རྒྱ་ནག་གིས་ཞི་བདེ་རྒྱ་མཚོའི་ཁུལ་དུ་དཔུང་སྟོབས་ངོམས་པར་ཉི་ཧོང་གིས་ངོ་རྒོལ་བྱས།

རྒྱ་ནག་བཅིངས་གྲོལ་དམག་མི་ཟེར་བ་དེས་མི་ཡ་ཀོ་མཚོ་འགག་ཏུ་མཁའ་དམག་གནམ་གྲུ་མངགས་གཏོང་བྱས་ཏེ་དཔུང་སྟོབས་ངོམས་པར་ཉི་ཧོང་གིས་ངོ་རྒོལ་གྱི་བརྡ་ལན་སྤྲད།

དེ་རིང་ལྷོ་བརྒྱུད་རྒྱ་ནག་ཞོགས་པའི་ཆ་འཕྲིན་གྱིས་གནས་ཚུལ་སྤེལ་བར་གཞིགས་ན། བདུན་ཕྲག་སྔོན་མར་རྒྱ་ནག་གི་མི་མང་བཅིངས་གྲོལ་དམག་ཟེར་བས། ཉི་ཧོང་གི་ལྷོ་ཕྱོགས་མི་ཡ་ཀོ་གླིང་ཕྲན་དང་ཨོ་ཀི་ན་ཝ་གླིང་ཕྲན་དབར་ལ་ཆགས་པའི་མི་ཡ་ཀོ་མཚོ་འགག་ (Miyako Strait) ཟེར་བའི་མཁའ་དབྱིངས་སུ་ H-6 རྟགས་ཅན་གྱི་འབར་མདེལ་གཡུག་མཁན་གྱི་གནམ་གྲུ་ ༣ མངགས་ཏེ་དཔུང་སྟོབས་ངོམས་ཡོད་འདུག

ཁ་སང་ཕྱི་ཚེས་ ༢༧ ཉིན་འཇར་མ་ནིར་འཚོགས་པའི་འཛམ་གླིང་འབྱོར་ལྡན་རྒྱལ་ཁབ་བདུན་ (G7) གྱི་ཚོགས་འདུའི་ཐོག ཉི་ཧོང་གི་སྲིད་བློན་ཧྥུ་མིའོ་ཀི་ཤི་ཌ་(Fumio Kishida) རྒྱ་ནག་ཅེས་དངོས་སུ་མིང་འབོད་བྱས་མེད་ནའང་། རྒྱ་གར་ཞི་བདེ་རྒྱ་མཚོ་ཁུལ་དུ་དམག་ཤུགས་སྤྱད་ནས་ད་ལྟའི་གནས་སྟངས་ལ་འགྱུར་བ་གཏོང་ཐབས་བྱེད་བཞིན་ཡོད་པ་དང་། རྒྱལ་ཁབ་རྣམས་ཀྱིས་ད་ལྟའི་ཡུ་ཀེ་རེན་དང་ཨུ་རུ་སུའི་དམག་འཁྲུག་ནས་བསླབ་བྱ་ནོར་བ་བླང་མི་ཉན་པར། དེ་བས་ཁྲིམས་སྒྲིག་གཙོར་བཟུང་གི་རྒྱལ་སྤྱིའི་ལམ་ལུགས་ལ་གཞོལ་དགོས་སྐོར་བཤད་དེ། དོན་དུ་རྒྱ་ནག་གིས་ཞི་བདེ་རྒྱ་མཚོ་ཁུལ་དུ་དམག་གི་སྟོབས་ཤུགས་རྒྱ་སྐྱེད་བྱེད་བཞིན་ངོ་རྒོལ་བྱས་ཡོད་འདུག གཞན་ཡང་སྲིད་བློན་ཀི་ཤི་ཌས་ད་ལྟ་ཉི་ཧོང་གིས་རང་གི་རྒྱལ་སྲུང་གི་ཆེད་དུ་རྒྱལ་ཁབ་ཀྱི་ལོ་རེའི་སྤྱི་ཡོངས་ཡོང་འབབ་ནས་བརྒྱ་ཆ་གཅིག་གམ། ཡང་ན་ཨ་སྒོར་ཐེར་འབུམ་ ༣༧ ཡས་མས་གཏོང་གི་མེད་པ་དེར་སྤར་ཆ་བྱ་རྒྱུ་ཡིན་སྐོར་བཤད་འདུག

ཉི་ཧོང་གི་རྒྱལ་སྲུང་ལྷན་ཁང་གིས་བསྒྲགས་པ་ལྟར་ན། ཟླ་འདིའི་ཕྱི་ཚེས་ ༢༣ ཉིན་རྒྱ་ནག་གིས་འབོམ་གཡུག་གནམ་གྲུ་གསུམ་ཤར་རྒྱ་ནག་རྒྱ་མཚོ་ (East China Sea) ནས་མི་ཡ་ཀོ་མཚོ་འགག་བརྒྱུད་ཞི་བདེ་རྒྱ་མཚོའི་ཁུལ་དུ་མངགས་རྗེས། ཡང་བསྐྱར་མཁའ་ལམ་དེ་རང་བརྒྱུད་ནས་ཕྱིར་ལོག་བྱས་ཡོད་འདུག་ལ། ད་ལན་གྱི་གནམ་གྲུ་ཁྲོད་ནས་ H-6J རྟགས་ཅན་གྱི་འབོམ་གཡུག་གནམ་གྲུ་གཉིས་ནི་རྒྱ་ནག་མི་མང་བཅིངས་གྲོལ་དམག་གི་མཚོ་དམག་གི་ཡིན་ཞིང་། དེ་གཉིས་ཀྱིས་ YJ-12 རྟགས་ཅན་གྱི་དམག་གཟིངས་གཏོར་རྒོལ་མེ་མདེལ་ ༨ འཁུར་ཡོད་འདུག H-6K རྟགས་ཅན་གྱི་གནམ་གྲུ་གཞན་དེ་ནི་རྒྱ་ནག་གི་མཁའ་དམག་གི་ཡིན་ཞིང་། དེར་དགྲ་བོའི་རེ་ཌཱར་(Radar)ནུས་མེད་བཟོ་རྒྱུའི་འཕྲུས་ཆས་སྦྱར་ཡོད་པ་རེད་འདུག

