སྟོབས་ཆེན་རྒྱལ་ཁབ་བདུན་གྱིས་རྒྱ་ནག་གི་རྒྱུད་གཅིག་ལམ་གཅིག་ལ་ཁ་གཏད་གཅོག་ཐབས་ཀྱི་མ་དངུལ་བཙུགས།

འཛམ་གླིང་གི་སྟོབས་ཆེན་རྒྱལ་ཁབ་བདུན་གྱིས་ཨ་སྒོར་ཐེར་འབུམ་ ༦༠༠ ཡི་མ་དངུལ་བཏང་སྟེ་རྒྱ་ནག་གི་རྒྱུད་གཅིག་ལམ་གཅིག་ལ་ཁ་གཏད་གཅོག་རྒྱུ་དང་ཡར་རྒྱས་འགྲོ་བཞིན་རྒྱལ་ཁབ་ཁག་ལ་རོགས་སྐྱོར་བྱ་འཆར་ཡོད་པ་རེད།

photo. BBC, A show of unity: G7 leaders in Bavaria

ཁ་སང་ཕྱི་ཚེས་ ༢༦ ནས་ ༢༨ བར་ཉིན་གྲངས་གསུམ་རིང་ཡུ་རོབ་རྒྱལ་ཁབ་འཇར་མན་ནང་འཚོག་བཞིན་པའི་འཛམ་གླིང་སྟོབས་ཆེན་རྒྱལ་ཁབ་བདུན་གྱི་ཚོགས་ཆེན་ཐེངས་ ༤༨ པའི་སྟེང་། སྟོབས་ཆེན་རྒྱལ་ཁབ་བདུན་གྱིས་རྒྱ་ནག་གི་སྟོབས་ཤུགས་རྒྱ་སྐྱེད་ལ་གདོང་ལེན་དང་། ཡོ་ཁུ་རེན་གྱི་དམག་འཁྲུག་དང་འབྲེལ་ནས། ཨུ་རུ་སུར་དཔལ་འབྱོར་གྱི་ཉེས་ཆད། རྒྱལ་སྤྱིའི་དངོས་ཟོག་གི་རིན་གོང་ཕྱོགས་ཡོངས་ནས་འཕར་སྲིད་པའི་དཀའ་ངལ་སེལ་ཐབས་དང་། ཡོ་ཁུ་རེན་གྱི་སྲིད་འཛིན་གྱིས་དྲ་ལམ་བརྒྱུད་གཏམ་བཤད་སོགས་སྤེལ་ཡོད་པ་རེད།

ད་རེས་ཚོགས་ཐོག་ཏུ་སྟོབས་ཆེན་རྒྱལ་ཁབ་བདུན་གྱིས། རྒྱ་ནག་གཞུང་གིས་རྒྱུད་གཅིག་ལམ་གཅིག་གི་ཚོང་འབྲེལ་རྒྱ་སྐྱེད་ཀྱི་ཤུགས་རྐྱེན་འོག ཡར་རྒྱས་འགྲོ་བཞིན་པའི་འཛམ་གླིང་རྒྱལ་ཁབ་མང་དག་ཅིག་བུན་ལོན་ནང་གཡུགས་པ་དང་། ཆབ་སྲིད་ཀྱི་ཤུགས་རྐྱེན་སོགས་སྤྲོད་བཞིན་པར་ཁ་གཏད་གཅོག་སླད་དུ། ཨ་སྒོར་ཐེར་འབུམ་ ༦༠༠ ཡི་འཛུགས་སྐྲུན་གྱི་མ་དངུལ་གཏང་རྒྱུ་ཡིན་པ་ཡོངས་བསྒྲགས་བྱས་འདུག་པ་དང་། ཨ་རིའི་སྲིད་འཛིན་ཇོ་བྷའེ་ཌན་མཆོག་གིས། རྒྱ་ནག་གཞུང་འབྲེལ་གྱི་སྟངས་འཛིན་འོག་མ་དངུལ་གཏོང་གི་ཡོད་པའི་གནས་སྟངས་དང་མི་འདྲ་བར། ཨ་རི་དང་སྟོབས་ཆེན་རྒྱལ་ཁབ་བདུན་གྱིས། མ་དངུལ་ལ་ཚོད་འཛིན་ཡོད་པ་དང་ཚོགས་སྡེ་ཁག་དང་སྒེར་གྱི་མ་དངུལ་ལེན་མཁན་དག་ལ་ཁེ་སྤོགས་ལྡན་པའི་མ་དངུལ་བགོས་འགྲེམས་བྱ་རྒྱུ་ཡིན་པས། སྟོབས་ཆེན་རྒྱལ་ཁབ་བདུན་གྱི་མ་དངུལ་བུན་གཡར་གྱི་ལས་གཞིའི་ཁྲོད་ཞུགས་མཁན་རྒྱལ་ཁབ་དག་ལ་བུན་ལོན་ནང་ལྷུང་བའི་ཉེན་ཁ་མེད་པ་མ་ཟད། རྒྱ་ནག་ནང་བཞིན་ཐད་ཀར་ཆབ་སྲིད་མི་སྣ་དང་དཔལ་འབྱོར་ལྷན་ཁང་སོགས་སུ་བུན་ལོན་གཡར་ཏེ། རྒྱལ་ཁབ་གང་དེའི་ཆབ་དཔལ་གཉིས་ལ་ཉེན་ཁ་བསྐྲུན་བཞིན་པའི་ཉེན་ཁ་སོགས་མེད་སྐོར་བརྗོད་ཡོད་འདུག

