༧གོང་ས་མཆོག་ལ་སྒྲོལ་དཀར་གྱི་ཚེ་སྒྲུབ་དང་འབྲེལ་བའི་བརྟན་བཞུགས་བསྟར་འབུལ་ཞུས་སོང་།

དེ་རིང་བོད་མིའི་ཚོགས་སྡེ་ཁག་ལྔ་ཡིས་༧གོང་ས་མཆོག་ལ་བརྟན་བཞུགས་ཕུལ་སྐབས། ༧གོང་ས་མཆོག་གིས་སླར་ཡང་མགོན་པོ་གང་ཉིད་མཆོག་ད་དུང་ལོ་བཅུ་ཕྲག་གཉིས་གསུམ་རིང་འཚོ་བཞུགས་མཛད་རྒྱུའི་བཀའ་སློབ་སྩལ་གནང་སོང་།

དེ་རིང་སྔ་དྲོའི་ཆུ་ཚོད་ ༧།༣༠ སྟེང་། བཞུགས་སྒར་ཆོས་གླིང་ཐེག་ཆེན་གཙུག་ལག་ཁང་དུ། ཡར་འབྲོག་གཞིས་བྱེས་མི་མང་དང་འཇོལ་ཀོང་རྒྱལ་གསུམ་གཞིས་བྱེས་མི་མང་། མངའ་རིས་སྤྱི་མཐུན་ཚོགས་པ་ཐུན་མོང་དང་སེར་བྱེས་དགེ་བཤེས་གྲོལ་ལྡན་རྒྱ་མཚོ། དེ་བཞིན་བྱང་རིས་གཞིས་བྱེས་མི་མང་བཅས་ཚོགས་པ་ལྔ་ཐུན་མོང་གིས་བོད་བསྟན་སྲིད་མི་རིགས་དང་བཅས་པའི་སླད་དུ་༧གོང་ས་རྒྱལ་བ་རིན་པོ་ཆེ་མཆོག་སྐུ་ཚེ་བསྐལ་བརྒྱར་བརྟན་ཕྱིར་བརྟན་བཞུགས་བསྟར་འབུལ་ཞུས་གནང་སོང་།

སྐབས་དེར་མགོན་པོ་གང་ཉིད་མཆོག་གིས། དེ་རིང་འདིར་འཇོལ་ཀོང་རྒྱལ་གསུམ་བརྟན་བཞུགས་གོ་སྒྲིག་ཚོགས་ཆུང་ཟེར་བ་ཞིག་འདུག དེ་རིང་འདིར་སྒྲོལ་དཀར་གྱི་ཚེ་སྒྲུབ་དང་འབྲེལ་བའི་བརྟན་བཞུགས་གནང་གི་ཡོད། ངོས་ལས་དང་སྨོན་ལམ་གྱི་ཐོག་ནས་བོད་ཀྱི་བསྟན་སྲིད་དང་འབྲེལ་བ་ཞེ་དྲགས་ཡོད་བསྡད་པ་ཞིག་རེད། ལས་དང་སྨོན་ལམ་བཙན་པོ་ཞེ་དྲགས་རེད། དེ་དངོས་ཡོད་གནས་ཚུལ་རེད། བོད་གངས་ལྗོངས་ཀྱི་རྒྱལ་བསྟན་ཆབ་སྲིད་མི་མང་གི་བདེ་རྩ་དང་བཅས་པར་འཕར་འབིག་ཞེ་དྲགས་ཡོང་བཞིན་པའི་ཁ་ཐུག་དེར། ངོས་ལ་༧རྒྱལ་བའི་མིང་ཐོབ་པ་ནས་བཟུང་། ད་ལྟའི་བར་འདས་པའི་ལོ་རྒྱུས་ནང་སྒྲོ་བཏགས་བཞག་པ་གང་ཡང་མིན་པར། ངོས་ནས་བོད་བསྟན་སྲིད་མི་མང་ལ་ཕན་ཐོགས་བཞག་ཡོད་པ་འཛམ་གླིང་ཀུན་གསལ་དང་དངོས་གནས་ཚུལ་རེད། ད་ལྟ་ལོ་བརྒྱད་ཅུ་གྱ་གྲངས་ཡིན་པ་དང་དེ་ནས་དགུ་བཅུ་དང་བརྒྱ་ལྷག་བསྡད་དེ། ངོས་ནས་ད་དུང་བོད་རྒྱ་ཆེ་མི་མང་གི་བསྟན་འགྲོའི་དོན་བསྒྲུབ་པའི་སེམས་ཤུགས་ཡོད་ལ། གཏན་གཏན་བྱ་ཐུབ་ཀྱི་རེད། ཤེས་སོང་ངམ། ཁྱེད་རང་ཚོ་བློ་བདེ་པོ་བྱས་ནས་བཞུགས་ཨ།

