྒྱ་ནག་གཞུང་ཚབ་པ་ཤའོ་ཆན་ (Xiao Qian) ཟེར་བ་དེས་ཡུལ་དེའི་གྲོང་ཁྱེར་སིཌ་ནིར་རྟེན་གཞི་བྱས་པའི་འཕྲུལ་རིག་སློབ་གྲྭ་ཆེན་མོའི་(University of Technology Sydney) ལས་རིམ་ཞིག་གི་ཐོག་རྒྱ་ནག་དང་ཨོ་གླིང་གི་འབྲེལ་ལམ་སྐོར་གཏམ་བཤད་སྤེལ་བཞིན་པའི་སྐབས་དེར། བོད་མི་མང་སྤྱི་འཐུས་ཟུར་པ་གདོང་འདུས་སྐྱིད་འཛོམས་ལགས་ཀྱིས་དབུ་འཁྲིད་དེ། ཡུལ་དེའི་གཞོན་སྐྱེས་ལས་འགུལ་བ་དང་བོད་དོན་རྒྱབ་སྐྱོར་བ་ཌེ་རུ་པེབ་ལོ་(Drew Pavlo) སོགས་ལས་འགུལ་བ་བདུན་ཙམ་རིམ་པ་བྱས་ཏེ་ཚོགས་རའི་ནང་དུ་ཕྱིན་ཏེ་བོད་དང་ཧོང་ཀོང་། ཤར་ཊུར་ཀི་སི་ཐན་བཅས་ལ་རང་དབང་དགོས་ཞེས་པའི་ཤོག་བྱང་འཕྱར་ནས་ངོ་རྒོལ་བྱས་ཡོད་འདུག
ཨོ་གླིང་གི་ཨེ་བྷི་སི་གསར་ཁང་(ABC News)གིས་སྤེལ་བའི་བརྙན་ལམ་གནས་ཚུལ་ནང་། འདི་ལོའི་ལོ་མགོ་ཙམ་ལ་གསར་དུ་བསྐོ་གཞག་བྱས་པའི་རྒྱ་ནག་གི་གཞུང་ཚབ་པ་ཞའོ་ཆན་ཟེར་བ་དེས་གཏམ་བཤད་འགོ་བཙུགས་ནས་སྐར་ཆ་འགའ་ཤས་ལས་མ་སོང་བར། འདས་པའི་ལོ་ངོ་དུ་མའི་རིང་ནས་ཨོ་གླིང་ནང་རྒྱ་ནག་གི་ཤུགས་རྐྱེན་ལྡོག་ཐབས་དང་རྒྱ་ནག་གཞུང་གིས་བོད་དང་ཤར་ཊུར་ཀི་སི་ཐན། ཧོང་ཀོང་བཅས་ནང་སྤེལ་བཞིན་པའི་སྲིད་ཇུས་ལ་ངོ་རྒོལ་ཤུགས་ཆེན་པོ་བྱེད་མཁན་གཞོན་སྐྱེས་ལས་འགུལ་བ་དང་ཆབ་སྲིད་པ་ཌི་རུ་པེབ་ལོ་ (Drew Pavlo) ཡིས་གཞུང་ཚབ་པའི་གཏམ་བཤད་ཀྱི་བར་ནས། དབྱིན་ཡིག་ཐོག་ Free Tibet, Free East Turkistan, Free Hong Kong ཞེས་འཁོད་པའི་ཤོག་ལྷེབས་ཤིག་འཕྱར་ཏེ། དམར་གསོད་གཏོང་མཁན་ཞིག་ལ་སྡིངས་ཆ་སྤྲོད་རྒྱུ་མཚམས་འཇོག་བྱ་དགོས། ཞེས་དང་། ཞའོ་ཆན་ཟེར་བ་དེར་མཛུབ་མོ་བཙུགས་ཏེ། ཁོ་ནི་ཁ་ཆེ་མི་མང་ས་ཡ་ ༡ ལྷག་བཀག་སྐྱིལ་ཁང་དུ་འཇུག་མཁན་གྱི་སྒེར་གཅོད་རིང་ལུགས་པའི་འཐུས་ཚབ་རེད། ད་ལྟ་ང་ཚོས་སྐད་ཆ་བཤད་བཞིན་པའི་གནས་སྐབས་འདིར་(རྒྱ་ནག་གཞུང་གིས་)ཁ་ཆེ་ཡུ་གུར་རྣམས་ལ་བཙན་གཡེམ་དང་མནར་གཅོད་གཏོང་གི་ཡོད། ཅེས་དང་། ང་ཚོས་ཡུ་གུར་དང་བོད་མི། ཧོང་ཀོང་བ་བཅས་ཀྱི་རང་དབང་ལ་རྒྱབ་སྐྱོར་བྱེད་ཀྱི་ཡོད། ཅེས་དང་། ཨོ་གླིང་གཞུང་གིས་བཀག་སྐྱིལ་ཁང་འཛུགས་མཁན་གཞུང་ཞིག་དང་ཚོང་འབྲེལ་བྱ་རྒྱུ་མེད་སྐོར་གྱི་འབོད་ཚིག་བསྒྲགས་ཡོད་འདུག