ཐེངས་འདིའི་རྒྱ་ནག་གི་རྒྱུད་གཅིག་ལམ་གཅིག་གི་ཚོང་ལམ་དང་འབྲེལ། རྒྱ་ནག་གི་སྟོབས་ཤུགས་རྒྱ་སྐྱེད་ལ་ཁ་གཏད་གཅོག་ཐབས་ཀྱི་སྟོབས་ཆེན་རྒྱལ་ཁབ་བདུན་གྱི་སྲིད་ཇུས་དེ་ནི། འདས་ལོར་དབྱིན་ཡུལ་དུ་འཚོགས་པའི་སྟོབས་ཆེན་རྒྱལ་ཁབ་བདུན་གྱི་ཚོགས་ཐོག་ཏུ་མགོ་བཙུགས་པའི་ལས་གཞི་ཞིག་ཡིན་ཡང་། ད་ལོར་ལས་གཞི་དེའི་མ་དངུལ་ཇེ་མང་དུ་བཏང་སྟེ། འཛམ་གླིང་གི་ཡར་རྒྱས་འགྲོ་བཞིན་པའི་རྒྱལ་ཁབ་ཁག་ལ་ཁ་ཡོད་ལག་ཡོད་ཀྱིས་ཁེ་ཕན་ལྡན་པའི་རོགས་རམ་བྱ་རྒྱུ་ཡིན་པ་དང་། ལས་གཞི་དེའི་ཁྲོད་འདི་ལོར་ཨ་རིས་ཁྱོན་ཨ་སྒོར་ཐེར་འབུམ་ ༢༠༠ ཁ་སྣོན་དང་། ཡུ་རོབ་མཐུན་ཚོགས་ཀྱིས་ཨ་སྒོར་ཐེར་འབུམ་ ༣༠༠ ཁ་སྣོན་གྱིས་ཁྱོན་ཨ་སྒོར་ཐེར་འབུམ་ ༦༠༠ ཡོད་ཅིང་། ཨ་རིའི་སྲིད་འཛིན་བྷའེ་ཌན་མཆོག་གིས། ཡར་རྒྱས་འགྲོ་བཞིན་པ་དང་ཡོང་འབབ་ཞན་པའི་རྒྱལ་ཁབ་དག་གིས་མང་གཙོའི་རྒྱལ་ཁབ་ཁག་དང་མཉམ་འབྲེལ་བྱས་ཏེ་ལས་གཞི་དེའི་ཁེ་སྤོགས་ལེན་ཆོག་གི་ཡོད་ཅེས་བརྗོད་ཡོད་འདུག