ངོས་ཀྱི་གཟུགས་གཞི་ཡག་ཐག་ཆོད་དང་ཀླད་པ་ཡང་གྲུང་ཐག་ཆོད་ཡོད་པས། ད་དུང་ལོ་བཅུ་ཕྲག་གཉིས་གསུམ་ཞིག་སྡོད་ཐུབ་ཀྱི་རེད། ང་ཚོ་བོད་ཀྱི་བདེན་མཐའ་སེལ་བར་རེ་བ་རྒྱག་ཆོག་གི་རེད། དེ་རིང་ཁ་སང་རྒྱ་ནག་ནང་འགྱུར་བ་ཞེ་དྲགས་འགྲོ་ཡི་ཡོད་པ་དང་བོད་ཀྱི་ནང་ཆོས་ལ་དོ་སྣང་ཤུགས་ཆེན་པོ་བྱེད་ཀྱི་འདུག་པ་མ་ཟད། ངོས་ཀྱི་མིང་ཐོག་ལའང་དོ་སྣང་བྱེད་ཀྱིན་འདུག གང་ལྟར། དེང་སྐབས་བོད་ཀྱི་ཆོས་དང་རིག་གཞུང་ལ་འཛམ་གླིང་གིས་དོ་སྣང་དང་ཚན་རིག་པའི་ནང་ནས་ཀྱང་དོ་སྣང་བྱེད་ཡུལ་ཞིག་ཆགས་བསྡད་ཡོད། དེར་བརྟེན། ང་ཚོ་བོད་ཀྱི་བདེན་དོན་དེ་མུ་མཐུད་འཛམ་གླིང་སྒང་གནས་ཐུབ་པ་མ་ཟད། འཛམ་གླིང་གང་སར་ཕན་ཐོགས་ངེས་ཅན་ཞིག་ཡོང་བར་ཕལ་ཆེ་ངོས་ནས་ཚོད་ཐིག་གི་འདུག ང་རང་གི་ངོས་ནས་གང་ཡོང་ཡོང་བྱ་རྒྱུ་ཡིན།

ངོས་ནས་གཙོ་བོ་ཆབ་སྲིད་ཀྱི་ལས་འགན་བཞག་སྟེ་རྒས་ཡོལ་བྱས་ནས་བསྡད་ཡོད། རྒྱ་གར་གྱི་སྲིད་བློན་ནེ་རུས་༧རྒྱལ་བ་རིན་པོ་ཆེར་བཞུགས་ས་ཞིག་གནང་ན་ཡག་པོ་འདུག་ཅེས་གསུངས་པ་ལྟར། ད་ལྟ་ངོས་རང་ཀཱང་རའི་ནང་སྡོད་བཞིན་པ་ཡིན། དེ་ནས་ང་ཚོའི་ཆབ་སྲིད་ཀྱི་ལས་ཀ་དེ་དག་གྲོས་ཚོགས་དང་སྲིད་སྐྱོང་གིས་བྱས་ནས་ཡག་ཐག་ཆོད་ཡོད། དེར་བརྟེན། ངོས་ནས་འདིར་ཡ་ང་འདྲ་པོ་བྱས་ནས་འགན་འཁུར་དགོས་པ་གང་ཡང་མི་འདུག ཁོང་རང་ཚོ་དངོས་གནས་དྲང་གནས་དྲང་པོ་དྲང་བཞག་དང་ཚགས་ཚུད་ཐག་ཆོད་འདུག