Drew Pavlo held signs and shouted during Xiao Qian’s speech at UTS.(ABC News: Dong Xing)
སྐབས་དེར་རྒྱ་ནག་གཞུང་ཚབ་པས་བལྟས་བསྡད་པ་ཙམ་ལས་ཐད་ཀར་གང་ཡང་བཤད་མེད་ནའང་། ཁོ་རང་ཨོ་གླིང་དང་རྒྱ་ནག་གི་འབྲེལ་ལམ་ལྟེ་གནས་ཁང་(Australia-China Relations Institude) གིས་མགྲོན་འབོད་བྱས་པ་ལྟར་བསམ་ཚུལ་བརྗེ་རེས་ཀྱི་ཆེད་དུ་བསླེབས་པ་ཞིག་ཡིན་པ་དང་། སོ་སོའི་བསམ་ཚུལ་བརྗོད་རྒྱུ་དང་དེར་བཅར་མཁན་རྣམས་ཀྱི་བསམ་ཚུལ་དང་དྲི་བར་ལན་འདེབས་བྱ་རྒྱུའི་སྡིངས་ཆ་ཞིག་ཡིན་པ་ལྟར། སོ་སོའི་བསམ་ཚུལ་རྣམས་ལུགས་མཐུན་ཚུལ་མཐུན་གྱི་སྒོ་ནས་བཤད་དགོས་སྐོར་བརྗོད་ཡོད་འདུག
ལས་འགུལ་བ་ཞིག་གིས་ལག་ལ་ཤོག་བྱང་ཞིག་ཁྱེར་ཏེ་སྨྲ་བརྗོད་གང་ཡང་མེད་པའི་ཐོག་ནས་ངོ་རྒོལ་བྱས་རྗེས། སྤྱི་ཟུར་གདོང་འདུས་སྐྱིད་འཛོམས་ལགས་ཀྱིས་ཤོག་བྱང་ཞིག་འཕྱར་ཏེ། བོད་དང་ཤར་ཊུར་ཀི་སི་ཐན། ཧོང་ཀོང་བཅས་ལ་རང་དབང་དགོས་པའི་འབོད་ཚིག་བསྒྲགས་སོང་བ་མ་ཟད། གཙུག་ལག་སློབ་གྲྭ་ཆེན་མོ་ཞིག་གིས་མི་རིགས་རྩ་མེད་གཏོང་མཁན་གྱི་སྒེར་གཅོད་རིང་ལུགས་པའི་འཐུས་ཚབ་ཅིག་ལ་སྡིངས་ཆ་སྤྲོད་རྒྱུ་མེད། ཅེས་རྒྱ་གཞུང་ལ་ངོ་རྒོལ་བྱས་རྗེས་ལས་རིམ་གོ་སྒྲིག་པས་གཏམ་བཤད་བྱ་སའི་ཚོགས་ཁང་དུ་ཕྱིར་ཕུད་བཏང་ཡོད་འདུག ཁོང་མོའི་རྗེས་སུ་བསྐྱར་དུ་ལས་འགུལ་བ་བཞི་ཡིས་ངོ་རྒོལ་བྱས་ཡོད་འདུག དེའི་ཐོག་ལས་འགུལ་བ་ཞིག་གིས་རིག་གནས་གསར་བརྗེ་ཟེར་བའི་སྐབས་ཀྱི་དམར་དམག་གི་ཆས་གོས་གྱོན་པའི་རྐྱེན་གྱིས་སྒོ་སྲུང་བས་ཚོགས་ཁང་ནང་ཞུགས་བཅུག་མེད་པ་རེད་འདུག
Chinese ambassador to Australia Xiao Qian’s address on the relationship between two countries . Photo: ABC news