ཡང་འཇར་མན་ནང་སྟོབས་ཆེན་རྒྱལ་ཁབ་བདུན་གྱི་ཚོགས་ཆེན་མགོ་བཙུགས་པ་དང་། ཨུ་རུ་སུས་ཡོ་ཁུ་རེན་གྱི་རྒྱལ་ས་ཀེ་ཝི་ནང་མཁའ་རྒོལ་མེ་སྒྱོགས་འཕངས་ཏེ། མི་གཅིག་འདས་གྲོངས་དང་མི་དྲུག་ལྷག་ལ་རྨས་སྐྱོན་བཟོས་ཡོད་ཅིང་། ཁ་སང་ཡོ་ཁུ་རེན་གྱི་སྲིད་འཛིན་རྫི་ལན་སི་ཀེ་ལགས་ཀྱིས། དྲ་ལམ་བརྒྱུད་སྟོབས་ཆེན་རྒྱལ་ཁབ་བདུན་གྱི་ཚོགས་ཆེན་སྟེང་གཏམ་བཤད་སྤེལ་བར་བརྟེན། ཁ་སང་སླར་ཡང་ཨུ་རུ་སུས་ཡོ་ཁུ་རེན་གྱི་རྒྱལ་ས་ཀེ་ཝིའི་འདུ་འཛོམས་ཁྲོམ་ཆེན་ཞིག་གི་ནང་མཁའ་ལམ་འཇབ་རྒོལ་བྱས་ཏེ། མི་གྲངས་ ༡༥ ལྷག་གྲོངས་པ་དང་མི་ ༥༨ ལྷག་ལ་རྨས་སྐྱོན་བཟོས་ཡོད་པ་དང་། སྲིད་འཛིན་རྫི་ལན་སི་ཀེ་ལགས་ཀྱིས། འཇབ་རྒོལ་དེ་ནི་ཡུ་རོབ་ཀྱི་ལོ་རྒྱུས་ནང་ཆེས་འཇིགས་སུ་རུང་བའི་དྲག་སྤྱོད་ཅིག་ཆགས་ཀྱི་ཡོད་པའི་སྐྱོན་བརྗོད་བྱས་ཡོད་པ་རེད།

སྟོབས་ཆེན་རྒྱལ་ཁབ་བདུན་གྱི་ཚོགས་འདུའི་སྟེང་ཡོ་ཁུ་རེན་གྱི་སྲིད་འཛིན་རྫི་ལན་སི་ཀེ་ལགས་ཀྱིས་དྲ་ལམ་བརྒྱུད། སྟོབས་ཆེན་རྒྱལ་ཁབ་བདུན་གྱི་ངོས་ནས་ད་བར་ཡོ་ཁུ་རེན་ལ་རྒྱབ་སྐྱོར་གནང་བར་ཐུགས་རྗེ་ཆེ་ཞུས་པ་དང་སྦྲགས། ཡོ་ཁུ་རེན་ལ་གང་མགྱོགས་ཡུ་རོབ་མཉམ་འབྲེལ་མཐུན་ཚོགས་ཀྱི་ཚོགས་མིའི་ཆོག་མཆན་སྤྲོད་རྒྱུ་གལ་ཆེན་ཡིན་པ་དང་། འཛམ་གླིང་གིས་ཨུ་རུ་སུར་སྔར་ལྷག་གི་དཔལ་འབྱོར་ཉེས་ཆད་གཅོད་དགོས་པ། དམིགས་བསལ་ཨུ་རུ་སུའི་སྣོམ་ཕྱིར་ཚོང་ལ་ཚོད་འཛིན་དང་། ཨུ་རུ་སུ་ནི་འཇིགས་སྐུལ་དྲག་སྤྱོད་པའི་སྦྱིན་བདག་ཅིག་ཡིན་པར་ངོས་འཛིན་དགོས་པ། དེ་བཞིན། འཛམ་གླིང་རྒྱལ་ཁབ་གཞན་གྱི་ནང་དུ་ཡོད་པའི་ཨུ་རུ་སུའི་མ་དངུལ་བཀག་སྡོམ་སོགས་བྱེད་དགོས་པའི་རེ་སྐུལ་ཞུས་ཡོད་པ་མ་ཟད། ད་ལྟ་ཨུ་རུ་སུས་ཡོ་ཁུ་རེན་གྱི་ཤར་ཕྱོགས་ས་ཁུལ་ཕལ་ཆེ་བར་བདག་བཟུང་བྱས་པ་ནི། ཡོ་ཁུ་རེན་ལ་མཚོན་ཆ་འདང་ངེས་མེད་པས་ཡིན་སྟབས། སྟོབས་ཆེན་རྒྱལ་ཁབ་དག་གིས་མུ་མཐུད་ཡོ་ཁུ་རེན་ལ་གོ་མཚོན་མཁོ་སྤྲོད་བྱ་དགོས་པ་དང་། ཡོ་ཁུ་རེན་གྱི་དམག་འཁྲུག་དེ་འདི་ལོའི་ལོ་མཇུག་བར་ཞི་འགྲིག་ཡོང་ཐབས་གནང་དགོས་པའི་འབོད་སྐུལ་སོགས་ཞུས་ཡོད་འདུག