ད་ལྟའི་བར་དུ་ངོས་ནས་དཀའ་ལས་བརྒྱབ་པ་ཡིན། དཀའ་ལས་བརྒྱབ་པར་བྱས་རྗེས་ཏོག་ཙམ་དགོས་པ་རེད་དེ། ང་ལ་ལྷོད་ལྷོད་སྡོད་རྒྱུ་བྱུང་ན་བྱས་རྗེས་གཞན་དགོས་རྒྱུ་མི་འདུག ངོས་ནས་ཉིན་རེ་བཞིན་དུ་བྱང་ཆུབ་ཀྱི་སེམས་སྒོམ་ནས་སྡོད་ཀྱི་ཡོད། རང་གཞན་དོན་ནི་རབ་བསྒྲུབ་ཕྱིར། །བྱང་ཆུབ་སེམས་ནི་བསྐྱེད་པར་བགྱི། ཞེས་རང་དོན་བྱང་ཆུབ་ཀྱི་སེམས་ཐོག་ནས་འགྲུབ་པ་དང་གཞན་དོན་ཡང་བྱང་ཆུབ་ཀྱི་སེམས་ཐོག་ནས་འགྲུབ་ཀྱི་འདུག ངོས་ནས་ཉམས་ལེན་གཙོ་བོ་དེ་བྱེད་ཀྱིན་ཡོད། ངོས་རང་འཕགས་པ་སྤྱན་རན་གཟིགས་དང་ཐུན་མོང་མ་ཡིན་པའི་འབྲེལ་བ་ཡོད་བསྡད་པ་ཞིག་ཡིན་དུས། བྱང་ཆུབ་ཀྱི་སེམས་བསྒོམ་རྒྱུ་དེ་ངས་གཙོ་བོ་བྱས་ནས་སྒོམ་གྱི་ཡོད། དེ་བཞིན་དུ། སྨྲ་བ་འགྲན་མེད་འགྲེལ་བརྗོད་ཤཀྱའི་དག །རྒྱལ་བའི་མཁྱེན་རབ་ཀུན་ཏུ་འཇམ་པའི་དབྱངས། །ཟབ་མོའི་ཐོས་བསམ་འཕགས་མཆོག་ཀླུ་སྒྲུབ་ཞབས།། ཞེས་གསུངས་དུས། ཀླུ་སྒྲུབ་ཀྱི་སློབ་མ་ཟླ་གྲགས་དང་ཟླ་གྲགས་ཀྱི་སློབ་མའི་གྲས་སུ་ངོས་རང་ཡོད་པར་དྲན་གྱི་འདུག ཅེས་གསུངས་སོང་།

ཡང་༧སྐུ་ཉིད་མཆོག་གིས། ད་ལྟ་བར་དུ་སྤྱིར་བོད་གངས་ཅན་ལྗོངས་ཀྱི་བསྟན་འགྲོའི་དོན་དང་། བོད་ནང་གི་རྒྱ་ཆེ་མི་མང་གིས་༧རྒྱལ་བ་བསྟན་འཛིན་རྒྱ་མཚོ་ཞེས་དགའ་མོལ་ཞེ་དྲགས་གནང་གི་འདུག ཚུར་དེ་ཙམ་གྱིས་དད་མོས་བྱས་ཡོང་དུས། དེ་དག་ལ་སྨོན་ལམ་ཚིག་སྐམ་པོ་ཞིག་མ་གཏོགས་བརྒྱག་རྒྱུ་མེད་ནའང་རྒྱག་དགོས་པ་ངོས་ཀྱི་ལས་འགན་རེད། དེ་ནས་རྒྱ་ནག་ནང་ཆ་བཞག་ན། དེང་སང་ཏཱ་ལའི་ལོག་སྤྱོད་པ་ཟེར་མཁན་མི་འདུག ཏཱ་ལའི་བླ་མས་ཆོས་སྐོར་བཤད་པ་དེ་ཚོ་ན་ལེནྡྲའི་ཆོས་བརྒྱུད་ཚན་རིག་དང་མཐུན་པ་འདུག་ཅེས་ཞུ་མཁན་འདུག དེ་རིང་འདིར་རིན་པོ་ཆེ་རྡོ་རྗེ་བློ་དཔོན་འདི་མགོ་དཀར་པོ་ཆགས་འདུག ངོས་རང་མགོ་དཀར་པོ་དེ་འདྲ་མེད། ད་དུང་ལོ་ཉུ་ཤུ་ཙམ་ཞིག་ཧྲ་ཐག་ཐག་བྱས་ནས་སྡོད་ཀྱི་རེད། ཁྱེད་རང་ཚོ་རྒྱ་ཆེ་མི་མང་གིས་སེམས་ཤུགས་བསྐྱེད་ནས་ཧུར་ཐག་བྱ་དགོས་རེད། ཧུར་ཐག་བྱ་རྒྱུ་དཔེ་གལ་ཆེན་པོ་རེད། ང་ཚོའི་གཉན་འཁྲེང་གི་དུས་ཚོད་སྡུག་ཤོས་དེ་ཕལ་ཆེ་ཡོལ་ཟིན་པ་དང་ད་ལྟ་ང་ཚོས་གནས་སྟངས་གསར་པ་ཞིག་གི་ཐོག་ནས་རེ་བ་གསར་པ་བརྒྱག་པའི་དུས་ལ་བསླེབས་ཡོད་པ་རེད། ཚང་མས་ཧུར་ཐག་གནང་ཤོག ཅེས་གསུངས།

གསར་འགོད་པ། སྐལ་བཟང་སྦྱིན་པ།