བོད་དོན་ཉན་ཞིབ་ཐོག་ཚོགས་གཙོ་ལས་རོགས་གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷ་ཝན་ལགས་ཀྱིས་མི་རིང་བར་ཨ་རིའི་གྲོས་ཚོགས་ནང་བོད་རྒྱ་གྲོས་མོལ་ཡོང་ཐབས་ཀྱི་ཁྲིམས་འཆར་ཞིག་གདོན་འཆར་ཡོད་སྐོར་གསུངས་འདུག
ཟླ་འདིའི་ཕྱི་ཚེས་ ༢༤ ཉིན་ཨ་རིའི་གྲོས་ཚོགས་གོང་འོག་གི་རྒྱ་ནག་ལས་དོན་ཚོགས་ཆུང་(Congressional Executive commission on China) གིས་བོད་ཀྱི་དཀའ་རྙོག་སེལ་བའི་འགག་རྩ་ཞེས་པའི་བརྗོད་གཞིའི་ཐོག་ཉན་ཞིབ་ཅིག་འཚོགས་ཡོད་ཅིང་། ཉན་ཞིབ་ཐོག་ཚོགས་ཆུང་གི་ཚོགས་གཙོ་ལས་རོགས་གྲོས་ཚོགས་འོག་མའི་འཐུས་མི་སྐུ་ཞབས་ཇིམ་མེག་གྷ་ཝན་ལགས་ཀྱིས་མི་རིང་བར་ཨ་རིའི་གྲོས་ཚོགས་ནང་བོད་རྒྱ་གྲོས་མོལ་ཡོང་ཐབས་ཀྱི་ཁྲིམས་འཆར་ཞིག་གདོན་འཆར་ཡོད་སྐོར་གསུངས་འདུག
ད་ལན་གྱི་ཉན་ཞིབ་དེ་ནི་ཨ་རིའི་རྒྱལ་ས་ཝ་ཤིང་ཊོན་དུ་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་ཐེངས་ ༨ པ་འཚོག་པའི་སྐབས་དང་བསྟུན་ནས་གོ་སྒྲིག་ཞུས་པ་ཞིག་ཡིན་ཞིང་། ཉན་ཞིབ་འདིའི་བརྒྱུད་ནས་ད་བར་བོད་རྒྱའི་དཀའ་རྙོག་མ་སེལ་བའི་རྒྱུ་རྐྱེན་གང་ལ་ཐུག་ཡོད་མིན་ཐད་རྒྱུས་ལོན་བྱས་ཡོད་འདུག རྒྱ་ནག་ལས་དོན་ཚོགས་ཆུང་གི་ཚོགས་གཙོ་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ཇེབ་མེར་ཀེ་ལེ་ (Jeff Merkley)ལགས་དང་། ཚོགས་གཙོའི་ལས་རོགས་སྐུ་ཞབས་ཇེམ་མེག་གྷ་ཝན་ (James McGovern) ལགས་རྣམ་གཉིས་ཀྱིས་ཉན་ཞིབ་ཀྱི་གཙོ་སྐྱོང་དང་ཐོག་མའི་གླེང་སློང་གནང་བ་དང་འབྲེལ། བཀའ་ཁྲི་ཟུར་པ་བཀྲས་མཐོང་བསྟན་འཛིན་རྣམ་རྒྱལ་མཆོག་དང་། འཛམ་གླིང་རྩོད་རྙོག་འདུམ་འགྲིག་ཁང་གི་འགན་འཛིན་ཀེ་རེ་ཌ་དང་རྒྱལ་སྤྱིའི་ཁྲིམས་ལུགས་སློབ་དཔོན་སྐུ་ཞབས་མའེ་ཁལ་ཝན་ཝལ་ཊི་ (Michael Van Walt)། ཧོང་ཀོང་གཙུག་ལག་སློབ་གྲྭ་ཆེན་མོའི་ལོ་རྒྱུས་སློབ་དཔོན་ཟུར་པ་སྐུ་ཞབས་ཧོན་ཤང་ལོ་ (Hon-Shiang Lau) དང་། ཨ་རིའི་ཕུགས་འདུན་ (American Purpose) ཞེས་པའི་ཨ་རིའི་དུས་དེབ་ཅིག་གི་གདན་ཞུས་རྩོམ་སྒྲིག་པ་ཨེ་ལེན་བྷོག་ (Ellen Bork) བཅས་ཀྱིས་ཉན་ཞིབ་ཀྱི་དཔང་པོ་བྱས་ཏེ་ངག་ཐོག་ནས་བོད་ཀྱི་གནད་དོན་ཁག་འགྲེལ་བརྗོད་བྱས་ཡོད་ཅིང་། རྒྱལ་སྤྱིའི་བོད་དོན་ལས་འགུལ་བསྟི་གནས་ཁང་ངོས་ནས་ཡིག་ཐོག་ནས་དཔང་པོ་བྱས་ཡོད་པ་རེད་འདུག