ད་ཐེངས་གནམ་གྲུ་གཉིས་ཀྱིས་འཁུར་བའི་ YJ-12 རྟགས་ཅན་གྱི་མེ་མདེལ་གྱི་མྱུར་ཚད་དང་སྙོབ་ཤུགས་ཀྱི་རྐྱེན་པས། དེ་ནི་ད་ཡོད་རྒྱ་ནག་ལ་ཡོད་པའི་དམག་གཟིངས་གཏོར་རྒོལ་བྱེད་པའི་འབར་མདེལ་ཁྲོད་ཀྱི་ཆེས་ཉེན་ཚབས་ཅན་དེ་ཡིན་ཞིང་། མེ་མདེལ་དེ་ས་མཚོ་གནམ་གསུམ་ནས་གཡུག་ཐུབ་ཀྱི་ཡོད་པ་རེད་འདུག ཡང་མེ་མདེལ་དེས་རྒྱང་ཐག་སྤྱི་ལེ་ ༤༠༠ སྙོབ་ཐུབ་ཀྱི་ཡོད་ཅིང་། མེ་མདེལ་གྱི་རྩེ་རྡོག་དེ་རང་གི་དམིགས་འབེན་ལ་སྐར་ཆ་ ༣༠ ནང་འབྱོར་ཐུབ་ཀྱི་ཡོད་པའི་རྐྱེན་གྱིས་སྔོན་ཚུད་ནས་བཀག་འགོག་བྱ་རྒྱུ་ཧ་ཅང་དཀའ་མོ་ཡིན་སྐོར་འགྲེལ་བརྗོད་བྱས་འདུག

ཉེ་བའི་ཆར་རྒྱ་ནག་གིས་རྐང་བཙུགས་ནས་ཉི་ཧོང་ལ་འགྲན་སློང་ངམ། ཡང་ན་དམག་སྟོབས་ངོམ་སྟོན་གྱི་ཚུལ་དུ་ཤར་རྒྱ་ནག་རྒྱ་མཚོ་དང་ཉི་ཧོང་གི་ཉེ་འགྲམ་ནས་དམག་དོན་གྲུ་གཟིངས་དང་གནམ་གྲུ་སོགས་མངག་གཏོང་བྱེད་བཞིན་ཡོད་འདུག དེ་ཡང་ཉེ་ཆར་ཟླ་འདིའི་ཕྱི་ཚེས་ ༢༣ ཉིན་ཉི་ཧོང་གི་རྒྱལ་སྲུང་བློན་ཆེན་ནོ་བུའོ་ཀི་ཤི་ (Nobuo Kishi) ཡིས། ཟླ་འདིའི་དཀྱིལ་ཙམ་ནས་རྒྱ་ནག་དང་ཨུ་རུ་སུ་གཉིས་ཀྱིས་ཉི་ཧོང་གི་བྱང་ཕྱོགས་ཧོ་ཀའེ་དོ་(Hokkaido) བརྒྱུད་ནས་ཞི་བདེ་རྒྱ་མཚོ་དང་། དེ་ནས་ཉི་ཧོང་གི་ལྷོ་ནུབ་ཏུ་ཆགས་པའི་ཊི་སུ་ཤི་མ་མཚོ་འགག་ (Tsushima Strait) བརྒྱུད་ནས་ཉི་ཧོང་རྒྱ་མཚོ་(Sea of Japan) ཁུལ་དུ་མཚོ་དམག་གི་གྲུ་གཟིངས་མངག་གཏོང་བྱས་པ་དེས་ཉི་ཧོང་ལ་དམག་གི་འཇིགས་སྐུལ་བྱེད་ཐབས་ཤིག་ཡིན་པ་མ་ཟད། ཕར་བལྟས་ཚོད་ཀྱིས་ཉི་ཧོང་གི་མཐའ་སྐོར་བཞིན་པའི་རྣམ་པ་ཐོན་བཞིན་ཡོད་པར་སྐྱོན་བརྗོད་དྲག་པོ་བྱས་ཡོད་འདུག དེ་བཞིན་ཟླ་འདིའི་ཕྱི་ཚེས་ ༢༦ ཉིན་གནས་ཚུལ་ཐོན་པ་ལྟར་ན། རྒྱ་ནག་གིས་འདི་ལོ་གཅིག་པུར་ཉི་ཧོང་དང་རྩོད་གཞིར་གྱུར་ཞིང་། ད་ལྟ་ཉི་ཧོང་གི་སྟངས་འཛིན་དོ་དམ་འོག་ཡོད་པའི་སེན་ཀ་ཀུ་གླིང་ཕྲན་ (Senkaku Islands) ཉེ་འགྲམ་དུ་བསྟུད་མར་གྲུ་གཟིངས་ཐེངས་ ༡༡ མངག་གཏོང་བྱས་ཡོད་པ་རེད་འདུག

གསར་འགོད་པ། པ་སངས་ཚེ་རིང་།