ཁ་སང་གི་གཏམ་བཤད་ཀྱི་ལས་རིམ་དེ་ནི་སིཌ་ནི་འཕྲུལ་རིག་སློབ་གྲྭ་ཆེན་མོའི་ཁྱབ་ཁོངས་སུ་གཏོགས་པའི་ཨོ་གླིང་དང་རྒྱ་ནག་གི་འབྲེལ་ལམ་ལྟེ་གནས་ཁང་ཞེས་པའི་ཚན་པས་གོ་སྒྲིག་ཞུས་པ་ཞིག་ཡིན་པ་དང་། ཕྱི་ལོ་ ༢༠༢༠ ལོར་རྒྱ་ནག་གི་གྲོང་ཁྱེར་ཝུ་ཧན་ནས་མཆེད་པའི་ཏོག་དབྱིབས་གཉན་རིམས་འཛམ་གླིང་ཡོངས་དང་། ལྷག་པར་དུ་ཨོ་གླིང་དུ་ཁྱབ་གདལ་ཤུགས་ཆེར་བྱུང་བའི་རྐྱེན་གྱིས་གཞུང་མང་གཉིས་ལ་བརྡབ་གསིག་ཆེན་པོ་ཐེབས་ཡོད་པ་ལྟར། ཨོ་གླིང་གཞུང་གིས་རྒྱ་ནག་གི་འཇིགས་སྐུལ་དང་གནོན་ཤུགས་ལ་མ་འཛེམས་པར། མཉམ་འབྲེལ་རྒྱལ་ཚོགས་ནང་ཏོག་དབྱིབས་གཉན་རིམས་ཀྱི་འབྱུང་ཁུངས་རྩད་གཅོད་དགོས་པའི་གྲོས་གཞིའི་ཐོད་སྣེ་ཁྲིད་ཀྱི་ནུས་པ་བཏོན་པའི་རྐྱེན་གྱིས། རྒྱ་ནག་གཞུང་གིས་ཨོ་གླིང་གི་ཚོང་ཟོག་ལ་ཁྲལ་སྣོན་དང་བཀག་སྡོམ་གྱིས་མཚོན་པའི་ཡ་ལན་སྤྲད་པར་བརྟེན། རྒྱ་ནག་དང་ཨོ་གླིང་དབར་གྱི་ཕྱི་འབྲེལ་དང་ཚོང་འབྲེལ་བཅས་ལ་དོ་ཕོག་ཆེན་པོ་ཐེབས་ཡོད་ལ། ལྷག་པར་དུ་རྒྱ་ནག་གཞུང་གིས་ཨོ་གླིང་གི་མི་སེར་ཡིན་པའི་གསར་འགོད་པ་ཞིག་གང་བྱུང་འཛིན་བཟུང་བཀག་ཉར་བྱས་པ་དང་། ཡང་ཉེ་ཆར་རྒྱ་ནག་གིས་ཨོ་གླིང་གི་ཉེ་འཁྲིས་སུ་ཆགས་པའི་སོ་ལོ་མོན་གླིང་ཕྲན་ཚོ་ཁག་རྒྱལ་ཁབ་ (Solomon Islands Nation) དང་བདེ་འཇགས་སོགས་ཀྱི་ཐད་ལ་གྲོས་མཐུན་བཞག་པར་བརྟེན། སྤྱི་ཡོངས་ནས་རྒྱལ་ཁབ་གཉིས་ཀྱི་འབྲེལ་ལམ་དེ་ལོ་རྒྱུས་ཁྲོད་ཀྱི་ཆེས་ཛ་དྲག་ལྟ་བུར་གྱུར་ཡོད།
ཁ་སང་གི་གཏམ་བཤད་ལས་རིམ་ཐོག་རྒྱ་ནག་གི་གཞུང་ཚབ་པ་དེས་རྒྱལ་ཁབ་གཉིས་ཀྱི་འབྲེལ་ལམ་སྔར་བཞིན་ལེགས་ལམ་དུ་འཁྲིད་ཐབས་དང་། རྒྱ་ནག་དང་ཨོ་གླིང་གི་འབྲེལ་ལམ་ནི་གྲོགས་འདྲིས་ཀྱི་འབྲེལ་ལམ་ཞིག་ཡིན་པ་དེ་འགྱུར་ཐབས་མེད་པ་དང་། རྒྱ་ནག་གི་ཡར་རྒྱས་ནི་ཨོ་གླིང་ལ་མཚོན་ན་གོ་སྐབས་ཤིག་ལས་ཉེན་ཁ་ཞིག་ལ་མཐོང་མི་ཉན་སྐོར་བརྗོད་འདུག ཞའོ་ཆན་གྱི་གཏམ་བཤད་གྲུབ་རྗེས་ཨོ་གླིང་དང་རྒྱ་ནག་གི་འབྲེལ་ལམ་ལྟེ་གནས་ཁང་ཞེས་པའི་ཚན་པའི་འགན་འཛིན་གྱིས་གཙོ་སྐྱོང་འོག་དྲི་བ་དྲིས་ལན་གྱི་ལས་རིམ་འཚོགས་ཡོད་ཀྱང་། གཙོ་སྐྱོང་བས་བསྐུར་བའི་དྲི་བ་རྣམས་སྔར་ནས་གཞུང་ཚབ་པར་བཏང་ནས་བསྐྱར་ཞིབ་བྱས་པ་ཤ་སྟག་ཡིན་སྐོར་གསལ་བཤད་བྱས་འདུག་ལ། ཚོགས་རའི་ནང་ངོ་རྒོལ་སྐད་འབོད་བྱས་པ་ལ་བརྟེན་ནས་ལས་རིམ་འཆར་གཞི་ལྟར་ཕྱིན་ཐུབ་མེད་འདུག
གསར་འགོད་པ། པ་སངས་ཚེ་རིང་།