ད་རེས་སྟོབས་ཆེན་རྒྱལ་ཁབ་བདུན་གྱི་ལོ་འཁོར་ཚོགས་འདུའི་སྟེང་། གོ་ལའི་གནམ་གཤིས་ཚ་དྲོད་ཀྱི་གཙོས་ཡར་རྒྱས་འགྲོ་བཞིན་པའི་འཛམ་གླིང་རྒྱལ་ཁབ་དག་ལ་འཛུགས་སྐྲུན་དང་འབྲེལ་མ་དངུལ་བསྐྲུན་ཐབས་སོགས་ཀྱི་བརྗོད་གཞི་མང་དག་ཅིག་ཡོད་ཀྱང་། ཡོ་ཁུ་རེན་གྱི་དམག་འཁྲུག་གིས་ཚོགས་འདུའི་མགོ་མཇུག་ཡོངས་ལ་ཤུགས་རྐྱེན་ཐེབས་ཡོད་པ་རེད་ལ། གཞན་ཡང་ཚོགས་འདུའི་ཐོག་ལྷོ་ཨ་ཧྥི་རི་ཁ་དང་རྒྱ་གར། ཨི་ཌོ་ནེ་ཞི་ཡ། ཨ་ཧྥི་རི་ཁའི་རྒྱལ་ཁབ་སན་གྷལ་ (Senegal) སོགས་མགྲོན་འབོད་བྱས་ཏེ། ཡོ་ཁུ་རེན་གྱི་དམག་འཁྲུག་གི་གནས་སྟངས་འོག ཁྱོན་ཡོངས་ནས་རྒྱལ་སྤྱིའི་ཚོང་ཟོག་གི་རིན་གོང་འཕར་བཞིན་པའི་དཀའ་ངལ་སེལ་ཐབས་སོགས་ཀྱི་སྐོར་ནས་གྲོས་བསྡུར་བྱས་ཡོད་པ་རེད།

ཕྱི་ལོ་ ༡༩༧༥ ལོར་གསར་འཛུགས་བྱས་པའི་སྟོབས་ཆེན་རྒྱལ་ཁབ་འདུན་གྱི་ཚོགས་མི་དག་ནི། ཨ་རི་དང་ཁེ་ན་ཌ། ཧྥ་རན་སི། ཉི་ཧོང་། དབྱིན་ཡུལ། ཨི་ཊི་ལི་བཅས་ཡིན་ཞིང་། འདི་ལོའི་ཚོགས་འདུ་གོ་སྒྲིག་བྱེད་མཁན་འཇར་མན་ཡིན་པ་དང་ཚོགས་ཐོག་ཏུ་རྒྱལ་སྤྱིའི་ཚོགས་པ་ཆེ་གྲས་ཀྱི་གཙོས་པའི་མཉམ་འབྲེལ་རྒྱལ་ཚོགས་ཀྱི་འཕྲོད་བསྟེན་དང་ཚོང་འབྲེལ་སྒྲིག་འཛུགས། རྒྱལ་སྤྱིའི་དངུལ་གྱི་ཐེབས་རྩ་དང་དངུལ་ཁང་སོགས་མཉམ་ཞུགས་བྱས་ཡོད་ཅིང་། ཕྱི་ལོ་ ༢༠༢༢ ལོའི་སྙན་ཐོ་ལྟར་ན། སྟོབས་ཆེན་རྒྱལ་ཁབ་བདུན་ལ་འཛམ་གླིང་གི་མི་འབོར་གྱི་བརྒྱ་ཆ་ ༡༠ དང་ཐོན་སྐྱེད་ཀྱི་སྤྱི་འབོར་བརྒྱ་ཆ་ ༣༡ ཟིན་ཡོད་འདུག་ལ། ལོ་རྗེས་མའི་སྟོབས་ཆེན་རྒྱལ་ཁབ་བདུན་གྱི་ལོ་འཁོར་ཚོགས་འདུ་དེ་ཉི་ཧོང་གིས་གོ་སྒྲིག་བྱ་རྒྱུ་ཡིན་པ་རེད།

གསར་འགོད་པ། སྐལ་བཟང་སྦྱིན་པ།