ཉན་ཞིབ་ཀྱི་ཐོག་མར་ཚོགས་གཙོ་སྐུ་ཞབས་ཇེབ་མེར་ཀེ་ལེ་དང་ཇིམ་མེག་གྷ་ཝན་ལགས་རྣམ་གཉིས་ཀྱིས་ཨ་རིའི་གྲོས་ཚོགས་ངོས་ནས་བོད་དོན་གྱི་ཆེད་དུ། བོད་ཀྱི་སྲིད་ཇུས་དང་རྒྱབ་སྐྱོར་ཁྲིམས་ཡིག བོད་ནང་འགྲོ་བསྐྱོད་འདྲ་མཉམ་གྱི་ཁྲིམས་ཡིག་གིས་མཚོན་པའི་ལས་དོན་མང་པོ་གཉེར་དང་གཉེར་མུས་ཡིན་པ་དང་། རྒྱ་ནག་གཞུང་གིས་འཆར་གཞི་ཡོད་པའི་ཐོག་ནས་བོད་ཀྱི་སྐད་ཡིག་དང་ཆོས་རིག་སོགས་མི་རིགས་ཀྱི་ངོ་བོ་རྩ་མེད་གཏོང་བའི་སྲིད་ཇུས་ལག་བསྟར་བྱེད་བཞིན་པ་དང་། ༸གོང་ས་མཆོག་གི་གཙོས་པའི་བོད་ཀྱི་བླ་སྤྲུལ་རྣམ་པའི་ཡང་སྲིད་ལམ་ལུགས་ལ་ཐེ་བྱུས་བྱེད་བཞིན་པར་སྐྱོན་བརྗོད་དང་སྦྲགས། བོད་ཀྱི་དཀའ་རྙོག་དེ་ཐག་གཅོད་མ་ཟིན་པའི་གནད་དོན་ཞིག་ཡིན་སྐོར་གསུངས་འདུག
དེའི་རྗེས་ཉན་ཞིབ་ཀྱི་དཔང་མི་རྣམས་ཀྱིས་འགོ་འབྱེད་གཏམ་བཤད་སྤེལ་བ་དང་སྦྲགས། རྒྱ་ནག་ལས་དོན་ཚོགས་ཆུང་གི་ཚོགས་མི་རྣམས་ཀྱིས་དོགས་འདྲི་ཁག་ལ་ལན་འདེབས་བྱས་སོང་། དེ་ཡང་ཉན་ཞིབ་སྐབས་སྐུ་ཞབས་མའེ་ཀལ་ཝན་ཝལ་ཊི་དང་ཧོན་ཤང་ལོ་རྣམ་གཉིས་ཀྱིས་བོད་དེ་ནམ་ཡང་རྒྱ་ནག་གི་ཆ་ཤས་ཤིག་མིན་པར་རང་བཙན་གྱི་རྒྱལ་ཁབ་ཅིག་ཆགས་ཡོད་སྐོར་དང་། རྒྱ་ནག་གཞུང་གིས་བོད་དེ་ཁྲིམས་འགལ་གྱི་ཐོག་ནས་དབང་བསྒྱུར་བྱས་ཡོད་སྟབས། རྒྱལ་སྤྱིའི་སྤྱི་ཚོགས་ངོས་ནས་རྒྱ་ནག་ལ་གནོན་ཤུགས་སྤྲོད་དགོས་སྐོར་གསུངས་སོང་། དེ་བཞིན་བཀའ་ཁྲི་ཟུར་པ་བཀྲས་མཐོང་བསྟན་འཛིན་རྣམ་རྒྱལ་མཆོག་གིས་བོད་ཀྱི་ལོ་རྒྱུས་ངོ་སྤྲོད་དང་འབྲེལ། ཨ་རིའི་གཞུང་གི་རྒྱབ་སྐྱོར་ལ་བརྟེན་ནས་ད་ལྟ་ཐག་གཅོད་མ་ཟིན་པའི་བོད་རྒྱའི་དཀའ་རྙོག་དེ་རྒྱལ་སྤྱིའི་ཐོག་སྔར་བས་ཤེས་རྟོགས་ཆེ་རུ་ཕྱིན་ཡོད་སྐོར་སོགས་གསུངས་འདུག
ཟླ་འདིའི་ཕྱི་ཚེས་ ༢༢ དང་ ༢༣ ཉིན་འཚོགས་པའི་རྒྱལ་སྤྱིའི་གྲོས་ཚོགས་བོད་དོན་རྒྱབ་སྐྱོར་ཚོགས་ཆེན་ཐེངས་ ༨ པ་མཇུག་བསྒྲིལ་རྗེས་བསྒྲགས་གཏམ་ཞིག་སྤེལ་འདུག་པའི་ནང་། ཚོགས་ཆེན་ནང་མཉམ་ཞུགས་བྱེད་མཁན་གྲོས་ཚོགས་འཐུས་མི་རྣམས་ཀྱིས་བོད་དོན་དང་འབྲེལ་བའི་ཐོག་ལ་ཕན་ཚུན་དབར་དང་བོད་མི་མང་སྤྱི་འཐུས་ལྷན་ཚོགས་ལྷན་དུ་མཉམ་ལས་བྱ་རྒྱུའི་ཁས་ལེན་བྱས་ཡོད་པ་མ་ཟད། རྒྱལ་སྤྱིའི་བོད་དོན་གྲོས་ཚོགས་འཐུས་མིའི་འབྲེལ་མཐུད་ཁང་སླར་གསོ་དང་། གྲོས་ཚོགས་བོད་དོན་རྒྱབ་སྐྱོར་ཚོགས་པ་མེད་པའི་རྒྱལ་ཁབ་ཁག་ནང་ཚོགས་པ་གསར་འཛུགས་གནང་རྒྱུ་ཡིན་པ་དང་། ཚོགས་བཅར་བ་རྣམས་ཀྱིས་རྒྱལ་ཁབ་སོ་སོའི་དབུས་སའི་གྲོས་ཚོགས་ནང་བོད་དོན་དང་འབྲེལ་བའི་ཐོག་ལ་ཁྲིམས་འཆར་གཏན་འབེབ་དང་ཉན་ཞིག་བསྐོང་འཚོག་དགོས་པ་དང་། རྒྱ་ནག་གི་ལོ་རྒྱུས་ལོག་བཤད་ལ་ཁ་གཏད་གཅོག་དགོས་པ་སོགས་ཀྱི་སྐུལ་འདེད་བྱས་ཡོད་འདུག
གསར་འགོད་པ། པ་སངས་ཚེ་རིང་།
