རྒྱ་ནག་གཞུང་གིས་སི་ཁྲོན་མི་རིགས་དགེ་འོས་སློབ་ཆེན་གྱི་ཞིབ་འཇུག་སློབ་མ་ཉི་མ་ཞེས་པ་ཞིག་ལ་རྒྱལ་ཁབ་ཀྱི་གསང་བ་ཕྱིར་གྱར་གྱི་ཉེས་མིང་འོག་ལོ་ ༣ གྱི་བཙོན་འཇུག་ཁྲིམས་ཐག་བཅད་ཡོད་ཀྱང་ད་ལྟ་གང་དུ་ཡོད་མེད་ཤེས་རྟོགས་ཐུབ་མི་འདུག
འདི་ག་བོད་ཀྱི་དུས་བབ་གསར་ཁང་ལ་གནས་ཚུལ་མཁོ་སྤྲོད་གནང་བ་ལྟར་ན། འདི་ལོའི་ཕྱི་ཟླ་དང་པོའི་ནང་དར་རྩེ་མདོ་ས་གནས་ཉེན་རྟོག་པས། བོད་རིགས་ཞིབ་འཇུག་སློབ་མ་ཉི་མ་ལགས་ལ་གསང་ཉུལ་གྱི་དོགས་གཞིའི་འོག་གློ་བུར་དུ་འཛིན་བཟུང་བྱས་ཡོད་པ་དང་། ཟླ་འདིའི་ཕྱི་ཚེས་༥ ཉིན་གྱི་ཞོགས་པར་དར་རྩེ་མདོ་འབྲིང་རིམ་མི་མང་ཁྲིམས་ཁང་ཟེར་བས། ཉི་མ་ལགས་སུ་ངན་པར་ལག་འབྲེལ་དང་རྒྱལ་ཁབ་ཀྱི་གསང་བ་ཕྱིར་གྱར་གྱི་ཉེས་མིང་གཡོགས་ཏེ་ལོ་ ༣ གྱི་ཁྲིམས་ཐག་བཅད་འདུག
ཞིབ་འཇུག་སློབ་མ་ཉི་མ་ལགས་ནི་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་དར་རྩེ་མདོ་ཧྲི་ལེན་གྲོང་ཚོ་(舍联乡)ནས་ཡིན་ཞིང་། སི་ཁྲོན་མི་རིགས་དགེ་འོས་སློབ་ཆེན་དུ་ཁོང་གིས་བོད་ཀྱི་རིག་གཞུང་ཞིབ་འཇུག་སྐོར་ལ་སློབ་གཉེར་གནང་གི་ཡོད་འདུག དུས་རྒྱུན་བོད་སྐད་ཡིག་ལ་དམིགས་བསལ་དོན་གཉེར་གནང་མཁན་ཞིག་ཡིན་པ་མ་ཟད། དར་མདོའི་ཕྱི་གླིང་བ་མང་པོར་བོད་ཀྱི་ལོ་རྒྱུས་དང་སྤྱིའི་གནས་བབ་ངོ་སྤྲོད་སོགས་ཀྱི་ལས་ཀ་བྱེད་ཀྱི་ཡོད་པར་བརྟེན། ངོ་ཤེས་པའི་གཞོན་སྐྱེས་མང་པོ་ཞིག་གིས་ཁོང་ལ་ལོ་ཙཱ་བ་ཞེས་འབོད་ཀྱི་ཡོད་འདུག
